هەولێر/ وەزارەتی تەندروستی سزای توند دەگرێتەبەر بەرامبەر تاوانێکی گەورەی دەرمانخانەیەک …
ڕێکەوتی ٢٦ ی ١١ی ٢٠٢٣ لێژنەی باڵای چاودێری دەرمان لە وەزارەتی تەندروستی حکومەتی هەرێمی کوردستان بەهەماهەنگی لەگەل لقی هەولێری سەندیکای دەرمانسازانی کوردستان و پۆلیسی شارەوانی قائمقامیەتی قەزای ناوەندی هەولێر، پشکنینی بۆ دەرمانخانەیەک ئەمجامدا لەبەرامبەر تاوانێکی گەورەی دژ بە بەرژەوەندی هاوڵاتیان کە دەرکەوت دەرمانخانەی CVS Pharmacy نرخ و ستیکەری فەرمی کوالیتی کۆنتڕۆڵی لەسەر دەرمانەکان لابردووو بۆ ئەوەی بەنرخێکی گرانتر دەرمان بە هاوڵاتیان بفرۆشێت و بەم ڕێگەیە تاوانی فێڵکردن و گران فڕۆشتنی ئەنجامداوە.
وەزارەتی تەندروستی دەسبەجێ بڕیاریدا بە داخستنی دەرمانخانە و ڕاگرتنی مۆڵەتی دەرمانخانە و ڕاگرتنی مۆڵەتی پیادەکردنی پیشەی دەرمانسازی و هەواڵەکردنی تۆمەتباران بۆ دادگا بۆ وەرگرتنی ڕێککاری یاسایی.
وەزارەتی تەندروستی جەخت لە سەرجەم دەرمانخانە و سەنتەر و نەخۆشخانە تایبەتەکان دەکاتەوە خۆیان دوور بگرن لە دەرمان و پێداویستی پزیشکی بێ ستیکەر و نافەرمی و هاوڵاتیانی خۆشەویستیش ئاگاداردەکاتەوە، هۆشیار بن لەکاتی کڕینی دەرمان بەنرخی فەرمی سەر ستیکەر و دڵنیابوونەوە لە هەبوونی ستیکەری ئەلیکتڕۆنی.
لەکاتی هەست کردن لە نەبوونی ستیکەر یان نرخی گرانتر لە نرخی فەرمی، دەستبەجێ پەیوەندی بە هێڵە گەرمەکانی چاودێری دەرمان بکەن بەم ژمارانەی خوارەوە.
ژمارەی مۆبایلی ڕاستەوخۆ و وەتسئەپ و ڤایبەر
07502356000
وەزارەتی تەندروستی
حکومەتی هەرێمی کوردستان.
26 تشرینی دووەم 2023