محەمەد شیاع سوودانی پێشوازی لە وەزیری تەندروستی حکومەتی هەرێمی کوردستان کرد
محەمەد شیاع سوودانی سەرۆک وەزیرانی عێراقی فیدڕاڵ پێشوازیکرد لە د. سامان بەرزنجی وەزیری تەندروستی حکومەتی هەرێمی کوردستان.
لە کۆبوونەوەیەکدا بەئامادەبوونی بەڕێز (د. ساڵح حەسناوی) وەزیری تەندروستی عێراقی فیدڕاڵ، بەڕێز وەزیری تەندروستی حکومەتی هەرێم وێڕای سوپاس و پێزانینی بۆ ئەم پێشوازی و دیدارە، پەیوەندی پتەو و هەماهەنگی و کاری هاوبەشی لەگەڵ تەندروستی عێراق دەربڕی، لە ڕاپۆرتێکدا پوختەیەک لەسەر ڕەوشی تەندروستی و نیشاندەرەکان و کاروچالاکیەکان و خزمەتگوزاری تەندروستی لە هەرێمی کوردستان خستە ڕوو لەگەڵ تاوتوێکردن و دەستنیشانکردنی کێشە و گرفتەکان و داواکاریەکان پەیوەست بە تەندروستی ئاوارە و پەناهەندەکان و کەمپەکان و نەخۆشانی دەرەوەی هەرێم بۆ ناو هەرێم و پێویستیەکانی دەرمان و پێداویستی پزیشکی و دابینکردن و سازدانەوەی ئامێری پزیشکی ستراتیجی و بەشەبوودجەی تەندروستی لە بوودجەی حاکیمە لە عێراق و هەماهەنگی کردن بۆ ڕێککارەکانی چاکسازیکردن لەبواری دەرمان و پێداویستی پزیشکی بۆ تۆمارکردن و پشکنین و هاوردەکردن و پێدانی مۆڵەتی بەکارهێنان لە کەرتی گشتی و تایبەت و بەشداریپێکردنی هەرێم لە پڕۆژەکانی نیشتمانی دابینکردنی خزمەتگوزاریەکانی تەندروستی و پڕۆژەکانی بەخشین و قەرزی نێودەوڵەتی بۆ دروستکردنی نەخۆشخانەکان و تەرخانکردنی دەرمان و پێداویستی پزیشکی بۆ پارێزگای هەڵەبجە و نەخۆشخانەی بەرکەوتووانی چەکی کیمیاوی هاوشێوەی پارێزگاکان و پڕۆژەکانی ئاوەدانکردنەوەی ناوچەکانی زیانلێکەوتووان و قوربانیانی بەرەنگاربوونەوەی تیرۆرستان لە هەرێمی کوردستان.
بەڕێز سوودانی سەرۆک وەزیرانی عێراق، جەختی لەسەر پێویستی هەماهەنگی بەردەوامی نێوان وەزارەتەکانی تەندروستی فیدراڵی و تەندروستی هەرێم کردەوە بۆ یەکخستنی هەوڵەکانی تەندروستی بۆ تێپەڕاندنی ئاستەنگەکانی بەردەم دابینکردنی باشترین خزمەتگوزاری تەندروستی بۆ هاوڵاتیان.
لەکۆتاییدا سەرۆک وەزیرانی عێراقی فیدڕاڵ، بڕیاریدا بە ڕەوانەکردنی داواکاری و کێشە هەڵپەسێردراوەکان بۆ ئەنجومەنی ئابووری لە حکومەتی عێراق و لایەنە پەیوەندارەکان و هەوڵی زیاتری دابینکردنی بەشە بوودجەی پێویست بۆ دابینکردن و سازدانەوەی ئامێرە پزیشکیەکان و دانانی لێژنەیەکی هەماهەنگی هاوبەش تایبەت بۆ چارەسەرکردنی گرفتەکانی تەندروستی لەگەڵ سوپاس و دەستخۆشی لە بەڕێز وەزیری تەندروستی حکومەتی هەرێمی کوردستان و سەرجەم دامودەزگاکانی تەندروستی و پزیشکان و کارمەندانی تەندروستی لە هەرێمی کوردستان کرد بۆ هاوکاری و هەماهەنگی و پاڵپشتیکردنی تەندروستی هاوڵاتیان لەڕابردوو و ئێستادا بۆ بەرەنگاربوونەوەی قەیران و ڕووداوەکان.