ڕاگه‌یاندراوی كۆبوونه‌وەی كۆمیته‌ی ناوەندیی
پارتی دیموكراتی كوردستان
ئه‌مڕۆ، پێنج شه‌ممه 2ی ئاداری 2023، به سه‌رپه‌رشتی سه‌رۆك مه‌سعود بارزانی، كۆمیته‌ی ناوەندیی پارتیمان، كۆبوونه‌وەی ئاسایی خۆی ئه‌نجام دا.
كۆبوونه‌وە، دوای ساتێك وەستان و نواندنی رێز و نه‌وازش بۆ شه‌هیدانی كوردستان سه‌روەریان بارزانی نه‌مر و كاك ئیدریسی هه‌میشه له‌یاد، به‌گوێرەی خشته‌ی ئامادەكراو ئه‌و ته‌وەرانه‌ی خوارەوەی تاوتوێی كرد و، بڕیار پێویست سه‌بارەت به چه‌ند بابه‌تێك وەرگیرا:
– بابه‌تی پرۆسه‌ی سیاسیی عێراق و په‌یوەندییه‌كانمان له‌گه‌ڵ حكومه‌تی فیدراڵی، پارتیمان به‌گوێرەی رێككه‌وتنێكی سیاسی به هاوبه‌شی له‌گه‌ڵ هاوپه‌یمانی ئیدارەی دەوڵه‌ت به‌شداری پێكهێنانی كابینه‌ی به‌ڕێز محه‌مه‌د شیاع سودانی كردووە و، به سازان كارنامه‌یه‌كی هاوبه‌ش ئامادەكراوە كه ویست و بۆچوونی لایه‌نه‌كانی به‌شدار له كابینه‌ی نوێی به ڕوونی تێیدا رەنگی داوەته‌وە، كۆبوونه‌وه پشتیوانی بۆ سه‌رۆك وەزیران و كابینه‌كه‌ی دووپاتكردەوە و، چاوەڕوانی جێبه‌جێكردنی ناوەرۆكی رێككه‌وتنه‌كان و بڕگه و خاڵه‌كانی كارنامه په‌سه‌ندكراوەكه‌ین، بۆ ئه‌م مه‌به‌سته‌ش لایه‌نه په‌یوەندیداره‌كان راسپێردران بۆ به‌دواداچوون و له‌به‌رچاوگرتنی ئه‌و كاته‌ی بۆ جێبه‌جێكردنی دیاریكراوە.
– بابه‌تی په‌یوەندییه‌كانمان له‌گه‌ڵ لایه‌نه‌كانی به‌شدار له پرۆسه‌ی سیاسیی عێراقدا، گۆڕانكاری و ڕووداوەكانی ناوچه‌كه به‌گشتی و عێراق به‌تایبه‌تی پێویستی به هه‌ڵوەسته‌كردن و لێكدانه‌وەی سیاسی جدین، بۆیه له‌لایه‌ن سه‌رۆك بارزانی و پارتیمان به‌ردەوام هه‌ڵسه‌نگاندن بۆ ئه‌و بابه‌تانه دەكرێت، كه به‌شێك له‌م گۆڕانكاری و ڕووداوانه راسته‌وخۆ یان نا ڕاسته‌وخۆ كاریگه‌ریان دەبێ له دروستكردنی ئاڵۆزی سیاسی یاخود ئابووری و ئه‌منی، بۆ ئه‌م مه‌به‌سته پێویسته ئاڵنگاری و چارەسه‌ریه‌كانیان بزاندرێ و له‌گه‌ڵ لایه‌نه‌كانی به‌شدار له ئیدارەی دەوڵه‌ت هه‌ماهه‌نگی و بیروڕاگۆڕینه‌وەی به‌ردەوام هه‌بێت به‌تایبه‌تی كه به‌شێك له‌و كێشه و گرفتانه‌ی دێنه‌پێش په‌یوەندییان به بژێوی هاوڵاتیان و ئاسایشی كۆمه‌ڵایه‌تیه‌وە هه‌یه، كۆبوونه‌وە هه‌ڤاڵانی په‌یوەندیداری ڕاسپارد بۆ ئامادەگی ته‌واو و جێبه‌جێكردنی ئه‌وەی كه پێویسته له‌و بارەوە.
– بابه‌تی په‌یوەندییه‌كانی ناوخۆ و دەرەوەی كوردستان، له‌ژێر رۆشنایی بڕیاری پێشوومان بۆ هه‌ڵدانه‌وەی لاپه‌ڕەیه‌كی نوێ له په‌یوەندییه‌كان، هه‌ڵسه‌نگاندنی وردكرا بۆ هه‌نگاوەكان له‌و بارەیه‌وە و، سه‌ردانی شاندی پارتیمان بۆ لای حزب و لایه‌ن و پێكهاته‌كانی كوردستان خرایه به‌رباس و گفتوگۆكردن و به په‌سه‌ندزانرا ئه‌و هه‌نگاوانه به‌ردەوامیان هه‌بێت و پرۆسه‌كه په‌رەی پێبدرێت، هاوكات په‌رە به په‌یوەندییه‌كانی دەرەوەمان بدەین.
– بابه‌تی سه‌ردان و دانوستانه‌كانی شاندی حكومه‌تی هه‌رێم له‌گه‌ڵ حكومه‌تی فیدراڵ له بواری بودجه و یاسای نه‌وت و غاز و پرسی پێشمه‌رگه و ڕەشنووسی یاسای ئه‌نجوومه‌نی فیدراڵی گه‌یشتووەته قۆناغێكی باش و له‌هه‌ردوولا تێگه‌یشتن و گه‌یشتن به چارەسه‌ری هاوبه‌ش دەبینرێت، كۆبوونه‌وە سوپاسی هه‌وڵ و كۆششه‌كانی حكومه‌تی هه‌رێم و شاندەكه‌ی كرد بۆ ئه‌م بابه‌ته گرنگه.
– سه‌بارەت به ڕێككه‌وتنی شنگال، چه‌ند ساڵێكه ئه‌م ڕێككه‌وتنه كراوە كه چارەسه‌رێكی گونجاوە و له سوودی هاوڵاتیانی دەڤه‌ری شنگاله، به‌ڵام هه‌ندێ لایه‌نی ناوخۆیی و دەرەكی ئاسته‌نگیان بۆ جێبه‌جێكردنی خاڵه‌كانی رێككه‌وتنه‌كه دروستكردووە و كێشه‌كان به چارەسه‌رنه‌كراوی ماونه‌ته‌وە، كۆبوونه‌وە ئاماژه‌ی به‌وەشدا كه هه‌ندێ لایه‌ن دەیانه‌وێت به‌شێوه‌یه‌كی دیكه مامه‌ڵه له‌گه‌ڵ ئه‌م پرسه گرنگه بكه‌ن كه ئه‌مه‌ش دەبێته هۆی چه‌قبه‌ستووی بۆ چارەسه‌ری و ئاڵۆزی زیاتری لێدەكه‌وێته‌وە، بۆ ئه‌م مه‌به‌سته لیژنه‌یه‌كی تایبه‌ت له هه‌ڤاڵانی په‌یوەندیدار پێكهات بۆ دیاریكردنی هه‌نگاوەكان له ڕوانگه و چوارچێوەی ئه‌و رێككه‌وتنه‌ی ئه‌نجامداروە، له پێناو جێبه‌جێكردنی رێككه‌وتنه‌كه به سوودی هاووڵاتیانی شنگال و قه‌رەبووكردنه‌وەی به‌شێكی ئه‌و هه‌موو نه‌هامه‌تی و ناخۆشیانه‌ی كه به‌سه‌ریاندا هاتووە.
– بابه‌تی هه‌ڵبژاردنی په‌رله‌مانی كوردستان گفنوگۆی پێویست و تێروته‌سه‌لی له‌بارەوە كراو، سوربوونی پارتیمان دووپاتكرایه‌وە له‌سه‌ر ئه‌نجامدانی هه‌ڵبژاردن له وادەی دیاریكراودا بۆ ئه‌مه‌ش به‌ڕێز سه‌رۆكی هه‌رێم به‌گوێرەی یاسا ڕۆژی ئه‌نجامدانی هه‌ڵبژاردن دیاریبكات و به‌هیچ شێوەیه‌ك له‌گه‌ڵ چیتر دواكه‌وتنی ئه‌و پرۆسه گرنگه نین و ئه‌وەشی كه ڕوویدا بۆ درێژكردنه‌وەی ته‌مه‌نی په‌رله‌مان، پارتیمان له رووی ناچاری له‌گه‌ڵیدابوو بۆ ئه‌وەی بۆشایی یاسایی بۆ ئۆرگانه‌كانی هه‌رێم دروستنه‌بێت، بۆ ئه‌م مه‌به‌سته‌ش هه‌نگاوەكانی به‌شی هه‌ڵبژاردنی مه‌كته‌بی سیاسیی پارتیمان به‌باشزانرا و داوایان لێكرا كه به‌ردەوامبن له هه‌وڵ و هه‌نگاوەكانیان، هاوكات هه‌ڤاڵانمان له فراكسیۆنی پارتیمان له په‌رله‌مان كاری پێویست بكه‌ن بۆ زەمینه خۆشكردنی ڕێككارە یاساییه‌كان و لادانی به‌ربه‌سته‌كان له‌به‌ردەم پرۆسه‌ی هه‌ڵبژاردندا.
– ته‌وەرێكی دیكه‌‌ی كۆبوونه‌وە تایبه‌تكرا به پرۆسه‌ی به‌هاناوەچوونی حكومه‌تی هه‌رێمی كوردستان و دەزگای خێرخوازی بارزانی و هاووڵاتیانی هه‌رێم به‌گشتی له‌كاتی روودانی بومه‌له‌رزەكان له وڵاتانی توركیا و سوریا و گه‌یاندنی خزمه‌تگوزاری و هاوكاری بۆ لێقه‌وماوان له هه‌موو روویه‌كه‌وە، كۆبوونه‌وە سوپاس و پێزانینی دەربڕی و ئه‌و هه‌ڵوێست و هه‌نگاوەی حكومه‌ت و دەزگای خێرخوازی بارزانی و هاووڵاتیانی كوردستانی به‌رزنرخاند.
– له كۆتاییدا، كۆبوونه‌وە هه‌ڵسه‌نگاندنی بۆ هه‌نگاوەكانی جێبه‌جێكردنی بریارەكانی دوای كۆنگرەی 14ی پارتیمان كرد كه زۆربه‌یان جێبه‌جێكراون و ئه‌و بابه‌تانه‌شی كه ماون له زووترین كاتدا جێبه‌جێ دەكرێن.
شایه‌نی ئاماژەیه كۆبوونه‌وە له كه‌ش و هه‌وایه‌كی هه‌ڤاڵانه و هه‌ست به به‌رپرسیاریه‌تی به‌ڕێوەچوو.
كۆمیته‌ی ناوەندیی
پارتی دیموكراتی كوردستان
2023/3/2