بە بڕیاری مەسرور بارزانی ژمارەیەک پڕۆژە لە خورماڵ جێبەجێ دەکرێن
سەرۆکی حکومەتی هەرێمی کوردستان دوای بڕیاری بە قەزاکردنی خورماڵ، وەڵامی داواکارییەکانی خەڵکی قەزاکە دەداتەوە و بڕیاری جێبەجێکردنی ژمارەیەک پڕۆژەی دا.
ئەمڕۆ دووشەممە 31ـی 07ـی 2023 فەرمانگەی میدیا و زانیاری ڕایگەیاند: مەسرور بارزانی سەرۆکی حکومەتی هەرێمی لێژنەیەکی تایبەت ڕادەسپێرێت بۆ ئەنجامدانی کۆمەڵێک پڕۆژە لە خورماڵ و جێبەجێکردنی ژمارەیەک داواکاری هاونیشتمانییانی قەزایەکە.
ئەمە لەکاتێکدایە کە دوێنێ شەو وەزاره‌تی ناوخۆ له ڕاگه‌یه‌نراوێكدا ڕایگه‌یاند “دوای ئەوەی دانیشتووانی ناحیەی خورماڵ لە ڕێی کەمپەین و داواکارییەکانیان، داوای بە قەزاکردنی ناحییەکەیان بەرز کردەوە، مەسرور بارزانی سەرۆکی حکومەتی هەرێمی کوردستان فەرمانی بە وەزارەتی ناوخۆ کرد کە بە هەماهەنگی لەگەڵ پارێزگای هەڵەبجە، دەست بە ڕێکارە کارگێڕییەکان بکەن و ئامادەکارییەکان بۆ هێنانە کایەوەی قەزای خورماڵ تەواو بکەن”.
ئەوەشی خستەڕوو کە “لەسەر فەرمانی سه‌رۆكی حكومه‌ت، لە بەیانی ڕۆژی دووشەممە ڕێکەوتی 31ی تەمووزی 2023 وەزارەتی ناوخۆ ڕێکارە کارگێڕییەکان و هەنگاوی کرداری هێنانەکایەوەی قەزای خورماڵ دەست پێ دەکات.”