هاوپۆل: هەواڵ

سەرۆك بارزانی پێشوازی لە شاندێكی سەربازیی بریتانیا دەكات

ئێوارەی ڕۆژی چوارشەممە 7ی ئەیلوولی 2022 لە سەلاحەددین سەرۆك مەسعود بارزانی پێشوازی لە مارشال سامی سامپسۆن ڕاوێژكاری باڵای سەربازیی بریتانیا بۆ ڕۆژهەڵاتی ناوەڕاست و باكووری ئەفریقا و شاندێكی یاوەری كرد.

لە دیدارەكەدا ڕاوێژكاری باڵای سەربازیی بریتانیا بۆ ڕۆژهەڵاتی ناوەڕاست و باكووری ئەفریقا پابەندبوونی وڵاتەكەی بە دۆستایەتی و هاوپەیمانی لەگەڵ هەرێمی كوردستان و پاڵپشتیی و هەماهەنگی لەگەڵ هێزی پێشمەرگەی كوردستان دووپاتكردەوە. هەروەها سوپاسی ڕۆڵی سەرۆك بارزانیی كرد لە هەوڵدانی بۆ یەكخستنی یەكەكانی پێشمەرگە لەژێر چەتری وەزارەتی پێشمەرگەی حكوومەتی هەرێمی كوردستان. جەختی لەوەش كردەوە كە ماف و ئیستحقاقاتی هەرێمی كوردستان و پێشمەرگە پێویستە لە چوارچێوەی مەنزوومەی بەرگریی عێراق پارێزراو بێت.

هەر لەو دیدارەدا سەرۆك بارزانی پیرۆزبایی دەستبەكاربوونی حكوومەتی نوێی بریتانیای كرد و سوپاسی وڵاتی بریتانیا و هاوپەیمانانی كرد كە لە شەڕی دژی داعشدا یارمەتیدەری هێزی پێشمەرگەی كوردستان بوونە. لە بەشێكی دیكەی دیدارەكەدا سەرۆك بارزانی وێڕای ئاماژەپێدان لە ڕۆڵی پێشمەرگە لە خەباتی گەلی كوردستان جەختی لەوە كردەوە كە پێشمەرگە بە بیروباوەڕی خۆی پارێزگاری لە دۆزی ڕەوای گەلی كوردستان و دۆز و بەها مرۆڤییەكان دەكات.

پەیوەست بە چاكسازییەكانی هێزی پێشمەرگە سەرۆك بارزانی ڕایگەیاند كە پاڵپشتیی تەواوی چاكسازییەكانی وەزارەتی پێشمەرگە دەكات و بە پێویستیشی زانی كە هێزی پێشمەرگەی كوردستان یەك یەكەی ژمێریاریی هەبێت و لەژێر یەك سەركردایەتیی بێت كە وەزارەتی پێشمەرگەی حكوومەتی هەرێمی كوردستانە.

سەرۆکی حکومەت پێشوازی لە یاریدەدەری وەزیری دەرەوەی ئەمەریكا دەکات

ئه‌مڕۆ چوارشه‌ممه‌ 7ی ئەیلوول، مەسرور بارزانى سه‌رۆكى حکومەتی هه‌رێمى كوردستان، پێشوازى له‌ باربارا لیف یاریدەدەری وەزیری دەرەوەی ئەمەریكا بۆ كاروباری ڕۆژهەڵاتی ناوەڕاست كرد.
له‌ كۆبوونه‌وه‌کەدا پەرپێدانی په‌يوه‌ندييه‌كانى ئه‌مه‌ريكا و هه‌رێمى كوردستان و دوايين گۆڕانکاری و پەرەسەندنەکانی دۆخى سياسيى عێراق تاووتوێ كران.
یاریدەدەری وەزیری دەرەوەی ئەمەریكا، پابەندبوونی وڵاتەکەی بە بەردەوامبوون لە پشتیوانیکردنی هەرێمی کوردستان و پێشمەرگە دووپات کردەوە. گوتیشی هەوڵەکانمان چڕ دەکەینەوە لە پێناو چارەسەرکردنی کێشەکانی نێوان هەرێمی کوردستان و حکومەتی فیدرالی بەتایبەتی ناکۆکییەکانی پەیوەندیدار بە پرسی نەوت وگاز کە پێویستە بە گفتوگۆ چارەسەر بکرێن، چونکە چارەسەرنەکردنیان، کاریگەریی خراپی لە سەر ئارامی و سەقامگیریی عێراق دەبێت .
سەرۆکی حکومەت، کورتەیەکی دەربارەی چاکسازییەکانی کابینەی نۆیەم لە بواری هەمەجۆرکردنی ئابووری و سەرچاوەکانی داهات و بنیاتنانی ژێرخانێکی بەهێز خستەڕوو. لەبارەی پەیوەندییەکانی هەرێمی کوردستان و حکومەتی فیدراڵی، سەرۆکی حکومەت جەختی لەوە کردەوە، کە خەڵکی کوردستان، قوربانییەکی زۆری لە پێناو مافە ڕەواکانی داوە، بۆیە ئامادە نییە لە ژێر هیچ فشارێکدا، دەستبەرداری ماف و شایستە دەستوورییەکانی ببێت. خواستی هەرێمی کوردستانیشی بۆ چارەسەرکردنی بنەڕەتی کێشەکان لە سەر بنەمای دەستوور، دووپات کردەوە.
گۆڕانی کەشو هەواو کاریگەرییەکانی نەرێنییەکانی لە سەر عێراق و هەرێمی کوردستان ، بایەخدان بە وزەی ژینگەدۆست و پاک و جێگرەوە و برەودان بە وەبەرهێنانی ئەمەریکی و گرنگیدان بە کەرتی تایبەت، چەند تەوەرێکی دیکەی کۆبوونەوەکە بوون کە ‌باڵیۆزی ئەمەریکا لە عێراق ئەلينا ڕۆمەناوسکی و ئیرڤ ھیکس كونسولى گشتيى ئه‌مه‌ريكا له‌ هه‌رێمى كوردستان ئامادەی بوون.

ئەنجومەنی وەزیران ئامادەکارییەکانی ساڵی نوێی خوێندن تاووتوێ دەکات

ئامادەکاری پێویست دەکرێت بۆ دابەشکردنی نەوتی سپی لە ناوچە شاخاوییەکان.

ئەمڕۆ چوارشەممە 7ی ئەیلوولی 2022، بە سەرپەرشتی مەسرور بارزانی سەرۆکی ئەنجومەنی وەزیران و ئامادەبوونی قوباد تاڵەبانی جێگری سەرۆکی ئەنجومەن، ئەنجومەنی وەزیرانی هەرێمی کوردستان کۆبووەوە.
لە سەرەتای کۆبوونەوەکەدا، سەرۆک وەزیران، باسی دوایین گۆڕانکاری و پێشهاتەکانی بارودۆخی سیاسیی عێراقی کرد و ئاماژەی بەوە دا کە هەرێمی کوردستان لە گەڵ چارەسەرکردنی کێشەکانی عێراقە لە ڕێگەی گفتوگۆ و بەشێوەیەکی ئاشتیانە و بنەڕەتی و لە سەر بنەمای دەستوور، بە جۆرێک ڕێز لە سیستەمی دیموکراسی و دەنگی هاووڵاتییان بگیرێت و ئارامی و سەقامگیریی عێراق بپارێزرێت.

سەرۆک وەزیران جەختی لە گرنگیی هاوهەڵوێستی لایەنە کوردستانییەکان لە داکۆکیکردن لە ماف و شایستە دەستوورییەکانی خەڵکی کوردستان و پاراستنی دەسکەوتە نیشتمانییەکان کردەوە . دووپاتیشی کردەوە کە هەرێمی کوردستان، وەک هەمیشە فاکتەرێکی ئارامی و سەقامگیریی لە عێراق و ناوچەکەدا دەبێت.

پاشان لە لایەن ئانۆ جەوهەر وەزیری پەروەردە بە وەکالەت و ئارام محەمەد قادر وەزیری خوێندنی باڵا و توێژینەوەی زانستی، ئامادەکارییەکانی هەردوو وەزارەت بۆ دەستپێکی ساڵی خوێندنی نوێی2023- 2022 و پێداویستییەکانی خرایەڕوو، ئەنجومەنی وەزیران، وێڕای پیرۆزبایی لە قوتابیان و خوێندکاران و مامۆستایان و کارمەندانی پەروەردە و خوێندنی باڵا، بە بۆنەی نزیکبوونەوەی ساڵی نوێی خوێندن کە بڕیارە لە 13ی ئەم مانگە لە قوتابخانەکان دەست پێ بکات، لە هەمانکاتدا ئەنجومەنی وەزیران، جەختی لە گرنگی کەرتی پەروەردە و خوێندنی باڵا کردەوە لە کارنامەی ئەم کابینەیە و بڕیاردرا بە ڕاسپاردنی وەزارەتە پەیوەندیدارەکان، بۆ بەدواداچوون و لێکۆڵینەوە لەو داواکاری و پێشنیازانەی لە لایەن هەردوو وەزارەت خرانەڕوو بۆ کۆبونەوەی ئەنجومەن و بە بایەخیشەوە ، باس لە گرنگیی پلانی هەردوو وەزارەت کرا بۆ گرنگیدان بەو بابەتانەی ڕەهەندی نیشتیمانییان هەیە وەک خۆشەویستی نیشتیمان وئاشتیی و بەیەکەوەژیان و مەترسییەکانی بەکارهێنان و بڵاوبونەوەی ماددە هۆشبەرەکان و توندوتیژی و خراپ بەکارهێنانی تەکنەلۆجیا وئامێرەکانی پەیوەندی.
لە بڕگەی سێیەمی کۆبوونەوەدا، کەمال محەمەد ساڵح وەزیری سامانە سروشتییەکان بە وەکالەت و ئاوات شێخ جەناب وەزیری دارایی وئابووری ، باسیان لە ئامادەکاریی پێویست بۆ دابینکردنی نەوتی سپی بۆ هاووڵاتییان کرد لە وەرزی زستان، هاوشێوەی ساڵانی پێشوو بەهەماهەنگی لە گەڵ حکومەتی فیدراڵ. ئەنجومەنی وەزیران بڕیاریدا، لەمبارەیەوە ئامادەکاری پێویست بکرێت بۆ دابەشکردنی نەوتی سپی بە تایبەتی بۆ ناوچە سارد و شاخاوییەکان . بۆ ئەم مەبەستەش، وەزیری سامانە سروشتیەکان بە وەکالەت و وەزیری هەرێم بۆ کاروباری دانوستان لەگەڵ حکومەتی فیدڕاڵیی ونوێنەرایەتی حکومەتی هەرێم لە بەغدا ڕاسپێردران بۆ ئەنجامدانی کاری پێویست.

لە بڕگەی کۆتاییدا، گفتوگۆ دەربارەی بابەتی گرێبەست لە دامەزراوەکانی هەرێمی کوردستان و دامەزراندنی هەڵگرانی بڕوانامەی ماستەر و دکتۆرا کرا کە تا ئێستا دانەمەزراون. ئەنجومەنی وەزیران وێڕای بە بایەخەوە سەیرکردنی ڕۆڵی کارمەندانی گرێبەست لە بەڕێوەبردن وپێشکەشکردنی خزمەتگوزاریی گشتیی و پێداویستی زانکۆکان بە خزمەتی هەڵگرانی بڕوانامەکانی ماستەر و دکتۆرا، بڕیاریدا کە ئەم بابەتە ئاراستەی ئەنجومەنی گشتی ڕاژە بکرێت کە تازە دەستبەکاربووە لە هەرێمی کوردستان تا بە پێی تایبەتمەندیی و بە هەماهەنگی لەگەڵ وەزارەتە پەیوەندیدارەکان، پۆڵێنی هەردوو بابەتەکە بکەن و لەبەر ڕۆشنایی پسپۆڕیی و تایبەتمەندیی و پێداویستی وەزارەت و دامەزراوەکان، بڕیار لەسەر پێشنیارەکە بدرێت و بەجۆرێک کە بگونجێت لە گەڵ پرۆسەی چاکسازی و ڕێکخستنەوەی میلاکاتی حکومەت، هەروەها لەسەر بنەمای زانستیی و پێداویستی وپسپۆڕیی لە لایەن ئەنجومەنی گشتی ڕاژەوە، ئەم بابەتە پێداچوونەوەی پێویستی بۆ بکرێت و گەڵاڵە بکرێت بۆ بڕیاردان.

سەرۆك بارزانی پێشوازی لە باڵیۆزی یەكێتیی ئەوروپا لە عێراق دەكات

ڕۆژی چوارشەممە 7ی ئەیلوولی 2022 لە سەلاحەددین سەرۆك مەسعود بارزانی پێشوازی لە بەڕێز ڤیلە ڤاریۆلا باڵیۆزی یەكێتیی ئەوروپا لە عێراق و شاندێكی یاوەری كرد.

لە دیدارەكەدا باڵیۆزی یەكێتیی ئەوروپا ڕایگەیاند كە یەكێتیی ئەوروپا بە بایەخەوە سەیری هەرێمی كوردستان دەكات و ڕۆڵی هەرێمی كوردستان بۆ پاراستنی سەقامگیریی عێراق و ناوچەكە بەرز دەنرخێنێت. ئەوەشی خستەڕوو كە یەكێتیی ئەوروپا بڕیاری داوە نوێنەرایەتییەكەی فراوانتر بكات و نوێنەرایەتییەكی هەمیشەیی لە هەرێمی كوردستاندا دابمەزرێنێت.

هەر لەو دیدارەدا بارودۆخی سیاسیی عێراق و بنبەستی سیاسیی نێو پڕۆسەی سیاسی عێراق تاوتوێ كرا و باڵیۆزی یەكێتیی ئەوروپا جەختی لەسەر دەستوور و دیالۆگ وەك بنەمای چارەسەری كێشەكان كردەوە. هاوكات پێزانینی بۆ ڕۆڵی سەرۆك بارزانی بۆ لەیەكنزیككردنەوەی لایەنە عێراقییەكان هەبوو و پشتیوانیی یەكێتیی ئەوروپاشی بۆ ئەنجامدانی هەڵبژاردنەكانی هەرێم ڕاگەیاند.

لەو دیدارەدا سەرۆك بارزانی خۆشحاڵیی خۆی بۆ بڕیاری یەكێتیی ئەوروپا بۆ كردنەوەی نوێنەرایەتیی هەمیشەیی یەكێتیی ئەوروپا لە هەرێمی كوردستان نیشان دا و، پەیوەست بە هەڵبژاردنەكانی هەرێمیش ئەوەی خستەڕوو، پارتی دیموكراتی كوردستان لەگەڵ ئەوەدایە كە هەڵبژاردنەكانی هەرێم بە زووترین كات ئەنجام بدرێن و داواشی كرد كە كۆمەڵگەی نێودەوڵەتی لە یارمەتیدان و چاودێریكردنی هەڵبژاردنەكانی هەرێم ڕۆڵی هەبێت.

لەبارەی قەیرانی سیاسیی عێراقیش سەرۆك بارزانی ئەوەی دووپات كردەوە كە هۆكاری لێكترازان و قەیرانی سیاسیی عێراق پابەندنەبوونە بە دەستوور و هەر حكوومەتێكیش كە لە ئاییندە لە عێراقدا پێك بهێندرێت دەبێ لەسەر بنەمای بەرنامەیەكی فراوان و بەهێز و، پاراستنی مافەكانی هەرێمی كوردستان و ڕەچاوكردنی پڕەنسیپەكانی شەراكەت و هاوسەنگی و سازان و، لەچوارچێوەی دەستوور و دیالۆگ بێت.

سەرۆك بارزانی پێشوازیی لە شاندێكی باڵای وەزارەتی دەرەوەی ئەمەریكا دەكات

ڕۆژی چوارشەممە 7ی ئەیلوولی 2022 لە سەلاحەددین سەرۆك مەسعود بارزانی پێشوازی لە خاتوو باربارا لیف یاریدەدەری وەزیری دەرەوەی ئەمەریكا بۆ كاروباری ڕۆژهەڵاتی ناوەڕاست و شاندێكی یاوەری كرد كە پێكهاتبوو لە خاتوو ئەلینا ڕۆمانۆسكی باڵیۆزی ئەمەریكا لە عێراق و، بەڕێز ئێرڤن هیكس كونسوڵی گشتیی ئەمەریكا لە هەولێر.

لە دیدارەكەدا یاریدەدەری وەزیری دەرەوەی ئەمەریكا بۆ كاروباری ڕۆژهەڵاتی ناوەڕاست سڵاوی سەرۆك بایدنی بە سەرۆك بارزانی گەیاند و هێمای بەوە دا كە سەرۆك بایدن بە بایەخێكی زۆرەوە سەیری هەرێمی كوردستان دەكات و، هەرێمی كوردستانیش یەكێكە لە ئەولەوییەتەكانی سیاسەتی دەرەكیی وڵاتەكەی و جەختیشی لەوە كردەوە كە سەروەری و سەقامگیریی هەرێمی كوردستان و عێراق، بناخەیە بۆ سەقامگیری و پێشكەوتنی ناوچەكە. لە بەشێكی دیكەی قسەكانیدا جەختی لەوە كردەوە كە وڵاتەكەی پەرۆشیەكی زۆری بۆ پەیوەندییەكانی هەرێمی كوردستان و حكوومەتی فیدڕاڵی عێراق هەیە و، وێڕای دەربڕینی پێزانینی خۆی بۆ ڕۆڵی سەرۆك بارزانی لە چارەسەركردنی كێشەكان لەسەر بنەمای دەستوور، داوای كرد كە سەرۆك بارزانی بە حیكمەت و كاریگەریی خۆی پتر بە ڕۆڵی خۆی بۆ چارەسەركردنی كێشەكان و نەهێشتنی بنبەستی سیاسیی عێراق هەڵبستێت.

هەر لەو دیدارەدا سەرۆك بارزانی وێڕای بەخێرهێنانی شاندی میوان سڵاو و ڕێزی بۆ سەرۆك بایدن هەبوو. هەروەها كورتەیەكیشی لەمەڕ بارودۆخی سیاسیی عێراق و هۆكارەكانی بنەبەستی سیاسیی عێراقی خستەڕوو. سەرۆك بارزانی جەختیشی لەوە كردەوە كە سەرچاوەی كێشەكان و قەیرانی سیاسیی عێراق بۆ پابەندنەبوونی بەغدا بە دەستوور و نەمانی بنەماكانی شەراكەت و هاوسەنگی و سازان لە پڕۆسەی سیاسی و ڕێزنەگرتن لە ئەنجامی هەڵبژاردنەكان و پڕۆسەی دیموكراسی دەگەڕێتەوە.

لە درێژەی قسەكانیدا سەرۆك بارزانی ڕایگەیاند كە پێویستە بابەتە بنەڕەتییەكانی نێوان هەرێم و بەغدا لە چوارچێوەی دەستوور چارەسەر بكرێن و هەر ڕێككەوتن و پێكهاتنێك دەبێ لەسەر بنەمای دەستوور بە ڕوونی و بە جددی كاری لەسەر بكرێت. هەروەها ئەوەشی خستەڕوو كە لە عێراقدا دەبێ بۆ چارەسەری كێشەكان فەرهەنگی یەكترقبووڵكردن هەبێت و، نابێ هیچ لایەنێك هەوڵی سڕینەوەی لایەنی تر بدات و دەبێ ڕێز لە دەستوور بگرێت. سەبارەت بە بیرۆكەی هەڵبژاردنی پێشوەختەش سەرۆك بارزانی ئەوەی دووپات كردەوە كە هیچ لاریەكمان لەمەڕ ئەنجامدانی هەڵبژاردنی پێشوەختە نیە بە مەرجێك زەمینەسازیی سیاسی و یاسایی بۆ بكرێت و هیچ لایەن و پێكهاتەیەك پەراوێز نەخرێت و ڕێزیش لە ئەنجامی هەر هەڵبژاردنێك بگیرێت كە بەڕێوەدەچێت.

مه‌سرور بارزانی سەرۆكی حكومەتی هەرێمی كوردستان : دەرمانی كوالێتی باشتر بۆ هاووڵاتیانمان دابین دەكه‌ین

مه‌سرور بارزانی، سەرۆکی حکومەتی هەرێمی کوردستان له‌ هه‌ژماری تایبه‌تی خۆی له‌ تۆڕی كۆمه‌ڵایه‌تی تویته‌ر ڕایگه‌یاند، ئەمرۆ حکومەت چاکسازییەکی گرنگی لەبواری تەندرینگی دەرمان لە کوردستان دەستپێکرد.

هەروەها لە تویتەکەی سەرۆکی حکومەتدا هاتووە: لەرێگەی گرێبەستە شەفافەکانەوە، دەرمان بە کواڵێتی باشتر و نرخێکی هەرزانتر بۆ هاووڵاتیانمان دابین دەکەین.

مه‌سرور بارزانی پیرۆزبایی له‌ سه‌رۆك وەزیرانی نوێی به‌ریتانیا دەكات

بەرێز مەسرور بارزانی سەرۆکی حکومەتی هەرێمی کوردستان لە تویتێکدا، وێڕای پیرۆزبایی لە سەرۆک وەزیرانی بەریتانیا، نووسی “دڵنیام لە ژێر سەرکردایەتی ئێوەدا، پەیوەندییەکانی نێوان هەرێمی کوردستان و بەریتانیا زیاتر بەرەوپێش دەچن”.

ئەمڕۆ (سێشەممە 6ـی ئەیلوول) لیز ترەس وەک سەرۆک وەزیرانی بەریتانیا لەلایەن شاژنە ئێلیزابێسی دووەم بۆ پێکهێنانی کابینەی نوێی حکومەتەکەی ڕاسپێردرا.