هاوپۆل: Uncategorized

چەند پڕۆژەیەکی خزمەتگوزاری لە قەزای ناوەندن سۆران دەچنە بواری جێبەجێکردن

ڕۆژی سێشەممە 27ـی ئابی 2024، لەسەر ڕاسپاردەی ڕێزدار مەسرور بارزانی سەرۆکی حکومەتی هەرێمی کوردستان، لە ژێر چاودێری سەرپەرشتیاری ئیدارەی سەربەخۆی سۆران، بەردی بناغەی پڕۆژەی درێژکردنەوەی بۆڕی ئاوی خواردنەوە و دروستکردن و قیرتاوکردنی کۆڵانەکانی گەرەکەکانی 26ـی گوڵان و بەرخودان و هەندرێن، بە گوژمەی(1,170,250,000) ملیار دینار لە سەر بودجەی ئیدارەی سەربەخۆی سۆران دانرا،کە لەلایەن کۆمپانیای هەبابان جێبەجێ دەکرێت.

لە مەڕاسیمی دانانی بەردی بناغەکەدا، هەڵگورد شێخ نەجیب سەرپەرشتیاری ئیدارەی سەربەخۆی سۆران و قائیمقامی قەزای ناوەندی سۆران، قائیمقامی قەزای چۆمان،بەڕێوەبەری گشتی شەهیدان و ئەنفالکراوانی سۆران،سەرۆکی شارەوانی سۆران،بەڕێوەبەری ناحیەی وەرتێ، بەڕێوەبەری تۆماری خانووبەرەی سۆران و بەرپرسانی حکومی و حزبی و دانیشتوانی هەرسێ گەڕەکەکە ئامادەیبوون.

سەرپەرشتیاری ئیدارەی سەربەخۆی سۆران لە مەڕاسیمەکەدا چەند وتەیەکی پێشکەش بە دانیشتوانی ئەم سێ گەڕەکە کرد و ڕایگەیاند: “وەک ئاگادارن لە ماوەی سێ ساڵی دروستبوونی ئیدارەی سەربەخۆی سۆران،سەرەڕای ئەو هەموو قەیران و فشارانەی لەسەر کابینەی نۆیەمی حکومەتی هەریمی کوردوستان هەیە، شۆڕشێکی ئاوەدانیمان بە پاڵپشتی و هاوکاری ڕێزدار مەسرور بارزانی سەرۆکی حکومەتی هەرێمی کوردستان لە هەموو بوارەکان بەتایبەت، ڕێگاوبان و ئاو و ئاوەڕۆ تۆڕی ئاوی خواردنەوە، کارەبا،تەندروستی،پەروەردە لەم دەڤەرە دەست پێکردووە و بەردەوامین”.

سەرپەرشتیاری ئیدارەی سەربەخۆی سۆران گوتیشی: “بۆیە جێی خۆیەتی بە ناوی هاوڵاتیان و خەڵکی ئەم دەڤەرە سوپاسێکی تایبەتی سەرۆکوەزیران ڕێزدار مەسرور بارزانی بکەین کە لەم ماوەیەی رابردوو هاوکار و پاڵپشتێکی تەواوی ئەو دەڤەرە بووە،ئەو هاوکاریانەی کە لەلایەن حکومەتەوە لەرێی ئێمەوە پێشکەش بە هاوڵاتیان دەکرێت بە ئەمانەتەوە ئەو هاوکاری و پاڵپشتیانە دەگەیێنینە خەڵکی خۆمان.

لە کۆتاییدا هەڵگورد شێخ نەجیب ڕاشیگەیاند: “لەدانانی بەردی بناغەی چەندین پڕۆژە خزمەتگوزاریەکان لە داهاتوو بەردەوام دەبین خەڵکی ئەم دەڤەرە شایستەی هەموو خزمەتێکن”.

راگەیاندنی ئیدارەی سەربەخۆی سۆران

ئاگادارییەك لە بەڕێوەبەرایەتی گشتیی خانەنشینی وەزارەتی دارایی و ئابوورییەوە

١- هەر خانەنشینێك بایۆمەتری نەكردووە،پێویستە لە ماوەی دوو هەفتەدا خۆی لە بایۆمەتری تۆمار بكات.
٢- هەر خانەنشینێك بایۆمەتری كردووە و نەیگەڕاندووەتەوە، پێویستە لە ماوەی دوو هەفتەدا بایۆمەترییەكەی بگەڕێنێتەوە بۆ فەرمانگەی خانەنشینیی پەیوەندیدار.
٣- هەر خانەنشینێك لەماوەی دوو هەفتەدا بایۆمەتری نەكردبێت و نەیگەڕێنێتەوە بۆ فەرمانگەی خانەنشینیی پەیوەندیدار، بەپێچەوانەوە مووچەكەی ڕادەگیرێت.

بەڕێوەبەرایەتی گشتیی خانەنشینی وەزارەتی دارایی و ئابووری.
٢٦/٨/٢٠٢٤

ڕۆژنامەنوسی سلێمانی محەمەد فاتیح بۆ بازمیدیا:
بەهۆی بیروڕای جیاواز یەکیتی دوریخستمەوە لە میدیاکەی، تەنانەت کارەبای مۆلیدەی ماڵەکەشیان بڕیوم.

دەستدرێژی سێکسی کرایە سەر کچەکەم کەچی تاوانبارەکەیان دەستگیر نەکرد

محەمەد فاتیح ڕۆژنامەنووسی سلێمانی بە بازمیدیای ڕاگەیاند: چەندین ساڵە یەکێتی بیانووی جۆراو جۆر بە من دەگرێت و هەڵکوتینە سەرماڵم بەبێ ئەوەی هۆکارێکی دیاریکراویان هەبێت، کە پەنام بۆ ئاسایشی سلێمانیش بردووە هاوکاریان نەکردووم تا ئەم ساتەش ئاسایش وەڵامی من نادەنەوە دەستی خۆیان لەم بابەتەدا هەیە، لە هیچ وڵاتێکی دونیادا نیە ئاسایش وەڵامی رۆژنامەنووس نەداتەوە.

ئاماژەی بەوەشکرد: کچەکەم ڕوو بەڕووی هەڕەشەی ڕفاندن و دەستدرێژی سێكسی بوەوە، بەڵام ئاسایشی سلێمانی ئامادە نەبوو تاوانبارەكە دەستگیر بكات، پۆلیس تاونبارەكەی دەستگیركرد و دادوەر بڕیاریدا بڕی ملیۆن و نیوێك قەرەبووی كچەكەم بكاتەوە و گوشاری توند بخەرێتەسەر كوڕەكە، ئەوەش جێبەجێ نەکرا.

ئەو ڕۆژنامەنووسەی سلێمانی گوتیشی: من وتار و هەڵوێستی جیاوازم هەبووە پێش ئەوەی بچمە کەناڵ هەشت و دواتریش ڕەخنەم لە یەکێتی گرتووە، بۆیە بە ئامانج گیرام و دژایەتیش کرام لای یەکێتی، لە ئیدارەی کەناڵەکەی بافڵ تاڵەبانی بانگرام و دورخرامەوە.

ئەوەشی خستە ڕوو، سیاسەتی چەواشەکاری و فرت و فێڵم بەرامبەر بەکاردەهێنن و ئەوەش عەیبە بۆ یەکێتی، تەنانەت جۆزەی مۆلیدەکەشیان کوژاندومەتەوە و کارەبای ماڵەکەیان بڕیوم.

ئەوەشی ئاشکرا کرد: بەرپرسی نووسینگەی بافڵ تاڵەبانی و بەڕێوەبەری کەناڵەکەی بافڵ تاڵەبانی چەندین جار لە کۆبوونەوە دەیگوت ئەوەی باسی کەناڵەکەمان بکات لە دادگاش وازی لێ ناهێنم و دوای ئەوەش بەدوایەوە دەبم، باوەڕیان بە بیروڕای ئازاد و ڕەخنەگرتن نییە، منیش لە دژی ئەم لە بەغدا سکاڵام تۆمار کردووە و ئاگادارکردنەوەشیان بۆ ناردووە، هاوکات دەستەی مافی مرۆڤی هەرێمی کوردستانیش لەسەر کەیسەکەم هاتوونەتە سەر هێڵ.

مەسرور بارزانی لە 36 مین ساڵیادی ئەنفالی بادینان پەیامێکی بڵاوکردەوە

دەقی پەیامی مەسرور بارزانی:

ئەمڕۆ بە ڕێز و شکۆوە یادی قوربانییانی ئەنفالی بادینان دەکەینەوە کە سی و شەش ساڵ لەمەوبەر، لە دوا قۆناغی شاڵاوە بەدناوەکانی ئەنفال ، ڕژێمی بەعس، هەزاران مرۆڤی بێتاوانی دەڤەری بادینانی شەهید و بێسەروشوێن کرد، سەدان گوندی ئەو ناوچەیەشی وێران کرد کە سەرەنجام بووە هۆی ئاوارەبوونی دەیان هەزار کەس.

ئامانج لە ئەنجامدانی ئەم تاوانە قێزەونانە، قڕکردن و جێنۆسایدکردنی گەلی کوردستان بوو،بەڵام تاوانباران و ئەنجامدەرانی ئەم کۆمەڵکوژیانە ، نەیانتوانی ئیرادە و خواستی ئازادیخوازانەی گەلی کوردستان لە ناوببەن.

لەم یادەدا ، دووپاتی دەکەینەوە کە پێویستە حکومەتی فیدراڵ ، ئەرکی یاسایی و ئەخلاقی خۆی جێبەجێ بکات و بە شێوەیەکی شایستە، بنەماڵە و کەسوکاری شەهیدان و ئەنفالکراوانی دەستی ڕژێمی پێشووی عێراق قەرەبوو بکاتەوە .

لەمبارەیەوە حکومەتی هەرێمی کوردستان لە هەوڵەکانی بەردەوام دەبێت و هەرچی لە تواناشیدا بێت بۆ خزمەتکردنی زیاتری کەسوکاری شەهیدان و ئەنفالکراوان درێخی ناکات.

سڵاو لە گیانی پاکی ئەنفالکراوانی بادینان و گشت شەهیدانی کوردستان.

مەسرور بارزانی
سەرۆکی حکومەتی هەرێمی کوردستان

2024/8/25

ئومێد خۆشناو:کێشەی کەمئاوی هەولێر چارەسەربوو

ئەمڕۆ هەینی، 23ی ئاب، ئومێد خۆشناو، پارێزگاری هەولێر، لە هەژماری خۆی لە تۆڕی كۆمەڵایەتیی فەیسبووک ڕای گەیاند، لە ماوەى ڕابردوو لەسەر فەرمان و ڕاسپاردەى پارێزگارى هەولێر، بۆ زاڵبوون بەسەر کێشەى کەمئاوى، کە بەو هۆیەوە بەشێک لە گەڕەکەکانى شارى هەولێر و دەروبەرى دووچارى گرفت دەبوون، بە هەوڵى تیمە هاوبەشەکانى فەرمانگە خزمەتگوزارییەکان توانرا تاڕادەیەکى زۆر باش ئیدارەى ئەو کێشانە بدرێت، وەک هۆشیارکردنەوەى هاووڵاتییان لە بەفیڕۆنەدانى ئاو و بڕینی سه‌رپێچی و زێده‌ڕۆییه‌كانی سه‌رتۆڕی ئاوى پاکى ماڵان و ئیجرائات وەرگرتن لەگەڵ هەموو ئەوکەسانەى کە ئاو بەفیڕۆ دەدەن.
ئەوەشی خستووەتە ڕوو، هەردوو بەڕێوەبەرایەتیى ئاوى هەولێر و دەوروبەر بە هەماهەنگى یەکتر و لە چوارچێوەى ئەو نەخشە و بەرنامە و پلانەى پارێزگاى هەولێر دایڕشتبووە بۆ چارەسەرى گرفتەکانى کەمئاوى، چارەسەرى کێشە و کەموکوڕى تەکنیکى بیرەکان و لێدانى بیر بەدیل و تازە، بۆ ئەو سێ مانگەى هاوین وەک یەک تیم چەندین هەنگاو بۆ ئەومەبەستە گیرایەبەر، بە تایبەتى لە بەڕێوەبەرایەتى ئاوى هەولێر، ئەوکارانە ئەنجام دراون:-
یەکەم : ئیفرازەکان
1- گۆڕینی بەشێکی هێڵی سەرەکی بۆڕی گوێزەرەوەی ئاوی ئیفراز 3 لە ناو ووێستگەی پاڵاوتنی ئاوی ئیفراز 3 لە سەربودجەی پارێزگای هەولێر، بە گوژمەی ( 535 ) ملیۆن دینار کە بووە هۆی کارپێکردنی پەمپی پێنجەمی پڕۆژەکە و زیادکردنی 2000م3/ لە کاتژمێرێكدا.
2- چاککردنەوە و بە کارخستنەوەی ووێستگەی یەکەم لە ناو ئیفراز خابت بە توانای 500 م3/ لەکاتژمێرێکدا لەسەر بوودجەی پارێزگای هەولێر بە گوژمەی ( 190 ) ملیۆن دینار.
3- چاککردنەوەی هەردوو پەمپی ووێستگەی دووەمی ئیفراز خابت ( بای واتەر) بە توانای ( 1000 ) م3/ لە کاتژمێرێکدا لەسەر فەرمانی بەڕێز پارێزگاری هەولێر لەسەر بوودجەی ئاسایی بەڕێوەبەرایەتی ئاوی هەولێر کە ماوەی زیاتر لە 10 مانگ بوو لە کارکەوتبوو.
4- چاککردنەوەی دوو ماتۆڕی پەمپی ژمارە 1 و 2ى ووێستگەی ئاوی ئیفراز یەك کە ماوەی 5 مانگ بوو لە کارکەوتبوو لەسەر بوودجەی ئاسایی بەڕێوەبەرایەتی ئاوى هەولێر.
5- چاککردنەوەی چوار پەمپی پڕۆژەی ئاوی ئیفراز 2 کەلەلایەن کۆمپانیان بای واتەر دانرابوو چاك نەدەکرایەوە بە فەرمانی بەڕێز پارێزگاری هەولێر چاککرایەوە لەسەر بودجەی ئاسایی بەڕێوەبەرایەتی ئاوى هەولێر.\
6- لە ئیفراز 2 های لیفت کڕینی دوو ماتۆڕ بۆ هێڵی سایلۆ و کوێستان بۆ یەکەمین جار هێڵی سایلۆ کرایە 3 پەمپ کە ساڵانێك بوو دوو پەمپ بوو .
7- لە ئیفراز 3 دوو پەمپ لە ئینتەیك دوو پەمپ لە لۆو لیفت یەك پەمپ لە مارعۆدا چاککرانەوە.
بەم چاکسازیانە کۆی گشتی ئاوی نێردراو بۆ شاری هەولێر لە ( 10400 ) مەتر سێجا / لە کاتژمێرێكدا بەرزبوویەوە بۆ ( 14600 ) مەتر سێجا لە کاتژمێرێكدا، واتا لە کۆی گشتی ئاو نێردراو لە ڕۆژێکدا 24960 مەتر سێجا لە ڕۆژێکدا بەرز بوویەوە بۆ ( 350400 ) مەتر سێجا لە کاتژمێرێكدا، لە کاتی ئێستاشدا گشت ووێستگەکان بە تەواوی توانای خۆیان کاردەکەن .
دووەم : بیرەکان
لەسەر بوودجەی تەنگەتاوی
15 بیر لێدراوە ( بێر کۆت ژمارە 2 ، تۆبزاوا احمد 1 ، باداوا 28، بنسلاوە 20 ، هاوکاری 10 ، بەحرکە 66 ، پۆلیسان 7، گردەڕەشەی بچووک 3 ، قەرەبووی ژیان ژمارە 22 ، مفتی ژمارە 9 ،هەرێم ژمارە 1 ، سەربەستی ژمارە 13 ، 94 باداوە ژمارە 40 ، گەرەکی ڕزگاری ژمارە 4 ، قەڵاتی نوێ ).هەروەها 10 بیری تر لەو چەند ڕۆژە دەست پێ دەکات ( بحرکە دوو بیر ، بنسلاوە دوو بیر ، بێرکۆتی نوێ یەک بیر ، دارەتوو دوو بیر ، باداوە یەک بیر ، پیرزین یەک بیر ، هەولێری نوێ ( سەربەخۆیی ) یەک بیر ).
لەسەر بودجەی پارێزگا متفرقە
5 بیر ( دارەتوو 94 گەڕەکی ژین ، کۆلێژی دەرمانسازی ، گەرەکی ژیان بدیل ژمارە 9 ، نەورۆز بدیل ژمارە 5 جهازی لەسەرە، بەشی ناوخۆیی 18 ی شوبات فەرمانی دەرچووە).
خێر خوازی
11 بیر لەم شوێنانە لێدراوە ( قەرەچناغە، ئازادی، شادی، دارەتوو، شاوێس، دارەتوو ، هاوکاری ، سەرکارێز، نازناز، بنسلاوە)، 5 بیریش لەسەر سندوقی گەشەپێدانی کۆمەڵایەتی عێراق بەسەرپەرشتی پارێزگای هەولێر لەم شوێنانە لێدراوە، (2 بیر لە گەزنە ، 1 بیر لە گوندی شێخە شەل ، 2 بیر لە باغەمرە شەهاب )
چاککردنەوەی بیرەکان :
زیاتر لە 622 ملیۆن دینار بۆ پێداویستی بیرەکان سەرف کراوە
تۆڕی ئاو:
30 کیلۆمەتر دانانی تۆڕی ئاو لە شاری هەولێر ئەنجام دراوە .
پڕۆسەی تانکەر
367 ملیۆن دینار پڕۆسەی تانکەر لەلایەن بەڕێوەبەرایەتی ئاوی هەولێر ئەنجامدراوە ( لەسەر بودجەی پارێزگا ى هەولێر، وەزارەتى شارەوانى ). ئەوەجگە لە بەستانوەی نزیکە 300 بیر کە لە ڕێگەی مولیدە ئەهلییەکان لەسەر بودجەی پارێزگای هەولێر، کارەبای 24 کاتژمێریان بۆ دابینکراوە.

قایمقامی عەنكاوە ڕایگەیاندووە، ئەنجوومەنی شارەوانی شاری ستێرلینگ هایتس لە ویلایەتی میشیگنی ئەمەریكی ڕەزامەندی نیشاندا لەسەر ئەوەی لەگەڵ عەنكاوە ببنە دەستەخوشك.

رامی نووری قایمقامی عەنكاوە ئاماژەی بەوە كردووە، ئەم دەستپێشخەرییە لە لایەن دامەزراوەی ڕەوەندی كلدانی لە ئەمەریكا لە مانگی نیسانی ئەمساڵ پێشكەش كرا، پێكەوە كاریان لەسەر كردووە و ڕەزامەندی فەرمانگەی پێوەندییەكانی دەرەوەی حكوومەتی هەرێمی كوردستان و پارێزگای هەولێریان وەرگرتووە.

قایمقامی عەنكاوە روونی كردەوە، لە ماوەی ڕابردوو لەگەڵ نوێنەرایەتیی حكوومەتی هەرێمی كوردستان لە واشنتن و ئیدارەی شارە ئەمەریكییەكە بەشێوەی ئۆنلاین كۆبوونەوەی هەفتانەیان هەبووە بۆ گفتوگۆكردن لەبارەی هەنگاوەكانی ئەو پرۆسەیە و هەموو ئەو خاڵە پێویستانەی هەبوون، هەردوولا ڕوونیان كردووەتەوە و تێگەیشتنی هاوبەش لەبارەیەوە دروست بووە.

لەبارەی ناوەڕۆكی ڕێككەوتننامەكە، قایمقامی عەنكاوە دەڵێت، چەند خاڵێك لەخۆدەگرێت، لەوانە ناردنی فەرمانبەرانی حكوومەت بۆ ڕا‌هێنان لە ئەمەریكا لەبارەی بەڕێوەبردنی كاروبارەكانی حكوومەت بەشێوەیەكی مۆدێرن، هەروەها لە بڕگەی دووەمی ڕێككەوتننامەكە باس لە ناردنی گەنجانی عەنكاوە دەكات بۆ ئەمەریكا بۆ ئەوەی ئاشنایی لەگەڵ فەرهەنگ و شێوازی ژیانی ئەو وڵاتە پەیدا بكەن و لە ڕووی سەركردایەتی و كاری پێكەوەییەوە ئامادە بكرێن بۆ داهاتوو.

هەروەها لە ڕووی ئاڵوگۆڕی كولتووریی و ڕۆشنبیریی هەردوولا پێوەندییەكانیان بەهێز دەكەن و سەردان و بەشداری لە چالاكییەكانی یەكتر دەكەن بۆ دروستكردنی ئاشنایەتی لەبارەی مێژووی ناوچەكە و ئەو پێكەوەژیانەی لە هەرێمی كوردستان هەیە، كە ئەنجوومەنی شارەكە سەرسامی خۆیان لەوبارەیەوە دەربڕیوە.

ئیدریس ئیسماعیل بۆ بازمیدیا:
ئەوانەی دەیانگوت نەوت رادەست بکەن، لەوکاتەوەی نەوت ڕادەستکراوە،بودجە نەنێردراوە و ورەیان لێنەهاتووە

ئەوانەی دەیانگوت نەوت رادەست بکەن ئەگەر بەغدا موچەی نەنارد وەرن گلەی لە ئیمە بکەن،لەو کاتەی نەوت رادەست کراوە تا ئێستا یەک مانگیش بە رێکو پێکی بەغدا پارە نەناردوە سەرەرای ئەوەی کە دادگای فیدرالی بریاری دابوو نابێت کێشەی موچە تێکەلی کێشەی سیاسی بکرێت ، هەر کاتێک دادگای فیدرالی بریارێک دژی کورد و کوردستان دابێت عیراقچیەکان دەیانگوت ئەمە بڕیاری دادگای فیدارلیە و بریارێکی قەتعیە و دەبێت جێبەجی بکرێت بەلام لە کاتی بریاردان لە بەرژەوەندی کوردستاندا و جێبەجێ نەکردنی ئەو بریارە لە لای وەزیری دارای عیراق هیچ لەو جاشانە ورەیان نیە یەک قسە دژی ئەو وەزیرە بکەن ،
من زور سەرسورماوم لە ئەوانەی بە ناو ئوپۆزسیۆن ، باشە تێگەیشتن لە هەرێمی کوردستان ئێوە هەر چی خراپە بە ناوی ئوپوزسیونەوە دەرهەق حکومەتی هەرێم دەلێن ، بەلام لە بەغدا لە جیاتی ئەوەی داوای مافی کورد بکن لەوێش دژی هەرێمی کوردستان کاردەکەن هەر وەکو لە عیراقیش پارتی حکومەت و دەسەلات بیت ، ئەگەر ئێستاش ئەو پسیارە ئاراستەی جاشەکانی بە ناو ئوپۆزسیۆن بکەین و بلێن کا موچەی خەلکی کوردستان بەدلنایەوە دەلێن حکومەتی هەرێم دەبێت پێشمەرگە و ئاسایش و چەک و جبەخانە هەموو رادەستی وەزارەتی بەرگری عیراق بکەن ، ئەوان ئامادەنە کوردستان بە دار و بەرد و ئاو خەلک و خاک و پێشمەرگەوە هەر هەموی رادەستی بەغدا بکەن ئەوان لە عیراق و عەرەبە شوفینیەکان زیاتر دوژمنی کوردستانن ، بەتایبەتی لەم روژانە کە هەلبژاردنی کوردستان لە پێشمانە جاشەکان هەمو هەول دەدەن بو نە ناردنی مووچەی خەلکی کوردستان بو ئەوە خەلک نارازی بیت ، بەلام خەلکی کوردستان چاک دەزانێت ئەوەی حکومەتی هەرێم بتوانێت بو خزمەتی خەلکی کوردستان درێغی ناکەن و جاشەکانیش هەر شەرمزار دەبن

ئیدریس ئیسماعیل، ئەندامی خولی پێنجی پەرلەمانی کوردستان. بۆ بازمیدیا

ئەمڕۆ چوارشەممە 21ی ئابی 2024، بە سەرپەرشتيی سەرۆک وەزیران مەسرور بارزانی و ئامادەبوونی قوباد تاڵەبانی، جێگری سەرۆک وەزیران، ئەنجومەنی وەزیرانی هەرێمی کوردستان کۆبووەوە.

لە بڕگەی یەکەمی کۆبوونەوەدا، دەرەنجامی کارەکانی لیژنەی وردبینيی هاوبەشی هەردوو دیوانی چاودێريی دارایيی فیدراڵ و هەرێم بۆ سێ مانگی یەکەمی 2024، لەبارەی داهات و خەرجی و میلاک و تۆماری بایۆمەتری و ژمارەی وەزیفيی یەکگرتوو، لەلایەن فەریق سلێمان، سەرپەرشتیاری دیوانی چاودێريی دارایيی هەرێم و هیوا ئەفەندی، سەرۆکی فەرمانگەی تەکنەلۆژیای زانیاری و سەفین غەفوور، ڕاوێژکار لە نووسینگەی جێگری سەرۆک وەزیران خرایە ڕوو.

ئەنجومەنی وەزیران وێڕای جەختکردنەوە لە سەرجەم وەزارەتەکان بۆ برەودان بە هەماهەنگیی پێویست لەگەڵ تیمە هاوبەشەکانی دیوانی چاودێریی دارایيی هەرێم و فیدڕاڵ لەپێناو لابردنی هەر ئاستەنگێکی تەکنیکی لە بەردەم خەرجکردنی مووچەی مانگانەی هەرێم لە کاتی خۆیدا، لە هەمانکاتدا ئەنجومەنی وەزیران دووپاتی کردەوە کە بەرپرسیارێتی وەزارەتی دارایيی فیدڕاڵە، مانگانە لە کاتی خۆیدا مووچەی هەرێمی کوردستان، هاوشێوەی ناوچەکانی دیکەی عێراق بنێرێت کە زیاتر لە 30 ڕۆژە، لیستی تەواوی مووچەخۆرانی هەرێم بۆ مانگی تەمموز بە سەرجەم زانیاریيە داواکراوەکان ڕەوانە کراوە، بەڵام بە داخەوە تا ئەمڕۆ مووچەی مانگی تەمموزی مووچەخۆرانی هەرێم خەرج نەکراوە، ئەمە لە کاتێکدایە کە مووچە بە بڕیاری دادگا بە دوورگیراوە لە ناکۆکیيەکانی نێوان هەردوو حکومەت بەو پێیەی مووچە، شایستەی دارایيی مووچەخۆرانە و نابێت تێکەڵی هیچ بابەتێکی دیکە بکرێت. لە هەمانکاتدا وەزارەتی دارایی و ئابووريی هەرێم سەرجەم پابەندییەکانی خۆی لە بەرانبەر وەزارەتی دارایيی حکومەتی فیدڕاڵ جێبەجێ کردووە لە ناردنی لیستی مووچەی سەرجەم مووچەخۆرانی هەرێم بە گشت زانیاریيەکانی تۆمارکراو لە داتابەیسی بایۆمەتری و دوای وردبینیکردنی لەلایەن دیوانی چاودێریی دارایی، سەرەڕای ناردنی تەرازووی پێداچوونەوەی مانگانەی داهات و خەرجیيەکانی هەرێم بۆ وەزارەتی دارایيی فیدڕاڵ لە کاتی خۆیدا و هەروەها مانگانە بەشی گەنجینەی فیدڕاڵی لە داهاتە نانەوتیيەکانی هەرێم بۆ وەزارەتی دارایيی فیدڕاڵ ناردووە.

ئەنجومەنی وەزیران هەروەها جەختی کردەوە ، كە نابێت بەهیچ جۆرێک هەبوونی تێبینی و سەرنج لە لایەن دیوانی چاودێریی دارایيی فیدراڵ ببێتە هۆی ڕاگرتنی خەرجکردنی مووچەی تەواوی مووچەخۆرانی هەرێم، وەک ئەوەی ئێستا لە لایەن وەزارەتی دارایيی فیدڕاڵەوە دەکرێت، ئەمە مامەڵەیەکی جیاکارییە لەگەڵ هەرێمی کوردستان، چونکە دڵنیاین، دیوانی چاودێريی دارایيی فیدڕاڵ، بەردەوام ڕاپۆرت لەبارەی کەموکورتییەکانی ژمێریاریی دامەزراوەکانی فیدڕاڵ پێشکەش دەکەن، بەڵام هیچ کات پەنایان بۆ دواخستن و نەناردنی مووچەی مووچەخۆرانی ناوچەکانی دیکەی عێراق نەبردووە، بۆیە پێویستە بە زووترین کات مووچەی مانگی تەمموزی مووچەخۆرانی هەرێم ڕەوانە بکرێت، وەزارەتەکانیش لە نزیکەوە کار لەسەر ڕاسپاردەکانی تیمی هاوبەشی هەردوو دیوانی چاودێریی دارایيی هەرێم و بەغدا دەکەن، بۆیە نابێت ڕاپۆرتەکانی چاودێريی دارایی، ببنە هۆکاری نەناردنی مووچەی مووچەخۆرانی هەرێم.

لە بڕگەی دووەمدا، ئامانج ڕەحیم، سكرتێری ئەنجومەنی وەزیران، ڕاپۆرتێکی لەبارەی کارەکانی لیژنەی هاوبەشی حکومەتی هەرێم و حکومەتی فیدراڵ خستەڕوو تایبەت بە یەکخستنی ڕێکار و ڕێنماییە داراییەکان لە نێوان هەرێم و حکومەتی فیدڕاڵی لە بواری دارایيی گشتی وسیستمە ژمێریاریيەکان، بە ڕەچاوکردنی تایبەتمەندێتی دەستووریی هەرێمی کوردستان، لەمبارەیەوە سکرتێری ئەنجومەنی وەزیران وردەکارییەکانی خستەڕوو.
ئەنجومەنی وەزیران، وەزارەت و لایەنە پەیوەندیدارەکانی ڕاسپارد هەماهەنگی لەگەڵ دیوان و سکرتاریەتی ئەنجومەنی وەزیران بکەن، بۆ گەڵاڵەکردنی ڕەشنووسی بڕیارێک لەمبارەیەوە، تا لە کۆبوونەوەی داهاتووی ئەنجومەنی وەزیران گفتوگۆی لەبارەوە بکرێت و بڕیاری پێویستی لەسەر بدرێت.

بڕگەی سێیەم تایبەت بوو بە گفتوگۆکردن لەبارەی هەماهەنگی نێوان کۆمسیۆنی باڵای هەڵبژاردنەکانی عێراق و سەرۆکایەتيی هەرێم و حکومەتی هەرێمی کوردستان، لەبەر ڕۆشنایيی دوا کۆبوونەوەی هاوبەش، لە ڕێککەوتی 8/14 و ڕاسپاردەکانی کۆبوونەوە تایبەت بە ئەرک و ڕۆڵی وەزارەتەکانی هەرێم لە پێشکەشکردنی ئاسانکاریی لۆجستی بۆ کۆمسیۆن، لەپێناو سەرخستنی ئامادەکارییەکانی پرۆسەی هەڵبژاردنی پەرلەمانی کوردستان لە 20 ی ئۆکتۆبەری ئەمساڵ.
ئەنجومەنی وەزیران پشتیوانیی خۆی بۆ سەرخستنی پرۆسەی هەڵبژاردن دووپات کردەوە و جەختی لە بەڕێوەبردنی هەڵبژاردنێکی بێگەرد لە کەشێکی ئارامدا کردەوە.

دوا بڕگەی کۆبوونەوە، پێشکەشکردنی ڕاپۆرتێک بوو لەلایەن کەمال موسلیم، وەزیری بازرگانی و پیشەسازی، سەبارەت بە پرۆسەی کڕینەوە و وەرگرتنی گەنمی جووتیارانی هەرێم و شایستە داراییەکانیان و بەبازاڕکردنی بەرهەمی گەنمی جووتیاران.

ڕونکردنەوەیەک لە وەزارەتی دارایی و ئابوریی / ژمێرکارییەوە.

ماوەی چەند ڕۆژێکە هەڵمەتێکی ناڕاست و ناڕەوا دژی وەزارەتی دارایی هەرێمی کوردستان لە لایەن بەشێک لە پەرلەمانتار و میدیاکان دەستی پێکردووە و دەیانەوێت هۆکاری نەناردنی مووچەی فەرمانبەرانی هەرێمی کوردستان بخەنە ئەستۆی حکومەتی هەرێمی کوردستان، لەو ڕێگایەوە چەندین زانیاری ناڕاست لەسەر لیستی مووچە بڵاو دەکەنەوە کە گوایە هۆکاری نەناردنی مووچە زیادبونی تەمویلی مووچەو ژمارەی فەرمانبەرو مووچەخۆرەو هتد….. ئەم چەند خاڵەی خوارەوە بۆ ڕای گشتی دەخەینە ڕوو.

١- سەبارەت بە دووبارە بونەوەی ناوی مووچەخۆران لە نێوان هەرێم و بەغداد، دوای بەدواداچوون دەرکەوتووە ئەو ناوانە هیچ کێشەیەکی یاساییان نییە و زۆربەیان فەرمانبەرن بەپێی یاساو دۆسیەی تەواویان هەیە بەڵام لە حکومەتی عێراق سودمەندن لە هاوکاری چاودێری کۆمەڵایەتی، واتە لەجیاتی ڕاگرتنی مووچە پێویست بوو وەزارەتی دارایی فیدراڵی هاوکاریەکە لای خۆیان ڕابگرن نەک مووچە، پێویست بوو لەکاتی بوونی سەرپێچی یاسایی لەلایەن هەردولاوە ئیجرائاتی پێویست بکرایە، هەندێک حاڵەتی بونی مووچەو هاوکاری لەیەک کاتدا بەپێی یاسا لە هەرێمی کوردستان ڕێگە پێدراوە، ئەگەر بەدەر لەم حاڵەتە دوبارە بونەوە هەبێت راستتر وابوو هاوکاریەکە ڕابگیرێت نەک مووچە لەبەرئەوەی فەرمانبەرەکە لەڕووی یاساییەوە بۆ پێدانی مووچە هیچ گرفتێکی نییە، وە ئەبوایە هەردوو وەزارەتی دارایی هەرێم و فیدراڵ لە ڕێی لیژنەی هاوبەشەوە بەدواداچون و وردبینیان بۆ دۆسیەکان بکردایەو چۆنیەتی سزاو بڕەکەیان دیاری بکردایە، کەڕەنگە هەندێک لەم حاڵەتانە نایاسایی نەبێت بەپێی یاسا بەرکارەکانی هەرێم.

٢- سەبارەت بە کێشەی نەبونی بایۆمەتری لە هەرێمی کوردستان، پێشتر ئاگاداری وەزارەتی دارایی فیدراڵمان کردووە کە پرۆسەی بایۆمەتری سەدا سەد بۆ مووچەخۆران و خانەنشینان نەکراوە بەهەندێک هۆکاری جیاواز لەوانە بونی وارسی خانەنشین و بەشێکی تریشیان لەدەرەوەی وڵات ژیان بەسەردەبەن و هتد….. ئەوەش بەو مانایە نایات ئەوەی کە بایۆمەتری نەبێت مووچەخۆر نییە، لەجیاتی ئیعتیماد لەسەر بایۆمەتری کە حکومەتی هەرێم بەفەرمی وتویەتی تەواو نەبووە، باشتربوو وەزارەتی دارایی حکومەتی فیدراڵی ئیعتیمادی لەسەر کارتی نیشتیمانی بکردایە کەهەموو هاوڵاتی و مووچەخۆرێک بەسەربازی و مەدەنیەوە هەیەتی لە تەواوی عێراقدا.

٣- بەشێکی تر لەو ناوە دوبارانەی لە لیستی مووچەدا هەیە بە تایبەت لە چەند وەزارەتێکى حکومەتى هەرێم کە یەکێک لە تێبینیەکانی تیمى هاوبەشە دواى بە دواداچوون لەگەڵ وەزارەتەکان دەرکەوتووە ناوی چواریان دووبارەیە بەڵام ناوی دایکیان و تەمەنیان جیاوازە ( تشابە الاسماء)، وەهیچ یاسا شکێنیەکی تیا نییە، بەڵام بەبێ گەرانەوە بۆ هەرێمی کوردستان وەزارەتی دارایی فیدراڵ بە نیازە مووچەیان ببڕێت ، شایەنی باسە وەزارەتی دارایی هەرێم ڕونکردنەوەی پێویستی لەسەر ئەم بابەتە بۆ ناردون.

٤- سەبارەت بە کێشەی مووچەی مامۆستایان و کارمەندانی پەروەردەی کەرکوک و فەرمانگەکانى ترى کەرکوک کە میلاکیان لەسەر حکومەتى هەرێمى کوردستانە ئەوەش کێشەیەکی کۆنەو لەدوای ساڵی ٢٠٠٣ وە بەردەوامە تاکو ئێستا وەکوو کێشەیەکی ماوە لەنێوان هەرێم و بەغداد درێژەی هەیەو پێویستی بەچارەسەری بنەڕەتی هەیە واتە ڕێکەوتنی سیاسی.

٥- سەبارەت بە زیاد بوونى تەمویلی مووچەى نێوان مانگى (٦و ٧)ـ ٢٠٢٤ ، بە پێی بڕیاری دادگای فیدراڵی دەبێت مووچەی فەرمانبەران و خانەنشینانی هەرێم هاوتای مووچەی فەرمانبەران و خانەنشینانی عێراق بکرێت، بۆ ئەم مانگە وەزارەتی دارایی هەرێم بەپێی بڕیاری دادگای فیدراڵی مووچەی خانەنشینانی هاوتا کردووەو بۆ وەزارەتی دارایی فیدراڵی ناردووەو بڕی (٥٤،٢٠٨،٠٠٠،٠٠٠) پەنجاو چوار ملیارو دووسەدو هەشت ملیۆن دینار زیادبووە، شایەنی باسە ئەگەر ئەم بڕە پارەیەی سەرەوە لە تەمویلی داواکراو بۆ مووچەی مانگی حەوت لاببەی ، تەمویلی داواکراو نزیکەی ٩٥٦،٨٧٦،٠٠٠،٠٠٠ نۆ سەدو پەنجاو شەش ملیارو هەشت سەدو حەفتاو ملیۆن دینار دەمێنێتەوە کەنزیک و هاوشێوەی تەمویلی پێنج مانگی ڕابردووە کە وەزارەتی دارایی فیدراڵی خەرجی کردووە.

لە کۆتایدا پێویستە هەموو لایەک ئاگادار بن حکومەتی هەرێم لەدوای ساڵی ١٩٩٢ وە دابڕانێکی دورو درێژی لەبواری سیستەمی کارگێڕی و دارایی و ژمێریاری هەبووە لەگەڵ حکومەتی فیدراڵی تا دەرچونی بڕیاری دادگای فیدراڵی لە شوباتی ئەمساڵ تایبەت بەمووچەی فەرمانبەران و خانەنشینانی هەرێمی کوردستان.

لەدوای ئەو بڕیارەوە هەردولا کاردەکەن بۆ ئەوەی ئیجرائاتە ئیداری و دارایی و یاسایی و ژمێریاریەکان یەک بخەن، کەئەمەش کارێکی ئاڵۆزو پڕ گرفتە.

ئێمە لەساڵی ڕابردووەوە کاری لەسەر دەکەین و بەردەوامیشین ، ئومێدەوارین تا کۆتایی ئەمساڵ سەرجەم کێشەکان چارەسەر بکرێن.

وە داواکارین لەوەزارەتی دارایی فیدراڵ هاوکار و هەماهەنگ بێت لەگەڵمان بۆ چارەسەر کردنی ڕێژەیەکی کەم لەو کێشە هونەریانەی تائێستا چارەسەر نەکراوە، نەک ئیجرائاتی (تعسف) ی بەرامبەر فەرمانبەران و مووچەخۆرانی هەرێمی کوردستان بکات.

چونکە پێمان وایە ناکرێت بەبێ وردبینی و بەدواداچوون لەو تێبینیانە مووچەی فەرمانبەران ببڕدرێت تەنها بەبڕیارێکی ئیداری.

بەبیر هەموو لایەکی دەهێنینەوە دوای ( ٣١ ) ڕۆژ لە ناردنی لیستی مووچەی فەرمانبەران و خانەنشینانی هەرێمی کوردستان بۆ وەزارەتی دارایی حکومەتی فیدراڵی، تا ئەم ساتە وەزارەتی دارایی عێراق تەنها بڕیاری خەرجکردنی ( ١،٤٢٦،٠٠٠،٠٠٠ ) تەنها یەک ملیارو چوار سەدو بیست شەش ملیۆنی دەرکردووە بۆ تەمویلی موچەی دیوانی چاودێری دارایی و دەستەی نەزاهە و دەستەی ژینگە، کە دەکاتە (%00.14)کۆی تەمویلی مووچەی مووچەخۆرانی هەرێمی کوردستان.

ئیتر مووچەخۆران و خانەنشینانی هەرێمی کوردستان خۆتان قەزاوەت بکەن کێشەکە ( ئیداری و دارایی و ژمێریارییە یان ســیاسـی)

بەڕێوبەرایەتی گشتی ژمێرکاری/ وەزارەتی دارایی و ئابوری. ٢٠٢٤/٨/٢١

هۆکاری کوشتنی کۆڵبەرە کوردەکەی دوێنیی سنووری هەڵەبجە لە لایەن یەکێتی ئاشکرا کرا

بەپێی زانیارییە بەردەستەکان ماوەی شەش مانگە یەکێتی لەڕێی وەهاب هەڵەبجەیی ، لەسنوری هەڵەبجە خەریکی سەرانە سەندنە لە خەڵکی ئاسایی و کۆڵبەرانی سەر سنور، هەر نەم هۆیەوە وەهاب هەڵەبجەیی کۆمەڵێک پیاوی خۆی بۆ ئەو کارە ڕاسپاردوە و هەر کەسێک سەرانە نەدات ناهێڵن لەسەر سنور کاری کۆڵبەری بکات! جێی باسە ئەگەر کەسی کۆڵبەر چاونەترس بێت و گوێ بە هەڕەشەی دژەتیرۆری یەکێتی و پیاوە ڕاسپاردەکانی وەهاب هەڵەبجەیینەدات و بەردەوام بێت لە کارکردن بەبێ سەرانەدان ، لەپشتەوە تە•قەی لێدەکەن بە مەبەستی کوشتن

جێی باسە نزیکەی 20ڕۆژ بەر لە ئێستا کۆڵبەرێک بەناوی (عومەر محمد) بەهۆی ئەوەی سەرانەی نەدابوو بە پیاوەکانی وەهاب و بەردەوام بوو لە کارکردن، لەلایەن یەکێک لە چەکدارەکانی وەهاب هەڵەبجەیی بەناوی (ئیبراهیم ئاوای) تەقەی لێ دەکرێت و بریندار دەکرێت!
ئەوکات بۆ ئەوەی بابەتەکە نەگاتە میدیاکان، هەرزوو کەسی تەقەکەر لەبەرچاوی خەڵک ون دەکەن و بە کەسوکاری کۆڵبەرە بریندارەکەش دەڵێن “دەسگیرمان کردوە و لەزیندانە”!!

شایەنی باسە دوێنێ هەمان ڕوداوی هاوشێوە دوبارە بویەوە کۆڵبەرێکی تر بەهۆی ئەوەی ئامادەنەبوو سەرانە بە پیاوەکانی وەهاب هەڵەبجەیی بدات، لەلایەن یەکێک لە پیاوەکانی وەهابەوە بەناوی (هەڵکەوت) تەقەی لێ دەکرێت و دە•کوژرێت،کو•ژرانی ئەم کۆڵبەرە ئاگری لە ناوچەکە بەردا و شەوی ڕابردوو کەسوکاری کوژراوەکە هێرشیان کردە سەر بارەگایەکی پاسەوانی سنور (واتا پیاوەکانی وەهاب هەڵەبجەیی) و بارەگاکەیان سوتاند.!

هەر بەپێی زانیارییەکان ئەمڕۆ کۆمەڵێک ئەفسەری پاسەوانی سنوور ویستیان بەژداری لە پرسەی ئەو کۆڵبەرەدا بکەن کە دوێنێ خۆیان کو*شتیان!، بەڵام لەلایەن کەسوکاری کۆڵبەرەکەوە دەرکران و ڕێگەیان پێ نەدرا بەژداری پرسەکە بکەن!!

تێبێنی /وێنەی لای ڕاست (عومەر محمد)ـی کۆڵبەری بریندار کراوە وێنەی لای چەپ، ئیبراهیم ئاوای پیاوی وەهاب هەڵەبجەییە کە عومەر محمدی بریندار کردوە!!