ئێوارەی ئەمڕۆ پێنجشەممە 29ی ئەیلوولی 2022، بە ئامادەبوونی مەسرور بارزانی، سەرۆکی حکومەتی هەرێمی کوردستان ڕێوڕەسمی ئاهەنگی دەرچووانی قوتابییانی زانکۆی سەڵاحەددین لە شاری هەوڵیر بەڕێوەچوو و تێیدا سەرۆکی حکومەتی هەرێمی کوردستان گوتارێکی پێشکەش کرد.
پوختەیەک لە گوتەکانی سەرۆکی حکومەتی هەرێمی کوردستان:
• جێی خۆیەتی لێرە یادی هەردوو پڕۆفیسۆری شەهیدی زانست، دکتۆر کاوان ئیسماعیل و دکتۆر ئیدریس حەمەخان بەرز رابگرین.
• ئەم زانکۆیە هەمیشە و بەردەوام جێگەی گرنگیدان و بایەخی جەنابی سەرۆک مەسعود بارزانی بووە کە لە سەرەتای ڕاپەڕینەوە و لە بارودۆخی سەختی ئابووریی ئەو کاتە، جەنابی سەرۆک بە هەموو شێوەیەک پشتیوانیی زانکۆی سەلاحەددینی کرد بۆ ئەوەی بەردەوام بێت لە پرۆسەی خوێندن و پێگەیاندنی نەوەکانمان.
• ئێمە لە حکومەتی هەرێمی کوردستان هەموو هەوڵ و توانایەکی خۆمان دەخەینە گەڕ بۆ چاکسازیکردن و یارمەتیدانی کەرتی پەروەردە و خوێندن و خوێندنی باڵا و گەشەپیدانی زیاتری زانکۆکانی هەرێمی کوردستان.
• یەکێک لە گەورەترین وانەکان، ئەو وانەیە کە مرۆڤ لە ژیان فێر دەبێت، ئەو وانەیەش بۆ ئێمەی خەڵکی کوردستان وانەیەکی ئاسان نەبووە و نییە، وانەیەکی سەخت و دژوارە، ئێوە بینیتان کە لە ماوەی ڕابردوو بە بیانووی جیا جیا بەبێ پاساو پەلاماری وڵاتەکەمان دەدرێ، پێشێلی سەروەریی خاکەکەمان دەکرێ، پێشێلی مافە دەستوورییەکانمان دەکرێ، ئێمە وەڵامی ئەم جۆرە هەڵوێستانە بەوە دەدەینەوە کە خۆمان بەهێز بکەین، وڵاتەکەمان بەهێز بکەین، بەهێزبوونی وڵاتەکەی ئێمە بەهێزبوونی تاکە تاکەی ئێوەیە، تاکوو ئێوە بتوانن زیاتر خۆتان بەزانست، بەخۆشەویستی وڵات، بەلێبووردن بەپێکەوەژیان بەهیزتر بکەن وڵاتێکی بەهێزترمان دەبێت و ئێمە دەتوانین ڕووبەڕووی هەموو ئەو لەمپەرانە ببینەوە کە دەخرێنە سەر ڕێگامان.
• لێرەدا جێی خۆیەتی سەرەخۆشیی لە کەسوکاری ڕووداوی دوێنی بکەم، تەمەنای چاکبوونەوەی زووش بۆ بریندارەکان دەخوازم.
• ئەو پەلامارانەی کە دەکرێنە سەر خاکەکەمان، بەداخەوە بەهیچ شێوەیەک چارەسەری هیچ كێشە و گرفتێک ناکات.
• ئێمە گەلێکی ئاشتیخوازین، نامانەوێت کێشە بۆ هیچ وڵاتێکی دراوسێ یان بۆ هیچ ناوچەیەکی تر دروست بکەین. پەیامی ئێمە پەیامی ئاشتی و ئازادییە، پەیامی پێکەوەژیانە، پەیامی ڕێزگرتنە لەیەکتر لەسەر بنەمای ڕێزی بەرانبەر.
• ئێمە دەمانەویت وڵاتەکەمان بەرەو پێشەوە ببەین، ئێمە دەمانەوێت بژیین.
• داوا دەکەین، ئەوانەی یارمەتیمان دەدەن سوپاسیان دەکەین، ئەوانەشی ناتوانن یارمەتیمان بدەن لەمپەڕ نەخەنە سەر ڕێگەی پێشکەوتنمان، چونکە ئێمە بڕیاری ژیانمان داوە. بڕیاری ئەوەمان داوە وڵاتەکەمان ئاوەدان بکەین، بڕیاری ئەوەمان داوە نەوەکانمان بەهێز بکەین بە چەکی زانست، بڕیاری ئەوەمان داوە ئێمە بەرەو ئاسۆیەکی گەشتر هەنگاو بنێین.
• ئێمە سەرکۆنەی هەموو ئەو پەلامار و دەستدرێژییانە دەکەین کە دەکرێنە سەرمان.
• داوا لە حکومەتی فیدڕاڵی عێراق و کۆمەڵگەی نێودەوڵەتیش دەکەین کە سنوورێک بۆ ئەو دەستدرێژی و پەلامارانەی دەکرێنە سەرمان، دابنرێن.
• داواتان لێ دەکەم ئەم کوردستانە ئەمانەتە بەدەستی ئێوەوە، بیپارێزن، وانەی خۆشەویستی بۆ وڵات، وانەی پارێزگاریکردن لە وڵات بکەنە پیشەی خۆتان، ئەم وانەیە نەک تەنها خۆتانی پێ دەوڵەمەند کەن و فێربن، بەڵکوو خەڵکانی تریش فێر بکەن.
• ئێوە ئایندەی وڵاتەکەمانن، کوردستان دەکەوێتە دەستی ئێوە، دڵنیام لە دەستێکی ئەمیندا دەبێت.
