هاوپۆل: وتار

یەکێتی چی چاندووە ئەوە دەدورێتەوە، بۆیە هەڵبژاردن ناکا!

مەسەلەی هەڵبژاردن و پیادەكردنی دیموكراسیەت لە كوردستان و عێراقدا بە زەمانەتی دەستووریی و ماددەكانی (5 و 6)ـی دەستووری هەمیشەیی دەستەبەركراون و ماددەی (46)ـیش قەدەغەی هەر جۆرە كۆتبەندكردنی ئەو ماف و میكانیزمە دیموكراسییەی كردووە.
مایەی نیگەرانییە كە هێشتا لە كوردستاندا حزب هەبێ ماف بە خۆی بدات كە پرۆسەی دیموكراسیەت و هەڵبژاردن بە بارمتە بگرێت و لە ترسی شكست و تۆڵەلێكردنەوەی دەنگدەران هەموو ڕێگە و شێوازێك بۆ دروستكردنی بەربەست بۆ ئەنجامدانی هەڵبژاردن، بگرێتە بەر.
حزبی حوكمڕان و خاوەندیدگا و بەرپرسیار ئەمە ناكات. حزبێك لەگەڵ خودا و خەڵك و خۆی پاك بێت و ترسی لە ڕق و تۆڵەكردنەوەی دەنگدەر نەبێت، ئەمە ناكات،بەڵكو ئەمە خەسڵەتی حزبی ئینتهازی و لۆكاڵی و ڕاوێژی “ئەم” و “ئەوە”. ئەمە ڕەفتاری حزبێكە كە دووچاری گرووپێكی “كاڵفام”ـی خۆسەپێن بووەتەوە، كە وێڕای وونكردنی ناسنامەی حزبەكە، خەریكە كوردستانیش، بەهەڵە و هەڵەكانی دووچاری گرفتی گەورە دەكات.

لە ماوەی یەك ساڵی ڕابردوودا، بیانوو نەما كە یەكێتی هەنگاو بە هەنگاو بۆ لەمپەر دروستكردن لەبەردەم پرۆسەی هەڵبژاردندا دروستی نەکا، لە بەرامبەردا هەمووی پووچەڵ کرانەوە، تەنها لە پێناو ئەنجامدانی هەڵبژاردندا مەرج و داواكارییە تەعجیزییەكانیشی ڕێككەوتننیان لەبارەوە كران. بەڵام حزبێك دڵنیایە لەوەی لە سیاسەتدا “چی بچێنی ئەوە دەدووریتەوە” و دەزانێ چی بەسەر هاووڵاتیانی دەڤەری ئازیزی سلێمانی و هەڵەبجە و گەرمیان و ڕاپەڕیندا هێناوە و چۆنیش سەرجەم هاووڵاتیانی كوردستانی دووچاری دڵەڕاوكێ كردووە و هەوڵی زەوتكردنی مافی دەستوورییانەی خۆیان لە هەڵبژاردن كە پێی ماددەی (20)ـی دەستوور بۆیان دیاریكراوە لە هەڵبژاردن و خۆكاندیدكردن دەدات، ئیتر چۆن مل بە هەڵبژاردن دەدات.

حزبێك كە بەهۆی هەڵپەی خۆدزینەوەی لە دادگاییكردنی گەل و ملكەچبوون بۆ حوكمی گەلەوە سڵ لە هیچ هەنگاوێك نەكاتەوە، تەنانەت ئەگەر بەرزكردنەوەی سكاڵاش بێت لەسەر ئەو سەرۆكی پەرلەمانەی كە خۆی دواجار ماوەیەك لەمەوبەر بە دەنگی بەرز هاواری كرد كە “دەست و پێم بەستراوە و كۆت كراوە”.

حزبێك كە لە “ئەلف و بێی” یاسا و دەستوور هێشتا تێنەگەیشتبێت و نەزانێ ئەوە دەسەڵات و ئەركی بەناو دادگای فیدڕاڵی نییە كە شوێنی پەرلەمانی كوردستان بگرێتەوە و یاسای هەڵبژاردنی كوردستان هەموار بكاتەوە؟
حزبێك لەبەر سەرقاڵبوونی بە تیرۆری فكری و جەسەدی یار و نەیارەكانی خۆیەوە، نەپرژاوە تەماشایەكی ماددەی (93)ـی دەستوور بكات و تێ بگات كە دادگای بەناو فیدڕاڵی چۆن و بەرمەبنای كام بڕگە دەتوانێت پرسگەلێك كە 100% لە چوارچێوەی دەسەڵاتە دەستوورییەكانی كوردستاندایە، دەستكاریی بكات؟
بەڵام هێشتا دڵنیا بن كوردستان هەڵبژاردن ئەنجام دەدات، دەسەڵات لە كوردستاندا بە “خۆسەپاندن” نە وەردەگیرێت نە بەردەوام دەبێت.
هۆكاری ئەم “كەین و بەینانەتان” هەرچییەك بێت، فەرمانەكەتان بە هەر زمانێ بۆ دەركرابێ كە ئەم كارانە بكەن، دەستەوایی و دانەوەی قەزر و تەسفەیەی خیانەتی 16ـی ئۆكتۆبەر بێ، یان بە دیهێنانی ئەو خەونە بێ كە پێشینە و مامۆستاكانتان بردیانە گڵەوە، سەرەنجام هەر دەبێ ئەنجامی تۆڵەی كوردستانیان لەم “لەتە”حزبەی ئێستاتانەوە ببینن.
جوان یونس ڕۆژبەیانی

‎بکوژ و داڵدەدەر
‎لەنێوان یاسا و پاشاگەردانیدا

‎هاودەنگ فارووق:

‎ئاسایشی هەولێر دەڵێ: عەلی مەحموود، له‌سه‌ر ئه‌وه‌ ده‌ستگیرکراوه‌، که‌ بکوژه‌که‌ی (کاوه‌ بازیانی) لە هەولێر حه‌شارداوه‌.
‎ئەوەی جێگەی هەڵوێستەی جدییە، پێویستە خەڵك لەپێش حكوومەتەوە سەرنجی لێ بدەن: تاكەی میدیاكان دۆخی دەروونیی خەڵك تێكدەدەن و کەیسەکان بەلاڕێدا دەبەن؟ باشە پرسێك تاكوو نەبووبێتە زانیاری ڕاستیی بەرجەستە، چۆن و بە چ شێوازێك میدیا دەیگوازێتەوە؟

‎ ئایا میدیا دەبێت زانیاریی دروست بگوازێتەوە، یان گومان و ڕاڕایی دروست بکات؟ پێش ئەوەی زانیاری هەبێت، بەگومان و پاڵنەری سیاسی، دۆسییەكان بەلاڕێدا بەرێت؟ ئایا كێ باجی ئەم بێسەروبەریەی میدیا و مەعمەعەی سیاسی دەدات؟ سەندیكای ڕۆژنامەنووسانی كوردستان، لەم نێوەدا لەبەردەم بەرپرسیارێتی و ئەركێكی قورس دایە؟ پێداچوونەوە بە یاساو ئیتیكی كاری ڕۆژنامەوانی و میساقی شەرەفی ڕۆژنامەگەری، ئیدی دەبێتە ئەرك، چونكە ڕۆژ بەڕۆژ میدیا لەكاری خۆی دووردەكەوێتەوە، پێویستی بەڕێكخستنەوە هەیە!

‎ڕۆژنامەنووس و نووسەران بەردەوام داكۆكی لە سەروەریی یاسا و ئارامیی كۆمەڵگە دەکەن، بەڵام چۆنە لەدۆسیەیەكدا بێ ئەوەی زانیاری تەواویان هەبێت، قسەی لەگۆترەی تێدا دەكەن ، هەڵوێست دەردەبڕن؟ ئاخر هەڵوێستەكان دەبنە مێژوو، چۆن دەگونجێت نووسەران و ڕووناكبیران و ڕۆژنامەنووسان ڕێگە بدەن لەسەر بنەمای زانیاریی هەڵە مێژووی ڕۆشنبیریی خۆیان بنەخشێنن؟ ئەو پەلەكردنە لە دەربڕینی هەڵوێست، دواجار بە زیانی هەڵوێستی مێژوویی نووسەران دەشكێتەوە!

‎پرسیارێك، كە پێویستە لەو ڕۆژنامەنووس و ڕۆشنبیرانە بكرێت، كە لەم دۆسیەیەدا پێشوەختە قسەیان كرد و بەهەڵەدا چوون: ئایا ئێوە لەگەڵ ئەوەدان بكوژ داڵدە بدرێت؟ وەڵامەكەی بۆ خودی ئەو نووسەرانە بەجێ دێڵین. بەڵام دڵنیاین لەوەی زۆرینەی ڕەهای نووسەران، بەوانەشەوە كەبەهۆی دڵگەرمییانەوە، یان بە پاڵنەری سیاسی پێش ڕووداوەكە كەوتن، پێیان قورسە بەرگری لە داڵدەدانی بكوژ بكرێت. چونكە ئەستەمە نووسەرێك بتوانێت لەیەك كاتدا داوای سەروەری یاسا بكات و، لە هەمانكاتیشدا داوای بەرگریكردن بكات لە داڵدەدەری بكوژ و پێشێلی یاسا،
‎تەنانەت ئەگەر مەبەست ئەوەبێت كە كەسی كوژراو تاوانباربووبێت، هێشتا تۆڵەی شەخسی لەو تاوانبارەش هەر پێچەوانەی یاساییە و پێویستە یاسا تۆڵە بۆ هەموو ستەملێكراوێك بكاتەوە، نەك هەركەس بۆی گونجا تۆڵە لەبەرانبەری بكاتەوە، ئەوكاتە لەبری كۆمەڵگەیەك كەتیایدا سەروەری یاسا پایەداربێت، كۆمەڵگەیەك دێتە پێشەوە كە سیخناخ دەبێت لە پاشاگەردانی و تاوانكاری.

‎ ئایا نووسەران بەرگری لەوە دەكەن كە پاشاگەردانی هەبێت و هەركەس بۆخۆی تۆڵە بكاتەوە لەوانەی كە زیانێكی پێدەگەیەنن؟
‎بۆیە بەبێ دوودڵی دەڵێین: تەنانەت ئەگەر كاوە بازیانی جاشیش بووبێت و تاوانباریش بووبێت، نابێت نووسەران و ڕۆشنبیران پشتیوانی لەوە بكەن كە كەسێك وەك شەخسی خۆی هەستێت تۆڵەی لێبكاتەوە، بەڵكوو پێویستە هەمووان هەوڵ بدەین دادگا و یاسا، تۆڵە لەهەموو ئەو كەسانە بكاتەوە كە ڕۆژێك لەڕۆژان خزمەتێكیان بەداگیركەرانی كوردستان كردووە بەبێ جیاوازی.

پشته‌وەی راپۆرته‌كه‌ی ئاژانسی مۆنیته‌ر و دژە تیرۆری یه‌كێتی

ئەسرین عاسی شوانی، نووسیویەتی:

ئه‌وەی ئاژانسی مۆنیته‌ری ئه‌مریكی له‌بارەی هه‌وڵی تیرۆركردنی (مه‌زڵوم عه‌بدی فه‌رماندەی په‌كه‌كه‌ له‌ ڕۆژئاوای كوردستان) باسكراوە كه‌ دزە به‌شوێنی نیشته‌جێ بوونی كراوە له‌ناو دژە تیرۆری یه‌كێتییه‌وە، رێك ئه‌و راپۆرته‌مان بیردەهێنێته‌وه‌ كه‌ چه‌ند ساڵ پێش ئێستا ئاژانسه‌ ئه‌مریكیه‌كان بڵاویان كردەوە كه‌ هه‌مان دەزگای یه‌كێتی نیشتیمانی كوردستان چۆن هاوكار بووە له‌ كوشتنی قاسم سلێمانی، یه‌كێتی و دژە تیرۆری یه‌كێتی به‌م هه‌نگاوە ئه‌وەندەی دیكه‌ بوەته‌ جێگای ترس بۆ وڵاتانی دەوروبه‌ر و ئه‌مریكاش چونكه‌ دەركه‌وت دەستی زۆر سیخور و جاسوس له‌ناو دژە تیرۆری یه‌كێتی هه‌یه‌، و به‌هۆی ئاشكراكردنی شوێنی مه‌زڵوم عه‌بدییه‌وە، مه‌ترسی گه‌ورەشی له‌سه‌ر هێزی هاوپه‌یمانان دروستكرد كه‌ دوای ئه‌م رووداوە ئاسته‌مه‌ هاوپه‌یمانان جارێكی دیكه‌ سیقه‌ به‌ دژە تیرۆری یه‌كێتی بكه‌ن، له‌لایه‌ك ئامانجه‌كانی ئه‌مریكایان ئاشكرا كرد بۆ توركیا له‌لایه‌كی دیكه‌وە له‌سه‌ر كوشتنی خوێنی عه‌بدی، ویستیان فه‌وزایه‌ك له‌ ناوچه‌كه‌ دروست بكه‌ن، ئێستاش كه‌ حكومه‌تی هه‌رێمی كوردستان و عێراقیش ئاگادار نه‌بوون له‌و پیلانه‌ و به‌بێ ئاگاداری هه‌ردوو حكومه‌ت یه‌كێتی ئه‌م كارەی كردووە به‌رپرسیاریه‌تی یه‌كه‌م له‌ ئه‌ستۆی حكومه‌تی عێراقه‌ لێكۆڵینه‌وە بكات چونكه‌ به‌بێ ئاگاداری ئه‌وان فه‌رمانده‌یه‌كی په‌كه‌كه‌ كه‌ داواكراوە له‌لایه‌ن توركیاوە به‌بێ فیزە و به‌بێ مۆڵه‌تی فه‌رمی هێنراوەته‌وە ژوورەوە، سیناریۆكانی دژە تیرۆری یه‌كێتی بۆ كوشتنی مه‌زڵوم عه‌بدی زۆر نزیكه‌ له‌ سیناریۆی كوشتنی قاسیم سلێمانی، هه‌ردووكیان زانیاری له‌ناو دەزگای ئه‌منییه‌وه‌ چووەته‌ دەرەوە هه‌ردوو رووداوەكه‌ له‌دەرەوەی فڕۆكه‌خانه‌ و له‌ نزیكی سیاجی فرۆكه‌ خانه‌بووە، هه‌ردووكیان سه‌رەتای فڕۆكه‌خانه‌یان جێهێشتووه‌ دواتر به‌ ئۆتۆمبیل بۆ شوێنێكی نادیار گوازراونه‌ته‌وە، ئه‌مانه‌ كۆدی نهێنین په‌كه‌كه‌ش ئێستا به‌گومانه‌ له‌ یه‌كێتی.

به‌پێی ئه‌و زانیاریانه‌ی هه‌یه‌ یه‌كێتی لێژنه‌یه‌كی لێكۆڵینه‌وه‌ی دروستكردووە بۆ ئه‌وەی بزانێت چۆن ئه‌م زانیاریه‌ له‌ناوخۆیانه‌وە دزەی كردووە بۆ توركیا ئه‌گه‌ری هه‌یه‌ له‌سه‌ر ئه‌م رووداوە ته‌سفیه‌ی جه‌سته‌ی ناوخۆیی ده‌ست پێبكات وەك تیرۆری هه‌ندێك كه‌سایه‌تی له‌ناو دژه‌ تیرۆر ئه‌گه‌ری دیكه‌ش هه‌یه‌ به‌وەی په‌كه‌كه‌ داوای روونكردنه‌وە له‌یه‌كێتی بكات كه‌ چۆن به‌ ئاسانی ئه‌و زانیاریه‌ دزەی كردووەته‌وە توركیا سایتی مۆنیته‌ری ئه‌مریكی له‌خۆیه‌وە ئه‌و راپۆرته‌ی بڵاو نه‌كردووەته‌وە سه‌رچاوه‌كانی باورپێكراون چونكه‌ پێش ئه‌وه‌ی بڵاوی بكه‌نه‌وە زانیاریان هه‌بووە كه‌ ئه‌گه‌ر زانیاریه‌كانیان ته‌واو نه‌بێت ئه‌گه‌ری هەیە داوای یاساییان له‌سه‌ر تۆمار بكرێت به‌ڵام كه‌ ئێستا دژە تیرۆری یه‌كێتی بێ دەنگه‌ گومانه‌كان زیاتر بوون.

به‌شێكی دیكه‌ی هۆكاری وەشاندنی ئه‌و مووشه‌كه‌ كه‌ تائێستا توركیا به‌فه‌رمی هیچی له‌بارەوە نه‌گوتووە بۆ چه‌ند مه‌به‌ستێك بووە یه‌كێك له‌وانه‌ به‌ ئه‌مریكا و یه‌كێتی بڵێت ئاگاداری ئه‌و كۆبوونه‌وانه‌م و زانیاری دروستم هه‌یه‌، دووەم به‌ڵگه‌ی حاشا هه‌ڵنه‌گری هه‌یه‌ كه‌ فڕۆكه‌خانه‌ی سلێمانی به‌مه‌بەستی ته‌راتێنی سه‌ركردایه‌تی په‌كه‌كه‌ به‌كاردەهێنرێت و شتی قاچاغی تێدا دەكرێت واته‌ توركیا به‌ڵگه‌ی ئه‌وەی نیشان داوە كه‌ بۆچی هێڵی توركیش ئۆنلاین له‌ فڕۆكه‌خانه‌ی سلێمانی داخستووە، ئه‌مه‌ جیاله‌وەش كه‌ په‌یامێكه‌ بۆ یه‌كێتی كه‌ توركیا له‌ناو جه‌رگه‌ی زۆنی سه‌وز دەسه‌ڵاتی له‌دژە تیرۆری یه‌كێتی زیاترە یه‌كێتی وا دەزانێت به‌عه‌یبه‌نی حزبی خۆی كه‌ تا سنووری دێگه‌ڵه‌ بڕدەكات هه‌رواش جیهان دەبینێت نازانێت درۆنی توركی و چه‌كی پێشكه‌وتووی ته‌كنه‌لۆژیایی جه‌نگ به‌ئاسانی دەتوانێت له‌تونێله‌ تاریكه‌كانیشیان بیان كاته‌ ئامانج ئه‌مه‌ش هه‌روا له‌خۆرا نییه‌ ته‌بیعه‌ن به‌هاوكاری كه‌سانی ناوخۆیان.

هەڵمەت حاجی بۆ یەکێتی : ئێستا فڕۆکەخانەی سلێمانی بۆ کوردایەتی داخراوە یان بۆ تەسفیەکردنی مەزڵوم بەدەستی ئێوە؟

هەڵمەت حاجی لە تۆڕی کۆمەڵایەتی فەیسبووک نووسیویەتی : زوو گوتمان یەکێتی باکی بە ھاوکار جاف و موراد کانی کوردەیی و چەندی تر نەبوو ، کە چەندین ساڵ گیانفیدای یەکێتی بوون، چۆن باکی بە مەزڵوم عەبدیەک دەبێ کە چەندین ساڵە پەکەکە لە پێناو قاچاخچیەتی بە ماددەی ھۆشبەر و قاچاخچیەتی بە چەک و ڕفراندن و کردەوەی تیرۆری و سپیکردنەوەی پارە بە یەکی گەیاندوون و ناساندوون.

دەڵێت ، یەکێتی کە بەھۆی سیاسەتی ھەڵەوە کەوتۆتە ژێر سزا و سلێمانیشی لەگەڵ خۆیدا تووشی باجی گەورە کردووە، ئەوەتا فڕۆکەخانەکەی دادەخرێ، دژە تیرۆرەکەی دەستی کەشف دەبێ لە زانیاریدان، لەولاشەوە ھاتوون ھاوکاریکردن لە فرۆشتنی مەزڵوم عەبدیان کردۆتە کوردایەتی بە خەڵکی بەستەزمان دەفرۆشنەوە ، ئەوە کوردایەتیتان بوو سەری مەزڵوم لە قوربنێن؟

هەروها نووسیویەتی، ھەموو ھاش و ھوشتان بەرامبەر حکومەت بۆ ئەوەبوو تا فۆکەس لەسەر ئەمە لابدەن و بیکەن بە قەزیەیەکو فۆکەسی لەسەر لاببەن ، بەڵام خوایکرد لە ئەمریکاوە دژە تیرۆری یەکێتی پێکرا و دەستە پیسەکەیان کەشفبوو کە ویستوویانە چەتەیەکیتر ئەنجام بدەن، ئەوە پێگەی بەناوبانگی ئەمریکی ئەلۆمۆنیتۆر، زانیاریەکی نەبیستراوی ئاشکراکرد کە دەستی یەکێتی لە تیرۆری مەزڵوم عەبدی ئاشکرا دەکات ، ماڵپەرەکە دەڵێت “لەنێو دژە تیرۆری یەکێتی لە سلێمانی زانیاری دراوە بە تورکیا تاکو مەزڵوم عەبدی تەسفیە بکرێت بە مەبەستی تیرۆرکردن” ئەوەبوو ئامانجەکە جێبجێکرا بەڵام ئەنجامی نەبوو لە دوایشدا ماڵپەرەکەی ژێر بەڕەی لە یەکێتی ھێنا سەڕ بەرە.

هەروها دەشڵێت، گوتم خودایە خێرە یەکێتی چەند ڕۆژە سەر زمان و ژێر زمانی کردۆتە کوردایەتی، ئەھا کەسێک کۆمیدی نەبێت و خۆی بەزۆر بکات بە کۆمیدی جگە لە خۆی کەس سەیری ناکات، یەکێتیش بە ھەمام شێوە کەس باوەری بەو کوردایەتیەی یەکێتی نەبوو کە چەند ڕۆژە خستبوویە سەر زمانی، بە کورتیەکەی لێی نەدەھات، تومەز بۆ ئەوەبوو یەکێک بفرۆشێ و تا چاوی خەڵک بخاتە سەر کوردایەتی و خەڵکیتر تۆمەتبار بکات، بەڵام ئەوجارەش ریسوابوون، ھەموو ئامانجیان لەو ھاش و ھوشە بۆ ئەوەبوو کەس بیری بۆ نەچن کە شتی وا ئەنجام دەدەن، ئەوە ھەڵوێستە کوردپەروریەکەتان بوو؟ ئێستا فرۆکخانەی سلێمانی بۆ کوردایەتی داخراوە یان بۆ تەسفیەکردنی مەزڵوم بەدەستی ئێوە؟ بەفرتان ھێنابووە سەر ئەژنۆ و ئێستاش دەرچوو مەزڵومتان فرۆشتووە ناویشتان لێناوە کوردایەتی، تەنھا بۆ ئەوەی مەتار بکرێتەوە ، تورکیا عوفوێکیان بکات، ئەمە دەرخەری ئەو سیاسەتە چەوت و بەکارھێنانی دژەتیرۆری یەکێتییە لە ئاستی ناوخۆ و دەرەوە بۆ تەسفیەکردن کە جاری یەکەمینیان نییە.

ئەوەش هاتووە، جگە لەوەی لەناوخۆشدا بە کردەوەی تیرۆرستیان ئەنجامداون، لەپاڵ ئەوەشدا چوونەوە نێو ماڵپەرە ئەمریکیەکان لە کردەوەی تیرۆردا، دژە تیرۆری یەکێتی کە ئێستا بووە بە بەڵا بۆ سلێمانی و یەکێتی، دیارنیە کەی سەری ھەموویان ئەخاتە قوڕەوە.

نیاز حاجی لە تۆڕی کۆمەڵایەتی فەیسبووک لەسەر هێرشکردنە سەر فڕۆکەخانەی سلێمانی و مەزڵوم عەبدی نووسیویەتی:

حەقە مەزڵوم عەبدی نانێک بخوات و دە نان بکاتە خێر و سەدەقە کە تیا نەچووە چونکە بەدڵنیاییەوە خراپ فرۆشرابوو!

ئەو نووسەرە دەڵێت : ئەگەر مەزلوم عەبدی خۆی لەسلێمانی بووبێت و هێرشی كرابێتە سەر یان ئەگەر جاسووسیەك بەسەر مەزلوومەوە كرابێت، بە دڵنیاییەوە دەستی یەكێتی تێدابووە چونكە جگە لەیەكێتی و پەكەكە كەسی تر نەیزانیوە مەزلووم عەبدی لەوێیە یان نا؟!

دەشڵێت : جگە لە خۆیان كەسی تر ئاگاداری پیلان و سەوداو و مامەڵەکانی ئەوان نیە، هەر كەتن و پیلان و كارێكی قێزەوەنیش ئەگەر لەژێر سەریان بووبێ و لە سلێمانی ئەنجامدرابێت هەر یەكێتی ئاگاداریەتی و ئەو خۆی لێی بەرپرسە و بەشێكە لەسرووشتی كارو کردەوەی ئەوان.

نیاز حاجی نووسیویەتی : ئەم روداوەش ھیچ پێویستی بەخۆگیڤكردنەوەو موزایەداتی نەتەوەیی و كوردایەتی دارودەستەی بافڵ و پەكەكە ناكات.

هەروها ئەو دەشڵێت، كاری هاوبەشی ئەو دوو لایەنە هیچ پەیوەندییەكی بە نیشتیمانپەروەری و كوردایەتییەوە نیە، تاكە بەرژەوەندییەک كە تاقمە باڵادەستەكەی یەكێتی بە چەكدارانی پەكەكە دەبەستێتەوە قاچاغی ماددەی ھۆشبەر و چەك و ڕفاندنی مرۆڤ و سپیكردنەوەی پارەیە. ئەگەر ئەوەندە ڕاستگۆن بۆ كوردایەتی بۆچی لەبارەی ئێش و ئازاری كورد لە ڕۆژهەڵات جارێك نەماندیت هەڵوێستێك بنوێنن؟

🔴 دەڵێت چونکە:
📌 هەر ئەوانە بوون مستەفا سەلیمیان ترسنۆكانە و نامەردانە فڕاند و ڕادەستیان كرد بۆ ئەوەی لە سێدارە بدرێت.

📌 هەر ئەوانە بوون ڕەسەدیان دەدا بۆ ئەوەی بارەگاكانی حزبێكی ڕۆژهەڵات بوردوومان بكرێت. ھەر خۆیانن کە دەڵێن یەكێتی بۆتە بەڵا بەسەر خەڵكی كوردستانەوە.

📌 بەڵێ ئەم تاقمە ناسروشتی و خۆسەپێن و سەیر و سەمەرەن، تەنانەت ناتوانن جلی سروشتیش لەبەر بكەن جلەكانیان جلی تلیاکخۆرو مافیا و چەتەكانە.

دوو کوڕی تاڵەبانی و سێ برای تەمبەڵ!

هۆگر نێروەیی لە لاپەڕەی تایبەتی خۆی لە تۆڕی کۆمەڵایەتی فەیسبووک نووسیویەتی:

ڕاستیەک ھەیە یەکێتی کە وتی خزمەت دەکەین و کارێکی باش دەکەین بۆ خەڵک بە گاڵتەوە وەری بگرن دڵنیابن کە ھیچ ناکات بەڵام کە یەکێتی وتی ڕێککەوتین، بەجدی وەریبگرن کە ڕێککەوتن لە سەر ئەوەی ڕێگری بکەن لەوەی حکومەت کارێکی باش بکات بۆ بەرژەوەندی خەڵک! زۆرجاریش کە نەتوانن ڕێگری بکەن لەکاری حکومەت کەتنێک بەدوای ڕێککەوتنەکانیان دێت!

ئەو نووسەرە دەڵێت : دەگێڕێنەوە سێ برای تەمبەڵ زەویەک لە باوکیان بە میراتیان بۆ مابوو، ڕۆژێک چوونە سەر کار بۆ ئەوەی زەویەکە بدورنەوە، لە ناو زەویەکەدا کەروێشکێک بێچوی خۆی دانابوو، کەروێشکەکە ترسێکی زۆری لا دروست بوو کە زەویەکە بدورنەوە وبێچوەکانی بە دەست بگرن و بیبەن، ماوەیەک وەستا بینی لای سێ براکە نە بایە نە بارانە، چوو گوێبگرێت بۆ ئەوەی بزانێت ئەو سێ برایە چی قسەیەک دەکەن، سێ براکە وتیان ھێشتا ڕۆژ زۆر ماوە ئەمڕۆ ئیش ناکەین، ئەمڕۆ دەکەین بە پشو بۆ خۆمان، سبەی بەشێک تەواو دەکەین دووسبە بەشێکی تر سێ بەیانی بەشێکی تر.

دەشڵێت: کەروێشکەکە ھاتە لای بێچوەکانی، بە پێچوەکانی وت مەترسن ئەمساڵ ھەموو لێرە بە ئیسراحەت بەسەر دەبەین کەس ئەم زەویە نادورێتەوە ئەوانە ھێندە تەمبەڵن بەبێ ئەوەی ئیش بکەن بۆخۆیان ڕۆژێکیان کردە پشوو کە ھەموو ڕۆژ لەبێ کاریدا لە پشو دان، ھەر سێ براکەش لەسەر بەزمەکە بەردەوام بوون ھەموو ڕۆژ دەھاتن و دادەنیشتن ئەمڕۆ دەکەین بە پشوو بۆ خۆمان ڕۆژ زۆری ماوە کارەکە تەواو دەکەین. کەروێشکەکەش فشەی بە قسەکانی سێ براکە دەھات و پێدەکەنی.

نووسیویەتی : ڕۆژێک لەناکاودا برایەک وتی: با زەویەکە ئاگری تێپەردەین بە تەواوی بیسوتێنین، ھەر کە کەروێشکەکە ئەم قسەیەی گوێ لێ بوو بەجدی وەریگرت بەتەواوی ترسی گرتی، چونکە زانی کەسی تەمبەڵ لەکۆتایی دا ھەر بە کاری ھیچەوە دەیگرێت، خۆی هیلەک ناکات ڕێگا ئاسانەکە دەگرێتەبەر، یەکسەر چوە لای بێچوەکانی، پێیانی وت خێراکەن با فریای گیانی خۆمان بکەوین تەواو ئەوان زەویەکە دەسوتێنن. ئەم جارە قسەکانیان جدین نەک وەکو ھەمیشە فشەن.

لەبارەی کوڕانی تاڵەبانییەوەش دەڵێت : دوو کوڕی تاڵەبانیش وەکو ئەو سێ برا تەمبەڵەن گەر وتیان بۆ خزمەتی کوردستان بە گاڵتەوە وەربگرن بەڵام بۆ ڕێککەوتن لەسەر فرۆشتنی کوردستان فشە ناکەن ھەمیشە جدین قەت و پاشەکشە ناکەن لە سەر فرۆشتنی! کاتی خۆی دوو کوڕی تاڵەبانی وتیان بۆ ئارامی بۆ ھەلی کار، بۆ خزمەتگوزاری زیاتر، ئەم جارە دەبینە حیزبی یەکەمی کوردستان، ئەمە دەکەین، وا وا دەکەین کەچی بەھەموو یەکێتیەوە چەند ساڵە ناتوانن شەقامێک تەواوبکەن، کە دەستکرا بە شەقامی سەد مەتری سلێمانی، ئۆباما سەرۆکی ئەمریکا بوو، ئێستا ترەمپ نا بایدن دوو ساڵ زیاترە سەرۆکی ئەمریکایە، تاڵیبان گروپێکی تیرۆریستی بوو لە کونە مشک دابوو، کەچی ئێستا تاڵیبان کۆشکی کۆماری سەرۆکایەتی بەدەستەوەیە حوكمرانی ھەموو ئەفغانستان دەکەن، قاسم سولەیمانی نانی بەیانیان لە بەغدابوو، بۆ نانی ئێواران لە دیمەشق بوو! ئێستا سولەیمانی نەنانی بەیانی ماوە نەنانی ئێوارە چەند ساڵە کوژراوە! ئیڤانکای کچی ترەمپ ھێشتا سینگل بوو کەس نەی دەناسی! ھەڵەنەبم تا ئێستا دوو سێ جار مێردی کردوە ھەموو کەسیش دەیناسێت بەتایبەتی برا عەرەبەکانمان لەوڵاتانی خەلیج.

زیاتر نووسیویەتی و دەڵێت : کەچی ھێشتا دوو کوڕی تاڵەبانی نەک ھەر شەقامی سەد مەتری تەواو نەکردوە بەڵکو نیوەشی تەواو نەکردوە ھەر وەستاوە، سەرەڕای ئەوەی حکومەت چەند جاریش بودجەی تەواویشی بۆ تەرخان کردوە! لە ئەنجام دا نە شەقامەکە دروستکرا، نە پارەکە دیار ماوە، کەس نازانێت کێ بردی لە گیرفانی کێ دایە!. دوو کوڕی تاڵەبانی ھەمیشە ھاواریان دەکرد بۆ ئارامی ھاواریان گەیشتە حەوت تەبەقەی ئاسمان، کەچی لەسەر زەوی لەناو سەنتەری شاری ڕانیە لەسەر ناکۆکی باڵ باڵانێ سەر کورسی دەسەڵات سەرکردەی خۆیان درایە بەر گولە! لە پایتەختیش گیانی ھاوکار جاڤ لێ سەندرا، ھەردوو برا وتیان بۆ خزمەتی زیاتر کەچی لە سەردەمی یەکێتی نوێ کە ھەردوو برا بانگەشە بۆ دەکەن سلێمانی سەدەیەک چووە دواوە چەند جار خانەنشین لەسرەی موچە گیانیان سپاردوە! ھەردوو برا وتیان بۆ ھەلی کار، کەچی ھەردوو برا ئەوانەشی کاریان دەکرد بێ موچە هێشتیانیەوە زۆر کەس بێ نان کران و شاریان غەرق کرد لە زبڵ و خاشاك دا.

لەبارەی یەکێتی نوێ و کوڕانی تاڵەبانیش نووسیویەتی : یەکێتی کاک بافڵ و کاک قوباد کە خۆیان بە یەکێتی نوێ لە قەڵەم دەدەن کاتی خۆی کەرکوکیان بە راکان و ئەمسالەکانی دا، ھەر خۆیان لە ژێر پەردە چەند جار شەڕیان کرد بۆ مانەوە راکان لە پۆستەکەی دا بۆ ئەوەی ئاسەواری ڕێککەوتنی 16ی ئۆکتۆبەری خۆیان کۆتایی نەیێت، کەرکوک ھەر بمێنێتەوە ژێر دەستەی راکان کەچی ئێستا کە ھیچی ئەوتویان بە دەستیان نەماوە دەڵێن دەنگ بە بودجە نادەین گەر ئیجرائات لەگەڵ راکان نەکرێت کە ئەمە کۆتا ھەوڵیانە بۆ تێکدانی ڕێککەوتنک کە خۆیان ھیچ ڕوڵیان تێدانەبوو کەیەکەم ڕێککەوتنە لەبەرژەوەندی خەڵکی کوردستان گەر سەربگرێت کە یەکێتی کاک بافڵ و کاک قوباد نایەوێت سەربگرێت!

هەروەها دوو کوڕی تاڵەبانی نەکاری ھەبووە نەکار دەکەن بۆ کوردستان وەکو سێ برا تەمبەڵەکە ھەر لەپشودان و لە دەرەوەن بۆ خزمەتی کوردستان و ھەمیشە لە کاردان بۆ خەڵکی تر، لە کوردستان تەنھا کاردانەوەیان ھەبوە بۆ کاری خەڵکیتر ( پارتی) کە لەسەروی خۆی بۆیان دێن لەسەریان دەسەپێنن، کە نەھێڵن ئەو کارەیان سەربگرێت، جا چی پرۆژەیەک بێت یان بەرەو پێشچونی ھەرێم بێت لە قۆناغێکەوە بۆ قۆناغێکی باشتر.

لینکی بابەت:

https://www.facebook.com/100066381601163/posts/pfbid02PoE5ioyPAoh3pgD8CyJUfEUsyhGsGX4SFYzNZCGPgSNpCoY1s5mNM54itswiNZozl/?mibextid=cr9u03

سەهل سوورچی : لە شارەکانی ژێر دەسەڵاتی یەکێتی گەنجان بێی هۆکار خەڵتانی خوێن دەکرێن.

سەهل سوورچی لە لاپەڕەی خۆی لە تۆڕی کۆمەڵایەتی فیسبووک نووسیویەتی:

لە سنووری سلێمانی مافیا حکوم دەکات ،ئەمە زیادەڕۆیی نیە بەڵکو ڕاستییەکی تاڵە کە دەبێت دانی پێدابنرێت ، جاران زۆر کات گوێمان لێ دەبوو لە فڵان وڵات مافیا چەند شارێک بەڕێوەدەبات کە لە لامان شۆک دەبوو ،بەڵام خۆمان بینیمان ، ئەمە بۆ ئێستای سلێمانیش گونجاوە ، تەنها لە ماوەی مانگێک ، دەیان هەڵکوتانەسەرو بردنی ئۆتۆمبێل و کوشتن ڕوویانداوە،ڕۆژ نیە دەنگی تەقە لە کۆڵانەکانی شار نەبیسترێت،لە کۆتا جاریش پەڕلەمانتارێکی یەکێتی بە کۆمەڵێک چەکدار دەردەکەوێت هەڵدەکوتێتە سەر شوقە و خاوەن پڕۆژەکان تەقە دەکات و خەڵک بریندار دەکات،کەسیش بۆی نیە قسەبکات،ئەم حاڵەتانە نوێ نین و پێشوتریش کراون ، خەڵک کوژراوە دوای هاوشێوەی مافیا بە جانتایەک پارە حەل کراوە.

ئەو نووسەرە دەشڵێت : لە شارەکانی ژێر دەسەڵاتی یەکێتی گەنجان بێی هۆکار خەڵتانی خوێن دەکرێن وەک ئەو گەنجەی شەوی ڕابردووی سەیدسادق کە کەس نازانێ ئەوهێزەی یەکێتی بۆ تەقەی لەو گەڕەکە کرد و کوشتی،خۆ قاچاغی و دزینی داهاتیش لە لوتکەیە ، فەرموون بەو ڕەمەزانە چی لە خانەنشینان دەکرێت و مووچەیان پێنادرێت لە شارەکانی وەک هەولێر و دهۆک موووچەی مانگی سێ وا دابەشدەکرێت ، هێشتان ئەوان خەریکی مووچەی مانگی ۲ی ئەمساڵن، بە عەلاگە پارەدەبەنە بانکەکان ،ئەگەر مافیا ئاوا نەبێت واتای مافیا چییە؟ئایا زیاتر هەڵدەگرێت؟ئەوەی زوڵمی لێ دەکرێت ناوێرێت دەنگ هەڵبڕێت ، ئەوەی زوڵمیش دەکات میدیای بەکرێگیراو نوسەرو بەناو ڕۆژنامەنووسان بۆیان پینە و پەڕۆ دەکەن،ئەوانەشی لەو بازنەیە نین دەستگیردەکرێن و دژەتیرۆری یەکێتی دەچێتە سەر ماڵی و دەیگرێت بە نموونەی زۆرەوە ،بەداخەوە ئیتر ئەمە سلێمانییە ئاوای لێکراوە،بەڵام ئەم گرووپە باکی نییە بەوەی کە چی دەکەن ،هەموو ئامانجیان ئەوەیە ناوبانگی هەرێم لەکەدار بکەن ،چونکە مافییا هیچی نیە لەدەست بدات هەمیشە ئامانجیان تێکدان و کارە نایاساییەکانی خۆیانن…

لە سلێمانی مافیا ئاسا حكوم دەكەن

دڵشاد جەلال، دەنووسێت :

شاری هەڵمەت و قوربانی و شاری ڕۆشەنبیری بەدەست گروپ و مافیا دەناڵێنێت ڕۆژانە هاووڵاتییان لە چینە جیاوازەكاندا دەكەونە ژێر بێ بەزەیی تفەنگ و شەقی ئەم مافیا و چەتانە ئەم شارە نائارامیەكی تەواو باڵی بەسەردا كێشاوە و ئەم مافیا و گرووپانە بە ڕۆژی ڕۆناک هەڵدەكۆتنە سەر خەڵكی كاسب و زوڵم لە خەڵک دەكەن نە حیساب بۆ دادگا دەكەن نە یاسا هەرچی دڵیان بخوازێت دەیكەن ئەوەی قسەش بكات بەرامبەر ئەم زوڵمەی ئەو مافیا و چەتە و گرووپانە ڕووبەڕووی هەڕەشەی كوشتن و بڕین و تیرۆركردن دەبێتەوە

دژە تیرۆری یەكێتی بەحساب پارێزەری سەروماڵ وگیانی خەڵكە لە سنووری سلێمانی كەچی بەداخەوە بوویتە جێی ترس و تۆقاندن و مەینەتی بۆ هاووڵاتییان و سەرچاوەی نائارامی بۆ سنوورەكە

ئەوەی جێی پرسیارو تێرامانە سەڕەرای ئەو هەموو زوڵم و تەعداو نائارامییەی بەڕۆكی ئەم شارە گرتووە میدیاو ڕۆشەنبیرو نووسەرەكانی بەناو ئازاد و سەربەخۆ لە ئاستی بێ دەنگ و كەڕو ڵاڵن كەسیان نقەیان لێوە نایەت! زوڵم و ستەم و هەڵكوتانە سەر خەڵک لە سنووری سلێمانی لەژێر دەسەڵاتی یەكێتی و بێ دەنگی نوخبەی ڕۆشەنبیرەكان و نووسەرەكانی ئەم شارە دەرخەری ئەوەیە كە دەیانەوێت ئەزموونی حكومڕانی لە هەرێمی كوردستان بە ناشرینی وێنا بكەن بۆ دەرەوە كە ئەمەش خەیاڵە و خەونی خۆشترە

لەماوەی ٢٤ كاتژمێری ڕابردووە لە سنووری سلێمانی دوو ڕووداوی مەترسیدار ڕوویاندا كە یەكێک پەرلەمانتارێک بوو بەناوی هاوڕێ مەلا ستار كە بە پاسەوانە هەڵیانكوتایە سەر وەبەرهێنەرێک لە شاری دایک برینداری لێكەوتووە و شەوی ڕابردووش لەلایەن چەند چەكدارێكەوە لە سەیدسادق تەقە لە گەنجێك كرا و كوژرا تا ئێستا لەسەر ئەم دوو ڕووداوە هیچ كەسێک دەستگیرنەكراوە

هەڵمەت حاجی : وەزارەتی دارایی سەرقاڵی دابەشکردنی مووچەی مانگی ٣ـیە کەچی لە سلێمانی بۆ مووچەی مانگی ٢ لە نۆرەگرتن وەستاون

هەڵمەت حاجی لەبارەی رووداوەکانی ئەم دوایەی سنووری سلێمانی و ژێر دەسەڵاتی یەکێتی نووسیویەتی :

دیسان لە سلێمانی لەژێر دەسەڵاتی یەکێتی خانەنشینان کەوتنەوە نۆرەگرتن بۆ مووچە، بانکەکان بەتاڵ کراون و دزیان تێدا دەکرێ ، ماڵپەرەکەی قوباد تاڵەبانی كە بۆ شەفافیەت بە حساب دانرابوو، داھاتی سلێمانی بە حساب تێدا بڵاودەکرا، پارەی ئەویش دیارنییە بیدەن بەو خانەنشینانە، بەو ھەموو خەبات و ڕەنج و ماندووبوونە کەوتوونەتە سەر شەقامەکان، پارەکانیان پێدەچێ بەدەردی پارەکانی تر بردرابێت، وەزارەتی دارایی سەرقاڵی دابەشکردنی مووچەی مانگی ٣ـیە کەچی لە سلێمانی لە نۆرەگرتن بۆ مووچە وەستاون نەک بۆ مانگی ٣ بەڵکو بۆ مانگی ٢.

هەروەها دەڵێت، کارەسات ئەوەیە ئێستا سلێمانی ھیچی بەسەر ھیچەوە نەماوە، زوڵم دەکەی ناگیرێیت، زوڵملێکراوبیت زیاتر دەچەوسێنرێیتەوە، تاوانبار ئازادانە دەسوڕێتەوە، نە دادگا ھەیە و نە سەروەریشی بۆ ماوەتەوە، دادگا بووەتە تۆپێک قوماش چۆنیان بووێ بۆخۆیان دەیدورن بە خەڵکی ھەژاری تێست دەکەن.

هەڵمەت حاجی دەشڵێت: لە سایەی ھێزە ئەمنیەکانی یەکێتی، خەڵک دەچەوسێنرێتەوە و ھەرەشەی لێدەکرێ ، ھەڵدەکوترێتە سەر موڵک و ماڵی خەڵک، وەبەرھێن نازانێ ئاوادەنی لە شارەکە بکات یان ئارامی خۆی دابین بکات، ئەمە جگە لەوەی لە شارەکە ھەر ڕۆژەو ھێزی کەسێک جوڵەی پێدەکرێ.

هەروها باسی کوشتن و ڕفاندن و موزایەدەچییەکان دەکات و دەنووسێت ، لەشارەکە دەسترێژی گوللە لە ھاووڵاتییان دەکرێ، کە کەسێکیش بکوژرێت نابی باس بکرێ و ھەولی پینەکردنی دەدەن، موزایەدەچی و کەمپینچیەکانی سلێمانی مێش میوانیان نییە، ئەڵێی لە شارەکە نین، مرۆڤ ئەوەندە بێ نرخ بووە لەوێ کە کەسێک دەکوژرێت تەنانەت میدیاکانیشی دەیانەوێ باسی نەکەن، کەچی مێشیش لە شوێنی تر ئەخەنە ئاست مرۆڤەکان، سەرتاشینێک لە ھەولێر ڕووبدات سێ شەو ڕۆژ نایبرنەوە ، کەچی بەبەرچاویانەوە خەڵک خەڵتانی خوێن دەکرێ کەڕوکاسن، ئەمە بەرھەمی ئەو دەسەڵاتە فاشیلەی یەکێتییە دەیانەوێ ھەموو وێنەو کردارە ناشرینەکانی خۆیان بە خەڵکی تر پاک بکەنەوە، ئەگەر دەنگی نارازیش ھەڵبڕیت ھەموو شتێک ھەبێت ئازادی نییە بەڵکو رادیۆبوونێک قەرزدار دەبیتەوە، ئەمەیە سنووری مافیاخانە و ترس و تۆقاندن و تیرۆر، بەداخەوە سلێمانیان بەم دۆخە گەیاندووە.