هاوپۆل: کوردستان

ئەنجومەنی وەزیران ئامادەیی حکومەتی هەرێم بۆ دەستپێکردنەوەی هەناردەکردنی نەوت دووپات دەکاتەوە

ئەمڕۆ چوارشەممە 11/15، بە سەرپەرشتی سەرۆک وەزیران مەسرور بارزانی و بە ئامادەبوونی قوباد تاڵەبانی، جێگری سەرۆک
وەزیران، ئەنجومەنی وەزیرانی هەرێمی کوردستان، کۆبووەوە.
لە بڕگەی یەکەمی کۆبوونەوەکەدا، ئەنجامی گفتوگۆی هاوبەشی نێوان وەزارەتی نەوتی حکومەتی فیدراڵ و شاندی هەرێم لە ڕۆژانی 12-13 /11 سەبارەت بە دەستپێکردنەوەی هەناردەکردنی نەوتی هەرێمی کوردستان لەلایەن سەرۆک وەزیران و وەزیرە پەیوەندیدارەکانەوە خرایەڕوو.
سەرەتا سەرۆک وەزیران کورتەیەکی دەربارەی گفتوگۆکانی حکومەتی هەرێم و شاندی حکومەتی فیدراڵ بە سەرۆکایەتیى جێگری سەرۆک وەزیران بۆ کاروباری وزە و وەزیری نەوتی فیدراڵ کە ماوەی چەند ڕۆژێک لە هەولێر بوونح، خستەڕوو.
سەرۆک وەزیران جەختی لەوە کردەوە کە لە چوارچێوەی دەستوور و ڕێزگرتن لە دەسەڵات و مافە دەستوورییەکانی هەرێمی کوردستان، حکومەتی هەرێم ئامادەیە لە زووترین کاتدا، پرۆسەی هەناردەکردنی نەوت دەست پێ بکاتەوە و هیوادارین لایەنە پەیوەندیدارەکانی حکومەتی فیدراڵیش پەلە بکەن لە تەواوکردنی ئامادەکارییەکانی دەستپێکردنەوەی پرۆسەکە.
دواتر ئەنجومەنی وەزیران، وێڕای پێشوازی و پشتیوانیکردن لە بەڕێوەچوونی ئەرێنی دانووستانەکان لەبارەی هەناردەکردنەوەی نەوتی هەرێم کە ئەم پرۆسەیە خزمەت بە بەرژەوەندی هەموو لایەنەکان دەکات و بەهۆی ڕاگرتنی هەناردەی نەوتی هەرێم چەندین ملیار دۆلار زیان لە گەنجینەی گشتی کەوتووە، لە هەمان کاتدا ئەنجومەنی وەزیران جەختی لە پاراستنی ماف و شایستەکانی هەرێمی کوردستان کردەوە و شاندی حکومەتی هەرێمی کوردستانی ڕاسپارد کە لە چوارچێوەی دەستوور لە هەوڵ و گفتوگۆکانیان بەردەوام بن.
پاشان لە بڕگەی دووەمدا، پێشنیاری چەند وەزارەتێک سەبارەت بە ڕێکخستنەوەی داهاتی ناوخۆیان خرایەڕوو ، کە ڕێژەیەک لە داهاتەکانیان بۆ جێبەجێکردنی پڕۆژەکانی وەزارەتەکانیان و خزمەتگوزارییەکان بەکاردەهێنرێتەوە.
ئەنجومەنی وەزیران جەختی لە پەرەپێدان و ڕێکخستنەوەی سیستمی دارایی و ژمێریاریی لە هەرێم کردەوە، بەجۆرێک کە ببێتە مایەی باشتر بەڕێوەچوونی پرۆسەکانی خەرجیی دوور لە بیرۆکراتی و ڕووتین، هەروەها گرنگیی پەرەپێدانی بە دیجیتاڵکردنی مامەڵە و خزمەتگوزارییەکان بە ئاراستەی پێشکەشکردنی ئاسانکاریی و دەستکردنەوە وتوانادارکردنی دامەزراوەکان بۆ جێبەجێکردنی ئەرک و خزمەتگوزارییەکان، ئەمەش بەسوود وەرگرتن لەو ڕێژە داهاتی گەڕاوەی وەزارەتەکانیان، لە چوارچێوەی سیستمێکی دارایی وژمێریاریی پێشکەوتوو، هەر لەم پێناوەشدا، وەزارەتەکان ڕاسپێردران کە هاوکاری و هەماهەنگی وەزارەتی دارایی وئابووری بکەن.
ئەنجومەنی وەزیران هەروەها بۆردی باڵای دارایی گشتی ڕاسپارد کە ڕێکاری پێویست سەبارەت بە بڕیاری ژمارە 219ی ئەنجومەنی وەزیران بگرنەبەر، هەروەها پێویستە مانگانە تەرازووی پێداچوونەوەی داهات و خەرجیەکان بە بێ دواکەوتن ئاراستەی وەزارەتی دارایی وئابووری بکرێت تاکوو دواتر حکومەتی فیدراڵی لێ ئاگاداربکرێتەوە بۆ خەرجکردنی شایستەی دارایی مانگانەی هەرێمی کوردستان.
لە کۆتاییدا بابەتی داواکاری ئەو فەرمانبەرانەی کە بە بێ مۆڵەتی خوێندن، بڕوانامەیان بەدەستهێناوە و تا ئێستا بڕوانامەکانیان بۆ هەموارنەکراوەتەوە لەلایەن ئارام محەمەد قادر وەزیری خوێندنی باڵا و توێژینەوەی زانستی و ئاوات شێخ جەناب وەزیری دارایی و ئابووری و وەزیرانی پەیوەندیدارەکانەوە خرایەڕوو .
ئەنجومەنی وەزیران وێڕای دووپاتکردنەوەی سیاسەتی حکومەتی هەرێم بۆ هاندانی فەرمانبەران بۆ بەدەستهێنانی بڕوانامەی باڵا و برەودان بە بەرزکردنەوەی توانای پیشەیی و ئەکادیمیی کارمەندانی کەرتی گشتیی بە پێی پلانی پەسەندکراوی وەزارەتەکان، بڕیاریشیدا کە لیژنەیەکی تایبەتمەند لە سەرۆکایەتی ئەنجومەنی وەزیران و وەزارەتە پەیوەندیدارەکان پێکبهێنرێت، بۆ پۆڵێنکردن و هەڵسەنگاندنی حاڵەتەکانی ئەو بڕوانامانەی کە بە بێ مۆڵەتی بێ مووچە بەدەستهاتوون، بۆ ئەوەی لە ڕووی زانستی و کارگێڕی و دارایی و یاساییەوە هەڵبسەنگێنرێن و دواتر دەرئەنجامی هەڵسەنگاندنەکە ، بخرێتە بەردەم کۆبونەوەکانی داهاتووی ئەنجومەنی وەزیران تاکوو بڕیاری کۆتایی لێ بدرێت.

سەرۆکی حکومەت: پشتیوانی لە كاری هونەری دەکەین و ئومێدی زۆرم بە گەنجانی کوردستان هەیە

ئەمڕۆ سێشەممە 11/14 مەسرور بارزانی سەرۆکی حکومەتی هەرێمی کوردستان، فێستیڤاڵی پەیمانگەی هونەرە جوانەکانی هەولێری بەسەر کردەوە.
سەرۆکی حکومەت لە لێدوانێکدا دەستخۆشی لە ڕێکخەران و بەشدارانی فێستیڤاڵەکە کرد و گوتی : من خۆم حەزم لە هونەرە، بە تایبەتی هونەری شێوەكاری، بۆیە زۆر پێم خۆش بوو بێم سەردانی ئێرە بكەم و كاری گەنجانی خۆمان ببینم كە لە قۆناغی جیاوازی كاری خۆیاندا، شتی زۆر جوانیان كردووە، ئومێدم زۆر پێیانە كە دەتوانن ببن بە هونەرمەندی زۆر گەورە لە دواڕۆژدا. ئەوەی ئێمەش پێمان بكرێ بۆ یارمەتیدانیان، چ لێرە چ لەو شوێنانەی تر كە كاری هونەرە جوانەكانی تێدا دەكرێت، لە هەموو شار و شارۆچكەكانی تری كوردستان دەیکەین بۆ ئەوەی زیاتر یارمەتییان بدەین.
هاتنیشم بۆ دەربڕینی پشتگیریی خۆم بووە كە بزانن ئێمە گرنگی بەم هونەرە دەدەین. كاری هونەری لە كولتووری هەر وڵاتێكدا، نیشانەی مێژوو و كولتووری ئەو وڵات و نەتەوانەیە كە دەتوانن بە كاری هونەری پێشانی دونیای بدەن.
سەرۆکی حکومەت هەروەها لە بارەی كۆبوونەوەی لەگەڵ وەزیری نەوتی عێراق و شاندی یاوەری گوتی : ئێمە كۆبوونەوەیەكی باشمان هەبوو لەگەڵ جێگری سەرۆك وەزیران و وەزیری نەوتی عێراق. ئەوەی لەسەر حکومەتی هەرێم بووە لە ڕووی كاری تەكنیكی یاخود یاسایی، جێبەجێكراوە، هەمووشمان لەگەڵیان باس كرد، دەمێنێتەوە سەر ئەوەی كە مافەكانی خەڵكی كوردستان وەكوو خۆی كە لە دەستووردا هاتووە، ئەوانیش ڕێز لەو مافانە بگرن و جێبەجێیان بكەن.
سەرۆکی حکومەت ئاماژەی بەوە دا کە قسەی زۆر كرا سەبارەت بەوەی هەرێم ئەركی چیە و مافی چیە، داواكارییەكانی ئێمەش لە حكوومەتی فیدڕاڵ ئەوەیە ڕێز لە مافە دەستوورییەكانی هەرێم بگیرێت ، بە تایبەتی دابینكردنی شایستە داراییەكانی خەڵكی هەرێمی كوردستان كە ماوەی چەند مانگێكە مووچەكانیان دواكەوتووە، کە هۆكارەكەی حكوومەتی بەغدا بووە، داوامان كرد ئەم كێشانە كۆتاییان پێ بێ و خەڵكی هەرێمی كوردستانیش وەكوو هەموو خەڵكی تری عێراق بە مافەكانی خۆیان شاد بن و ئەو شایستانەی خۆیان كە هەیانە چیتر دوانەكەوێ.
سەرۆکی حکومەت جەختی لەوە کردەوە کە لە قسەكردندا گەیشتین بە زۆر تێگەیشتنی باش و ئەوان گوتیان دەگەڕێینەوە بۆ ئەوەی دوابڕیار لەسەر پێشنیارەكان بدەین، من ئومێدم زۆرە ئینشائەڵڵا ئەنجامێكی باش و وەڵامی باشیشی بۆ خەڵك دەبێت. لەسەر بابەتی هەناردەكردنەوەی نەوتی هەرێمی كوردستانیش قسەمان كرد، بەڵێ ئەگەری هەناردەکردنەوەی نەوت هەیە بەڵام دەبێ مافەكانی خەڵكی هەرێمی كوردستان بەپێی دەستوور رەچاو بكرێت.
لەبارەی مووچە و شایستە داراییەکانی هەرێمی کوردستانیش، سەرۆکی حکومەت ڕوونیکردەوە کە لەگەڵ سەرۆك وەزیرانی حكوومەتی فیدڕاڵ قسەی كردووە لەسەر (بابەتی ناردنی 700 ملیارەكە) جگە لە ناردنی نامەش تایبەت بەم پرسە، ئێمە كاتی خۆی داوای شەش مانگمان كرد كە ئەو بڕە پارەیەی ئەو شەش مانگەی لەمساڵدا ماوە بۆ خەڵك دابین بكەین، ئەوان لە سەر سێ مانگ بڕیاریان دا، ئێمە داوای 800 ملیارمان كرد، ئەوان لە ئەنجوومەنی وەزیرانی عێراق بڕیاری 700 ملیاریان دا. بۆ سێ مانگی تر ئەوان گوتوویانە دەبێ لە مانگی 12 جارێكی تر حیسابات تەسفیە بكرێت بۆ ئەوەی بزاندرێ چی ماوە دابینی بكەن. ئیتر ئێمەش چاوەڕێی ئەوەین کە ئەوانیش بەڵێنەكانی خۆیان جێبەجێ بكەن

موقەدەم شاخەوان محەمەد: چەند منداڵێک لە سنوورەکەمان فرۆشراون

بەڕێوەبەری نووسینگەی بەرەنگاربونەوەی تاوانە رێکخراوەکان لە ئیدارەی گەرمیان لەم چاوپێکەوتنەی “بازمیدیا” دا باس لە چۆنییەتی بازرگانیکردن بە منداڵانی بچووک لە سنوورەکەی دەکات، هەروەها ئەو ماددە یاسایانەی بۆ سزادانی کەسانی تاوانبار لەم کەیسانە دەخاتە روو.

بازمیدیا:
باس لەوە دەکرێت کە ئێوە ژن و پیاوێکتان بە تۆمەتی فرۆشتنی منداڵەکانی دەستگیر کردووە، ئایا ئەمە راستە؟

موقەدەم شاخەوان محەمەد: دایک و باوکێک منداڵی خۆیان بە بڕی یەک ملیۆن دینار بە ماڵێک فرۆشتووە، دوای هەفتەیەک رۆشتوون منداڵەکەیان لێ وەرگرتوونەتەوە و پارەکەشیان بۆ نەگەڕاندونەتەوە، جارێکی دیکە منداڵەکەی خۆیان بە ماڵێکی دیکە بە بڕی یەک ملیۆن دینار فرۆشتووەتەوە، واتە ژن و پیاوەکە دوو جار منداڵەکەی خۆیان بە دوو خێزانی جیا فرۆشتووە.

بازمیدیا:
ئایا جگە لەم منداڵە منداڵی دیکەیان هەبووە و فرۆشتبێتیان؟

موقەدەم شاخەوان محەمەد: بەڵێ، پێشتر دوو منداڵی دیکەیان هەبووە و فرۆشتوویانە، یەک لەوان بە هەزار دۆلار، ئەوی دیکەیان بە هەزار و 500 دۆلار.

بازمیدیا:
تەمەن و رەگەزی منداڵەکان چین؟

موقەدەم شاخەوان محەمەد: ئەم حاڵەتی ئێمە پيمانزانی منداڵێکی تەمەن 3 مانگی کچە، منداڵەکانی دیکەش یەکێکیان کوڕە و ئەوی دیکەیان کچە، کاتێک تەمەنیان 11 مانگ و ساڵێک بووە بە دوو خێزانی جیایان فرۆشتوون کە منداڵیان نەبووە.

بازمیدیا:
چۆن مامەڵە لەگەڵ ئەم کەیسە دەکەن؟

موقەدەم شاخەوان محەمەد: کڕین و فرۆشتن بە مرۆڤ بە پێی یاسا تاوانە، بۆیە ئەم دایک و باوکە بەندکراون و لێکۆڵینەوەیان لەگەڵ دەکرێت.

بازمیدیا:
بەپێی چ یاسایەک مامەڵە لەگەڵ ئەو دایک و باوکە دەکرێ؟

موقەدەم شاخەوان محەمەد: بە پێی ماددەی (5)ی نەهێشتنی بازرگانی کردن بە مرۆڤ مامەڵە لەگەڵ ئەم ژن و پیاوە دەکرێت.

بازمیدیا:
ئێستا ئەو سێ منداڵە لە کوێن؟

موقەدەم شاخەوان محەمەد: ئێمە ئەو خێزانانەمان بانگکرد و دادوەر منداڵەکانی بینی، ئێستا دۆسیەکە لەلای حاکمە و لێکۆڵینەوە بەردەوامە و هێشتا بڕیاری کۆتایی نەدراوە، بۆیە منداڵەکان جارێ لای ئەو دایک و باوکانەن کە کڕیویانن، رەنگە منداڵەکان لای ئەوان دابنەن، چونکە دایک و باوکە راستەقینەکانیان جارێ بەند کراون و زەحمەتە ئازاد بکرێن و رەنگە حوکم بدرێن.

بازمیدیا:
ئەو منداڵانە چ گرنتییەک هەیە کە ژیانیان لای ئەو خێزانانەی کڕیویانن پارێزراوە؟

موقەدەم شاخەوان محەمەد: ئیفادەی ئەو ژن و پیاوانەه وەک دایک و باوکی نوێی منداڵەکانن و کڕیویانن وەرمانگرت، ئەوانە خۆیان منداڵیان نابێت، ئەم منداڵانەیان کڕیوە بۆ ئەوەی وەک منداڵی خۆیان بەخێوی بکەن و ناسنامەیان لەسەر ناوی خحتان بۆ دەرکردوون.

بازمیدیا:
ئەم منداڵانە تازە فرۆشراون یان کۆنە؟

موقەدەم شاخەوان محەمەد: منداڵێکیان ٥ ساڵە فرۆشراوە، منداڵێکی دیکەیان 4 ساڵە فرۆشراوە، منداڵێکیان ئەمساڵ فرۆشراوە، ئەمەی لە کۆتایدا فرۆشراوە رووداوەکەی ئاشکرا کرد.

بازمیدیا:
شوێنی نیشتەجێبوونی ئەم ژن و پیاوەی منداڵەکانیان فرۆشتووە لە کوێیە؟

موقەدەم شاخەوان محەمەد: دانیشتووی ناحییەی رزگاری سەربە قەزای کەلارن، دایک و باوکەکە کوردن و خەڵکی ئەسڵی مەنتقەکەشن.

بازمیدیا:
لە لێکۆڵینەوەکاندا باسی هۆکاری فرۆشتنی منداڵەکانیان کردووە؟

موقەدەم شاخەوان محەمەد: خۆیان دەڵێن باری دارایماب خراپ بووە، بەڵام هەموو حاڵەتێکدا ناکرێت هەر خێزانێک باری دارایی خراپ بێت و منداڵەکانی بفرۆشێت.

بازمیدیا:
ئایا پێشتر حاڵەتی وا لە سنووری ئیدارەی گەرمیان تۆمار کراوە؟ هیچ کەیسی ترتان هەیە؟

موقەدەم شاخەوان محەمەد: حاڵەتی دیکەمان نەبووە، ئەگەر هەشبووبێ پێمان نەزانیوە، ئەمە یەکەم حاڵەتە هاتبێتە لای ئێمە.

بازمیدیا:
ئەو دایک و باوکەی بازرگانیان بە منداڵەکانیان کردووە تەمەنیان چەندە؟

موقەدەم شاخەوان محەمەد: تەمەنیان لە نێوان 30 تا 35 ساڵ دەبێت

پەرلەمانتارێکی عێراق: مامۆستایان دەبێت لە پێش بارەگای یوئێن بۆ فشار خستنە سەر بەغدا خۆپێشاندان بکەن

شوان محەمەد، ئەندامی پەرلەمانی عێراق لەبارەی خۆپیشاندان و بایکۆتی مامۆستایانی سنووری پارێزگای سلێمانی و دەوروبەری بە (بازمیدیا)ـی گوت: هەرچەندە مامۆستایان ماوەیەک بەرگەی نیو مووچەیان گرت، بەڵام دەبێت واقیع بینبن و بەو پەڕی راستگۆییەوە قسە بکەن، چونکە باش دەزانن مووچە لای بەغدایە، ئیتر بۆ زیان بە مناڵی خەڵک دەگەیەنن.

پەرلەمانتارەکەی عێراق پێیوایە کە مامۆستایان دەبوو بچنە پێش بارەگای (یو ئێن) خۆپیشاندان بکەن، تا فشار لەسەر بەغدا دروست بکەن و پارە لە کاتی خۆی بنێرێت، لە کۆتایدا ئەگەر بەغدا پارە نەنێرێت حکومەتی هەرێم ناتوانێت مووچە بدات، جگە لە مامۆستایان، کەمئەندامانی سەنگەر کە بەشێک لە جەستەیان بەخشیوەتە ئەم خاکە، کەسوکاری شەهیدان کە کەسێکی گرنگیان شەهید بووە ئەمانەش زۆر زەرورترن کە مووچەیان پێ بدرێت، بەڵام بەغدا پارە نەنێرێت چۆن مووچەیان پێ بدرێت؟.

شوان محەمەد جەختیکردەوە کە دەبێت واقیعانە بیر بکەینەوە، ئێمە بیرمان دێت رۆژێک دەیانگوت با بەغدا مووچەمان پێ بدات، با هەرێم لەگەڵ بەغدا رێکبکەویت و نەوت رادەست بکات، فەرموون هەموو ئەمانەمان کرد و یاسای بوودجەش دانراوە و پەسند کرا، ئێستا هیچ لای هەرێم نییە، ئەی بۆ رووتان لە بەغدا ناکەن و بڵێن کوا مووچەکانمان،؟ بەداخەوە ئەم خۆپیشاندانە تێکەڵ بە ئەجێندای سیاسی کراوە، یەکيتی نیشتمانی رۆڵی باش نییە و لە ناڵ و لە بزماریش دەدات، خۆی بەشێکە لە حکومەتی هەرێم و هەموو بەڕێوەبەرەکانی قوتابخانەکانی سنووری زۆنی سەوز سەربەون، ئەگەر سبەی ئیعقزیان پێ بدات بچنەوە قوتابخانەکان یەک بەڕێوەبەر ناتوانێ لە ئیعازەکەی دەربچێت، بەڵام بەداخەوە ئەم خۆپیشاندانانە بۆ لاوازکردنی حکومەتی هەرێم و لێدانە، واتە بۆ داواکردنی مافی مامۆستا نییە، بەڵکو بابەتەکە بەسیاسی کراوە.

باڵەکایەتی بە کۆمەڵێ پرۆژەی گرنگ بەسەر کرایەوە

کرمانج عزەت دەرگەڵەیی
بەرپرسی لقی ٢٦ی گوڵانی پارتی لە چۆمان:

لە سەردانێکی مێژویی و لەسەر ڕاسپاردەی سەرۆکی حکومەتی ھەرێمی کوردستان کاک مەسرور بارزانی، سەرۆکی دیوانی ئەنجومەنی وەزیرانی حکومەتی ھەرێمی کوردستان
د ئومێد صباح بە یاوەری تیمێکی ھونەری ئەنجومەن و ھاوڕێ لەگەڵ سەربەست لەزگین ئەندامی مەکتەبی سیاسی و چیا ھەرکی جێگری مەکتەبی رێکخستنی پارێزگای ھەولێر و ھەڵگورد نەجیب سەرپەرشتیاری ئیدارەی سەربەخۆی سۆران، بۆ چۆمان و حاجی ئۆمەران، لەمیانی دوو کۆبوونەوەدا، گوێیان بۆ پێداویستی دەڤەرەکە راگرت. لە ئاکامدا ئەو پرۆژانە کرانە پلانی حکومەت و رەزامەندیان بۆ درا:

١- ئاستەنگەکانی بەر پڕۆژەی دووسایدی حاجی ئۆمەران چار بکرێن بە زوترین کات و ئەو دوو سایدە تەواو بکرێ.

٢- پلانی فراوانکردنی شەقامی چۆمان/ پردی حافز، نەخشەسازی بۆ بکرێ و بە کۆمپانیایەکی شارەزاجێبەجێ بکرێ.

٣- پێداویستی کردنەوەی کۆلێژێکی زانکۆی سۆران لە چۆمان ڕەزامەندی لەسەر درا و بەم زوانە بخرێتە بواری جێبەجێ کردن.

٤-یاریگاکانی سمیلان و گەلاڵە و قەسرێ و حاجی ئۆمەران، رەزامەندی نۆژەنکردنەوەیان بۆ درا.

٥- ھۆڵی بۆنەکان کە ھەزار کەس جێی تیا دەبێتەوە، درایە تەندەر بۆ چۆمان، لە سەر راسپاردەی سەرۆک بارزانی.

٦-ئاوی شارەدێی قەسرێ بە گوژمەی ملیارێک و ھەشتسەد ملیۆن دینار درایە تەندەر.

٧-دوو سایدی پردی چۆمان بۆ ئاشی بڕەگوێز، بڕیاری لێدرا و لەو ماوەیە دەست بەکار دەبێ.

٨- پێشنیاری دروست کردنی ھەوارگەیەکی گەشتیاری بۆ چۆمان پەسەند کرا لە پردی سەروی چۆمان بۆ ڕێگای ناوەندە، کە بەشێوەی کۆڕنیشێکی سەردەمیانە، بۆشایی پارکێکی سەردەم پر دەکاتەوە و جوانترین شوێنی گەشتیاری لەخۆ دەگرێ.

٩- ڕەزامەندی لەسەر دابینکردنی دوو ئامێری تیشکی Mri و سیتی سکان درا بۆ نەخۆشخانەی چۆمان، وێڕای تەواو بوونی رەزامەندی ئامێری ئیکۆ بۆ ھەمان نەخۆشخانە و تیشکی دیجیتاڵ بۆ بنکەی تەندروستی قەسرێ.

١٠-ڕێگای گوندی چۆمان/ مەمیخەلان ڕەزامەندی بۆ درا.

١١- ھەڵیکار بۆ زیاتر لە ١٥٠ کادری خۆبەخشی نەخۆشخانەکان و سێکتەری شارەوانی و ئاو و کارەبا ڕەزامەندی بۆ درا، جگە لە کۆمەڵێ مامۆستای وانەبێژ.

١٢- ھەلیکار لە سنووری ھێلەکانی حاجی ئۆمەرانیش زێدەتر دەبێ.

ھەموو ئەو دەستکەوتانە کە ڕەزامەندی بۆ سنووری باڵەکایەتی لێدرا، بەرھەمی داکۆکی لق و ناوچەکانمان بوو لە رێگای مەکتەبی رێکخستنی پارێزگای ھەولێر و قائمقامیەتی چۆمان و ئیدارەی سەربەخۆی سۆران، کە دڵنیا وەرزێکی ئاوەدانی زۆر گەورە دەخاتە سنووری باڵەکایەتی.

منەت بەسەر خەڵکی خۆمان ناکەین، بەڵام پێتان دەڵێین.. ئیتر پارتایەتی ئێمە لە جاران زیاتر کردارە و ئامانجمان خزمەتی گەلە.
پیرۆزتان بێ، ئێوە شایستەن خەڵکی باڵەکایەتی.

قوتابیانی کۆلێژی پزیشکی زانکۆی گەرمیان چوار رۆژە لە دەباشان ناڕەزایەتی دەردەبڕن و ئاوڕیان لێ نادرێتەوە

ماوەی چوار رۆژە قوتابیانی کۆلێژی پزیشکی زانکۆی گەرمیان ناڕەزایەتییەکانیان بۆ دەباشان و بەردەم بارەگای بافڵ تاڵەبانی گواستوەتەوە، تا بتوانن لە نزیکەوە گرفتەکانی خۆیان بخەنەڕوو،کەس ئامادەنەبوون بچنە نێو قوتابییەکان و گوێ بۆ داواکارییەکانیان بگرن.

توانا لەتیف، نوێنەری قوتابییە ناڕازییەکانی کۆلێژی پزیشکی زانکۆی گەرمیان بە بازمیدیای راگەیاند: لەبەر ئەوەی ئيمە لە زۆنی سەوزین و ناوچەکەمان یەکێتی تێدا باڵا دەستە هەریەک لە بافڵ تاڵەبانی و قوباد تاڵەبانی دەسەڵاتی تەواویان لێرە هەیە، بڕیارماندا دوای چوار هەفتە لە خۆپیشاندان لە گەرمیان کە هیچ بەرپرسێک بەدەم داواکاریەکانمانەوە نەهات، خۆپیشاندامەکانمان بۆ دەباشان بگوازینەوە، ئەوە چوار رۆژە لە پێش دەباشان خۆپیشاندان دەکەین، تا ئێستا هیچ کەس نەهاتووە گوێ لە داواکارییەکانمان بگرن و چارەسەرمان بۆ بکەن.

نوێنەری قوتابییە نارازییەکانی کۆلێژی پزیشکی زانکۆی گەرمیان دەڵێ: داواکارییەکانمان بریتین لەوەی کە کۆلێژی پزیشکی گەرمیان دابخرێت و قوتابییەکانی بۆ کۆلێژە پزیشکییە هاوسیستمەکان بگوازرێتەوە بە میکانیزمی گونجاو، یان کۆلێژی پزیشکی زانکۆی گەرمیان بۆ شارێکی دیکە بگوازرێتەوە کە توانای بەڕێوەبردنی هەبێت لە رووی ئەکادیمی و زانستییەوە، یان تەقیفکردنی کۆلێژی پزیشکی زانکۆی گەرمیان بۆ کاتێکی دیاریکراو بکرێت و قوتابییەکانی بۆ کۆلێژەکانی پزیشکی زانکۆکانی دیکە بگوازرێتەوە.

توانا لەتیف بۆ بازمیدیا گوتی: کۆلێژەکەی ئێمە بروانامەکەی لەلایەن عیراقەوە دانپیانراو نییە، ئێمە بۆ ئەوەی درێژە بە خوێندن بدەین دەبێ دانپیانانمان هەبێت، سەرەڕای ئەوەش تا ئێستا دە بۆ سیازدە دکتۆرمان هەیە، لە کاتێکدا پێویستمان بە هەشتا دکتۆری پسپۆڕ هەیە تا وانە بە قۆناغی یەک تا شەش بڵێتەوە، ئەمە جگە لەوەی تا ئێستا نەخۆشخانەی فێرکاری و تاقیگەمان نییە، بۆ هەموو ئەمانەش بڕە پارەیەکی زۆر و کاتێکی زۆری دەوێت، بۆیە چەند قۆناغێک دەکرێتە قوربانی تا ئەمە تەواو بکرێت، بۆیە داواکارییەکانمان گۆڕی و وەک ئەوەی لەسەرەوە ئاماژەم پێداوا.

خانەوادەی نەجمەدین کەریم روونکردنەوە لەسەر کاندیدکردنی برایەکی دەدەن

ڕوونکردنەوە:

هاووڵاتییانی شاری کەرکوکی خۆشەویت کەس و کاری سەربەرزی شەهیدان پێشمەرگە قارەمانەکان سەرجەم جین و توێژەکانی کەرکووک هەموومان دەزانین کە هەڵبژارنی ئەنجومەنی پارێزگای کەرکووک گرنگیەکی تایبەت بەخۆی هەیە وە دڵنیاین لەوەی کە شارەکەمان بەوجۆری ئێستا نامینێتەوە گۆرانکانی تەواوی بەسەر دێت مۆرکی کوردایەتی و رەسەنایەتی بۆ شارەکەمان دەگەرێتەوە.

ئەوەی بەلای ئێمەوە جێگەی سەرسوڕمانمان بوو وەک خانەوادەی ( دکتۆر نەجمەدین کەریم ) کە برایەکی بەناوی ( فەرهاد کەريم ) وەک کاندیدێک بەشداری هەڵبژاردنی ئەنجومەنی پارێزگای کەرکووکی کردووە کە ئيمە دڵنیاین ئەو بەرێزە لەلایەن لایەنێکی سیاسییەوە بەکارهێندراوە دەیانەوێت لەو رێگایەوە دەنگی هاووڵاتییانی سەربەرز و خۆشەویست وە سۆز و هەستی دەنگدەرانی شارەکەمان بەدەست بەهێنن ، بۆیە بەگرنگمان زانی کە هاووڵاتییانی شاری کەرکووک دڵنیا بکەینەوە کە ئەم بەرێزە هیج پەوەندیەکی بە ئێمەوە وەک خانەوادەی ( دکتۆر نەجمەدین کەریم ) وە نیە وە ئاگاداری خۆکاندیدکردنی نین و پشتگیر و پشتیوانی نین وە بەهیچ جۆرێک نامانەوێت ناوی باوکی کۆجکردوومان بۆ بانگەشەی هەڵبژاردن بەکاربهێندرێت بۆ مەبەستی راکێشان و سۆز و هەستی هاووڵاتییان وە کۆکردنەوەی دەنگەکانیان، وە دڵنیاین کە ئەو بەرێزە بۆ بەدەست هێنانی حەزو ئارەزووەکانی خۆی کاندید کردووە ،وە دەیەوێت ناو و ناوبانگی ( دکتۆر نەجمەدین کەریم ) بەکاربهێنێت بۆ کۆکردنەوەی دەنگ .

ئيمە دڵنیاین کە هاووڵاتییانی سەربەرز و خۆراگری شارەکەمان بەشداری کارای هەڵبژاردن دەبن وە دەنگ بەو کاندیدانە دەدەن کە دڵخوازی خۆیانن،
نەک ئەو کاندیدانەی کەدەیانەوێت لەژێر ناو و سێبەری کەسانی تر دەنگ بەدەست بهێنن .
لە کۆتاییدا دووبارەی دەکەینەوە کە ئێمە بەهیج جۆرێک پشتگیر و هاوکاری ( فەرهاد کەریم ) نین و ئاگاداری خۆکاندید کردنی نین وە رێگەش بەهیج کەس و لایەنێک نادەین ناوی رەوانشاد ( دکتۆر نەجمەدین کەریم ) بەکاربهێنن بۆبانگەشەی هەڵبژاردن .

خانەوادەی
ڕەوانشاد (دکتۆر نەجمەدین کەریم)
١ / ١١ / ٢٠٢٣