هاوپۆل: Uncategorized

سەرۆکی حکومەت پێشوازی لە کونسولی گشتیی نوێی تورکیا دەکات

ئەمڕۆ دووشەممە 6/10 ، مەسرور بارزانی سەرۆکی حکومەتی هەرێمی کوردستان، پێشوازی لە ئەرمان تۆپچو کونسولی گشتیی نوێی تورکیا لە هەرێمی کوردستان کرد.

سەرۆکی حکومەت وێڕای پیرۆزبایی دەستبەکاربوونی، جەختی لە گرنگیی پەرەپێدانی پەیوەندی دوولایەنە لەسەر بنەمای بەرژەوەندی هاوبەش کردەوە.

سەرۆکی حکومەت باسی لە گرنگیی ئەنجامدانی پڕۆژەی ڕێگەی گەشەپێدان کرد کە عێراق و تورکیا و ئەوروپا لە ڕێگەی هێڵی ئاسنینەوە بەیەکەوە دەبەستێتەوە. ئاماژەشی بە پێویستیی بەشداربوونی هەرێمی کوردستان و هەموو پێکهاتەکانی عێراق لەو پرۆژە ستراتیژییەدا کرد.

کونسولی گشتیی تورکیا، خۆشحاڵی خۆی بە دەستبەکاربوونی لە هەرێمی کوردستان نیشاندا و خواستی وڵاتەکەی بۆ پەرەپێدانی زیاتری پەیوەندییەکان لەگەڵ هەرێمی کوردستان لە هەموو بوارەکاندا دووپاتکردەوە.

چارەسەرکردنی کێشەکانی هەرێمی کوردستان و حکومەتی فیدراڵ و هەوڵەکانی دەستپێکردنەوەی هەناردەکردنی نەوتی هەرێمی کوردستان ، تەوەرێکی دیکەی گفتوگۆکان بوو.

سەرۆکی حکومەت پێشوازی لە سەرۆکی ئەنجومەنی بەڕێوەبردنی گرووپی کۆمپانیاکانی ئەلهیلال دەکات

ئەمڕۆ دووشەممە ، مەسرور بارزانی سەرۆکی حکومەتی هەرێمی کوردستان،پێشوازی لە حەمید جەعفەر دامەزرێنەر و سەرۆکی ئەنجومەنی بەڕێوەبردنی گرووپی کۆمپانیاکانی ئەلهیلال کرد.

لە دیدارەکەدا گفتوگۆ لەبارەی کار و پڕۆژەکانی گرووپەکە لە عێراق و هەرێمی کوردستان کرا و جەخت لە گرنگیی پاراستنی ئاسایشی ژێرخانیی ئابووری و وزە کرایەوە .

سەرۆک بارزانی پێشوازی لە باڵیۆزی فەڕەنسا لە عێراق دەکات

رۆژی یەکشەممە 9ی حوزەیرانی 2024، سەرۆک مەسعود بارزانی پێشوازی لە بەڕێز پاتریک دۆرێل باڵیۆزی فەڕەنسا لە عێراق کرد.

لە دیدارەکەدا باس لە بارودۆخی سیاسی و ئەمنیی عێراق و رۆژهەڵاتی ناوەڕاست بە گشتی و ئالنگاریی و ئاستەنگەکانی بەردەم سەقامگیری ناوچەکە کرا.

هەر لەو دیدارەدا ڕۆشنایی خرایە سەر پەیوەندیی دۆستانەی نێوان هەرێمی کوردستان و فەڕەنسا و بەردەوامی و بەرەوپێشەوە بردنی پەیوەندی دۆستانەی نێوان هەردوولا بە گرنگ زانرا.

هەروەها سەرۆک بارزانی سوپاسی فەڕەنسای کرد و ئاماژەی بەوەدا کە گەلی کوردستان هەرگیز ڕۆلی دۆستانە و ئیجابی گەل و حکوومەتی فەڕەنسا لەبیر ناکات کە لە قۆناغە سەختەکاندا هاوسۆز و پاڵپشتی گەلی کوردستان بوون، و هەروەها باسی لە هەڵوێستی سەرۆک فرانسوا میتران کرد لە پشتگیری و بەدەنگەوەهاتنی گەلی کورد لە ساڵی 1991 و هەوڵدانیان لە دەرکردنی بڕیاری 688ی ئەنجوومەنی ئاسایش و دروستکردنی ناوچەیەکی ئارام و پاراستنی گەلی کوردستان.

لە کۆتایی دیدارەکەدا باس لە هەڵبژاردنی پەرلەمانی کوردستان کرا کە بڕیارە ئەمساڵ ئەنجامبدرێت و جەخت لە پێویستیی بەڕێوەچوونی هەڵبژاردنێکی پاک و بێگەرد کرایەوە.

سیپان شێروانی:
ئەوە ناوی سیانی پێشمەرگە و ناوخۆش نێردرا ئینجا بزانین بۆ مووچەی مانگی 6 چ داواكارییەكیتر دەكەن و بەناوكوردەكانیش چۆن دەكەونە بەهانە هێنانەوە بۆیان.!

سیپان شێروانی ئەندامی ئەنجومەنی نوێنەرانی عێراق لە توڕی کۆمەڵایەتی فەیسبووک نووسیویەتی:
بیرتانە دەیان وت ئەگەر نەوت رادەستبكرێت كوردستان پڕی پارە دەكەن، ئەگەر لیستی مووچە نەنێرن تەبعەن بەغدا مووچە نانێرێت، ئەگەر مەحكەمەی اتحادی قەرار بدات هەموو 25 مانگێك مووچە دێت، ئەگەرداهاتی نانەوتی رادەست نەكرێت منیش بم مووچە نانێرم، ناوی سیانی پێشمەرگە پری گەندەلییە بۆیە نانێرن.

سیپان شێروانی دەڵێت:
حكومەتی هەرێم هەموو ئەمانەی جێبەجێ كردوو لەگەڵ هەر جێبەجێكردنێكدا بۆ مانگی دواتر داوایتریان هەبوو، سەیركەن بۆ مانگی 6 چۆن جارێكیتر گێچەڵێكیتر بە مووچەی هەرێم دەكەن، جارێكیتر ئەم گروپە چۆن دەكەونەوە بە بەهانە هێنانەوە بۆ بەغدا.

ئەو ئەندامەی ئەنجومەنی نوێنەرانی عێراق دەشڵێت:
مادام وایە ئیتر روونە كە ئەم گرووپە خۆی یەكلایی كردۆتەوە بۆ دژی مافەكانی هەرێم و بەشێكن لە پلانەكەی ناحەزانی هەرێم.

پرسیارێك بۆ گەل:-
ئەرێ كاتی ئەوە نەهاتووە چیتر بەو بەهانانەی كە گروپەكە بۆ بەغدا دێننەوە نەخەلەتێین ؟
ئەری كاتی ئەوە نەهاتووە ستۆپێك بە داوا نادەستورییەكانی ناحەزەكانمان بكەین بۆ ئەوەی سنوورێك بۆ بەزاندنی مافە دەستورییەكانی هەرێم دابنێین؟
ئەرێ كاتی ئەوە نەهاتووە چیتر قبوڵ نەكەین موچەی فەرمانبەران بە پاڵپشتی گروپی بەناوكوردەكانەوە بكرێتە بارمتەی ئامانجی سیاسی و لێدان لە مافە دەستورییەكانی هەرێم؟

بەڵێ ئەگەر میللەت، بەناوكوردە بەهانەهێنەرەكان بێدەنگ بكات ئیتر ناحەزان خۆیان بێدەنگ دەبن.

رێکخراوی چاودێریی میدیای کوردیی (چمک)؛

سەرگرتنی بڕیاری بەندکردنی مامۆستای زانکۆی سلێمانی دەبێتە پێشهاتێکی مەترسیدار لەبەردەم ئازادییەکانی دەربڕین

بەتاوانی دانانی پرسیاری تاقیكردنەوەی ئیتیكی میدیا د.شوان ئادەم ئەیڤەس لە سلێمانی بە سێ مانگ بەندکردن سزادرا

رێکخراوی چمک داوای هەڵوەشاندنەوەی بڕیاری سزادانی سەرۆکەکەی دەکات
رێکخراوی چاودێریی میدیای کوردیی (چمک)؛ سەرکۆنەی سزادانی سەرۆکی رێکخراوەکەی د.شوان ئادەم ئەیڤەس دەکات کە لەلایەن دادگەی کەتنی دووی سلێمانی بە سێ مانگ بەندکردن و پڕکردنەوەی بەڵێننامە پێی سزای دا.

لەوبارەوە تۆڕی_ئەکادیمیی_کوردیی لە بانگەوازێکییدا بۆ رایگشتیی بڵاویکردەوە کە رۆژی دووشەممە (03ی حوزەیرانی 2024) بە بڕیاری ژمارە 2534/ک/2021، دادگەی کەتنی دووی سلێمانی بە تاوانی دانانی «پرسیارەکانی تاقیکردنەوەی ئیتیکی میدیا» بۆ قۆناغی دووەمی بەشی راگەیاندنی کۆلیژی زانستە مرۆڤایەتییەکانی زانکۆی هەڵەبجە بۆ ساڵی خوێندنی 2020-2021، سزای سێ مانگ بەندکردنی بەسەر د.شوان ئادەم ئەیڤەس؛ پسپۆڕی رێسا پیشەییەکانی راگەیاندن-دا سەپاند.

هەروەک لە دەقی سزاکەدا هاتووە: بەپێی ماددە 433/آ لە یاسای سزادانی عێراق؛ ژمارە 111ی ساڵی 1969 سزای «حبسی سوک» بەسەر ئەو مامۆستایەی زانکۆدا سەپێنراوە، ئەوەیش بە لەبەرچاوگرتنی تەمەن و باری ژیان و نەبوونی پێشینەی تاوانکاریی و بارودۆخی تاوانەکەی؛ دادگا دەگەیەنێتە ئەو باوەڕەی کە جارێکی تر لە داهاتوودا تاوان ئەنجامنادات، لەبەر ئەوە دادگا بڕیاری دا بە وەستاندنی جێبەجێکردنی سزاکە دژی تۆمەتبارکراو بۆماوەی سێ ساڵ لە رۆژی دەرچوونی ئەم بڕیارە، «بەو مەرجەی بەڵێن بدات کە لەو ماوەیەدا رەفتار و هەڵسوکەوتی چاک بێت.»

ئێمە لە رێکخراوی چاودێریی میدیای کوردیی (چمک) وەک تاقانە رێکخراوی ناحکوومیی قازانجنەویست بۆ چاودێریی و هەڵسەنگاندنی خەوش و کەمتەرخەمییەکانی میدیاوان و میدیای کوردیی بە تووندی سەرکۆنەی بڕیاری سزادانی پڕۆفیسۆری یاریدەدەر دکتۆر شوان ئادەم ئەیڤەس؛ سەرۆکی رێکخراوی_چمک و سەرنووسەری گۆڤاری دەرگاوان و پسپۆڕی رێسا پیشەییەکانی راگەیاندن لە بەشی تەکنیکی میدیای زانکۆی پۆلیتەکنیکی سلێمانی دەکەین؛ داواکارین هەرچی زووە ئەم بڕیاری سزادانە لەلایەن دادگەی تێهەڵچوونەوە هەڵبوەشێنرێتەوە، چونکە سەرگرتنی ئەم بڕیارە دەبێتە پێشهاتێکی مەترسیدار لەبەردەم ئازادییەکانی دەربڕین، رۆژنامەگەریی، وانەوتنەوە و توێژینەوەی ئەکادیمیی و کاری پیشەیی ئەکادیمییانی کوردستان.

هەربۆیە ئێمە ئەم سزایە بە سزایەکی تاکەکەسیی نازانین و پێمانوایە سزایەکی گشتییە بۆسەر ماف و ئازادییەکانی سەرجەم مامۆستایان و توێژەرانی میدیایی لە هەرێمی کوردستانی عێراقدا. لێرەوە بە دەنگی بەرز روو لە ئازادییخوازانی ناوەوەو دەرەوەی کوردستان دەکەین:

#نا_بۆ_بەرتەسککردنەوەی_ماف_و_ئازادییە_ئەکادیمیی

رێکخراوی چاودێریی میدیای کوردیی
چ.م.ک
کوردستان

سیپان شێروانی ئەندامی ئەنجومەنی نوێنەرانی عێراق لە ئەکاونتی تایبەتی خۆی لە تۆڕی کۆمەڵایەتی فەیسبووک نووسیویەتی:

مووچەی فەرمانبەرانی هەرێم بە مەدەنی و سەربازی و خانەنشین و چاودێرییەوە لە بودجەی ٢٠٢٤ بە ٩٦٥ ملیار دینار دیاریكرا.
ئەم ڕەقەمە لە چەندین فیلتەری جیاوازی هەرێم و بەغدا وەك هەردوو وەزارەتی دارایی ، هەردوو وەزارەتی پلاندانان، هەردوو دیوانی چاودێری دارایی، هەردوو ئەنجومەنی وەزیران تێپەریوە و سەرجەمیشیان پەسەندیانكردووە بەدوای هەموو ئەم فیلتەرانە ئەنجومەنی نوێنەرانی عێراقیش پەسەندیكرد و بوو بە یاسا.

سیپان شێروانی ئاماژەی بەوەش کردووە:
بۆیە ئەركی وەزارەتی دارایی تەنیا جێبەجێكردنی یاساكەیە وەك خۆی جگەلەمە هەر ڕێكارێکی تر لەژێرناوی تەدقیقكردن بێت یان هەر ناوێکی تر نایاساییە و گێچەلپێكردنە، هەر كەسێكیش ماف بداتە ئەم كارەی وەزارەتی دارایی بۆ ڕاگرتنی مووچەی پێشمەرگە و هێزە ئەمنییەكان بەهەر بیانوویەك بێت، بەشدارە لەو سیاسەتە قێزەوەنەی دژی پێشمەرگە و هێزە ئەمنییەكان دەگیرێتە بەر بۆ برسی كردن و شێواندنی ژیانیان و لە هەمانكاتیشدا ڕێگەخۆشكردنە بۆ زیاتر ئازاردانیان.

ئەنجومەنی وەزیران هەوڵ و هەنگاوەکانی دەستپێکردنەوەی هەناردەکردنی نەوت و وەرگرتنی گەنمی جووتیارانی هەرێمی کوردستان تاوتوێ دەکات

ئەمڕۆ چوارشەممە 5ی حوزەیرانی 2024، بە سەرپەرشتی سەرۆک وەزیران مەسرور بارزانی و ئامادەبوونی قوباد تاڵەبانی جێگری سەرۆک وەزیران، ئەنجومەنی وەزیرانی هەرێمی کوردستان کۆبووەوە.
لە دەستپێکی کۆبووەنەوەکەدا، سەرۆک وەزیران ئاماژەی بە ڕۆژی جیهانیی ژینگە کرد کە ئەمڕۆیە و ئاماژەی بەوە دا کە پێویستە هەموو ڕۆژێک ڕۆژی پاراستنی ژینگە بێت و دەبێ هەموو هەوڵێک لە پێناو پەرەپێدانی کولتووری ژینگەپارێزی بخەینەگەڕ .
سەرۆک وەزیران جەختی لە پابەندبوونی حکومەتی هەرێم بە بابەتی ژینگەپارێزی کردەوە و گوتی پێویستە ژینگەپارێزی ئەرک و خەمی هەموومان بێت و دەبێت ژینگە و سروشتی جوانی کوردستان بە پاکی ڕابگرین و وا بکەین نەوەکانی دوای ئێمەش بە باشی سوودی لێ وەربگرن ، چونکە ئەم سروشتە بە تەنیا موڵکی ئێمە نییە و موڵکی نەوەکانی داهاتووشە، بۆیە پاراستنی و گەشەپێدانی ئەرکی هەموو لایەکمانە.
لە بڕگەی یەکەمی کۆبوونەوەدا، ڕاپۆرتی ساڵی دووەمی جێبەجێکردنی پلانی حکومەتی هەرێمی کوردستان بۆ مافەکانی مرۆڤ ( 2025-2021 ) لەلایەن دیندار زێباری ڕێکخەری ڕاسپاردە نێودەوڵەتییەکان خرایەڕوو، دوای ئەوەی ئەم پلانە لە مانگی ئەیلولی ساڵی 2021 لەلایەن ئەنجومەنی وەزیرانەوە پەسەندکرا و کەوتە بواری جێبەجێکردنەوە.
لە ڕاپۆرتەکەدا بە داتا و زانیاریی وردەوە ، ئاماژە بە ڕێکارەکانی وەزارەت و لایەنە پەیوەندیدارەکانی حکومەتی هەرێمی کوردستان کرابوو بۆ پاراستنی مافەکانی مرۆڤ و ئازادی ڕادەربڕین و ئازادی ڕاگەیاندن و نەهێشتنی توندوتیژی دژی ئافرەتان و پاراستنی مافی پێکهاتە جیاوازەکان، هەڵسەنگاندنێکی گشتگیریش بۆ پرۆسەی جێبەجێکردنی پلانەکە لەسەر ئاستی هەر سێ دەسەڵاتەکانی جێبەجێکردن ویاسادانان ودادوەری کرا.
هەروەها زانیاری پێویست لەبارەی کار و هەنگاوەکانی حکومەتی هەرێم تایبەت بە باشترکردنی دۆخی چاکسازیی و بەندیخانەکان و بەرەنگاربوونەوەی ماددە هۆشبەرەکان و کارتێکەرە عەقڵییەکان و بازرگانیکردن بە مرۆڤ خرایەڕوو.
سەرۆکی ئەنجومەنی وەزیران وێڕای دەستخۆشی لە نووسینگەی ڕاسپاردە نێودەوڵەتییەکان بۆ ئەم ڕاپۆرتە، ئاماژەی دا بە کارنامەی کابینەی حکومەتی هەرێم لە بواری پاراستنی مافەکانی مرۆڤ کە لە کارە لەپێشیەکانی کابینەیە نۆیەمە و حکومەتی هەرێم بە ئەرکی خۆی دەزانێت کە لە ڕێگەی وەزارەت و لایەنە پەیوەندیدارەکانەوە گرنگیی و بایەخی تەواو بەم بابەتە بدرێت.
لەمبارەیەوە ئەنجومەنی وەزیران، وەزارەتەکانی ڕاسپارد بەردەوام بن لە هەنگاوەکانیان بۆ جێبەجێکردنی پلانی پەسەندکراو وەک بەشێک لە کارنامە و پلانی کابینەی نۆیەم.
لە بڕگەی دووەمدا، بێگەرد تاڵەبانی وەزیری کشتوکاڵ و سەرچاوەکانی ئاو ، ڕاپۆرتێکی لەبارەی دوا هەڵوێستی حکومەتی فیدراڵ تایبەت بە وەرگرتنی گەنمی جووتیارانی هەرێمی کوردستان و ڕاسپاردە و پێشنیارەکانی وەزارەت لەمبارەیەوە خستەڕوو.
ئەنجومەنی وەزیران وێرای دەستخۆشی لە هەنگاوەکانی وەزارەتی کشتوکاڵ وسەرچاوەکانی ئاو بۆ داکۆکیکردن لە ماف و شایستەی جووتیارانی هەرێمی کوردستان و هەوڵەکانی ئەم دواییەی سەرۆک وەزیران و گفتوگۆی لەگەڵ سەرۆک وەزیرانی فیدراڵ و هەروەها کۆبوونەوەکانی وەزارەتی کشتوکاڵ و سەرچاوەکانی ئاوی لە بەغدا لەگەڵ وەزارەتی کشتوکاڵی فیدڕاڵ و ئەنجومەنی ئابووری فیدڕاڵ بەرز نرخاند. ئەنجومەنی وەزیران وەزارەتی کشتوکاڵ و سەرچاوەکانی ئاو و وەزارەتی بازرگانیی وپیشەسازی ڕاسپارد کاری پێویست بکەن لەسەر ئەو پێشنیارانەی لە کۆبوونەوەکەدا خرانەڕوو بە ئاراستەی سوود وەرگرتن لە گەنمی جووتیارانی هەرێم لە چوارچێوەی پلانێکی کشتوکاڵی گونجاو و هەروەها ڕێکاریی پێویست لەمبارەیەوە بگرنەبەر بە پێی ئەو پێشنیارانەی لە ڕاپۆرتی وەزیری کشتوکاڵ وسەرچاوەکانی ئاو هاتبوون.
پاشان گفتوگۆ لەبارەی دوا پێشهاتەکانی دۆسیەی دەستپێکردنەوەی هەناردەکردنی نەوتی هەرێمی کوردستانەوە کرا.
سەرۆک وەزیران و شاندی دانوستانکار باسیان لە کۆبوونەوە و هەوڵ و ڕێکارەکانی دەستپێکردنەوەی هەناردەکردنی نەوتی هەرێمی کوردستانەوە کرد کە لەم ڕووەوە، کۆبوونەوەکان لەگەڵ حکومەتی فیدراڵ بەردەوامن بۆ هەرچی زووتر دەستپێکردنەوەی هەناردەکردنەوەی نەوتی هەرێم، هەر بۆ ئەم مەبەستەش، وا بڕیارە لە سەرەتای حەفتەی داهاتووش، شاندی حکومەتی هەرێم و کۆمپانیا نەوتیەکان لەسەر بانگهێشتی وەزارەتی نەوتی عێراق ، بەیەکەوە سەردانی بەغدا بکەن بۆ گفتوگۆکردن و دانانی میکانیزمی چارەسەر بۆ لابردنی هەموو ئاستەنگ و بەربەستەکانی بەردەم دەستپێکردنەوەی هەناردەكردنی نەوتی هەرێم، کە بەداخەوە بەهۆی ڕاگرتنیەوە لە مانگی ئاداری ساڵی پارەوە، چەندین ملیار دۆلار زیان بە گەنجینەی گشتی عێراق و هەرێمیش گەیشتووە.

لە کۆبوونەوەدا ڕێنوێنی ئەنجومەنی وەزیران بۆ شاندی دانووستانکار دووپاتکردنەوەی هەڵوێستی جدیی حکومەتی هەرێمی کوردستان بوو بۆ هەرچی زووتر گەیشتن بە ڕێکەوتننامەیەکی گشتگیر و هاوسەنگ لە چوارچێوەی دەستوور بۆ دەستپێکردنەوەی هەناردەکردنی نەوتی هەرێم لە ڕێگەی کۆمپانیای سۆمۆ و خستنەگەڕی داهاتەکەی بۆ خزمەتی گەنجینەی گشتی ، ئەمەش پێویستە لەسەر بنەما دەستوورییەکان و لەبەرچاوگرتنی تایبەتمەندیی دەسەڵاتەکانی هەرێم بێت، لەم چوارچێوەیەدا حکومەتی هەرێم ئامادەی گفتوگۆ و دانوستان و گەیشتنە بە ڕێککەوتن.

سەرۆکی حکومەتی هەرێمی کوردستان پێشوازی لە باڵیۆزی بەریتانیا لە عێراق دەکات

ئەمڕۆ چوارشەممە 6/5، مەسرور بارزانی، سەرۆکی حکومەتی هەرێمی کوردستان، پێشوازی لە ستیڤن هیچن، باڵیۆزی بەریتانیا لە عێراق کرد.

لە کۆبوونەوەکەدا کە جەیمس گۆڵدمان، کونسولی گشتیی بەریتانیا لە هەرێم ئامادەی بوو، بیروڕا لەبارەی هەوڵەکانی چارەسەرکردنی کێشەکانی نێوان هەرێمی کوردستان و حکومەتی فیدراڵ ئاڵوگۆڕ کرا و سەردانی حەفتەی ڕابردووی سەرۆکی حکومەت بۆ بەغدا و کۆبوونەوەکانی لەگەڵ بەرپرسانی باڵای حکومەتی فیدراڵ و لایەنە سیاسییەکان، بە هەنگاوێکی گرنگ دانرا بۆ چارەسەرکردنی کێشەکان، بەتایبەتی ماف و شایستە داراییەکانی هەرێم، بە شێوەیەکی بنەڕەتی و لەسەر بنەمای دەستوور و ڕێککەوتنەکان و کارنامەی حکومەتی فیدراڵ.

هەروەها گفتوگۆ لەبارەی پرۆژەی ڕێگەی گەشەپێدان و بەستنەوەی وڵاتانی کەنداو لە ڕێگەی هێڵی ئاسنینی عێراقەوە بە تورکیا و وڵاتانی ئەوروپا کرا و جەخت لە پێویستيی بەشداربوون و تێپەڕینی بە هەرێمی کوردستان و سوودمەندبوونی هەموو پێکهاتە و ناوچەکانی عێراق لەم پرۆژە ستراتیژییەدا کرا.

تەوەرێکی دیکەی گفتوگۆکان، پێويستی ئەنجامدانی هەڵبژاردنی پەرلەمانی کوردستان بوو، لە کاتێکی گونجاوی ئەمساڵدا.

هەردوولا هاوڕا بوون لەسەر گرنگیی چارەسەرکردنی هەموو کێشە و گرفت و ئاستەنگەکانی بەردەم هەڵبژاردن و بەشداربوونی هەموو لایەنەکان و پاراستنی مافی پێکهاتەکان.

دژەتیرۆری کوردستان ئاماری کردەوە تیرۆر*یستییەکانی داعشی لە چەند پارێزگایەکی عێراق بڵاوکردەوە

دژەتیرۆری کوردستان: لە مانگی ئایاری ساڵى 2024، ڕێكخراوى تيرۆر*يستیی “دا*عش” له‌ چه‌ند پارێزگايه‌كى عێراق، 8 كرده‌وه‌ى تيرۆر*يستیی ئه‌نجام داوه وه‌ک له ‌خواره‌وە خراوەتە ڕوو:

یەکەم: پارێزگاى کەرکووک، 1 كرده‌وه‌ى تيرۆر*يستی:
1 هێر*شی چە*کداری
قوربانييه‌كان، 3 کەس
3 بریندار

دووەم: پارێزگای سەلاحەدین، 2 كرده‌وه‌ى تيرۆر*يستی:
2 هێر*شی چە*کداری
1 بۆ*مبی چێندراو
قوربانييه‌كان: 15 کەس
7 کوژ*راو
8 بر*یندار

سێیەم: پارێزگای ئەنبار، 2 كرده‌وه‌ى تيرۆر*يستی:
1 بۆ*مبی چێندراو
1 هێر*شی چە*کداری
قوربانييه‌كان: 6 کەس
1 کوژ*راو
5 بر*یندار

چوارەم: پارێزگای دیالە، 2 كرده‌وه‌ى تيرۆر*يستی:
1 بۆ*مبی چێندراو
1 دەستڕ*ێژی گو*للـە
قوربانييه‌كان: 3 کەس
1 کوژ*راو
2 بر*یندار

پێنجەم: پارێزگای نەینەوا، 1 كرده‌وه‌ى تيرۆر*يستی:
1 ڕ*فاندن
قوربانییەکان: 1 کەس
1 ڕ*فێندراو

‏

90 كیلۆ حەبی هۆشبەر دەستی بەسەردا گیرا

بەرێوەبەرایەتی نەهێشتنی مادە هۆشبەرەكان رای دەگەیەنێت، سێ تۆمەتبار گیران و بڕی 90كیلۆ حەبی هۆشبەریش لەجۆری ترامادۆل دەستی بەسەردا گیرا .

ئەمڕۆ دووشەمە سێی حوزەیران، لە راگەیەنراوێكی بەرێوەبەرایەتی نەهێشتنی مادە هۆشبەركان هاتووە، سێ تۆمەتبار گیران و بڕی 90 كیلۆ حەبی هۆشبەریش لەجۆری ترامادۆل دەستی بەسەرداگیرا .

باس لەوەش كراوە، گرتنی ئەو كەسانە لە بەردەوامی هەوڵەكان بۆ بەرەنگاربوونەوە و نەهێشتنی مادە هۆشبەرەكان، دوای بەدواداچوون و كۆكردنەوەی زانیاری و پاشان وەرگرتنی فەرمانی دادوەری لێكۆڵینەوەی ئاساییش، تیمێكی بەدواداچوونی بەڕێوەبەرایەتیەكە دوای ئاڵوگۆڕی زانیاری لەگەڵ بەڕێوەبەرایەتی مادە هۆشبەرەكانی مووسڵ، لەچالاكیەكدا توانییان سێ تۆمەتبار بگرن.

ئاماژە بەوەیش كراوە ئەو كەسانە كە كاری گواستنەوەو بازرگانییان بە حەبی هۆشبەرەوە دەكرد، هاوكات هەر لەم چاڵاكیەدا بڕی 90 كیلۆ گرام حەبی ترامادۆڵ لەشارۆچەی زاخۆ دەستی بەسەردا گیرا.

لە ئێستەدا هەر سێ تۆمەتبار بەپێی یاسای بەرەنگاربوونەوەی مادەهۆشبەرەكان و كارتێكەرە ئەقڵیەكان ڕاگیراون و لە ژێر لێكۆلینەوەدان .