قەهرەمان عوسمان : پارتی نەهاتووە بشکێت
پارتی نەهاتووە بۆ شکان!
بەدرێژایی مێژووی پارتی، هەمیشە پارتی قوربانی داوە بۆ ئەوەی دۆزی کورد سەربخات؟! چونکە لای پارتی حیزبایەتی ئامرازە بۆ گەیشتن بە ئامانج و پارێزگاری کردن لێی. کورد وەک نەتەوە و کوردستان وەک خاک، ئامانجن بۆ پارتی نەک حیزبایەتی و دەستکەوتی حیزبی و کەسی.
پارتی نەهاتووە بشکێت و زۆر کەسیش خۆیان تاقی کردووەتەوە کە بیشکێنن، کەچی ئەوان شکان و پارتی هەر بە پێوەیە.
ملی ساریجێ و هەندرێن و زۆزک و خواکورک و داستانی کۆڕێ و نەبەردییەکانی پردێ و سحێلا و مەحموودییە، شاهیدن کە چەند نەیار هاتن پارتی بشکێنن، کەچی خۆیان شکان و لەسەر ئەژنۆ هاتنەوە بۆ دەست ماچ کردنی پارتی، و پارتیش هەر بە پێوەیە و دارەبەڕوو ئاسا ڕەگەکانی بە زەویدا ڕووچوون و سەریشی لە تاقی ئاسماندا بەرز بەرز ڕاست وەستاوە.
پارتی نەشکاوە و بۆ شکان نەهاتووە! پارتی پارێزگاری لە دەستکەوتی گەلی کورد دەکات، و ئەوانەی شکاندن کە دەیانەویست دەستکەوت و مافێکی کورد ( پۆستی سەرۆککۆمار) بە کەسی و حیزبی بکەن و لەسەر کەسێکی تاپۆ بکەن.
پارتی نەشکا، بەڵکو ئەو دەستانەی شکاندن کە، دەیانەویست مافی گەلی کورد مۆنۆپۆل بکەن و جگە لە بێ بەرهەم بە کەسی تری کوردی ڕەوا نەبینن ئەو پۆستە.
پارتییەک لە ۱۹٦٦ و ۱۹۸۳ و ۱۹۹٤ بە گەورەکانیان نەشکا بێت، بە ئەوان نەک ناشکێت، بەلکو تەنانەت درزیشی تێناکەوێت.
پارتی خاوەنی ڕابەرێکە نەک هەر ناشکێت، بگرە درزەکانی نێوان کوردیش چاک دەکاتەوە و هەرگیز لێناگەڕێت کورد و دۆزەکەی بشکێندرێن.
