سەرۆکی حکومەت پیرۆزبایی لە یانەی وەرزشی دهۆک دەکات
ئەمڕۆ یەکشەممە 11ی ئەیلوول ، مەسرور بارزانی سەرۆکی حکومەتی هەرێمی کوردستان ، لە پەیوەندییەکی تەلەفۆنیدا لە گەڵ عەبدوڵڵا جەلال سەرۆکی یانەی وەرزشی دهۆک، پیرۆزبایی لە سەرۆک و ئەندامانی دەستەی کارگێڕی و سەرجەم یاریزان و هاندەرانی یانەی وەرزشی دهۆک کرد بە بۆنەی سەرکەوتنی یانەکەیان بۆ خولی نایابی عێراق .
سەرۆکی حکومەت، هیوای سەرکەوتنی بۆ خواستن و پشتیوانیی خۆی بۆ بزاڤی وەرزشی و وەرزشکارانی کوردستان دووپات کردەوە .
سەرۆك بارزانی لە ساڵیادی هەڵگیرساندنی شۆڕشی ئەیلوول پەیامێکی بڵاوکردەوە
دەقی پەیامی سەرۆک مەسعود بارزانی :
بەناوی خودای بەخشندە و میهرەبان
ئەمڕۆ شەست و یەك ساڵ بەسەر هەڵگیرساندنی شۆڕشی مەزنی ئەیلوولدا تێدەپەڕێ. لەو شۆڕشە سەرتاسەرییەی گەلی كوردستاندا هەموو چین و توێژەكانی كۆمەڵگە بەشداری خەباتی نەتەوایەتی و دیموكراسیخوازی گەلەكەیان بوون و هەموو پێكهاتە نەتەوەیی و ئایینییەكانی كوردستانیش شانبەشانی كورد بە ڕابەرایەتیی جەنابی بارزانیی نەمر لەدژی ستەم و داگیركاری خەباتیان كرد. شۆڕشی ئەیلوول شۆڕشی ئیرادە و بڕوابەخۆبوونی مرۆڤی كوردستانی بوو و بناغەیەكی پتەو و ڕێكخراوی بۆ بەردەوامیی تێكۆشان و وەستانەوەی گەلی كوردستان لەدژی زۆرداری دانا. شۆڕشی ئەیلوول بە بەها بەرزەكانییەوە و بە پێداگری و خۆراگریی سەركردایەتی و پێشمەرگە و جەماوەر وای كرد دۆزی ڕەوای گەلی كوردستان هەنگاوی زۆر گەورە بەرەو پێشەوە بنێت و ببێتە سەرچاوەی هێز بۆ قۆناغەكانی تری خەباتی گەلی كوردستان و هەروەها سەرچاوەی ئیلهام بۆ تێكۆشەر و خەباتگێڕان لە هەموو پارچەكانی تری كوردستان.
لە شەست و یەكەمین ساڵیادی شۆڕشی ئەیلوولدا پێزانینم بۆ ڕۆڵ و ماندوونەناسیی دایكان و ژنان و هەموو ئەو پێشمەرگە و خەباتگێڕ و قارەمانانە هەیە كە ڕۆڵیان لەو شانازییە نیشتیمانییەدا هەبووە. چ ئەو قارەمانانەی لە شۆڕشی ئەیلوولدا شەهید بوون و یانیش لە ژیاندا نەماون و، چ ئەو ڕۆڵە سەربەرزانەی بەشداری شۆڕش بوونە و هێشتا لە ژیاندا ماون. ئەو قارەمانانە مێژوویان بۆ گەلەكەیان دروست كرد و جێگەی شانازی و سەربەرزیین بۆ هەموومان.
مسعود بارزانی
11ی ئەیلوولی 2022
مەسرور بارزانی سەرۆکی حکومەتی هەرێمی کوردستان بەبۆنەی شەست و یەکەمین ساڵیادی هەڵگیرسانی شۆڕشی ئەیلوولی مەزن پەیامێکی بڵاوکردەوە کە ئەمە دەقەکەیەتی:
ئەمڕۆ یادی گەورەترین شۆڕشی گەلی کوردستان دەکەینەوە کە شۆڕشی مەزنی ئەیلوولە. ئەم شۆڕشە،وەرچەرخانێکی مێژوویی و شۆڕشێکی سەرتاسەری خەڵکی کوردستان بوو بە گشت پێکهاتە نەتەوەیی و ئاینییە جیاوازییەکانەوە، بە سەرکردایەتی ڕابەری نیشتمانیمان مستەفا بارزانیی نەمر.
یەکێک لە گرنگترین و بەهادارترین تایبەتمەندییەکانی شۆڕشی ئەیلوول، یەکڕیزی و یەکگرتوویی گەلی کوردستان بوو، کە بەهۆی خۆڕاگری و ئیرادەی بەهێزی خەڵکی کوردستان، دوژمن ناچار بوو دان بە بەشێک لە مافە نەتەوەیی و نیشتمانییە ڕەواکانی دا بنێت لە چوارچێوەی ڕێککەوتننامەی یازدەی ئادار.
هەروەها گەورەترین شوناسی شۆڕشی ئەیلوول، گۆڕینی ڕاپەرین و خەباتی ناوچەیی بوو بۆ شۆڕشێکی نیشتیمانی سەرتاسەری لە هەموو کوردستان و دروستکردنی هەستی نەتەوەیی و نیشتیمانی بوو لای هەموو هاووڵاتییانی کوردستان.
ئەمڕۆ کە یادی شۆڕشی مەزنی ئەیلوول دەکەینەوە، پێویستە هەموو لایەن و پێکهاتەکانی گەلی کوردستان، هاوهەڵوێست و یەکدەنگ بن لە پێناو داکۆکیکردن و پاراستنی مافە دەستووری و دەسکەوتە نیشتمانییەکانمان، کە خەڵکی کوردستان، دەیان ساڵە لە پێناویاندا خەبات دەکات و قوربانییەکی زۆری داوە.
لە ساڵیادی شۆڕشی ئەیلوولدا، بە ڕێز و پێزانینەوە، یادی هەموو پێشمەرگە و بەشدارانی ئەو شۆڕشە مەزنەی گەلی کوردستان دەکەینەوە.
سڵاو لە گیانی پاکی شەهیدانی شۆڕشی ئەیلوول و سەرجەم شەهیدانی کوردستان.
مەسرور بارزانی
سەرۆکی حکومەتی هەرێمی کوردستان
مەسرور بارزانی: ئومێدێکی زۆرم بە گەنجە دەرچووەکانی خۆمان هەیە، دڵنیابن بەردەوام دەبم لە پشتیوانیکردنیان
ئەمڕۆ شەممە 10/9/2022، بە ئامادەبوونی مەسرور بارزانی سەرۆکی حکومەتی هەرێمی کوردستان، ئاهەنگی دەرچوونی خوێندکارانی 17مین خولی زانکۆی هەولێری پزیشکی بەڕێوەچوو، کە تێیدا بڕوانامە بەخشرایە 692 خوێندکاری دەرچووی زانکۆکە.
سەرۆکی حکومەتی هەرێمی کوردستان لەمیانی بەشداریکردنی لە ئاهەنگی دەرچوونی قوتابیانی زانکۆی هەولێری پزیشکی وتارێکی پێشکەشکرد و بە قوتابیانی گوت: “ئێوە کە دەبنە پزیشک هیوادارم و دڵنیام لە ئاست پیشەکەتان و سوێندخواردنەکەتاندا دەبن، پزیشکی پیشە و ئەرکێکی زۆر پیرۆز و مرۆڤانەیە، کە پێویستە بەر لە هەر شتێک ئامانجەکەی رزگارکردنی ژیانی خەڵک و پاراستنی تەندروستیان بێت، لەگەڵ دەرچوونتان لە زانکۆ قۆناغێک لە قۆناغەکانی ژیانتان کۆتایی دێت، بەڵام فێربوون کۆتایی نایەت، چونکە فێربوون پرۆسەیەکی بەردەوامە”.
سەبارەت بە بەرزکردنەوەی کوالیتی زانکۆکانی کوردستان، مەسرور بارزانی رایگەیاند: “لە ماوەی رابردوودا حکومەتی هەرێمی کوردستان لەپێناو پەرەپێدانی ئاستی زانستی و ئەکادیمی و زانکۆ و دامەزراوە پەروەردەییەکانمان، دەستەی متمانەبەخشین بە دامەزراوەکان و پڕۆگرامەکانی پەروەردە و خوێندنی باڵای پەسند کرد، ئەم دەستەیە ئامانجی بەرزکردنەوەی کوالیتی خوێندن و پەروەردەیە لە هەرێمی کوردستان، لە ماوەی ساڵانی رابردوودا شایەتی ئەوەین، کە ئاستی زانکۆکانمان بەرز بووەتەوە، بەڵام بۆ ئەوەی بتوانین رکابەری لەگەڵ زانکۆکانی جیهانیدا بکەین، بە پێویستمان زانی ئەو دەستەیە دابمەزرێنین، بۆ ئەوەی زانکۆکانمان لەسەر ئاستی جیهان پلەکانیان بەرزببێتەوە و ئاستی خوێندن لە کوردستان بەرز بکەینەوە”.
سەرۆکی حکومەتی هەرێمی کوردستان، گوتیشی: “دەزانم کە بواری تەندروستی لە کوردستان کێشە و گرفتی هەیە، بۆیە یەکێک لەلایەنە گرنگەکانی چاکسازی کابینەی نۆیەمی حکومەتی هەرێمی کوردستان، چاکسازیکردنە لە بواری تەندروستی و باشترکردنی کوالیتی نەخۆشخانەکان و چاکسازیکردنە لە هاوردەکردن و پشکنینی دەرمان”.
مەسرور بارزانی، راشیگەیاند: “من ئومێدێکی زۆرم بە گەنجە دەرچووەکانی خۆمان هەیە، کە دەتوانن رۆڵێکی کاریگەرببینن لە پرۆسەی گۆڕانکاری و چاکسازی و بەرەوپێشبردنی هەرێمی کوردستان، دڵنیابن من بەردەوام دەبم لە پشتیوانیکردنی ئێوە، پشتیوانی لە پڕۆژە و بیرۆکە داهێنەرەکانتان دەکەم، دڵنیاشم ئێوەش بەهرەی زۆرتان هەیە پشێخستنی کوردستان و پرۆسەی چاکسازی و ئەو گۆڕانکارییەی کە لە هەرێمی کوردستان دەستمان پێکردووە”.
مه‌سرور بارزانی، سه‌رۆكی حكومه‌تی هه‌رێمی كوردستان بۆ كۆچی دوایی شاژنە ئێلیزابێسی دووەم، شاژنی به‌ریتانیا په‌یامێكی سه‌رەخۆشی راگه‌یاند.
ئێوارەی ئه‌مڕۆ شاژنه ئێلیزابێسی دووەم (1926 – 2022)، شاژنی به‌ریتانیا كۆچی دواییكرد.
بەرێز مه‌سرور بارزانی، سه‌رۆكی حكومه‌تی هه‌رێمی كوردستان له په‌یامه‌كه‌یدا نووسیویه‌تی: سەرەخۆشی له بنەماڵەی شاهانەی بەریتانیا و وڵاتانی بەرژەوەندی هاوبەش دەکەم.
هه‌روەها هاتووە: شاژنه ئێلیزابێسی دووەم کەسایەتییەکی بەهێز بوو بۆ حەوت دەیه خزمەتی کرد و مەشخەڵی ئەرکێکی خۆنەویست بوو.
له به‌شێكی دیكه‌ی په‌یامه‌كه‌ی سه‌رۆكی حكومه‌تی هه‌رێمی كوردستاندا هاتووە: شاژنه ئێلیزابێس سەرمەشقی هەموو جیهان بوو، لەگەڵ هەموو جیهان ماتەم بۆ کۆچی دوایی دەگێڕین.
دوای مردنی شاژن لە بەریتانیا چی روودەدات؟
📌 سەرۆک وەزیرانی بەریتانیا لە مردنی ئاگادار دەکرێتەوە ، هەر ئەوکات تەواوی حکومەت لە مردنی ئاگادار دەکرێتەوە.
📌 هەر لە چرکە ساتی مردنی شاژندا ئۆپراسیۆنی پردی لەندەن دەستپێدەکات.
📌 15 حکومەتی دەرەوەی بەریتانیا و 36 وڵات و سەرکردەی وڵاتانی کۆمۆنوێلس ئاگادار دەکرێنەوە.
📌 بڕیارە کورەکەی بەناوی چارڵز کە تەمەنی 72 ساڵە جێگەی دەگرێتەوە و دەبێتە شازادەی بەریتانیا.
📌 بەیانی شازادە چارڵز وتارێک بۆ بەریتانییەکان پێشکەش دەکات.
📌 بەیانی تەرمەکەی لە ئوسکوتلەندا بەرەو لەندەن بەرێدەکرێت.
📌 شازادە ئیلیزابێس لەگەڵ 15 سەرۆک وەزیران ژیاوە لە چەرچڵەوە تا لیزی ترەس .
📌 ئاڵاكان لەسەر کۆشکی بەکینگھام داگیران .
📌 10 ڕۆژ ماتەمینی گشتی لە بەریتانیا ڕادەگەیەندرێت.
📌 هەموو کلێساکانی بەریتانیا زەنگ لێ دەدەن.
📌 کەناڵی بی بی سی بەریتانیا پەخشی ئاسایی ڕادەگرێت و لۆگۆی کەناڵەکەش لە سورەوە بۆ ڕەش دەگۆڕدرێت.
📌 یارییە وەرزشیەکان و خولی تۆپی پێی ئینگلیزی دواخران .
📌 70 سال و 7 مانگ شاژنی وڵاتی بەریتانیا بووە .
📌 چاوەڕوان دەکرێ سەرۆک وەزیرانی نوێی بەریتانیا لیزی ترەس ، بەھۆی کۆچی دوای شاژن وتارێک پێشکەش بکات .
📌 ئەنجومەنی ئاسایشی نێودەوڵەتی دەقیقەیەک وەستان بۆ کۆچی دوای شاژن.
📌 لەسەر باڵاخانەی کۆنگرێسی ئەمریکا ئاڵای ئەمریکا داگیرا.
سەرۆکی حکومەت پێشوازی لە فەرماندەی فەرماندەیی ناوەندیی ئەمەریکا دەکات
ئێوارەی ئەمڕۆ پێنجشەممە 8ی ئەیلوول، مەسرور بارزانی سەرۆکی حکومەتی هەرێمی کوردستان، پێشوازی لە جەنەراڵ مایکل کورێللا فەرماندەی فەرماندەیی ناوەندیی ئەمەریکا ( CENTCOM )کرد.
لە کۆبوونەوەکەدا کە جەنەرال ماتیۆ ماکفەرلین فەرماندەی گشتیی نوێی هێزەکانی هاوپەیمانان لە عێراق و سوریا ئامادەی بوو، دوایین پەرەسەندنەکانی بارۆدۆخی گشتیی عێراق و پەرەپێدانی پەیوەندی دوولایەنە تاووتوێ کرا.
جەنەرال کورێللا قوربانیدانەکانی هێزی پێشمەرگەی کوردستانی بەڕێبەرایەتی جەنابی سەرۆک مەسعود بارزانی لە تێکشکاندنی تیرۆریستانی داعش بەرز نرخاند و پابەندبوونی وڵاتەکەشی بە بەردەوامیی پشتیوانیکردنی پێشمەرگە دووپات کردەوە.
سەرۆکی حکومەت، سوپاسی هاریکاریی و پشتیوانی ئەمەریکا و هێزەکانی هاوپەیمانانی کرد و کورتەیەکی دەربارەی پرۆسەی چاکسازییەکانی کابینەی نۆیەم، بەتایبەتی چاکسازییەکانی وەزارەتی پێشمەرگە خستەڕوو .
گرنگیی چارەسەرکردنی کێشەکانی هەرێمی کوردستان و حکومەتی فیدراڵی بە شێوەیەکی بنەڕەتی و لە سەر بنەمای دەستوور، تەوەرێکی دیکەی گفتوگۆکان بوو.
مەسرور بارزانی پێشوازی لە سەرۆکی دەزگەی ڕاگەیاندن و ڕۆشنبیریی و هونەریی ئەلمەدا دەکات
ئەمڕۆ پێنجشەممە 8ی ئەیلوول مەسرور بارزانی سەرۆکی حکومەتی هەرێمی کوردستان پێشوازی لە بەڕێز فەخری کەریم سیاسەتمەدار و سەرۆکی دەزگەی ڕاگەیاندن و ڕۆشنبیریی و هونەریی ئەلمەدا کرد.
لە کۆبوونەوەکەدا گفتوگۆ دەربارەی بارودۆخی گشتیی عێراق و هەوڵەکانی تێپەڕاندنی چەقبەستوویی سیاسیی و چارەسەرکردنی کێشەکان کرا.
سەرۆکی حکومەت پێشوازی لە شاندێکی یەکێتیی ئەوروپا لە عێراق و سوریا دەکات
ئەمڕۆ پێنجشەممە 8ی ئەیلوول، مەسرور بارزانی سەرۆکی حکومەتی هەرێمی کوردستان، پێشوازی لە شاندێکی هاوبەشی یەکێتی ئەوروپا لە عێراق و سوریا کرد بە سەرۆکایەتی ڤیلە ڤاریۆلا باڵیۆزی یەکێتیی ئەوروپا لە عێراق .
لە کۆبوونەوەکەدا کە بەرپرسی نێردەی یەکێتیی ئەوروپا لە سوریا دان ستۆوینسکو و ئه‌ندێرس ويبێرگ سه‌رۆكى نوێى نێرده‌ى ڕاوێژكاريى يه‌كێتيى ئه‌وروپا له عێراق ئامادەی بوون، گفتوگۆ دەربارەی دوایین پێشهات و گۆڕانکارییەکانی عێراق و سوریا و پەرەپێدانی پەیوەندییەکانی هەرێمی کوردستان و یەکێتیی ئەوروپا کرا.
دوای خستنەڕووی کارو چالاکییەکانی یەکێتیی ئەوروپا لە عێراق و سوریا، باڵیۆز ڤاریۆلا ستایشی پرۆسەی چاکسازییەکانی کابینەی نۆیەمی حکومەتی هەرێمی کوردستان و ئەو هەڵمەتی ئاوەدانکردنەوەیەی کرد کە ئێستا لە هەرێمی کوردستان هەیە و ئامادەیی یەکێتیی ئەوروپاشی بۆ هەر هاوکاریی و هەماهەنگییەک لە گەڵ حکومەتی هەرێم دەربڕی.
سەرۆکی نێردەی یەکێتیی ئەوروپا لە سوریا، سوپاسی هاریکاریی مرۆیی حکومەتی هەرێمی کوردستانی بۆ پەنابەرانی سوریا لە هەرێم و ئاسانکاری هاتووچۆی نێوان هەرێمی کوردستان و ناوچەکانی باکووری ڕۆژهەڵاتی سوریا کرد.
سەرۆکی حکومەت، ئاماژەی بە پەیوەندی بەهێز و دۆستانەی نێوان هەرێمی کوردستان و وڵاتانی یەکێتی ئەوروپا کرد و خواستی بەرەوپێشترچوونی زیاتری پەیوەندییەکانی لە سەر هەموو ئاستەکاندا نیشاندا.
لە تەوەرێکی دیکەی کۆبوونەوەدا، سەرۆکی حکومەت پشتیوانی حکومەتی هەرێمی كوردستانی بۆ ئەنجامدانی پرۆسەی هەڵبژاردنی پەرلەمانی کوردستان لە نزیکترین کاتدا دووپات کردەوە و ئامادەیی حکومەتیشی بۆ هەر هاریکاریی و کارئاسانییەک، بۆ ئەم مەبەستە ڕاگەیاند.
دایكێک بەجارێك حەوت منداڵی بوو
ڕووداوێكی نامۆ ژیانی ژنێكی بەناوی غەزالە تەواو گۆڕی، دوای دووگیانبوونی بە ٩ منداڵ بە جارێك، سەرەڕای ئەوەی پزیشكان پێشبینییان كردبوو هەرگیز ناتوانێت جارێكی دیكە دووگیان ببێتەوە.
غەزالە (٤٠ ساڵ) نیشتەجێی پارێزگای بوحەیرە-یە لە باكووری میسر، هاوسەرەكەی وەك جوتیار بە كرێی ڕۆژانە كاردەكات، پێشتر سێ كچی بووە، بەپێی وتەی پزیشكان دوای ئەو دووگیان نابێتەوە، بۆیە ژیانی لەسەر ئەو ئەگەرە بونیادنا، بەڵام لەپڕێكدا هەستی بە نیشانەكانی دووگیانبوون كرد، دوای ئەوە پزیشكەكە ئەم هەواڵەی پێدا، “لە منداڵدانتدا ٩ منداڵ هەن”.
غەزالە دەڵێت، “هەواڵێكی شۆكهێنەر بوو، دنیا لەو كاتەدا لەبەرچاومدا وەستا، نەمدەزانی چی بكەم، چۆن بژێویی ژیانی ١٢ منداڵ پێكەوە دابین بكەم”.
وتیشی، “یەكێك لە پزیشكان پێشنیاری دەرزی لێدان لە منداڵەكانی بۆ كردم، تا تەنها دوو یان سیانیان بمێننەوە، بە فیعلی لە مانگی سێیەمی سكەكەمدا چوومە نەخۆشخانە، بەڵام بۆ ئەنجامدانی داوای چوار هەزار جونیەی لێكردم، نەمدەتوانی بیدەم، بۆیە خۆم دایە دەست خوا، سكەكەم وەك خۆی هێشتەوە، دووانیان مردن و حەوتیان مانەوە”.
لە مانگەكانی كۆتایی سكەكەیدا، هاوسەرەكەی دەرزییەكی بە ٢٠٠ جونەی میسری بۆ كڕی، سەرەڕای دژواریی دۆخی دارایی، بۆ گەورەبوونی سكی، تا منداڵەكان بتوانن لەناویدا بجوڵێن، تا ئەوكاتەی لە هەشت مانگیدا لە نەخۆشخانەیەكی پارێزگای ئەسكەندەرییە لەدایكبوون.
“منداڵەكانم بەشێكن لە جەستەم”، ئەمە وەڵامی غەزالە بوو كاتێك خانمێك پێشنیاری كڕینی یەكێك لە كچەكانی بۆ كردبوو لە بەرامبەر پێدانی پارە و شوێنێكی نیشتەجێبوون، بەڵام ڕەتیكردەوە و هەموو خۆتەرخانكردنی بۆ منداڵەكان لە بری فرۆشتنی یەكێكیان هەڵبژارد، هاوسەرەكەشی هەمان هەڵوێستی هەبووە و تەنانەت لەسەر ئەو پێشنیارە لەگەڵ بەڕێوەبەری نەخۆشخانەكە بووەتە دەمەقاڵەی و فرۆشتنی كچەكەی لە بەرامبەر پارەدا ڕەتكردووەتەوە.
كاتێك دایك و باوكەكە هەستیان بە نائارامی لەو دۆخە كردووە، لەكاتێكدا لە نەخۆشخانە بوون كاتی لەدایكبوونیان، پەنایان بۆ ئەفسەرێكی پۆلیس بردووە، ئەویش لای خۆیەوە پاسەوانی بۆ ژوورەكەیان داناوە لە ترسی دزینی یەكێك لە منداڵەكانی.
خێزانێكی سعودی پێشنیاریان بۆ غەزالە و هاوسەرەكەی كردووە بچنە سعودیە، خێزانەكە بەڵێنی دابینكردنی تەواوی شمەك و پێداویستییەكانیان پێداون، بەڵام سەرەڕای دژواریی ژیانیان ڕەتیانكردووەتەوە وڵاتەكەیان جێبهێڵن و گەشت بۆ دەرەوە بكەن.
لەئێستادا هەر ١٠ منداڵەكەی غەزالە لە قۆناغی خوێندنی جیاوازدان، حەوت منداڵە پێكەوە لەدایكبووەكەشی لە یەك قۆناغدان، دووپاتیشیكردەوە ڕێگری لە خوێندنی هیچكامیان ناكات. لە خوێندنی هیچكامیان ناكات.