فەرمانگەی ڕێكخراوە ناحكوومییەكان ڕوونكردنەوەیەكی بۆ ڕای گشتی بڵاو کردەوە
فەرمانگەی ڕێكخراوە ناحكوومییەكان لە روونکردنەوەیەکدا بۆ رای گشتی بڵاوی کردووەتەوە: “لە چەند ڕۆژی ڕابردوو لە لایەن دەزگایەكی ڕاگەیاندن كە زمان حاڵی حیزبێكی كوردستانە، بەبێ بوونی زانیاری و بەڵگەی دروست و گەڕانەوە بۆ سەرچاوەی فەرمی، بە چەند هەواڵێكی چەواشەكاری، فەرمانگەی ڕێكخراوە ناحكوومییەكانی كوردستان تۆمەتبار دەكات بە دامەزراندنی ڕێكخراوێك كە بە زمانی ئەوان (هاوڕەگەزبازی) كە لەبنەڕەتدا بەكارهێنانی ئەو وشەیە دەچێتە چوارچێوەی شێواندنی دەرونی كۆمەڵگاکەمان.”
ئاماژە بەوەش دراوە: “ئەم كەناڵە هەموو ئەو بەها ئەخلاقی و ئیتیكیانەی تێپەڕاندووە كە لە یاسایی ڕۆژنامەگەری كوردستان ژمارە 35ی ساڵی 2007 و بەڵێننامەی شەرەفی فیدراسیۆنی نێودەوڵەتی ڕۆژنامەنوسان دیاریكراوە، پێشێلی پیشەی ڕۆژنامەنوسیشی كردووە چونكە بەبێ سەرچاوەی ڕاست و دروست هەواڵەكەی بڵاوكراوەتەوە، بڵاوبوونەوەی ئەم هەواڵەش بووە بەهۆكاری ئەوەی دوێنێ چەند کەس و لایەنەک كۆنگرەی ڕۆژنامەوانی ڕێكبخەن و بەیاننامەیەكی چەواشەكاری بێ بنەمای تێدا بەیان بكەن، كە وشە بە وشەی بەیاننامەكە بێ بەڵگە و تۆمەتێكی دروستكراو و هەڵبەستراو و چەواشەكارییە لە پێناو شێواندنی دەرونی هاووڵاتیانی ئازیزی كوردستان.”
روونیش کراوەتەوە: “ئێمە تێدەگەین مەرامی ئەم دەزگا و كەس و لایەنانە چیە و دەشزانین (ئاینی پیرۆزی ئیسلام) بەكار دەهێنن بۆ مەرامەكانیان و دەیانەوێت لەو ڕێگەیەوە سۆزی هاوڵاتیان بەلای خۆیاندا ڕابكێشن، بۆ كۆكردنەوە و زیادكردنی چەند دەنگێك، بەڵام هاووڵاتیانی خۆشەویستی هەرێمی كوردستان زۆر بەئاگا و هۆشیارن لەبەرامبەر ئەم چەواشەكارییانەدا.”
هەروەها ئاماژە بەوەش دراوە: “بۆیە ئێمە وەك تیمی نوێی سەرۆكایەتی لە فەرمانگەی ڕێكخراوە ناحكوومییەكان لە ژێر ڕۆشنای یاسای ژمارە 1ی ساڵی 2011 و پەیڕەوی ژمارە 4 كاروبارەكانمان بەڕێوەدەبەین و سەرقاڵی داڕشتنی پلانێكی تۆكمەین كە ڕێكخراوەكان ئازادانە لە چوارچێوەی یاسا بەركارەكانی عێراق و هەرێمی كورستان كاروچالاكی گرنگ و كاریگەر ئەنجام بدەن بۆ بوژانەوەی ژێرخان و سەرخانی كوردستانی ئازیز، ئامانج و پەیام و خەمی گەورەی ئێمە پاراستنی نیشتمان و خۆشەویستی خاك و بەها باڵاكان و ئاكارە جوانەكانی كۆمەڵگاكەمانە بەهەموو نەتەوە و ئاین و پێكهاتەكانیەوە.”
فەرمانگەی رێکخراوە ناحکوومییەکان راشیگەیاندووە: “لێپێچینەوەی یاسایی دەگرینەبەر بەرامبەر ئەو كەس و لایەن و دەزگا ڕاگەیاندنانەی كە جگە لە چەواشەكاری و بڵاوكردنەوەی هەواڵی ناڕاست، هیچی تر لە هەگبەیاندا نیە.”
جەختیش کراوەتەوە: “بە وزەیەكی نوێ و عەقڵێكی مەدەنییەوە كاردەكەین بۆ گەشەكردن و پێشخستنی ڕەوتی ڕێكخراوەیی لە هەرێمی كوردستاندا.”
روونیش کراوەتەوە: “هەر لێرەشەوە ڕایدەگەیەنین كە لە پەیکەری كارگێڕی فەرمانگەكەماندا پلەیەك نیە بەناوی ڕاوێژكار، بەڵكو بەپێی پەیڕەوی ژمارە 4/ ماددەی دووەم/ بڕگەی یەكەم: بەرزترین پلەی كارگێڕی لە فەرمانگەكەماندا (بەڕێوەبەری گشتی)یە.”
