له هه‌ژماری تایبه‌تی خۆی له تۆڕی كۆمه‌ڵایه‌تی تویته‌ر، سه‌رۆك وەزیران مه‌سرور بارزانی نووسیوویه‌تی: بڕیاری ٦٨٨ی ئەنجوومەنی ئاسایشی نەتەوەیەکگرتووەکان، رێگەی بە گەیاندنی هاوکاری مرۆیی بۆ خەڵکەکەماندا، کە لە چیاکاندا گیریان خواردبوو.
هه‌روەها سه‌رۆك وەزیرانی هه‌رێمی كوردستان له تویته‌كه‌یدا نووسیوویه‌تی: بڕیاری ٦٨٨ رێگا خۆشکەر بوو بۆ ئێمە، بۆ ئەوەی بەشێوازی خۆمان حکومڕانی گەلەکەمان بکەین.
لە رۆژی ٥ـی نیسان / ئه‌پرێلی ١٩٩١، ئەنجوومەنی ئاسایشی نێودەوڵەتی بڕیارێکی گرنگ و مێژوویی بە ژمارە (٦٨٨) بۆ پاراستنی کورد لە هێرش و هەڕەشەکانی رژێمی عێراق بەسەرۆکایەتی سەدام حسێن، دەرکرد.
له دانیشتنی ژمارە (٢٩٨٢)ـی ئەنجوومەنی ئاسایشی نێودەوڵه‌تی، به زۆرینەی دەنگ بڕیاری (٦٨٨)ی دەرکرد و تەنیا سێ وڵات لەگەڵ بڕیارەکە نەبوون، ئەوانیش بریتی بوون لە (زیمبابۆی، کوبا و یه‌مه‌ن)، دوو ئه‌ندامیش کە (چین و هیند) بوون، له ئاست بڕیارەكه بێلایه‌نییان نواند.
ئەم بڕیارە بەتەنها بریتی نەبوو لە پاراستنی کورد لە هەڕەشەکانی سەدام لەعێراقدا، بەڵکو هێڵێکی جیاکەرەوەشی لەنێوان کوردستان و بەشەکانی دیكه‌ی عێراق دروستکرد، کە بە هێڵی (٣٦) ناسراوە، بەوەش کورد تاڕادەیەک لەمەترسییەکانی سەدام رزگاری بوو، کۆتایی بەدەسەڵاتی حکومەتی عێراق لەناوچە کوردییەکان هات.
دەرکردنی ئەم بڕیارە هه‌رێمی كوردستانی بردە قۆناغێکی نوێوە، بەجۆرێک توانی هەر سێ پارێزگای هەولێر، سلێمانی و دهۆک وەک هەرێمێکی سیاسی و ئیداری جیاواز لە دەسەڵاتی حکومڕانی سەدام پێکبێنێت و کەوتە ژێر چاودێری ئەمه‌ریکاو کۆمەڵگەی نێودەوڵەتییەوە.