یه‌كێتی له سنووری سلێمانی، بەرپرسانی حكومی خۆی ناچار دەكات فۆرمی كارمەندی سەر سندووقەكانی دەنگدان پڕ بكەنەوە
ناڕەزاییەكی زۆر لەنێو گەنجانی هەژار و بێكاردا دروست بووە.
یه‌كێتی نیشتیمانیی كوردستان له دەڤەری سلێمانی، بەرپرسانی حكومیی خۆی ناچار دەكات فۆرمی كارمەندی سەر سندووقەكانی دەنگدان پڕ بكەنەوە، تاوەكوو زۆرترین كادیری خۆی لە رۆژی دەنگداندا كارمەندی سندووقەكانی دەنگدان بن و دڵنیا بن لە بەشداریكردنیان لە هەڵبژاردن.
بەپێی زانیارییەكان، مەڵبەندەكانی یەكێتی لە پارێزگاكانی سلێمانی و هەڵەبجە و ئیدارە سەربەخۆكانی گەرمیان و راپەڕین، سەرجەم بەڕێوەبەر و بەڕێوەبەرە گشتییەكانی سەر بە حزبەكەیان ئاگادار كردووەتەوە كە دەبێت فۆرمی كارمەندی سەر سندووقەكانی دەنگدان پڕ بكەنەوە، بەم هۆیەشەوە بەشێكی بەرچاوی بەرپرسانی حكوومیی یەكێتی ناویان وەك كارمەندی سەر سندووقەكانی دەنگدان هاتووەتەوە، لەنێویشیاندا هەریەك لە بەڕێوەبەری گشتیی وەبەرهێنانی هەڵەبجە و بەڕێوەبەری گشتیی گەشتوگوزاری هەڵەبجەش هەن.
پاش ئاشكرابوونی ناوی ئەو بەرپرسانەی یەكێتی لەنێو لیستی كارمەندانی سەر سندووقی دەنگدان بۆ هەڵبژاردنی پەرلەمانی كوردستان، ناڕەزاییەكی زۆر لە لایەن گەنجانی بێكار و هەژاری دەڤەرەكە دروست بوو و گازاندەی ئەوەیان دەكرد كە بۆچی ئەو كەسانە فۆرمیان پڕ كردووەتەوە و دەرفەت نەدراوە گەنجانی بێكار لەو بڕە پارە كەمە سوودمەند بن كە بە كارمەندانی سەر سندووقەكان دەدرێت؟
بەپێی زانیارییەکانی بازمیدیا، هەر لەژێر ئەو فشارانەدا، زانیار حەمەنووری، بەڕێوەبەری گشتیی وەبەرهێنانی هەڵەبجە ڕوونكردنەوەیەكی بڵاو كردووەتەوە و تێیدا ناڕاستەوخۆ دانی بەوەدا ناوە كە لە لایەن یەكێتیدا راسپێردراوە بۆ پڕكردنەوەی فۆرم و دەڵێت: ”بەهۆی ئەوەی ئێستا لە پۆستی بەڕێوەبەری گشتیدام، وەک ئەرک و واجبێک ڕاسپێردراوین بە پڕکردنەوەی فۆڕم بۆ ئەوەی تەواجودمان هەبێت و دەورێکی ڕاستەوخۆمان هەبێت لە پڕۆسەکەدا، ئەمەش بە ئەرکێکی هەڤاڵانە دەبینین و پابەندین بە جێبەجێکردنیەوە.“
