هاوپۆل: هەواڵ

كۆشكی سپی ئه‌مریكا به‌ توندی سەرکۆنەی هێرشەکانی ئێران بۆ سه‌ر خاکی هه‌رێمی كوردستان دەكات

جاك سولیڤان، راوێژكاری ئاسایشی نیشتمانی ئه‌مریكا لە بەیاننامەیەکدا به‌ توندی سەرکۆنەی هێرشه‌ مووشەکییەکانی ئێران بۆ سه‌ر خاکی هه‌رێمی كوردستان كرد و پشتیوانی واشنتۆنی بۆ هه‌رێمی كوردستان دووپاتكرده‌وە.

جاك سولیڤان، ڕایگەیاندووە : تاران ناتوانێت سه‌رنج له‌سه‌ر كێشه‌ ناوخۆییه‌كان و ناڕەزایه‌تییه‌كانی وڵاته‌كه‌ی به‌ هێرشكردن له‌ دەرەوەی سنوورەكانی، لابدات.

له‌ به‌یاننامه‌كه‌ی جاک سولیڤان هاتووە، كۆشكی سپی به‌ردەوام دەبێت له‌سه‌ر سه‌پاندنی سزاكان له‌سه‌ر تاران، بۆ راگرتنی جموجۆڵه‌كانی ئه‌و وڵاته‌ له‌ تێكدانی ئاسایش و سه‌قامگیری ناوچه‌كه‌.
راوێژكاری ئاسایشی نیشتمانی ئه‌مریكا دەڵێت : رێزگرتن له‌ سه‌روەری و په‌كپارچه‌یی وڵاتانی دراوسێ له‌ بنه‌ما جێگیركراوەكانی په‌یماننامه‌ی نه‌ته‌وەیه‌كگرتووەكانه‌.

فەرمانگەی میدیا و زانیاری لە ڕاگەیەندراوێکدا :

گواستنەوەی شوێنی رووداوەکان دەبێتە هۆی چاوساغی بۆ هێرشبەران.

دەقی ڕاگەیەندراوەکە:

ڕاگەیەندراوێک لە فەرمانگەی میدیا و زانیارییەوە

ئەمڕۆ چوارشەممە ٢٨ی ئەیلوولی ٢٠٢٢، کۆماری ئیسلامی ئێران، لە ڕێگای مووشەک و درۆنی خۆکوژییەوە، بنکە و بارەگاکانی حیزبە کوردییەکانی ڕۆژهەڵاتی کوردستانی لە هەرێمی کوردستان کردە ئامانج و تا ئێستاش بۆردومانەکان بەردەوامن.
پێویستە گشت کەناڵەکان هەست بە بەرپرسیارێتی کاری پیشەیی خۆیان بکەن و لە کاتی ڕوودانی ڕووداوێکی لەوشێوەیە، شوێنی ڕووداوەکە بە شێوەیەکی ڕاستەوخۆ نەگوازنەوە، چونکە ئەو کارە دەبێتە هۆی چاوساغی هێرشبەران و کەوتنەوەی زیانی ماڵی و گیانی زیاتر، کە بەداخەوە تاوەکو ئێستا چەند هاووڵاتییەک بوونەتە قوربانی ئەم جۆرە ڕووماڵکردنانە.
پێویستە لەسەر میدیا و میدیاکاران بە شارەزاییەوە مامەڵە لەگەڵ ئەم جۆرە ڕووداوانە بکەن و داواش لە لایەنە پەیوەندیدارەکان دەکەین لە پێناو پاراستنی گیانی میدیاکاران و ڕۆژنامەنوسان ڕێنوێنی گونجاویان بکەن.

فەرمانگەی میدیا و زانیاری
٢٨ی ئەیلوولی ٢٠٢٢

ڕاگەیێندراوێك لە بارەگای بارزانییەوە

ئەوە بۆ جاری چەندەمە هەرێمی كوردستان دەكەوێتە ژێر پەلاماری مووشەكی و بۆردومانی هێزەكانی ئێران. ئیدانەی ئەو پەلامار و بۆردومانانە دەكەین چونكە بووەتە هۆی كوشتن و برینداربوونی هاووڵاتیانی مەدەنی و ژن و منداڵی بێتاوان و ئەوە لە ڕاستیدا تاوانكارییە. لە هەمانكاتیشدا ئەو پەلامار و بوردومانانە پێشێلكردنی بنەماكانی دراوسێتی و دۆستایەتی و سەروەرییە و هیچ پاساوێك هەڵناگرێت و لە دژی بەرژەوەندی و سەقامگیریی هەرێمی كوردستانە.

ڕاشیدەگەیێنین كە مووشەكبارانكردن و پەلاماردان چارەسەری كێشەكان ناکات و پێویستە چیتر پەنا بۆ ئەو جۆرە كردەوانە نەبردرێت كە جگە لە تاوانكاری و ناسەقامگیری هیچی لێ بەرهەم ناهێت. داوا دەكەین دەستبەجێ ئەو پەلامار و بوردومانانە ڕابگیرێن و هەرێمی كوردستانیش چیتر نەكرێتە گۆڕەپانی یەكلاییكردنەوەی گرفت و ناكۆكییە ناوخۆییەكانی وڵاتانی دراوسێ.

بارەگای بارزانی
28ی ئەیلوولی 2022

ڕاگەیەندراوێک لەشانەی ڕاگەیاندن و هۆشیاری پێشمەرگەوە

ئەمڕۆ ٢٨ی ئەیلولی ٢٠٢٢، لەسنووری میحوەری پێنجی هێزەکانی پێشمەرگە، بەشێک لە سەنگەرەکانی پێشمەرگەکانی پارتی ئازادی کوردستان، لەڕێگەی فڕۆکەی بێ فڕۆکەوان بۆردوومان کران.
بۆردوومانەکە، بەدوو گەڕ بووە، گەڕی یەکەم کاتژمێر ١٠٣٠ بوو، گەڕی دووەم کاتژمێر ١٣٢٠ بوو.
بەداخەوە لە بۆردوومانەکاندا، ژمارەیەک پێشمەرگە شەهید و بریندار بوون، هەروەها چەند ڕۆژنامەنووسێک بریندار بوون لەنێویاندا پەیامنێر و وێنەگری کەناڵی کوردستان ٢٤.
ئەم رووداوە لە کاتێک دایە، کە هێزەکانی پێشمەرگە، سەنگەریان لە تیرۆریستان گرتووە و ڕووبەڕووی ئەو تیرۆریستانە بوونەتەوە، کە بوونەتە بەشێک لە مەترسییەکانی سەر ئاسایشی نیشتیمانی عێراق و هەرێمی کوردستان بەگشتی.
ئێمە لە شانەی ڕاگەیاندن و هۆشیاری پێشمەرگە ئیدانەی ئەو بۆردوومانانە دەکەین، داواش دەکەین زۆر بە خێرایی ئەم کارە دزێوانە لەسەر سەنگەرەکانی هێزی پێشمەرگە ڕابگیرێن.

شانەی راگەیاندن و هۆشیاری پێشمەرگە
٢٨ی ئەیلولی ٢٠٢٢

سەرۆکایەتی حکومەتی هەرێمی کوردستان لەسەر بۆردوومانکردنی شار و شارۆچکەکانی کوردستان لەلایەن ئێرانەوە ڕاگەیەندراوێکی بڵاوکردەوە و ڕایگەیاند : سەرکۆنەی مووشەکبارانکردنی خاکی هەرێمی کوردستان دەکەین

دەقی ڕاگەیەندراوەکەی سەرۆکایەتی حکومەتی هەرێمی کوردستان :

ڕاگەیەندراوێک لە حکومەتی هەرێمی کوردستانەوە

بەزاندن و پێشێلکردنی چەندبارەی سەروەریی خاکی هەرێمی کوردستان بە مووشەکباران، بە توندی سەرکۆنە دەکەین.
بۆردومانکردنی بنکەکانی ئۆپۆزسیۆن بە مووشەک لە لایەن کۆماری ئیسلامیی ئێرانەوە، بە هەر پاساوێک، هەڵوێستێکی ناڕاست و بەلاڕێدابردنی ڕەوتی ڕووداوەکانە و جێگای سەرسوڕمانە. ئەم جۆرە هێرشانە، کە بەردەوام دەکرێنە سەر خاکمان و بەو هۆیەوە، خەلکی سیڤیلیش دەبنە قوربانی، شەرمەزار دەکەین و پێویستە کۆتایی بەم دەستدرێژیانە بهێندرێت.

سەرۆکایەتی حکومەتی هەرێمی کوردستان
2022/9/28

لە چوارچێوەی سەردانەکەی بۆ شاری زاخۆ ئەمرۆ مەسرور بارزانی سەرۆکی حکومەتی ھەرێمی کوردستان لەگەڵ بەرپرسانی حکومی سنووری ئیدارەی سەربەخۆی زاخۆ کۆبووەوە.

سەرۆکی حکومەت دەستخۆشی لە سەرپەرشتیاری ئیدارە و بەرپرسانی دیکەی دەڤەرەکە کرد بۆ هەوڵ و ماندووبوون و بەجێگەیاندنی ئەرکەکانیان بە سەرکەوتوویی کە لە ماوەی تێپەڕبوونی ساڵێک بەسەر ڕاگەیاندنی ئیدارەی سەربەخۆی زاخۆ، حکومەتی هەرێمی کوردستان، چەندین پڕۆژەی خزمەتگوزاری گرنگیی لە ناو شاری زاخۆ و سنووری ئیداری ناوچەکە ئەنجام داوە و هەندێکیشان ئێستا لە جێبەجێکردندان.

سەرۆکی حکومەت وتی خەڵکی زاخۆ قوربانییەکی زۆریان داوە و ڕۆڵێکی گرنگییان لە خەباتی گەلی کوردستاندا گێڕاوە و شایەنی ئەوەن بە شێوەیەکی شایستە خزمەتیان بکرێت.

سەرۆکی حکومەت بەرپرسانی دەڤەرەکەی ڕاسپارد، کە هەموو هەوڵی خۆیان بخەنەگەڕ، لە پێناو خزمەتکردنی زیاتری هاووڵاتییان. دووپاتیشمان کردەوە کە بەدەستهێنانی ڕەزامەندی هاووڵاتییان، پێوەری سەرەکی سەرکەوتنی بەرپرسانە.

پاراستنی بنەما پیرۆزەکانی ئایینی ئەرکی وەزارەتی ئەوقاف و کاروباری ئایینی وزانایانمانە

دوای خوێندنەوەی راگەێندراوەکەی زانایانی کۆمەڵی دادگەری ، ئێمە لەلقی ھەولێری یەکێتی زانایان ئەم خاڵانەی خوارەوە دەخەینە ڕوو”

(ئەرکی ئێوە نییە وەک زانایانی کۆمەڵی دادگەری، زانای ئایینی دەبێ خزمەتی ئایین بکات نەک پشتگیری بەیاننامەی پارتێکی سیاسی )
دەربارەی بڵاوکراوەکەتان:
١- بەڕێزتان کاری رێکخستنی حزبی و سیاسی لە ناو مزگەوتەکاندا دەکەن و خۆتان بەشانازییەوە لە زۆر شوێن باسی ژمارەی مزگەوت و مامۆستای سەر بە رێکخستنەکانتان دەکەن، ئەمەش پێچەوانەی پرەنسیپەکانی ئایینی پیرۆزی ئیسلام و یاسا بەرکارەکانە، کە شوێنی ئاینی بۆکاری سیاسی رێگە پێدراونییە.
٢- ئێوە کەخۆتان بە ئیسلامی دادەنێن، پێویستە راستگۆیانە قسە بکەن، لە بەرامبەر خودا و گەڵ، چونکە قسە بەرپرسیارییەتی ئایینی و ئەخلاقییە، ئایا کەی قەدەغەی فێربوونی قورئانی پیرۆزکراوە؟! وەزارەتی ئەوقاف وکاروباری ئایینی، خاوەنی سەدان بنکەی فێرکردن و لەبەرکردنی قورئانی پیرۆزە، ئەمە بوختانێکی زۆر گەورەیە، دواتر وەزارەت بەپێی یاسا بەرپرسە لەکاروباری ئایینی هەرێم، ئەوەی وەزارەتی ئەوقافیش دەیڵێت و دەیکات هەماهەنگی کردنە، ناکرێت هەر کەسێک بەئارەزووی خۆی و ئایدیای سیاسی خۆی پڕۆگرامی ئایینی و پەروەردەیی ئایینی، بۆ گەنجان و قوتابیان و کچ و کوڕانی کوردستان دابڕێژێت، لەهیچ وڵاتێکی جیهانی ئیسلامی شتی وانییە، پێویستە ئەم بابەتە لەلایەن خەڵکی شارەزاو پسپۆڕ و ئەکادیمی دابندرێت لەژێرچاودێری حکوومەتی هەرێم بێت .
٣- ئەم بابەتانە بەپێی یاسا بەرکارەکان بابەتی سەرەکی حکوومەتی هەرێمە، نازانین بە چ یاسایەک ئێوە دەیکەنە بابەتی خۆتان،
باش بزانن مامۆستای ئایینی ئەگەر بۆختان هەڵببەسترێت بە ناراست سزاکەی لای خودای گەورە قورسترە.

لقی ھەولێری یەکێتی زانایانی ئایینی
٢٧⁄٩⁄٢٠٢٢

ئەمڕۆ سێشەممە 27ی ئەیلوولی 2022، مەسرور بارزانی، سەرۆکی حکومەتی هەرێمی کوردستان لە ڕێوڕەسمێکدا لە ئیدارەی سەربەخۆی زاخۆ بەردی بناغەی چەند پڕۆژەیەکی خزمەتگوزاریی دانا و تێیدا گوتارێکی پێشکەش کرد.

پوختەیەک لە گوتەکانی سەرۆکی حکومەتی هەرێمی کوردستان:

• لە ماوەی ساڵی ڕابردوو پرۆژەی زۆر لە ئیدارەی سەربەخۆی زاخۆ ئەنجام دراوە لە ڕیگەوبان، کەرتی پەروەردە، کەرتی تەندروستی و کەرتی گەشتوگوزار، چونکە بەداخەوە پێشتر وەک پێویست خزمەتی زاخۆ نەکرابوو.
• هیوادارم ئەم پڕۆژانە ببێتە هۆی باشتركردنی ژیانی خەڵكی زاخۆ و شێوازی باژێڕڤانی لە زاخۆ، كەمتەرخەمی ناكەین و بەردەوام دەبین.
• زاخۆ بۆ ئێمە شارێكی گرنگە، دەڤەری زاخۆ بە شێوەیەكی گشتی دەڤەرێكی زۆر گرنگە، قوربانییەكی زۆری داوە بۆ پاراستنی هەرێمی كوردستان، لە شۆڕشە یەک لە دوای یەكەکان کە لە كوردستان كراون قوربانییەکی زۆری داوە.
• من لێرە باوك و كەسوكاری چەندان شەهید دەبینم، لێرە راوەستاون و ئامادەن، سەری ڕێز و نەوازش بۆ ئێوە دەچەمێنین، ئومێدەوارین خوا دەرفەت بداتە ئێوە تەمەنی ئێوە درێژ بكات و پشتیوان بن بۆ ئیدارەی خۆتان كە ئیدارەی سەربەخۆی زاخۆیە، تا ئەویش لە خزمەتتاندا بێت.
• خەڵكێكی زۆر هەیە لە زاخۆ كە خاوەن شەهیدە و زەحمەتێكی زۆریان كێشاوە، وەك زۆربەی ناوچەكانی تری كوردستانیش كەمتەرخەمییان نەكردووە لە پارێزگاریکردنی دەستكەوتەكانی كوردستان.

• هەر خزمەتێك بۆ ئەم دەڤەرە بکرێت، مافی ئەوانە و شایانی ئەوانە و پێویستە ڕۆژ بە ڕۆژ دەڤەری زاخۆ پێش بخەین.
• جگە لەوەی زاخۆ لە ڕێگەی كوردایەتی و بەرەڤانی و بەرخۆداندا لە هەرێمی كوردستان چەند زەحمەتی كێشاوە، زاخۆ دەڤەرێكی گرنگی بازرگانییشە، دەڤەرێكە كە هەرێمی كوردستان لە ڕێگەی توركیاوە بە ئەوروپا گرێ دەدات.
• پێویستە ئەوەش لەبەرچاو بگرین، ئێمە چۆن دەتوانین باشترین سوود لە ڕووی بازرگانی وەربگرین و خەڵكی زاخۆش لێی بێبەش نەبێت.
• بڕیاری جووتسایدكردنی شەقام و جادەكانی زاخۆ بۆ ئاسانكاریی بازرگانیی نێوان زاخۆ و شارەكانی دیكەی كوردستان و گرێدانی هەرێمی كوردستان بە دەرەوەی كوردستان، ئەمە دەكرێ هەنگاوێكی باش بێت بۆ بەهێزكردنی ژێرخانی ئابووریی كوردستان.

• بەر لە ساڵێك وەك ئەوەی من تێگەیشتم، گوتیان ٦٠٪ی شەقام و كۆڵانە ناوخۆییەكانی زاخۆ هێشتا قیرتاو نەكراون، ئێمە سەربەرزین ئەمڕۆ دەڵێین ئەو هەڵمەتەی بۆ قیرتاوكردنی شەقامە ناوخۆییەكانی زاخۆ كراوە، زیاتر لە ٣٠٪ی ئەو ٦٠٪ە ئەنجام دراوە.
• لە ڕووی گەشتوگوزاریشەوە زاخۆ شارێكی زۆر جوانە و دەڤەری زاخۆ زۆر دڵڕفێنە، بەڵام بەداخەوە ئەو شەڕ و پێكدادانەی ئێستا بەتایبەتی لە ناوچە سنوورییەكان هەیە، لە گوند و دەوروبەری زاخۆ هەیە، بووەتە هۆكاری ئەوەی ئێمە نەتوانین زۆر گوندی خۆمان ئاوەدان بكەینەوە.
• هیوادارین ئەو شەڕە كۆتایی بێت و ڕێز لە سەروەری و خاكی ئێمە بگیرێت. تا بتوانین خزمەتێكی زیاتری خەڵكی خۆمان بكەین و خەڵكەكەشمان بگەڕێنەوە سەر گوند و ئاوەدانیی خۆیان.
• پردی دەلال كە دەزانم چەند گرنگیی بۆ خەڵكی زاخۆ و هەموو كوردستان هەیە، دڵخۆشم كە ئەو پرۆژەیەش دەكەوێتە بواری جێبەجێكردن، هیوادارین لە كاتێكی نزیكدا هەم خەڵكی كوردستان و هەم خەڵكی دەرەوەی كوردستانیش بێن سەردانی پردی دەلال بكەن.
• لە بەرنامەماندایە بەنداوێكیش لەم دەڤەرە دروست بكەین كە یەكێكە لەو پرۆژانەی لە بەرنامەی كابینەی حكومەتدا هەیە بۆ دروستكردنی چەند بەنداوێك لە سەرانسەری كوردستان.