بەختیار تاڵەبانی: ئەو کوتلەچیانەی بەناوی خەڵکی سلێمانی دەڵێن “دەبێت قبوڵناکەین”، قامچی لەسەر پشتیان بێ قبوڵی دەکەن

دوای ئەوەی لە رۆژانی رابردوودا ژمارەیەک کادر و خەڵکی نێو دەزگا ئەمنییەکانی یەکێتی و لایەنەکانی دیکەی سلێمانی هاتنە سەر شەقام، دروشمی ‘دەبێت قبوڵ ناکەین’ بەرزکردەوە، دژی گەڕانەوەی مامۆستایان بۆ هۆڵەکانی خوێندن هوتافیان لێ دەدا.

لەمبارەیەوە بەختیار تاڵەبانی، بە (بازمیدیا)ی راگەیاند: ئەم بابەتە زۆر هەڵدەگرێت، نازانی لە کوێوە دەست پێ بکەی، خۆ ئاشکرایە ئەم گردبوونەوانە سیاسین، ئەم هەڵایە پەیوەندی بەو پرۆژەی جەماعەتی یەکێتی و ئەو چەند کاندیدە دۆڕاوەی سنوورەکە هەبوو کە خۆیان هەڵبژاردبوو دەرنەچوون و فەشەلیان هێنا، ئەمانە وتیان ٦٠ هەزار ناومان بردووە بۆ بەغدا بۆ ئەوەی راستەوخۆ مووچەمان بۆ رەوانە بکرێت، پێشتریش دوو بۆ سێ پرۆژەی لەم جۆرەیان هەبوو فەشەلیان تێدا هێنا، هەموو ئەم کارانەیان بۆ دژایەتی کردنی حکومەتی هەرێمی کوردستانە، بەڵام هەر زوو حکومەتی هەرێم بەڕەکەی لەژێر پێ دەرهێنان و فەشەلیان هێنا.

هەروەها پێیوایە ئەو کەسانەی کە دروشمی ‘دەبێت قبوڵ ناکەین’ یان هەڵگرتووە، کۆمەڵێک رێکخراوی کوتلەچین کە نوێنەرایەتی خەڵکی راستەقینەی سلێمانی ناکەن، ئەوانە نەک دەبێت، بەڵکو قامچی لەسەر پشتیان بێت قبوڵی دەکەن، هەر جارە و حزبێک ئاراستەیان دەکات و بۆ مەرامی خۆیان بەکاریان دەهێنن و بە دار و بەردیان دا دەکێشن.

ئاماژەی بەوەدا: لایەنەکانی سلێمانی ئەم جۆرە گردبوونەوانە دەقۆزنەوە بۆ ئەوەی کاندیدەکانی خۆیان بە خەڵک بناسێنن، تا لەو رێگەیەوە دەنگیان بۆ مسۆگەر بکەن، بۆیە ئەم گردبوونەوەوانە هیچ پەیوەندی بە زرنگی و وشیاری خەڵکی سلێمانییەوە نییە، بەڵکو خەڵکەکە بارمتەی دەستی یەکێتی و حزبەکانی سلێمانین و هەر جارە و بە فەتارەتێکیان دەدەن، وایان لەو خەڵکە کردووە کە زمانی گوڵ و دیبلۆماسی قبوڵ ناکەن، جۆرێک لە ماسۆشیەتیان هەیە.

بەختیار تاڵەبانی بۆ (بازمیدیا) رایگەیاند: بێ خزمەتی و پەراوێزخستن، تاڵانی گومرگەکان، بڕینی بانکەکان و نەبوونی شەقامێکی رێک و پێک لە گیانیاندا خۆشە.

ئەندامێکی جڤاتی گشتی گۆڕان: پێویستە خەڵکی سلێمانی بێدەنگی بشکێنن و چیتر رێگە نەدەن بەکاریان بهێنن

سەبارەت بەوەی بۆ دەبێت سلێمانی دزی و تاڵانی قبوڵ بکات، لە یەک شەودا ١١ ملیۆن دۆلار تاڵان بکرێت، دڵشاد رەشید، ئەندامی جڤاتی گشتی گۆڕان بە (بازمیدیا)ی راگەیاند: کێ قبوڵی نەکات؟، لەسەر ئاستی جەماوەر ئەوەیان پێناخۆشە، چونکە دزییە لە گیرفانی خەڵک کراوە، غەدر لە خەڵکی سلێمانی دەکرێت، شارەکە بەتەواوی پەراوێزخراوە، لە رووی ئابووریشەوە مردووە و کارکردن تێیدا وەستاوە.

خەڵکی سلێمانی کەی بێدەنگی دەشکێنێت؟، ئەندامەکەی جڤاتی گشتی گۆڕان ئاماژەی بەوە دا: ئیتر پێیویستە خەڵکی سلێمانی بێدەنگی بشکێنن، داواکارییەکانیان رووبە ڕووی دەسەڵاتی شار بکەنەوە، کە یەکێتی نیشتمانییە و حاکمی موتڵەقی ناوچەکەیە، هەموو پۆستە گرنگەکانی لایە، تا دەگاتە ئاسایش و هێزی چەکدار.

ناڕەزایەتی خەڵکی سلێمانی و ئیستغلالکردنی لەلایەن یەکێتییەوە لە کاتی هەڵبژاردن باوە، دڵشاد رەشید بە (بازمیدیا)ی رایگەیاند: بۆ کاتی دەنگدان خەڵک بەکاردەهێنن تا کاندیدەکانیان دەردەچێت، دواتر بینەرمانن و بێدەنگن لە ئاستی داواکارییەکانمان، ئەمە راستییەکەیە، کەس گوێمان پێنادات، تەنیا لە کاتی دەنگدان فشە بۆ خەڵک دەکەن و سلێمانیایان بیردەکەوێتەوە، بەڵام لە کاتی پێویست ئێمەیان بیر نییە.

لیژنەی داکۆکی لە ئازادی رۆژنامەنووسی و مافی رۆژنامەنووسان تایبەت بە دەستگیرکردنی پۆلێک رۆژنامەنووس لە دەڤەری سلێمانی:

*ئەم شێوازی دەستگیرکردنە مەترسییە بۆسەر ئازادی رادەربرین و گیانی رۆژنامەنووسان، داواکارین هەرچی زووترە ئەم رۆژنامەنووسانە ئازادبکرێن

لەگەڵ ئەوەی بەپێی یاسای ژمارە 35ی رۆژنامەگەری ساڵی 2007ی هەرێمی کوردستان، دەستگیرکردنی رۆژنامەنووس رێگەپێنەدراوە و ئەگەر رۆژنامەنووس دۆسیەیەکی لەو جۆرەی هەبێت دەبێت سەندیکای رۆژنامەنووسانی لێ ئاگاداربکرێتەوە، بەڵام لەماوەی رۆژانی رابردوو وە لە ئەمڕۆشدا سێ رۆژنامەنووس دەستگیرکراون، دوانیان لەشاری سلێمانی بەناوەکانی نووسەر و رۆژنامەنووس جەمال عەبدوڵا لە کەناڵی کوردستان24 و عیماد بیلال لە دەزگای باسنیوز کە ئێستا بەداخەوە لەزینداندان، وە لە شاری چەمچەماڵیش رۆژنامەنووس ئازاد بایز، دەستگیرکراوە و دوای 23 رۆژ ئازادکراوە.”
“ئەم شێوازی دەستگیرکردنە مەترسییە بۆسەر ئازادی رادەربرین و گیانی رۆژنامەنووسان، داواکارین هەرچی زووترە ئەم رۆژنامەنووسانە ئازادبکرێن و بەپێی یاسای رۆژنامەگەری مامەڵەیان لەگەڵ بکرێت.”

“داواکارین لە لایەنە پەیوەندیدارەکانی پارێزگای سلێمانی روونکردنەوە بۆ رای گشتی بدەن، کە ئەم جۆرە رەفتارو هەڵسوکەتە نایاساییانە بەرامبەر رۆژنامەنووسان بۆ؟ بۆ ئێمە لە لیژنەی داکۆکی لە رۆژنامەنووسان لە سەندیکای رۆژنامەنووسان و تەواوی رۆژنامەنووسان بووەتە جێگای پرسیار.”

راگەیاندراوێك لە دەزگای میدیایی (باس) و ئاژانسی هەواڵی (باسنیوز)ەوە

بەداخەوە لە ماوەی 24 كاتژمێری رابردوودا، دوو ڕۆژنامەنووسی ناسراوی شاری سلێمانی و هەرێمی كوردستان كە بریتین لە: جەمال عەبدوڵا، کە پارێزەرە و هاوكات نووسەر و ڕۆژنامەنووسە و لە ماڵپەڕی (باسنیوز) گۆشەیەكی وتارنووسیی هەیە، هەروەها عیماد بیلال، رۆژنامەنووس كە پەیامنێرێكی چالاكی دەزگاكەمانە لە شاری سلێمانی، لە لایەن دەزگا ئەمنییەكانی شارەكە دەستگیر كراون و ئێستا لە زینداندان.

لێرەوە جەخت دەكەینەوە، دەزگای میدیایی (باس) لە هەوڵەكانی لەسەر دەرخستنی راستییەكان بەردەوام دەبێت و ناچێتە ژێر باری هیچ جۆرە فشارێك، ئەو دوو هاوکارە رۆژنامەنووسەمان، هەر کەیسێکیان بۆ کرابێتەوە یان دروست کرابێت، هیچ لەو راستیە ناگۆڕێت کە بەهۆی نووسین و رادەربڕین و کاری رۆژنامەوانیيەوە گیراون، بۆیە داوا لە دەزگا دادوەرییە بەڕێزەکانی شاری سلێمانییش دەكەین، بەپێی یاسای ڕۆژنامەگەری لە كوردستان ژمارە 35ی ساڵی 2007 مامەڵە لەگەڵ رۆژنامەنووسە گیراوەكانی سلێمانیدا بكەن.

ئێمە لە دەزگای میدیایی (باس)، سەلامەتیی ژیان و تەندروستیی هەردوو ڕۆژنامەنووس دەخەینە ئەستۆی دەسەڵاتدارانی شاری سلێمانی کە یەکێتیی نیشتمانیی کوردستانە، چونكە ئەزموونێكی تاڵ لە مامەڵەكردن لەگەڵ ڕۆژنامەنووسان و گیراوان لەو شارەدا هەیە.

دەزگای میدیایی (باس) و ئاژانسی هەواڵی (باسنیوز)
23ی 10ی 2023

سەرۆکی حکومەت لەگەڵ شاندی دانوستانکاری هەرێم کۆدەبێتەوە

ئەمڕۆ یەکشەممە 10/22، مەسرور بارزانی، سەرۆکی حکومەتی هەرێمی کوردستان، لەگەڵ شاندی دانوستانکاری حکومەتی هەرێم بە سەرۆکایەتیى وەزیری دارایی و ئابووری کۆبووەوە، کە هەفتەی ڕابردوو بە مەبەستی خستنەڕووی ژمارە و زانیاری دروست لەسەر تەوەرەکانی پەیوەندیدار بە دۆخی دارایی و بودجە و مووچەی هەرێم، ئامادەی کۆبوونەوەی هاوبەشی لیژنەی دارایی ئەنجومەنی نوێنەران و وەزیری دارایی و سەرۆکی دیوانی چاودێریی دارایی فیدڕاڵ بوون.
لە کۆبوونەوەکەدا کە ژمارەیەک لە وەزیرە پەیوەندیدارەکانی حکومەتی هەرێم ئامادەی بوون، تیمی حکومەت کورتەیەکیان له‌بارەی ئەنجامی سەردانەکەیان بۆ بەغدا خستەڕوو، ئاماژەیان بەوە دا کە ڕوونکردنەوەی تەواویان بە داتا و زانیاری وردەوە پێشکەش کردووە و لە ئەنجامدا تێگەشتنێکی ئەرێنی هاوبەش دروست بووە لە نێوان ئامادەبووانی کۆبوونەوەکە، لەسەر چۆنییەتی چارەسەرکردنی کێشەی مووچەی مووچەخۆرانی هەرێمی کوردستان و جیاکردنەوەی مووچە لە پێوەری خەرجیى ڕاستەقینە وەک شایستەی قانونی مووچه‌خۆر و دوورخستنەوەی لە ململانێ سیاسییەکان، بەم ئاراستەیەش لە کۆبوونەوەکەدا، میکانیزمی گونجاو بۆ چارەسەری ئەم بابەتە خرایەڕوو.
سەرۆکی حکومەت وێڕای دەستخۆشیکردن لە تیمی حکومەتی هەرێم، دووپاتی کردەوە کە حکومەتی هەرێمی کوردستان، پابەندە بە چارەسەرکردنی کێشەکان لەسەر بنەمای دەستوور و ڕێککەوتنەکان و ڕێزگرتن لە قەوارەی فیدرالی هەرێم. گوتیشی دابینکردنی مووچەی مووچەخۆرانی هەرێم، کاری لەپێشینەی ئەنجومەنی وەزیرانە و لەم پێناوەشدا، حکومەتی هەرێم، بەردەوام دەبێت لە بەجێگەیاندنی ئەرک وپابەندییە دەستووریەکانی خۆی، لە بەرانبەریشدا چاوەڕوانیمان لە حکومەتی فیدڕاڵە کە شایستە داراییەکانی هەرێم لەپێش هەمووشیانەوە تەرخانکراوی مووچە وەک لە خشتەکانی بودجەی عێراقدا هاتووە بۆ هەرێم خەرج بکات، هاوشێوەی ناوچەکانی دیکەی عێراق.
لە کۆتایی کۆبوونەوەکەدا، سەرۆکی حکومەت تیمی دانوستانکاری ڕاسپارد، لە نزیکترین دەرفەتدا و لەبەر ڕۆشنایی دەرئەنجامی کۆبوونەوەی هاوبەشی لایەنەکان لە لیژنەی دارایی ئەنجومەنی نوێنەران، لە پەیوەندی بەردەوام بن لەگەڵ حکومەتی فیدڕاڵی، تا گەیشتن بە چارەسەرێکی هاوسەنگ و گونجاو.

وێستگەیەکی گواستنەوەی کارەبای ١٣٢ کەی ڤی لە کەلار دادەنرێت

پرۆژەی وێستگه‌یەکی نوێی کارەبا لە ئیدارەی سەربەخۆی گەرمیان جێبەجێ دەکرێت و چاوەڕوانیش دەکرێت گرفتی بارقورسی و کێشەى دابەشکردنی کارەبا لەو ناوچەیە چارەسەر بکات.
مەحموود کەریم ئەمین، ئەندازیار و بەرپرسی جێبەجێکاری پرۆژەکە، بە فەرمانگەى میدیا و زانیاریی ڕاگەیاند: “بەهۆی فراوانبوونی شار و دروستكردنی زیاتر له‌ ٨ هەزار یه‌كه‌ی نیشته‌جێبوون لە سەنتەری ئیدارەی سەربەخۆی گەرمیان، حکومەتی هەرێمی کوردستان دەستی بە پرۆژەی نوێی وێستگەى کارەبا لە کەلار کردووە؛ بڕیارە لە ناوەڕاستی ساڵی داهاتوو پرۆژەکە بکەوێتە کار و سوود بە دانیشتووانی ناوچەکە بگەیەنێت.”
هەر لەمبارەیەوە، حازم کەریم حەمید، بەڕێوەبەرى گشتیی کارەباى گەرمیان، بە فەرمانگەى میدیا و زانیاریی گوت: “پرۆژەى ١٣٢ کەی ڤیی دووەمی کەلار، ١٨ ملیار و ٣٩٠ ملیۆن دینارى تێدەچێت. وێستگەکە تواناى گۆڕینی کارەباى ١٨٩ مێگاوات دەبێت و نزیکەی ٥٠%ى کارەکانی تەواو بووە؛ ئەم پرۆژەیە بارقورسیی کارەبا لە ناوچەکەدا زۆر کەم دەکاتەوە.”
بەڕێوەبەرى گشتیی کارەباى گەرمیان ئەوەشی خستەڕوو: “لە ٨ ى تشرینی یەکەمەوە، لە ئیدارەى گەرمیان، دەست بە ڕاکێشانی هێڵی کارەبا بۆ ٢٤ گوندی ناوچەکە بە گوژمەى ٣ ملیار و ٥٢١ ملیۆن دینار لەسەر بودجەى وەبەرهێنانی وەزارەتی کارەباى حکومەتی هەرێمی کوردستان کراوە.”
هەرێمی کوردستان، لەڕووى فراوانبوونی دانیشتووان و شارسازییەوە، گەشەیەکی بەردەوامی هەیە، ئەمەش خواستی گشتی لەسەر وزەى کارەبا بەرز کردووەتەوە؛ بۆ وەڵامدانەوەى ئەو پێداویستییە، حکومەتی هەرێمی کوردستان بەردەوام پرۆژەى نوێی کارەبا دادەمەزرێنێت و بەکاریان دەخات.
فەرمانگەى میدیا و زانیاری

شەوی ڕابردوو دژەتیرۆری یەکێتی بەهاوکاری گرووپێکی حەشدی شەعبی ئەفسەرێکی کورد لە کەرکووک دەڕفێنن

ــ ئەفسەرەکە کێ بووە و کێ ڕفاندی ؟

درەنگانێکی شەوی ڕابردوو ئەفسەری ئەنجومەنی ئاسایشی هەرێم (گۆران نەوزاد) لە کەرکووک لەلایەن دژەتیرۆری یەکێتی و گرووپێکی حەشدەوە دەڕفێندرێت، ناوبراو بەهۆی نەخۆش کەوتنی باوکیەوە و بە مەبەستی سەردانی گەڕابوویەوە شاری کەرکووک.

بەپێی زانیاریەکان ناوبراو دوای چاودێریەکی وورد لەلایەن تیمێکی دژەتیرۆری سەر بە وەھاب ھەڵەبجەییەوە و بەهاوکاری گرووپێکی حەشدی شەعبی ڕفێندراوە، ئەمە لە کاتێکدا کە پێشتر ھەمان تیم ماڵەکەی گۆرانیان لەو شارە سوتاندبوو و دوو جاریش مالی باوکیان دابووە بەر دەستڕێژی گوللـە.

بەپێی زانیاریەکان ئەو تیمەی گۆرانیان بەو شێوەیە ڕفاندوە پێکھاتوون لە لە گرووپێک بەسەرپەرشتی ( سەریاس نەجات اسماعیل) کە بەرپرسی پاسەوانەکانی وەهاب هەڵەبجەیە و لەگەڵ هەریەکە لە ( هاوکار مەجید ڕەشید ناسراو “بەهاوە دووزی” و حەمەی نەجم ).

بە پێی زانیاریەکان گۆران دوای ڕفاندنەکەی بردوویانە بۆ سلێمانی و لە بارەگای فەرمی دژەتیرۆر دەستبەسەرکراوە، هەربۆیە لێرەوە سەلامەتی گیانی گۆران نەوزاد دەکەوێتە ئەستۆی سەرۆکی یەکێتی و بەرپرسی دژەتیرۆری سلێمانی.

سەرۆکی حکومەت: کاردەکەین لەپێناو ڕێکخستنەوە و گەشەپێدانی سیستەمی تەندروستیى گشتی و بەرزکردنەوەی ئاستی خزمەتگوزارییەکان کە زیاتر جێگەی متمانەی هاووڵاتییان بێت

ئەمڕۆ پێنجشەممە 10/19، بە ئامادەبوونی مەسرور بارزانی سەرۆکی حکومەتی هەرێمی کوردستان، ئاهەنگی دەرچووانی پسپۆڕییە پزیشکییەکان( بۆردی کوردستانی) لە شاری هەولێر بەڕێوەچوو.
سەرۆکی حکومەت لە گوتارێکدا ئاماژەی بەوە کرد کە پزیشکی، پیشەیەکی یەکجار پیرۆزە، هیوادارم پزیشکانی کوردستان لە ئاست پیرۆزی و گەورەیی ئەرک و پیشەکەیان و سوێندخواردنەکەیاندا بن. گوتیشی کە شاراوە نییە کەرتی تەندروستی لە کوردستان، وەک هەموو کەرتەکانی تر، بەدەر نییە لە ڕەخنە و گلەیی، بۆیە لەسەرەتای دەستبەکاربوونی کابینەی نۆیەم، دەستمان بە پرۆسەیەکی فراوانی چاکسازی لە بواری تەندروستیدا کرد.

ئەمەش دەقی گوتاری سەرۆکی حکومەتی هەرێمی کوردستانە:

بە ناوی خوای گەورە و میهرەبان
ئامادەبووانی هێژا:
میوانانی بەڕێز:

ئەم کاتەتان باش

بەختەوەرم ئەمڕۆ لەگەڵ ئێوە بەشدارم لە ئاهەنگی دەرچووان و ڕاهێنراوانی ئەنجومەنی باڵای کوردستان بۆ  پسپۆڕە پزيشکیيەکان، پیرۆزباییەکی گەرم لە گشت دەرچووان و ڕاهێنراوان دەکەم و هیوای سەرکەوتن و پێشکەوتنی زیاترتان بۆ دەخوازم.
دەستخۆشی لە ئەنجومەنی باڵای کوردستان بۆ پسپۆڕییە پزيشکیيەکان دەکەم کە وەک دەزگایەکی فێرکاری و ڕاهێنان لەبواری پزیشکی کار دەکات لە پێناو پەرەپێدانی خوێندن و پسپۆڕی و پیشەی پزیشکی و ئەنجامدانی توێژینەوە و کارکردن بۆ بەدەستهێنانی متمانەی ناوەندە پزیشکییە نێودەوڵەتییەکان.
هەروەها دەستخۆشی لە توێژەرە بەڕێزەکان دەکەم بۆ ئەو توێژینەوە گرنگانەی لە بواری پزیشکی و تەندروستیدا ئەنجامیان داوە و ئەمڕۆ کورتەیەکیان خستەڕوو. هیوادارم ئەم توێژینەوانە سوودیان لێ وەربگیرێت و ببنە هۆی دۆزینەوەی چارەسەر بۆ نەخۆشییەکان و باشتربوونی سیستەمی تەندروستیمان بەگشتی.
ڕێز و پێزانینم بۆ ئەنجومەنی پزیشکی ئوردنی هەیە، کە متمانە و باوەڕی خۆیان  بە پرۆگرام و سەنتەرەکانی ئەنجومەنی باڵای کوردستان بەخشیوە. خۆشحاڵین بەو هاوکاری و هەماهەنگییە بەهێزەی لە نێوان هەرێمی کوردستان و شانشینی ئوردندا هەیە، بەتایبەتی لە بواری تەندروستیدا. ئێمە هەمیشە شانازی بە پەیوەندیی مێژوویی و دۆستانە و تایبەتیى نێوان هەرێمی کوردستان و شانشینی هاشمی ئوردنی بە ڕێبەرایەتی خاوەنشکۆ شا عەبدوڵڵای دووەم دەکەین کە لە قۆناخە جیاوازەکاندا پشتیوانی هەرێمی کوردستان بوون .

بەڕێزان:
پزیشکی، پیشەیەکی یەکجار پیرۆزە، هیوادارم پزیشکانی کوردستان لە ئاست پیرۆزی و گەورەیی ئەرک و پیشەکەیان و سوێندخواردنەکەیاندا بن. پزیشکیی، بەر لە هەر شتێک، ئەرکێکی مرۆڤانەیە و پێویستە ئامانجەکەی ڕزگارکردنی ژیانی خەڵک و پاراستنی تەندروستییان بێت. بۆیە ئومێدەوارم هەمیشە، لایەنى مرۆیی و ئینسانی پیشەکەتان لەبەر چاو بێت.
بێگومان فێربوون کۆتایی نایەت، چونکە پرۆسەیەکی بەردەوامە و مرۆڤ بە گشتی و لە قۆناخە جیاوازەکانی ژیانیدا، پێویستە بەردەوام بێ لە هەوڵی گەڕان بەدوای زانست و زانیاری و فێربووندا. بەتایبەتیش بواری پزیشکیی و تەندروستی وەک زۆر بواری دیکە، لە پێشکەوتنی بەردەوامدایە، بۆیە دەبێ ئێوەش، هەمیشە لە هەوڵی بەردەوام و بێ وچاندا بن لە پێناو بەدەستهێنانی زانیاری نوێ و ئەنجامدانی توێژینەوەی گرنگ و زانستی، بۆ ئەوەی بتوانن زیاتر خزمەتی خەڵک و کۆمەڵگەی خۆتان و مرۆڤایەتی بە گشتی بکەن. هیوادارم سوودێکی زیاتر لە بواری تەکنەلۆجیای زانستی Bio Technology وەربگیرێت کە ئاسانکاری زۆر و هاوکاری زۆرتری پزیشکەکان دەکات.

شاراوە نییە کەرتی تەندروستی لە کوردستان، وەک هەموو کەرتەکانی تر، بەدەر نییە لە ڕەخنە و گلەیی، بۆیە لەسەرەتای دەستبەکاربوونی کابینەی نۆیەم، دەستمان بە پرۆسەیەکی فراوانی چاکسازی لە بواری تەندروستیدا کرد کە تا ئێستاش بەردەوامە، چونکە هێشتا زۆر شت ماون ئەنجامیان بدەین. هەر بۆ نموونە یەکێک لە چاکسازییەکانمان، دەرچوونی یاسایەکی گرنگی پەیوەندیدار بە بواری تەندروستیى گشتی بوو، کە یاسای ماف و ئەرکەکانی نەخۆشە لە هەرێمی کوردستان کە لە ساڵی 2020 لەلایەن پەرلەمانی کوردستانەوە پەسەند کرا.
چاکسازی پرۆسەیەکی بەردەوامە و کاتی دەوێت، هەروەها پێویستی بە هەماهەنگی و هاریکاری هەموومان هەیە، بەتایبەتی پزیشکان و پسپۆڕانی بواری تەندروستی، بۆ ئەوەی بە هەوڵی هەموو لایەک بتوانین سیستەمی ته‌ندروستیى  گشتی باش بکەین و خزمەتگوزاریی ته‌ندروستی، بە شێوەیەکی باشتر بە هاووڵاتییانمان بگەیەنین.

حکومەتی هەرێمی كوردستان خەرجیيەکی زۆر لە بواری تەندروستیى گشتی و دامەزراوە تەندروستییەکان دەکات و کاردەکەین لەپێناو باشترکردنی کوالێتی ئەو خزمەتگوزارییانە و ڕێکخستنەوە و گەشەپێدانی سیستەمی تەندروستيی گشتی و بەرزکردنەوەی ئاستی خزمەتگوزارییەکان بە شێوەیەک کە جێگەی متمانەی زیاتری هاووڵاتییان بێت.
جارێکی دیکەش پیرۆزبایی لە دەرچووان و ڕاهێنراوان و توێژەران دەکەم و هیوای پێشکەوتن و بەردەوامیی بۆ ئێوە و ئەنجومەنی باڵای کوردستان بۆ  پسپۆڕييە پزيشکیيەکان دەخوازم .
هیوادارم هەمیشە سەرکەوتوو بن و کوردستانیشمان هەر پارێزرا و ئاوەدان بێت .

سەرۆكی حكومەت بەشداری لە ئاهەنگی خولی دەرچووانی پۆلیسی هەولێر دەكات

ئەمڕۆ پێنجشەممە 10/19 ، بە ئامادەبوونی مەسرور بارزانی ،سەرۆكی حكومەتی هەرێمی كوردستان، ئاهەنگی خولی دەرچووانی پۆلیسی هەولێر بەڕێوەچوو.
مەسرور بارزانی ،سەرۆكی حكومەتی هەرێمی كوردستان لەمیانەی مەراسیمەكەدا پیرۆزبایی لە دەرچووانی خوولەكە كردوو رایگەیاند: كارمەندانی پۆلیس دەبێ دەبێت نموویەكی گەشی دەسەڵات بن لای هاووڵاتیان.
هەروەها سەرۆكی حكومەت گوتی: نابێت پۆلیس و ئاسایش بەرامبەر تاوانباران نەرمی بنوێنن.

دەقی گوتارەكەی سەرۆكوەزیرانی هەرێمی كوردستان….
بە ناوی خوای گەورە و میهرەبان
ئامادەبووانی هێژا:
ئەم كاتەتان باش
پیرۆزباییەكی گەرم ئاراستەی گشت دەرچووانی ئەم خولە دەكەم . هیوادارم ئەنجامدانی ئەم جۆرە خولانە ببنە هۆی زیاتر پەرەپێدان و بەهێزكردن و پێشخستنی تواناكانی كارمەندانی پۆلیس.

ڕێز و پێزانینی زۆرم بۆ هێزەكانی ئاسایشی ناوخۆ هەیە و دەستخۆشیان لێ دەكەم بۆ ماندووبوون و شەونخوونی و دڵسۆزیی و كارامەییان لە بەجێگەیاندنی ئەركەكانیان لە پێناو ئاسایش و سەقامگیریی هەرێمی كوردستان. من خۆم لە نزیكەوە شاهید و ئاگاداری هەوڵ و خزمەتی بەرچاوی پۆلیس و هێزەكانی ئاسایشی ناوخۆم كە زۆر خۆنەویستانە و لە بارودۆخی سەخت و دژواردا، ئەركەكانیان ڕادەپەڕێنن.

بەشێكی گرنگی ئەركی كارمەندانی پۆلیس و هێزەكانی ئاسایشی ناوخۆ، پاراستنی ئاسایش و تەناهی و دابینكردنی ئارامی و سەقامگیریی و نەهێشتنی تاوان و ڕووبەڕووبوونەوەی تاوانبارانە،لەوەش گرنگتر ئەوەیە كە چۆن بە شێوەیەكی یەكسان و دادپەروەرانە و لە چوارچێوەی یاسا و ڕێزگرتن و پاراستنی مافەكانی مرۆڤ، مامەڵە و هەڵسوكەوت لەگەڵ هاووڵاتییان بە گشتی دەكەن و چۆن سەرپێچیكاران و تاوانبارانیش ملكەچی بەردەم دادگا دەكەن .

هەروەها كارمەندانی پۆلیس، كە نوێنەرایەتی دەسەڵات و باڵادەستبوون و سەروەری یاسا دەكەن، دەبێ نموونەیەكی جوان و گەشی دەسەڵات بن لای هاووڵاتییان، بەتایبەتی كە ئێوە ڕۆژانە لە نزیكەوە پەیوەندی ڕاستەوخۆتان لەگەڵ خەڵكدا هەیە، پێویستە لە ڕەفتاركردن لەگەڵ خەڵك، خۆتان لە توندوتیژی و ئەزیەتدان و زوڵم و ستەم كردن و هەموو كارێكی نایاسایی بەدوور بگرن ، هاونیشتمانیان دەبێ ئێوە بە بەشێك لە خۆیان بزانن و هەردوولا تەواوكەری یەكتر بن لە پێناو ئامانجێكی هاوبەش، كە ئەویش پاراستنی ئاسایش و سەقامگیریی نیشتمان و سەروماڵی هاووڵاتییانە.

خۆشبەختانە یەكێك لە هۆكارەكانی ئەو ئاسایش و سەقامگیرییەی لە كوردستان هەیە كە بووەتە دەسكەوت و سیمایەكی گەشی هەرێمی كوردستان ، بۆ ئەو هەماهەنگیی و هاوكاریی و پەیوەندییە بەهێز و توندو تۆڵەی نێوان خەڵكی كوردستان و دەزگا ئەمنییەكان دەگەڕێتەوە.

پۆلیس و هێزەكانی تری ئاسایشی ناوخۆ ، نابێ بە هیچ شێوەیەك، هیچ كەمتەرخەمییەك و نەرمییەك بنوێنن لە بەرامبەر تاوانباران و هەموو ئەوانەی دەیانەوێ ئارامی و ئاسایشی وڵاتەكەمان تێك بدەن و ژیانی هاووڵاتیان بخەنە مەترسییەوە .

ئەمڕۆ جیهان لە پێشكەوتنێكی خێرای تەكنەلۆجیادایە، پێویستە پۆلیس و هێزە ئەمنییەكانمان، خۆیان لەگەڵ پێشكەوتنەكان ڕابهێنن و لە ڕاپەڕاندنی ئەركەكانیاندا سوودی باش لە تەكنەلۆجیا وەربگرن كە بە دڵنیاییەوە، ئاسانكارییەكی زۆر بۆ دەزگا پەیوەندیدارەكانی ناوخۆ دەكات و یارمەتیدەرێكی باشە بۆ ئەوەی ئامانجەكانیان لە بەدواداچوونی تاوانباران و سەپاندنی یاسا و دابینكردنی ئاسایش و سەقامگیریدا بەدەست بهێنن.

لەم چوارچێوەیەدا، ئەنجامدانی خولەكانی مەشقكردن و ڕاهێنان و بەرزكردنەوەی ئاستی هوشیاریی و پیشەیی پۆلیس و سەرجەم هێزەكانی ناوخۆ، كارێكی پێویست و گرنگە و هیوادارم لە سەری بەردەوام بن ، بۆ ئەوەی بتوانن بە باشترین و شایستەترین شێوە ، ئەركەكانتان بە جێ بگەیەنن و ئارامی و سەقامگیریی بپارێزن .

جارێكی دیكەش پیرۆزبایی دەرچوونتان لێ دەكەم و هیوای سەركەوتن و سەرفیرازیتان بۆ دەخوازم و دڵنیام بە پشتیوانی خوای گەورە و هیممەت و دڵسۆزی و كارامەیی ئێوە، كوردستانمان هەمیشە پارێزراو دەبێت.

شایانی باسە خولی دەرچووانی پۆلیسی هەولێر تایبەتە بە هەڵكوتانە سەر، گەمارۆدان و ئازادكردنی بارمتە. خوولەكە لە بەرواری 9-7-2023 بە ناوی خولی شەهید سەركەوت ئازاد بۆ مەشقی هەڵكوتانە سەر، گەمارۆدان و ئازادكردنی بارمتە بۆ 80 بەشداربوو كرایەوە، بەمەبەستی رێكخستن و مەشقی لقی ئەركە تایبەتییەكانی سەر بە بەرێوەبەرایەتی پۆلیسی هەولێر كە پێك دێت لەبارەگای لق و سێ پەل،ماوەی خوولەكەش 14 هەفتەی خایاند بە تێكڕای 9 كاتژمێر مەشقی رۆژانە.
هەر لە خوولەكەدا راهێنان بەبەشداربووان لەسەر چەندین جۆرە چەكی سووك و مامناوەند كراوە.

ئەندامێکی پێشووی سەرکردایەتی یەکێتی:

ئەمشەو دەرکەوت سەعدی تا ئەوکاتە وتەبێژە کە پاسەوانی لە بافڵ بکات لەوە زیاتر بۆی نییە قسە بکات.

ئەندامێکی پێشووی سەرکردایەتی یەکێتی نزیک لە لاهور جەنگی بە (بازمیدیا)ی گوت: دوای چەند ڕۆژێک لە دامەزراندنی وەک وتەبێژی یەکێتی، ئەمشەو سەعدی پیرە بۆ قسەکردن میوانی کەناڵەکەی شاسوار بوو، چەند خولەکێک دوای دەستپێکردنی بەرنامەکە، کە پێشکەشکارەکە دەربارەی خیانەتی ١٦ی ئۆکتۆبەر پرسیاری لێ کرد، راستەوخۆ تیمەکەی سەعدی پیرە پەخشەکەیان کوژاندنەوە و رێگەیان نەدا سەعدی تەنانەت وشەیەکیش بڵێت و لە ڤیدیۆکەدا دەردەکەوێ کە سەعدی خۆی حازر دەکات وەڵام بداتەوە بەڵام تیمەکەی پەخشەکەی لەسەر دەبڕن.

ئەو سەرکردەی نزیک لە لاهور جەنگی پێیوایە، ئەمەی ئەمشەو روویدا زۆر جیاواز بوو، چونکە پێشتر زۆر جار روویداوە سەعدی پیرە لە پرسیاری بێژەرەکان توڕە دەبێت و قسەی نەشیاو دەکات و هەر خۆی مایکەکان فرێدەدات و دەڕوات، بەڵام ئەمەی ئەمشەو سەلمێنەری ئەوەیە کە ئیتر سەعدی وەکو جاران نییە هەرچی ویستی بیڵێت، تەنیا وتەبێژی بەرگری کردنە لە بافڵ و هەرچی بافڵ حەزی لێ نەبێت سەعدی نابێ نە بە چاک نە بەخراپ قسەی لەبارەوە بکات، بۆیە بەر لەوەی سەعدی دەم بکاتەوە تیمەکەی پەخشەکەیان کوژاندنەوە و سەعدیان بێبەش کرد لەو بەرنامەیەی کە بەدرێژایی ئەمڕۆ خۆی بۆ ئامادە کردبوو.