مەسرور بارزانی : پلانی چاکسازی هەمەلایەنەمان هەیە

ئه‌مڕۆ پێنجشەممە 6ی تشرینی یەکەمی 2022، مه‌سرور بارزانی، سه‌رۆكی حكومه‌تی هه‌رێمی كوردستان له‌ شاری هه‌ولێر ئاماده‌ی کۆنفرانسی تێپەڕبوونی یەک ساڵ بەسەر جێبەجێکردنی پلانی هەرێمی کوردستان بۆ مافەکانی مرۆڤ بوو و تێیدا گوتارێكی پێشكه‌ش كرد:

پوختەیەک لە گوتەکانی سەرۆکی حکومەتی هەرێمی کوردستان:

* ئەم پلانە نەخشەڕێگەیەكی گشتگیرە كە لە لایەن حكومەتی هەرێمی كوردستانەوە پەسەند كراوە لەپێناو برەودانی زیاتر بە پاراستنی مافەكانی مرۆڤ لە هەرێمی كوردستان لە ماوەی پێنج ساڵی داهاتوودا لە هەموو بوارەكاندا.

* پاراستن و پەرەپێدانی مافەكانی مرۆڤ بەشێكی گرنگ و سەرەكییە لە كارنامەی كابینەی نۆیەمی حكومەتی هەرێمی كوردستان لە بواری پاراستن و داكۆكیكردن لە پێكەوەژیانی ئاشتییانەی نێوان پێكهاتە جیاوازەكانی هەرێم و بەهێزكردنی بنەماكانی ئازادی و دیموكراسی و نەهێشتنی توندوتیژی و توندڕەوی و دەمارگیری و جیاكاریی رەگەزی و پاراستنی مافەكانی مرۆڤ بە گشتی.

* پابەندبوونی حكوومەتی هەرێمی كوردستان بە پەرەپێدانی كەلتووری پێكەوەژیانی ئایینی و نەتەوەیی و پاراستنی ئازادییە تاكەكەسی و گشتییەكان و بەرگریكردن بە بەها دیموكراسییەكان دووپات دەكەینەوە.

* پلانێكی چاكسازیی هەمەلایەنەمان هەیە، پشت بە خوا و خەڵكی كوردستان و دۆستانمان لە كۆمەڵگەی نێودەوڵەتی، بەربەست و ئاستەنگەكان تێپەڕێنین و بەرەو قۆناغێكی پێشكەوتووتری حوكمڕانی هەنگاو بنێین.

* دەمانەوێت خزمەتكردنی هاووڵاتییان و پاراستنی مافەكانیان سەنتەری گرنگیپێدان و ئامانجی لەپێشینەی حكومەت بێت.

* پلانی هەرێمی كوردستان بۆ مافەكانی مرۆڤ بەشێكە لە پرۆسەی چاكسازیی كابینەی نۆیەم.

* بە بەراورد بە زۆر لە وڵاتان هەرێمی كوردستان لە ئاستێكی بەرزدایە، بە تایبەتی لە بوارەكانی یاسای پاراستنی مافی پێكهاتەكان، یاسای بەرەنگاربوونەوەی توندوتیژیی خێزانی، یاسای پاراستنی مافەكانی منداڵان، یاسای رۆژنامەگەری و چەندین یاسای دیكە.

* حكومەتی هەرێمی كوردستان هەنگاوی زۆری ناوە بۆ سووككردنی ئازارەكانی كەسوكار و قوربانییانی دەستی تیرۆریستانی داعش، هەروەها ڕۆڵێكی گرنگ و بەرچاوی هەبووە لە ئازادكردنی ڕفێندراوانی ئێزیدی و پێكهاتەكانی تر لەدەست تیرۆریستانی داعش و بەجینۆسایدناساندنی تاوانەكانی داعش وەك تاوانی جەنگ.

* حكومەتی هەرێم بە پشتیوانیی كۆمەڵگەی نێودەوڵەتی و تیمی نەتەوە یەكگرتووەكان بۆ لێپێچینەوە لە تاوانەكانی داعش پرۆژەیاسایەكی پێشكەش بە پەرلەمان كرد بۆ دامەزراندنی دادگایەكی تایبەتمەند بە دادگاییكردنی تیرۆریستانی داعش لەسەر تاوانە نێودەوڵەتییەكانیان، دادگای باڵای بەناو ئیتیحادیی عێراق پرۆژەیاساكەی ڕەت كردەوە كە ئەمەش پێشینەیەكی نوێ و جێی سەرسوڕمان بوو كە ڕێگە لە دادگاییكردنی تیرۆریستانی داعش بگیرێت.

* پلانی هەرێمی كوردستان بۆ مافەكانی مرۆڤ، داڕشتنی میكانیزمێكە بۆ پێداچوونەوە بە تەواوی یاسا بەركارەكان و گونجاندنیان لەگەڵ ڕێككەوتننامە و پەیماننامە نێودەوڵەتییەكان.

* حكومەتی هەرێم نموونەیەكی سەركەوتووە لە برەودان بە دیموكراسی و داكۆكیكردن لە بەها دیموكراسییەكان، لەوانەش مافی ئازادیی ڕادەربڕین.