ئێوارە کۆبوونەوەیەکی دۆستایەتی لە نێوان کوردستانییان و نەرویژییەکان ڕێکخرا
ڕۆژی پێنجشەممە ڕێکەوتی ٤ی٤ی ٢٠٢٤ بە ئامادەبوونی بەڕێز کاک شفا بارزانی سەرپەرشتیاری گشتی ڕەوەندی کوردستانی، لە ئۆسلۆی پایتەختی نەرویژ، نوسینگەی دیاسپۆرا لە بارەگای بارزانی ئێوارە خوان و کۆبوونەوەیەکی بۆ کوردستانییان و نەرویژییەکان ڕێکخست.
کۆبوونەوەکە بۆ ڕێزگرتن بوو لەو ئەندام پەرلەمان و وەزیر و سیاسەتڤانە نەرویژییانەی کە هاوڕێ و هاوکاری کوردستانییان بوونە و بەردەوام پاڵپشتی دۆزی ڕەوایی چوار پارچەی کوردستانییان کردووە.
لە کۆبوونەوەکەدا سەرپەرشتیاری گشتی ڕەوەندی کوردستانی وتارێکی پێشکەش کرد، تیایدا سوپاسی هاوکاری دۆستە نەرویژییەکانی کرد و گوتی: بە بوونتان ئیتر کوردستان جگە لە شاخەکان دۆستی تریشی هەن و ئێوەش شاخن بۆ پشتگیری لە کوردستان، هەروەها داوای لێکردن بەردەوام بن لە پشتگیری دۆزی ڕەوایی کوردستان لە هەرچوارپارچە و هانی وڵاتی نەرویژ بدەن زیاتر هاوکاری کوردستان بکات.
چەند کەسایەتی و سیاسەتڤانێکی نەرویژی وتارییان پێشکەش کرد و سوپاسی بانگهێشتنامەی جەنابی کاک شفا بارزانییان کرد، و بەڵێنیاندا بەردەوام بن لە پاڵپشتی گەل و وڵاتی کوردستان.
لە لایەن بەڕێز کاک شفا بارزانی سوپاسنامە و پەرتووکی جەنابی سەرۆک بارزانی ( بارزانی و بزووتنەوەی رزگاریخوازی نەتەوەی کورد) پێشکەش بە دۆستانی کورد کرا.
ئەوەی شایانی باسە دانیشتنەکە بە ئاوازی ئۆپێرای کوردی کە لە لایەن ئۆپێراخوێنی کوردی پەروین چاندار پێشکەش بە ئامادەبووان کرا، زیاتر درەوشایەوە.