سەلماندت کە ئاغا و کوێخا نیت، بەڵکو خزمەتکاری میللەتی خۆتی.
قەهرەمان عوسمان :
ئەم سەردانەی ئەمڕۆی بەڕێز کاک مسرور بارزانی سەرۆکی حکومەتی هەرێمی کوردستان، دەبێت ببێتە وانەیەک بۆ تەواوی کاربەدەست و بەرپرسانی پارتی، چی ئەوانەی لە نێو حزبن و چی ئەوانەشی کە لە حکومەت کار دەکەن.
پێویستە دەرگاکانیان بخەنە سەر پشت، و بەپیر داواکاری خەڵکییەوە بچن، چیتر باوی ئەوە نەماوە لە ئۆفیسەکانیان و لە نێو ئۆتۆمبیلە جام ڕەشەکانیانەوە سەیری خەڵکی بکەن. بە کردار وەک جەنابی سەرۆکی حکومەت دەبێت بیسەڵمێنن کە “ئاغا و کوێخا نین، و خزمەتکاری میللەتی خۆیانن” و گوێ لە گلەیی و ڕەخنەی هاووڵاتییان بگرن.
هەروەها زۆر پێویستە لەمەودوا گلەیی و داواکاری هاووڵاتییان بگەیننە جەنابی سەرۆکی حکومەت و چیتر ڕاستییەکان ئاوەژۆ نەکەن، چونکە ئەگەر تا ئێستا شاردنەوەی ڕاستییەکانیان بۆ چوو بێتە سەر، دەبێت بزانن کە لە مەودوا خەڵکی ڕاستەوخۆ گلەیی و گازندە و داواکاری خۆیان دەگەیننە جەنابی سەرۆکی حکومەت و ئەو سەرۆک حکومەتەی کە ئەمڕۆ بۆ گوێ گرتن لە ڕەخنە و داواکارییەک چووە ماڵی جووتیارێک، بەیانیش بۆ هەمان مەبەست ئامادەگی تێدایە بچێتە ماڵی کرێکار و کاسب و کەناسێکی ئەم وڵاتەش.
