هاوپۆل: هەواڵ

سەرۆك بارزانی پێشوازی لە جێگری یەكەمی سەرۆكی ئەنجوومەنی نوێنەرانی عێراق دەكات

ڕۆژی شەممە 1ی تشرینی یەكەمی 2022 لە سەلاحەددین سەرۆك مەسعود بارزانی پێشوازی لە موحسین عەلی مەندەلاوی جێگری یەكەمی سەرۆكی ئەنجوومەنی نوێنەرانی عێراق كرد.

لە دیدارەكەدا كە شاخەوان عەبدوڵڵا جێگری سەرۆكی ئەنجوومەنی نوێنەرانیی عێراقیش ئامادەی بوو، سەرۆك بارزانی پیرۆزبایی لە موحسین عەلی مەندەلاوی كرد بۆ هەڵبژاردنی وەك جێگری یەكەمی سەرۆكی ئەنجوومەنی نوێنەرانی عێراق و هیوای سەركەوتنی بۆ خواست. هەروەها جێگری یەكەمی سەرۆكی ئەنجوومەنی نوێنەرانی عێراق سوپاسی ڕۆڵی سەرۆك بارزانی كرد لە پڕۆسەی سیاسیی عێراق و هەوڵەكانی بۆ نەهێشتنی بنبەستی سیاسی.

هەر لەو دیدارەدا بیروڕا لەبارەی دوایین پێشهاتەكانی ناو پڕۆسەی سیاسیی عێراق ئاڵوگۆڕ كرا.

سه‌رۆك بارزانی لە پیرمام پێشوازی له‌ سیناتۆر كریستیان كامبۆن سه‌رۆكی لیژنه‌ی پێوه‌ندییه‌كانی ده‌ره‌وه‌ی په‌رله‌مانی فەڕه‌نسا كرد.

ئه‌مڕۆ شه‌ممە 1ـی ئۆكتۆبه‌ر، به‌گوێره‌ی‌ هه‌واڵێكی‌ باره‌گای‌ بارزانی‌، سەرۆک بارزانی له‌ دیدارێکدا پێشوازی لە سه‌رۆكی لیژنه‌ی پێوه‌ندییه‌كانی ده‌ره‌وه‌ی په‌رله‌مانی فەڕه‌نسا کردووە .
سه‌رۆكی لیژنه‌ی پێوه‌ندییه‌كانی ده‌ره‌وه‌ی په‌رله‌مانی فەڕه‌نسا پێزانینی بۆ ڕۆڵی حه‌كیمانه‌ی سه‌رۆك بارزانی له‌ بارودۆخی عێراق و كوردستان هه‌بووە و ڕای گه‌یاند، سه‌رۆك ماكرۆن ڕایسپاردووه‌ كه‌ سه‌ردانی سه‌رۆك بارزانی بكات بۆ وه‌رگرتنی بۆچوونی له‌سه‌ر بارودۆخی سیاسیی عێراق.

هه‌ر له‌و دیداره‌دا بارودۆخی سیاسیی عێراق خرایه‌ به‌رباس و بیروڕا له‌باره‌ی ئه‌و ڕێككه‌وتنه‌ش ئاڵوگۆڕ كرا كه‌ له‌ نێوان چوارچێوه‌ی هاوئاهه‌نگی و سوننه‌ و كورد له‌سه‌ر بنه‌مای ده‌ستوور ئه‌نجام دراوه‌، دووپاتیش له‌وه‌ كرایه‌وه‌ كه‌ كێشه‌كانی عێراق له‌ ڕێی گفتوگۆ چاره‌سه‌ر بكرێت.

پرسەنامەیەک لە سەرۆکی حکومەتی هەرێمی کوردستانەوە

بە داخێکی زۆرەوە، هەواڵی گیان لە دەستدانی پێنج پێشمەرگە (تاهیر كاكەوڵا، سەروەر ئەنوەر، ئەردەڵان جەمال، توانا نەسرەدین، جەمال جەلال)م بيست کە ئەمڕۆ لە کاتی گەڕانەوەیان لە ئەرکی پێشمەرگایەتیدا، لە ڕووداوێکی دڵتەزێنی هاتووچۆدا، گیانیان لە دەستدا. پرسە و سەرەخۆشی لەبنەماڵە بەڕێزەکانیان دەکەم و هاوبەشی خەمیانم. خوای مەزن، گیانیان بە بەهەشت شاد بکات و سەبر و ئارامییش بە هەمووان ببەخشێت.

مەسرور بارزانی
سەرۆکی حکومەتی هەرێمی کوردستان

سەرۆکی حکومەت پێشوازی لە جێگری یه‌که‌می سه‌رۆکی ئه‌نجومه‌نی نوێنه‌رانی عێراق دەکات

ئه‌مڕۆ شه‌ممه 1ی ئۆکتۆبەر ( تشرینی یەکەم)‌ مەسرور بارزانی، سه‌رۆکی‌ حکومەت هه‌رێمی کوردستان، پێشوازی له‌ موحسین مه‌نده‌لاوی، جێگری یه‌که‌می سه‌رۆکی ئه‌نجومه‌نی نوێنه‌رانی عێراق کرد.

سەرۆکی حکومەت پیرۆزبایی لێکرد بەبۆنەی هه‌ڵبژاردنی به‌ جێگری یه‌که‌می سه‌رۆکی ئه‌نجومه‌نی نوێنه‌ران و هیوای سه‌رکه‌وتنی له‌ ئه‌رکەکەیدا بۆ خواست.

لە دیدارەکەدا کە شاخەوان عەبدوڵڵا جێگری سەرۆکی ئەنجومەنی نوێنەران ئامادەی بوو، بارودۆخی سیاسیی عێراق و چارەسەکردنی بنەڕەتی کێشەکانی هەرێمی کوردستان و حکومەتی فیدراڵی لەسەر بنەمای دەستوور، تاووتوێ کران.

سەرۆک بارزانی پێشوازی لە سەرۆکی لیژنەی پەیوەندییەکانی دەرەوەی پارلەمانی فەڕەنسا دەکات

ڕۆژی شەممە 1ی تشرینی یەکەمی 2022 لە سەلاحەددین سەرۆک مەسعود بارزانی پێشوازی لە سێناتۆر کریستیان کامبۆن سەرۆکی لیژنەی پەیوەندییەکانی دەرەوەی پارلەمانی فەڕەنسا کرد.

لە دیدارەکەدا کە ئۆلیڤیێ دیکۆتینی کونسوڵی فەڕەنسا لە هەولێریش ئامادەی بوو، سەرۆکی لیژنەی پەیوەندییەکانی دەرەوەی پارلەمانی فەڕەنسا پێزانینی بۆ ڕۆڵی حەکیمانەی سەرۆک بارزانی لە بارودۆخی عێراق و کوردستان هەبوو و ڕاشیگەیاند کە سەرۆک ماکرۆن ڕایسپاردووە کە سەردانی سەرۆک بارزانی بکات بۆ وەرگرتنی ڕا و بۆچوونی لەمەڕ بارودۆخی سیاسیی عێراق.

هەر لەو دیدارەدا بارودۆخی سیاسیی عێراق خرایە بەر باس و بیروڕا لەبارەی ئەو ڕێککەوتنەش ئاڵوگۆڕ کرا کە لەنێوان چوارچێوەی هەماهەنگی و سوننە و کورد لەسەر بنەمای دەستوور ئەنجامدراوە، جەختیش لەوە کرایەوە کە کێشەکانی عێراق لە ڕێگەی گفتوگۆ چارەسەر بکرێت.

پەیوەست بە پەلامارە مووشەکیەکەی کۆماری ئیسلامی ئێران بۆسەر هەرێمی کوردستان، هەردوولا لێدانی خەڵکی سڤیل و بۆردومانی قوتابخانە و شوێنی مەدەنیان بە تاوانێکی گەورە لە قەڵەم دا.

لە بەشێکی تری ئەو دیدارەدا سەرۆک بارزانی سوپاسی گەل و حکوومەتی فەڕەنسای کرد کە لە ڕۆژە سەختەکاندا پاڵپشتی گەلی کوردستان بوونە بە تایبەتیش هاتنی سەرۆک ئۆڵاند لە کاتی پەلاماری داعش بۆ سەر کوردستان ئاماژەیەکی گەورەی دۆستایەتیی گەلی فەڕەنسا و گەلی کوردستان بوو.

سەرۆکی لیژنەی پەیوەندییەکانی دەرەوەی پارلەمانی فەڕەنساش ڕایگەیاند وڵاتەکەی بەردەوام دەبێ لە پاڵپشتی و دۆستایەتیی گەلی کوردستان. لە کۆتایی دیدارەکەشدا میدالیای پارلەمانی فەڕەنسای وەک دیاری پێشکەش بە سەرۆک بارزانی کرد.

سەرۆکی حکومەت پێشوازی لە سەرۆکی لیژنەی پەیوەندییەکانی دەرەوە و بەرگری ئەنجومەنی پیرانی فەرەنسا دەکات

ئەمڕۆ شەممە 1ی ئۆکتۆبەر ( تشرینی یەکەم)، مەسرور بارزانی سەرۆکی حکومەتی هەرێمی کوردستان، پێشوازی لە سێناتۆر کریستیان کامبۆن سەرۆکی لیژنەی پەیوەندییەکانی دەرەوە و بەرگری و هێزە چەکدارەکانی لە ئەنجومەنی پیرانی فەرەنسا ( سێنات) کرد.

لە کۆبوونەوەکەدا، دوایین گۆڕانکاری و پێشهاتەکانی دۆخی گشتیی عێراق و ناوچەکە و پەرەپێدانی پەیوەندییەکانی هەرێمی کوردستان و فەرەنسا، تاووتوێ کران.

سەرۆکی لیژنەی پەیوەندییەکانی دەرەوە و بەرگری و هێزە چەکدارەکان لە ئەنجومەنی پیرانی فەرەنسا، خۆشحاڵی خۆی بە دووبارە سەردانکردنی هەرێمی کوردستان نیشاندا و ئاماژەی بەوە دا کە هەر جارێک سەردانی هەولێر و هەرێم دەکات، ئاوەدانیی و پێشکەوتنی بەرچاو دەبینێت . ئامادەیی ولاتەکەشی بۆ برەودان بە پەیوەندیی هەمەلایەنە، بەتایبەتی هەماهەنگیی ئەمنی و بەرگری لە گەڵ هەرێمی کوردستان دەربڕی. هەروەها مێدالیی ڕێزلێنانی ئەنجومەنی پیرانی فەرەنساشی، پێشکەش سەرۆکی حکومەتی هەرێمی کوردستان کرد.

سەرۆکی حکومەت ، سوپاسی حکومەت و خەڵکی فەرەنسای کرد کە لە ڕۆژانی سەختدا، پشتیوانییان لە گەلی کوردستان کردووە، خواستی هەرێمی کوردستانیشی بۆ پێشخستنی زیاتری پەیوەندییەکان لەکەڵ فەرەنسا دووپات کردەوە.
چاکسازییەکانی کابینەی نۆیەمی حکومەتی هەرێمی کوردستان و گرنگی چارەسەرکردنی کێشەکانی هەرێم و حکومەتی فیدراڵی و پاراستن و ڕێزگرتن لە مافە دەستوورییەکانی خەڵکی کوردستان، تەوەرێکی دیکەی کۆبوونەوەکە بوون، کە کونسولی گشتیی فەرەنسا لە هەرێمی کوردستان ئۆلیڤیێ دیکۆتینێ، ئامادەی بوو.

ڕوونکردنەوەیەک دەربارەی قسەکانی فەرماندەیەکی هێزەکانی ئێرانی سەبارەت بە دوا هێرشیان بۆ سەر ھەرێمی کوردستان

نوێنەر و شاندە ئیرانییەکان لە کۆبوونەوەکان و لە ڕاگەیاندنەکانیش، بە ئاشکرا و بەردەوام هەڕەشەی لێدانی بنکەکانی ئوپۆزسیۆن و بنکەکانی ئەمریکایان کردووە ، لایەنە ئوپۆزسیۆنەکانیش ئاگاداری ئەو گەف و ھەڕەشانە بوون. بەڵام هەرێمی کوردستان ، بە هیچ شێوەیەک و ھیچ کاتێک، ڕەزامەندی لە سەر پێشێلکردنی سەروەری خاک و ئەنجامدانی ئەم هێڕشانە نەداوە و بە توندیش سەرکۆنەیان دەکەین.

گوتەبێژی وەزارەتی ناوخۆی حکومەتی ھەرێمی کوردستان
2022/9/30

یەنس ستۆلتنبێرگ، سكرتێری گشتی ناتۆ، لەبارەی بڕیارەكەی ڤلادیمێر پۆتین سەبارەت بەو چوار هەرێمەی ئۆكراینا کە خستیە سەر ڕووسیا رایگەیاند:

ناتۆ پشتیوانی لە یەكپارچەیی خاكی ئۆكراینا دەكات و هەرگیز دان بە لكاندنی هیچ ناوچەیەكی ئەو وڵاتە بە ڕووسیادا نانێت، چونکە بڕیارەكەی ڤلادیمێر پۆتین پێشێلكردنی یاسا نێودەوڵەتییەكانە و بڕیارێکی نا یاساییە.

ستۆڵتنبێرگ ڕاشیگەیاند : ئەگەر ڕووسیا بڕیاری راگرتنی شەڕ بدات ئەوا كیێڤ پابەند پابەند دەبێت بە بڕیارەکەوە.

لەبارەی بەکارهینانی چەکی ئەتۆمی لەلایەن ڕووسیا سکرتێری گشتی ناتۆ گوتی: کەس براوە نابێت لە بەکارهێنانی چەکی ئەتۆمی و بەکارهێنانی بە زیانی هەمووان تەواو دەبێت

مەسرور بارزانی، سەرۆکی حکومەتی هەرێمی کوردستان ٦٤١ جووتیاری سنووری ئیدارەی راپەڕین قەرەبوو دەکاتەوە

بە فەرمانی سەرۆکی حکومەتی هەرێمی کوردستان، ٦٤١ جووتیاری سنووری ئیدارەی سەربەخۆیی راپەڕین قەرەبوودەکرێنەوە.

بە گوێرەی نووسراوی ژمارە ٣١٣٦ کە له‌ رێکكەوتی ٢٩ی ئەم مانگە واژووکراوە، مەسرور بارزانی، سەرۆکی حکومەتی هەرێمی کوردستان، لەپێناو بەرجەستەکردنی دادپەروەری و یەکسانی لە مەمەڵەکردن، بڕیاریداوە بە قەرەبووکردنەوەی ٦٤١ جووتیاری سنووری ئیدارەی راپەڕین، کە زەوییە کشتوکاڵییەکانیان کەوتووەتە سنووری شارەوانییەکان.