دەزگای خێرخوازی بارزانی و خەمی کوردانەی
شیروان عەبدوڵڵا:
هەندێک جار لێرە و لەوێ گلەیی و گازەندە دەبیستین و دەڵێن ڕێکخراوی خێرخوازی بارزانی جیاوازی ناکات لە نێوان ڕێبوارێکی ڕێی بارزانی و دژبەرێکی هەمان ڕێگا ، بەشێوەیەکی گشتی ئەگەر بەوردی سەرنج لە مێژووی پڕشانازی ئەم ڕێبازە پڕشکۆیە بدەین ئەوا دەبینین کە لە ڕابردوو ڕەوتی مرۆڤ دۆستانە و هەستی نەتەوەیی چۆن بووە و لەداهاتوویشدا چۆن ڕێدەکات، کاروانی خەباتی کوردایەتی ڕێبازی بارزانی بەبێ جیاوازی بووە و هەر چوارپارچەی کوردستانی کردووەتە یەک ماڵ و وەک یەک سەنگەری بەرگری سەیری کردووە، ئەوەی دەبینن کە لە باکوور و ڕۆژئاوای کوردستان ڕوو دەدات ئەو خەباتە نەپساوەیەیە کە سەدەیەکە یار و نەیار ناتوانن لەمپەری بۆ دروست بکەن و خۆیان لە ڕاستی ڕووداوەکانی مێژوو بدزنەوە.
لەسەر پارتی بوون و شێوازی کاری پارتایەتی لە بارزانی نەمر دەپرسن کێ پارتی یە ئەویش لە وەڵامدا دەڵێت ” کوردێکی باش لە هەر جێگایەک بێت ئەوە پارتی یە ” ئەم وتە بەنرخە لە خەمی کورد بوون و هەستی نەتەوەیی یەوە سەرچاوەی گرتووە، کەواتە دەبێت هەموان هەمان خەمی خەڵک بێت و کارە مەزنەکانی ئەم ڕێکخراوە مەزنە کەلە ژێر ناوی بارزانی و وێنەی بارزانی نەمردا کار و خزمەت دەکەن بە گەورەیی بهێڵینەوە چونکە خەباتی نەپساوەی گەلی کورد لە هەر چوارپارچەی کوردستانە
بۆیە دەبێت بە هێزی مەنتق بیسەلمێنین کە سنوورەکان دەسکردن و هیچ لەمپەرێک ڕێگر نابێ لەبەردەم خەباتی نەتەوەییمان خەمخۆری مرۆیی خەڵکی کوردستان جا لە هەر جێگایەک بێت.