هاوپۆل: هەواڵ

لە ئیدارەی سەربەخۆی سۆران ڕۆژانە 300 تۆن زبڵ فڕێ دەدرێت

بەرپرسێكی كۆمپانیای پاپا گرووپ رایگەیاند كه‌ ڕۆژانە زیاتر لە 300 تۆن لە زبڵ و خاشاكی هاووڵاتیانی هەر چوار قەزای ئیدارەی سەربەخۆی سۆران كۆدەكەنەوە و فڕێی دەدەن.

نامیق ئیبراهیم، جێگری بەڕێوەبەری كۆمپانیای پاپا گرووپ لە سۆران دەڵێت : دوو ڕۆژ جارێك كۆمپانیای پاپا گرووپ هەڵدەستێ بە پاككردنەوەو فڕێ دانی زبڵ و خاشاك و پاشماوەی ماڵان و شوێنە گشتییەكانی هەر چوار قەزای ئیدارەی سەربەخۆی سۆران.

نامیق ئیبراهیم گوتی : ڕۆژانە زیاتر لە 300 تۆن لە زبڵ و خاشاكی ئیدارەكە كۆدەكەنەوە، بە پێی ئەو ئامارە بێت واتا ئیدارەی سەربەخۆی سۆران مانگانە نۆ هەزار تۆن و ساڵانە 108 هەزار تۆن زبڵ فڕێ دەدات.

نامیق ئیبراهیم دەشڵێت : زبڵی هەر یەك لە قەسرێ و چۆمان لەوێ كۆ دەكرێتەوە، بەڵام هەر یەك لە قەزاكانی ڕواندز و ناوەندی سۆران و دیانا لە باپشتیان كۆ دەكرێتەوە.

هەروەها ئاماژەی بەوەشدا کە هەفتانە زبڵی قەزای مێرگەسۆریش دەهێنرێتەوە سۆران، بۆ ئەوەی لەوێ كەڵەكە نەبێت.

پرۆژەی هێڵی شەمەندەفەر لە هەرێمی کوردستان دەست پێ دەکات

“قۆناغی یه‌كه‌می پرۆژەی هێڵی شه‌مه‌ندەفه‌ر له‌ ئیدارەی سه‌ربه‌خۆی زاخۆ دەستپێدەكات تا دەگاته‌ شاری هه‌ولێر”

ئاگرین عه‌بدوڵڵا، بریكاری وەزارەتی ئاوەدانكردنه‌وە و نیشته‌جێبوون، ڕایگه‌یاند:

پرۆژەی هێڵی شه‌مه‌ندەفه‌ر له‌ قۆناغی خه‌مڵاندنی بودجه‌یه‌ و كاری باشی بۆ كراوە، له‌ ماوەی دوو هه‌فته‌ی داهاتوو، وردەكاری پرۆژەكه‌ ڕادەگه‌یه‌ندرێت و كات و بڕی پارەی پێوست بۆ دەستپێكردنی پرۆژەكه‌ ئاشكرا دەكرێت.

بریكاری وەزارەتی ئاوەدانكردنه‌وە و نیشته‌جێبوون گوتیشی : قۆناغی یه‌كه‌می پرۆژەی هێڵی شه‌مه‌ندەفه‌ر له‌ ئیدارەی سه‌ربه‌خۆی زاخۆ دەستپێدەكات تا دەگاته‌ شاری هه‌ولێر، له‌ قۆناغی دووەمیشدا له‌ هه‌ولێرەوە بۆ كۆیه‌ و رانیه‌ و قه‌ڵادزێیه‌، پاشان قۆناغ دوای قۆناغ له‌ دهۆك و سه‌رسنگ و ئامێدی دەبێ و دواتر هه‌ولێر بۆ حاجی ئۆمه‌ران، درێژیی هێڵی شه‌مه‌ندەفه‌رەكه‌ 620 كیلۆمه‌ترە.

سەرۆکی حکومەت سەرەخۆشی لە بابە شێخ دەکات

ئێوارەی ئەمڕۆ پێنجشەممە 15ی ئەیلوول، مەسرور بارزانی سەرۆکی حکومەتی هەرێمی کوردستان، لە پەیوەندییەکی تەلەفۆنیدا ، سەرەخۆشی لە شێخ عەلی شێخ ئەلیاس بابەشێخی ئێزدییان کرد بۆ کۆچی دوایی (شێخ حجی)ی برای .
سەرۆکی حکومەت ، پرسە و هاوخەمی خۆی پێگەیاند و هیوای خواست، خوای مەزن گیانی بە بەهەشت شاد بکات و سەبر و ئارامییش بە کەسوکار و بنەماڵەکەیان ببەخشێت.
بابە شێخ سوپاس و پێزانینی خۆی و بنەماڵەکەی بۆ پەیوەندیی و هاوخەمی سەرۆکی حکومەتی هەرێمی کوردستان دەربڕی.

ئەمڕۆ پێنجشەممە 15ی ئەیلوولی 2022, مەسرور بارزانی، سەرۆکی حکومەتی هەرێمی کوردستان بەشداریی لە ڕێوڕەسمی دانانی بەردی بناغەی دروستکردنی دووسایدی سپیلک-خەلیفان کرد و گوتارێکی پێشکەش کرد.

پوختەیەک لە گوتەکانی سەرۆکی حکومەتی هەرێمی کوردستان:

• خۆم بە خۆشحاڵ و بەختەوەر دەزانم کە ئامادەین بە دانانی بەردی بنا‌غەی دروستکردنی شەقامێکی سەرەکی و ستراتیژیی دووسایدی خەلیفان-سپیلک، کە بەشێکە لەو بەرنامانەی حکومەتی هەرێمی بۆ دروستکردنی ڕێگاوبان لە هەموو کوردستاندا.
• پیرۆزبایی لە ئیدارەی سەربەخۆی سۆران دەكەم بۆ ساڵیادی دامەزراندنی و ئەو بڕیارەی دامان بۆ ئیدارەی سەربەخۆی سۆران.
• ئێمە دەمانەوێ ئەم پرۆژەیە بە كوالێتییەكی باش و گونجاو كە لەگەڵ ستانداردە جیهانییەكان بگونجێت، جێبەجێ بكرێت.
• من لێرە داوا لە خەڵكی هەرێمی كوردستان و بەتایبەتی خەڵكی ئەم دەڤەرە و دانیشتووانی ئەم سنوورە دەكەم، داواتان لێ دەكەم ڕەچاوی ئەوە بكەن كە ئەو شوێنە قەدەغەكراوانەی كەناری جادەكان هەن، تەجاوزی ئەو شوێنانە نەكرێ، بۆ سەلامەتیی خۆتان باشترە و بۆ جوانیی شارەكە و سروشتی وڵاتەكەشمان جوانترە.
• داوا لە شۆفێران دەکەم ڕێنماییەکانی هاتوچۆ لەبەرچاو بگرن.

• لە کابینەی نۆیەمی حکومەتی هەرێمی کوردستان گرنگییەکی زۆرمان بە ڕێگاوبان وەکوو ژێرخانی ئابووریی هەرێمی کوردستان داوە، لە هەموو ناوچەکانی کوردستانیشدا ئەم جۆرە پڕۆژانەمان جێبەجێ کردووە.
• بەرنامەمان هەیە بۆ جێبەجێکردنی پڕۆژەی زیاتری ڕێگاوبان، بۆ دەڤەری سیدەکان برادۆست ناوچەی بارزان و قەزای مێرگەسوور، هەروەها بەجووتسایدکردنی رێگای هامڵتۆن.
• ئەم ناوچەیە ناوچەیەكی زۆر تایبەتە، لەوەی چ لە كاتی خۆڕاگری و بەرگریكردن لە ماف و دەستكەوتەكانی هەرێمی كوردستاندا قوربانییەكی یەكجار زۆری داوە، چ لە ڕووی جوانیی سرووشتی خۆی كە ناوچەیەكی زۆر دڵگیر و سەرنجڕاكێشەیە.
• بەرنامەی زۆرمان هەیە كە لە ڕووی گەشتوگوزارییەوە گرنگییەكی زیاتر بەم ناوچەیە بدەین.