هاوپۆل: هەواڵ

سەرۆکی حکومەتی هەرێمی کوردستان بۆ زیاترکردنی هەلیکار بۆ ناوخۆی هەرێم فەرمانێکی دەرکرد

لەم بارەیەوە پێشەوا هەورامانی گوته‌بێژی فراكسیۆنی پارتی دیموكراتی كوردستان له‌ په‌رله‌مانی كوردستان، ڕایده‌گه‌یه‌نێت، بە فەرمانی مەسرور بارزانی سه‌رۆكی حكومه‌تی هه‌رێمی كوردستان، هیچ پڕۆژەیەکی وەبەرهێنان مۆڵەتی پێنادرێت، ئەگەر بێت و لە 75% کەمتر پشت بە دەستی کاری خۆماڵی ببەستێت.

واتا لەمەودوا مۆڵەتی وەبەرهێنان بەو وەبەرهێنەرە دەدرێت کە لە 75%ی دەستی کاری خۆماڵی بێت .

پرۆژەیەکی تایبەت بە یەکەکانی نیشـتەجێبوون بۆ کرێ نشینانی کریستیانەکان دروست دەکرێت

د. محەمەد شوکری سەرۆکی دەستەی وەبەرھێنانی حکومەتی ھەرێمی کوردستان بە ئامادەبوونی ھەریەک لە ئانۆ جەوھەر وەزیری گواستنەوەو گەیاندن و قایمقام و سەرۆکی شارەوانی عەنکاوە پرۆژەی دروستکردنی یەکەکانی نیشـتەجێبوون بۆ خەڵک و ھاوڵاتیانی کەم دەرامەت و کرێ نشینانی کریستیانەکانی قەزای عەنکاوە ڕاگەیاند

پرۆژەکە لە سنوری قەزای عەنکاوە دەبێت و بەرنامەی سەرۆک وەزیرانە بۆ دروستکردنی یەکەی نیشتجێبوونی شایستە بۆ کرێنشینان بە ئاراستەی یارمەتیدانی ھاوڵاتیانی ھەژارو کەمدرامەت کە ببن بە خاوەنی یەکەیەکی نیشتەجێ بوونی خۆیان .

پرۆژەکە سێ جۆری یەکەی نیشتەجێ بوون لە خۆ دەگرێ ٨٠ بـە پێشەکی ٤ ھەزار دۆلار و ١٠٠ م بە پێشەکی ٥ ھەزار دۆلار و ١٢٠م بە پێشەکی ٦ ھەزار دۆلار دەبێت دواتر بـە قیستی ١٥ پانـزدە ساڵ دەبێت .

سەرۆک مەسعود بارزانی بەشداری لە فێستیڤاڵی ڕۆشنبیری دھۆک کرد ، لە فێستیڤاڵەکەدا وتارێکی پێشکەش بە ئامادەبووان کرد .

بەشێک لە وتارەکەی سەرۆک بارزانی ⬇

📌 دەست و چاوی ئەوانە ماچ دەکەم کە خۆیان نەچەماند و خۆناچەمینن.

📌 نابێ ئێمە فەرھەنگی پێکەوەژیان و یەکتر قەبووڵکردن و ڕێز لەیەکترگرتن ھیچ کاتێک لەبیر بکەین ، ئەوە سەروەت و سامانێکن کە زۆر بە نرخ و بەھان، زۆریش قەدری بە گەلی ئێمە داوە لە دەرەوە.

📌 نە خۆتان بە مەزنتر لە کەس بزانن، نە خۆشتان بە بچوکتر و کەمتر لە کەس بزانن ، ئێمە لە کەس کەمتر نین.

📌 نابێ ئێمە ڕێگا بدەین دوژمن و ناحەزانی ئێمە دڵیان بەوە خۆشبکەن ئەمڕۆ بڵێن “ئیرادەی ئێوەمان شکاند” .

📌 ئەگەر ئیرادەی ئێمە شکا، ئێمە هیچ قەدر و بەھایەکمان نامێنێ و ئەو دەستکەوتانەی ھەن ئەویش لە دەست دەچن.

📌 مێژووی گەلی ئێمە مێژوویەکی پرە لە شانازی و سەرفرازی، لەھەمانکاتدا مێژوویەکە پڕە لە ئێش و ئازار.

📌 ئەمڕۆ دەیانەوێ ئەو ئیڕادەیە بشکێنن، ئەو ئیرادەیەی کە پێشمەرگەیەک بە تاپڕ شەری تەیارەی دەکرد.

📌کاتێک تاکی کورد باوەڕی بەخۆی نەما خۆی بە کەم زانی بەرامبەر خەڵکی تر ، ئەوە مردنە.

📌 ترسناکترین ھێرشی ئەمرۆ لەسەر سەری ئێمە ئەوەیە کە دەیانەوێ ئیرادەمان بشکێنن، کەلتوری ئێمە بسوتێنن، باوەڕی بەخۆ بوون نەمێنێ.

📌 بە ڕاستی زۆر نەخۆشە کاتێک دەبینن ھەندێک خۆیان بە ڕۆشنبیر بزانن چاوساغی بۆ دوژمنی گەلی خۆیان بکەن، بێن کەلتوری ئێوەو مێژووی ئێوە خەباتی پێشمەرگەو خوێنی شەھیدان ھەمووی بزر بکەن و ھەرزان بکەن، نوسەران و ڕۆشنبیران تکاتان لێدەکەم ئەو مەیدانە چۆڵ نەکەن بۆ خۆفرۆشان و دوژمن و ناحەزان.

📌 باری گران لەسەر ملی ئێوەیە نووسەر و ڕۆشنبیران، ئەمڕۆ ئەوان دەیانەوێ ئەو ئیرادەیە بشكێنن، ئەو ئیرادەیەی كە پێشمەرگە بە تاپڕێك شەڕی فڕۆكەی دەكرد.

📌 ئێمە سەرکەوتنمان بەسەر چیادا ھەڵبژارد.

📌 سەرەڕای ئەنفال و کیمیاباران و جینۆساید و ئاوارەبوون، بەڵام خەڵکی کوردستان پەیوەندیی خۆیان لەگەڵ برا عەرەبەکانیان هێشتەوە و ئەو تاوانانەیان لەسەر گەلی عەرەب حساب نەکرد.

کوردی / عربي

سەرۆک بارزانی پەیامێک بڵاودەکاتەوە

ڕۆژی یەکشەممە 25ی ئەیلوولی 2022 سەرۆک مەسعود بارزانی لە پێنجەمین ساڵیادی ئەنجامدانی ڕیفراندۆمی سەربەخۆیی دا تویتێکی بە زمانی عەرەبی بڵاوکردەوە.

دەقی تویتی سەرۆک بارزانی؛

ئەو رۆژەی میللەت ژیانی ویست،
بێگومان چارەنووس به‌ده‌نگیەوە دێت.
تاریکیی شه‌و هەر دەبێ بڕەوێتەوە و
زنجیریش هه‌ر ده‌بێ بپسێ
ئه‌وه‌ى نەیەوێ بە چیادا هەڵزنێ
بۆ تاهەتایە لەناو چاڵ و چۆڵدا جێ دەمێنێ.

…………….

الرئيس بارزاني ينشر رسالة بمناسبة ذكرى الاستفتاء

نشر الرئيس مسعود بارزاني يوم الأحد 25 ٲیلول 2022 تغريدة باللغة العربية بمناسبة الذكرى الخامسة للاستفتاء على الاستقلال.

نص تغريدة الرئيس بارزاني ؛

إِذا الشَّعْبُ يوماً أرادَ الحياةَ
فلا بُدَّ أنْ يَسْتَجيبَ القدرْ
ولا بُدَّ للَّيْلِ أنْ ينجلي
ولا بُدَّ للقيدِ أن يَنْكَسِرْ
ومن لا يحبُّ صُعودَ الجبالِ
يَعِشْ أبَدَ الدَّهرِ بَيْنَ الحُفَرْ

وتەبێژی فراکسیۆنی پارتی لە پەرلەمانی کوردستان ڕاگەیەندراوێکی بڵاوکردەوە و ڕایگەیاند : هیچ پڕۆژە و یاسایەک تێناپەڕێت لە ڕێی پەرلەمانەوە کە دژی بنەماکانی ئاینی پیرۆزی ئیسلام بێت.

دەقی ڕاگەیەندراوەکەی وتەبێژی فراکسیۆنی پارتی :

ڕاگەیەندراوێک لە وتەبێژی فراکسیۆنی پارتی لەپەرلەمانی کوردستان

بەناوی خودای گەورەو میهرەبان

چەند ڕۆژێکە لەمیدیاو لەناو شەقام و خەڵکی هەرێمی کوردستان بابەتی پڕۆژە یاسای (بەرەنگاربوونەوەی توندوتیژی دژی خێزان و ئافرەت) بۆتە باسێکی گەرم و لەسەر هەندێک لە ماددەکانی نیگەرانی دروستکردووە.

لەبارەی ئەم پڕۆژە یاسایە لەیەکەم ماددە کە گفتوگۆی لەسەرکرا بەڕێز سەرۆکی فراکسیۆن لەناو هۆڵی پەرلەمان هەڵوێستی پارتی ڕاگەیاند”کە هیچ پڕۆژەو یاسایەک تێناپەڕێت لە ڕێی پەرلەمانەوە کە دژی بنەماکانی ئاینی پیرۆزی ئیسلام بێت”

لێرەوە دووبارە ڕایدەگەیەنین پارتی و مێژووی پارتی پڕە لەهەڵوێست لەبەرگری لە هەموو ئاینەکان و ئاینی ئیسلام کە ئاینی زۆرینەی خەڵکی هەرێمی کوردستانەو لەسەر ڕێچکەو ڕێبازی سەرکردەی ڕۆحیمان بارزانی نەمر لانادەین و دڵنیایی دەدەین ڕێگا نادەین یەک وشەش بە پاڵپشتی ئێمە تێپەڕببێت کەهەستی موسڵمانان بریندار بکات.

پێشەوا هەورامانی
وتەبێژی فراکسیۆنی پارتی لەپەرلەمانی کوردستان

۲۲/۹/۲٠۲۲

سەرۆکی حکومەتی هەرێمی کوردستان پێشوازی لە کونسولی گشتی نوێی کۆماری کۆریا لە هەرێمی کوردستان دەکات

ئەمڕۆ پێنجشەممە 22ـی ئەیلوولی 2022 مەسرور بارزانی سەرۆکی حکومەتی هەرێمی کوردستان پێشوازی لە بەڕێز چۆ كیجۆنگ کونسولی گشتیی نوێی کۆماری کۆریا لە هەرێمی کوردستان کرد.

سەرۆکی حکومەت پیرۆزبایی دەستبەکاربوونی لێکرد و هیوای سەرکەوتنی بۆ خواست لە ئەرکەکەیدا، هەروەها سەرۆکی حکومەت ئاماژەی بە پەیوەندیی مێژوویی و تایبەتی نێوان هەرێمی کوردستان و کۆریا کرد و خواستی بەرەوپێشچوونی پەیوەندی دوولایەنەی لە هەموو بوارەکاندا دووپات کردەوە.

کونسولی گشتیی کۆریا، وێڕای خستنەڕووی کورتەیەک دەربارەی کار و چالاکییەکانیان لە هەرێمی کوردستان، سوپاسی لایەنە پەیوەندیدارەکانی حکومەتی هەرێمی کوردستانیشی کرد بۆ هاریکاری و هەماهەنگیی باشیان لەگەڵ کونسوڵخانەی ولاتەکەی.

سەرۆکی حکومەتی هەرێمی کوردستان پێشوازی لە فەرماندەی گشتیی هێزەکانی هاوپەیمانان لە عێراق و سوریا دەکات

ئەمڕۆ چوارشەممە 21ی ئەیلوول، مەسرور بارزانی سەرۆکی حکومەتی هەرێمی کوردستان، پێشوازی لە جەنەراڵ ماتیۆ ماکفەرلین فەرماندەی گشتیی هێزەکانی هاوپەیمانان لە عێراق و سوریا کرد.

لە کۆبوونەوەکەدا، دوایین پێشهات و گۆڕانکارییەکانی بارودۆخی گشتیی عێراق و ناوچەکە و بەردەوامبوونی پشتیوانیکردنی هێزی پێشمەرگە لە بەرەنگاربوونەوەی تیرۆر و هەڕەشەکانی تیرۆریستانی داعش تاووتوێ کرا و جەخت لە گرنگیی پەرەپێدانی پەیوەندیی و هەماهەنگیی نێوان پێشمەرگە و سوپای عێراق لەگەڵ هێزەکانی هاوپەیمانان کرا لە پێناو پاراستنی ئاسایش و سەقامگیریی عێراقدا.

سه‌رۆک بارزانی سه‌ردانی یه‌کێتی زانایانی ئایینی ئیسلامی کوردستان ده‌کات

ڕۆژی چوارشه‌ممه‌ 21ـی ئەیلوولی 2022 سه‌رۆک مسعود بارزانی به‌بۆنه‌ی پەنجاو دووەمین ساڵیادی دامه‌زراندنی یه‌کێتیی زانایانی ئایینی ئیسلامی کوردستان له‌ هه‌ولێر سه‌ردانی مه‌کته‌بی ته‌نفیزی یه‌کێتی زانایانی ئایینی ئیسلامی کوردستانی کرد، لەلایەن دکتۆر عەبدوڵلا سەعید وەیسی، سەرۆکی یەکێتی زانایانی ئایینی ئیسلامی کوردستان و دکتۆر پشتیوان سادق، وەزیری ئەوقاف و کاروباری ئایینی، و ئەندامانی یەکێتی زانایانی ئیسلامی پێشوازی لێکرا.

سەرەتا سه‌رۆکی یه‌کێتی زانایانی ئایینی ئیسلامی کوردستان به‌ناوی سه‌رجه‌م زانایانی ئایینی ئیسلامی کوردستان به‌خێرهاتنی سه‌رۆک مسعود بارزانی کرد و کورته‌یه‌کی له‌باره‌ی مێژوو و کار و ئامانج و ئه‌رکه‌کانی یه‌کێتیی زانایانی ئایینی ئیسلامی کوردستان خسته‌ڕوو، ئاماژه‌ی به‌وەدا ئه‌م سه‌ردانه‌ی سه‌رۆک بارزانی سه‌ردانه‌ بۆ ماڵی هه‌موو زانایانی ئایینی ئیسلامی له‌ کوردستان.

سه‌رۆک بارزانی جارێکی دیکه‌ پیرۆزبایی ساڵیادی دامەزراندنی لە یەکێتی زانایانی ئایینی ئیسلامی کوردستان کرد، و پشتیوانی خۆی بۆ زانایانی ئایینی لە کوردستان دەربڕی، هیوای خواست چۆن له‌ رابردوودا رۆڵی کاریگه‌ریان له‌ بیری نەتەوەیی و نیشتیمانپەروەری و رەتکردنەوەی ژێردەستی و چه‌سپاندنی ئاشتی و پێکه‌وه‌ژیان و دینداری هەبووە، ‌به‌هەمان شێوەش‌ له‌ داھاتوودا لە خزمه‌تکردنی ئایینی پیرۆزی ئیسلام و بەھا پیرۆزەکان به‌رده‌وام بن.