هاوپۆل: جیهان

راگەیاندكارێكی میسڕی هەواڵی تووشبوونی عادل ئیمام، زەعیمی سینەمای میسڕی بە نەخۆشیی (ئالزهایمەر) رادەگەیەنێت.

بەپێی هەواڵێكی ماڵپەڕی (العربیة)، محەمەد باز، راگەیاندكاری میسڕی لە میانی بەرنامەیەكی تەلەڤزیۆنیدا شەوی رابردوو رای گەیاندووە، زەعیم عادل ئیمام بەدەست نیشانەكانی نەخۆشیی (ئالزهایمەر) دەناڵێنێت و زۆر كەسیش لەوانەی لەم دواییانە سەردانیان كردووە، هەستیان پێ كردووە و ”تەندروستیی عادل ئیمام ڕێگەی پێ نادات لەبەردەم كامێرا بوەستێت“.

هاوكات داوای لە خانەوادەی زەعیم كرد، كۆتایی بە مشتومڕەكان لەبارەی تەندروستیی عادل ئیمام بهێنن و ئاماژەی بەو دەنگۆیانە كرد كە لە لایەن كەسوكاری عادل ئیمامەوە بڵاو دەكرێنەوە لەبارەی ئەوەی لەم نزیكانەدا زەعیم لە فیلمێك دەردەكەوێت كە ئەو پێیوایە ئەم دەنگۆیانە راست نین.

ئەو راگەیاندكارە میسڕییە جەختی كردۆتەوە، عادل ئیمام لە قۆناغێكی تەمەن و تەندروستیی تایبەت دایە و چیتر هیچ كارێكی هونەری پێشكەش ناكات، ”كاتێكیش دەگوترێ لە كاری هونەری دابڕاوە، هیچی لێ كەم نابێتەوە، بەڵام مافی هەوادارەكانیەتی كە لەسەر باری تەندروستیی زەعیم زانیارییان هەبێ“.

ئەمە لە كاتێكدایە كە پێشتر بەرهەمهێنی سینەمایی عیسام ئیمام كە هاوكات برای عادل ئیمامە، رای گەیاندبوو، زەعیم تەندروستی باشە و بە شێوەیەكی زۆر سرووشتی ژیانی خۆی بەسەر دەبات. ئەم قسانەشی وەك وەڵامێك بوو بۆ قسەكانی تاریق شناوی، رەخنەگری هونەری كە گوتبووی مەحاڵە جارێكی دیكە عادل ئیمام لە كارێكی تازەی هونەریدا ببینینەوە.

پێشتر زەعیم لەگەڵ هونەرمەندی بەناوبانگ سەعید ساڵح كە هاوڕێی تەمەنیشیەتی، فیلمێكی لەبارەی نەخۆشیی (ئالزهایمەر) بەرهەم هێناوە و لە فیلمەكەدا چەند دیمەنێك نیشان دەدات كە عادل ئیمام تووشی ئالزهایمەر بووە، بەڵام لە بەشێكی دیكەی فیلمەكەدا دەردەكەوێت كە بۆ ئەوەی وانەیەك بە منداڵەكانی بدات و لە ڕێگەی هەڵە لایانبدات، خۆی وا نیشانداوە كە تووشی نەخۆشییەكە بووە.

عادل ئیمام، تەمەنی ٨٢ ساڵە، خاوەن مێژووێكی گەورەیە لە سینەمای میسڕی و عەرەبیدا، بەهۆی كارە هونەرییەكانیەوە نازناوی (الزعیم)ی پێ دراوە، لە ئاستی دونیادا و لە نێو عەرەب و نەتەوەكانی دیكەش، جەماوەرێكی زۆری هەیە و لە هەرێمی كوردستانیشدا خەڵكێكی زۆر بە پەرۆشەوە چاوەڕێی بەرهەمی تازەی لێ دەكەن.

عادل ئیمام پێشتر بە سەردان هاتۆتە هەولێری پایتەختی هەرێمی كوردستان، لە زنجیرە درامایەكیشدا بە ناوی (فرقة ناجی عطا الله) كە عادل ئیمام ڕۆڵی سەرەكی تێدا دەبینێت، دیمەنی چەند شارێك نیشان كە یەكێك لەو شارانە هەولێرە و دیمەنە جوانەكانی قەڵا و باخی شار و شەقامە سەرەكییەكانی هەولێر لەم زنجیرە درامایەدا نیشان دەدرێت.

دایكێک بەجارێك حەوت منداڵی بوو

ڕووداوێكی نامۆ ژیانی ژنێكی بەناوی غەزالە تەواو گۆڕی، دوای دووگیانبوونی بە ٩ منداڵ بە جارێك، سەرەڕای ئەوەی پزیشكان پێشبینییان كردبوو هەرگیز ناتوانێت جارێكی دیكە دووگیان ببێتەوە.

غەزالە (٤٠ ساڵ) نیشتەجێی پارێزگای بوحەیرە-یە لە باكووری میسر، هاوسەرەكەی وەك جوتیار بە كرێی ڕۆژانە كاردەكات، پێشتر سێ كچی بووە، بەپێی وتەی پزیشكان دوای ئەو دووگیان نابێتەوە، بۆیە ژیانی لەسەر ئەو ئەگەرە بونیادنا، بەڵام لەپڕێكدا هەستی بە نیشانەكانی دووگیانبوون كرد، دوای ئەوە پزیشكەكە ئەم هەواڵەی پێدا، “لە منداڵدانتدا ٩ منداڵ هەن”.

غەزالە دەڵێت، “هەواڵێكی شۆكهێنەر بوو، دنیا لەو كاتەدا لەبەرچاومدا وەستا، نەمدەزانی چی بكەم، چۆن بژێویی ژیانی ١٢ منداڵ پێكەوە دابین بكەم”.

وتیشی، “یەكێك لە پزیشكان پێشنیاری دەرزی لێدان لە منداڵەكانی بۆ كردم، تا تەنها دوو یان سیانیان بمێننەوە، بە فیعلی لە مانگی سێیەمی سكەكەمدا چوومە نەخۆشخانە، بەڵام بۆ ئەنجامدانی داوای چوار هەزار جونیەی لێكردم، نەمدەتوانی بیدەم، بۆیە خۆم دایە دەست خوا، سكەكەم وەك خۆی هێشتەوە، دووانیان مردن و حەوتیان مانەوە”.

لە مانگەكانی كۆتایی سكەكەیدا، هاوسەرەكەی دەرزییەكی بە ٢٠٠ جونەی میسری بۆ كڕی، سەرەڕای دژواریی دۆخی دارایی، بۆ گەورەبوونی سكی، تا منداڵەكان بتوانن لەناویدا بجوڵێن، تا ئەوكاتەی لە هەشت مانگیدا لە نەخۆشخانەیەكی پارێزگای ئەسكەندەرییە لەدایكبوون.

“منداڵەكانم بەشێكن لە جەستەم”، ئەمە وەڵامی غەزالە بوو كاتێك خانمێك پێشنیاری كڕینی یەكێك لە كچەكانی بۆ كردبوو لە بەرامبەر پێدانی پارە و شوێنێكی نیشتەجێبوون، بەڵام ڕەتیكردەوە و هەموو خۆتەرخانكردنی بۆ منداڵەكان لە بری فرۆشتنی یەكێكیان هەڵبژارد، هاوسەرەكەشی هەمان هەڵوێستی هەبووە و تەنانەت لەسەر ئەو پێشنیارە لەگەڵ بەڕێوەبەری نەخۆشخانەكە بووەتە دەمەقاڵەی و فرۆشتنی كچەكەی لە بەرامبەر پارەدا ڕەتكردووەتەوە.

كاتێك دایك و باوكەكە هەستیان بە نائارامی لەو دۆخە كردووە، لەكاتێكدا لە نەخۆشخانە بوون كاتی لەدایكبوونیان، پەنایان بۆ ئەفسەرێكی پۆلیس بردووە، ئەویش لای خۆیەوە پاسەوانی بۆ ژوورەكەیان داناوە لە ترسی دزینی یەكێك لە منداڵەكانی.

خێزانێكی سعودی پێشنیاریان بۆ غەزالە و هاوسەرەكەی كردووە بچنە سعودیە، خێزانەكە بەڵێنی دابینكردنی تەواوی شمەك و پێداویستییەكانیان پێداون، بەڵام سەرەڕای دژواریی ژیانیان ڕەتیانكردووەتەوە وڵاتەكەیان جێبهێڵن و گەشت بۆ دەرەوە بكەن.

لەئێستادا هەر ١٠ منداڵەكەی غەزالە لە قۆناغی خوێندنی جیاوازدان، حەوت منداڵە پێكەوە لەدایكبووەكەشی لە یەك قۆناغدان، دووپاتیشیكردەوە ڕێگری لە خوێندنی هیچكامیان ناكات. لە خوێندنی هیچكامیان ناكات.