قەهرەمان عوسمان: خزمەتەکانی حکومەتی هەرێم سەری لە ئۆپزسیۆن شێواندووە، سەیرە وای لێهاتووە بڵێن چاککردنی ڕێگاوبان و ئاو و کارەبا و پرۆژەکان کارێکی خراپە!!
قەهرەمان عوسمان:
خزمەتەکانی حکومەتی هەرێم سەری لە ئۆپزسیۆن شێواندووە، سەیرە وای لێهاتووە بڵێن چاککردنی ڕێگاوبان و ئاو و کارەبا و پرۆژەکان کارێکی خراپە!!
قەهرەمان عوسمان لە ئەکاونتی تایبەتی خۆی لە تۆڕی کۆمەڵایەتی فەیسبووک نووسیویەتی؛ لە جیهانی دیموکراسیدا ئۆپۆزسیۆن وەک کۆلەکەیەکی سەرەکی حوکمرانیی سەیر دەکرێت و لەچوارچێوەی دەوڵەتدا ڕۆڵی چاودێر و دەوڵەتی سێبەر دەگێڕێت. هەر لەبەر ئەوەیە کە لە سەرجەم دەستووری دەوڵەتاندا پێگەی ئۆپۆزسیۆن دیاری و جێگیر کراوە.
ئۆپۆزسیۆن لە جیهاندا بە کۆمەڵێک یاخود کۆمەڵە کەسێک دەگوترێت کە بەشێوەیەی بەردەوام و جێگیر جیاوازن لەگەڵ حکومەت لە بیر و تێڕوانین و شێوازی حوکمرانیدان، واتە ئامانجێکی دیاریکراویان هەیە و ستراتیژێکی نەگۆڕ پەیڕەو دەکەن.
بەڵام بە پێچەوانەوە لای خۆمان ئۆپۆزسیۆن سەرئێشەن بۆ کۆمەڵگا و دەستییان گرتووە بە تاکتیکی کورت مەوداو تەنها بۆ ئەوەی بڵێن جیاواز بیر دەکەینەوە دژی هەرچی هەنگاوی باشیش دەوەستنەوە و سەرکۆنەی دەکەن!
شەڵم کوێرم، دەستناپارێزم بۆتە بەرنامەیان و بە هەوەسی خۆیان تەنها بۆ ئەوەی بڵێن دژین، قسەی دوێنێی خۆیان قوت دەدەنەوە و دونیایان لێبووە بەڕادیۆ.
بەر لە هەبوونی پرۆژەی هەژماری من، زوومی کامێڕا و قسە و باسییان ڕیزی مووچە وەرگرتن بوو، سەردێری هەواڵی ڕاگەیاندنەکانیان ئەوە بوو: کەسێکی بەتەمەن لە ڕیزی وەرگرتنی مووچە بورایەوە یان گیانی لەدەست دا، هەرچی ناسزا بوو بە حکومەتییان دەکرد، کەچی لەگەڵ ڕاگەیاندنی پڕۆژەی هەژماری من کە لە کەمترین سوودەکانی نەهێشتنی ڕیزی مووچە وەرگرتن بوو، دەستییان کرد بە ناشرین کردنی و دەیانگوت دژی بەرژەوەندی فەرمانبەرانە!
ڕۆژانە ڕاپۆرتییان لەسەر پیسبوونی ژینگە دەکرد و وەک دۆستی ژینگە و خەڵکی خۆیان هەڵدەخست، کەچی دوای سەرکەوتنی پڕۆژەی ڕووناکی، بە ناو خەڵکی دیندار و عاقلییان هاتوون و دەڵێن: خاوەن موەلیدە زیانی بەرکەوتووە و حکومەت زاڵمە؟!!!
خۆشبەختانە کاروچاڵاکییەکانی حکومەت ئەوەندە جوان و سەرکەوتوون، کێشەی بۆ ئۆپۆزسیۆن دروست کردووە، و سەریان لێشێواوە، خەریکە وایان لێ دێت بڵێن: ژیانی بێ تەکنەلۆژییا و ڕێگا و بان و ئەلکترۆنیات باشترە و حکومەت کارێکی خراپ دەکات پێشکەوتنەکانی جیهان بە خەڵکی ئاشنا دەکات!
هەر بە جددیش پێیان خۆش نییە خەڵکی وشیار ببنەوە، حەزیان لێیە نەزان بن و بەدوای با و بالۆرەی ئەوان بکەون و بەکەیفی خۆیان بۆ پارە و نان پەیداکردن بەکارییان بێنن. بۆیە خەڵکی بەگشتی هۆش ئۆپۆزسیۆنێک قەردارن و لە جێی خۆیەتی لە هەڵبژاردنەکان ستۆپێکیان پێ بکەن و ئەو سەرئێشانە بێ کار بکەن، باوەڕ بکەن ئەوانە نەبن نەک هەر زیانی نابێت بگرە، خەڵک و وڵات ئیستراحەت دەکەن و ئارامی دەروونی باڵ دەکێشێت بەسەر کۆمەڵگادا.
