چەند پەیامێکی گرنگ لە سەرۆک بارزانییەوە
ئەمڕۆ پێنجشەممە ١٥ی ٥ی ٢٠٢٥، لە شاری هەولێر بە ئامادبوونی سەرۆک بارزانی و مەسرور بارزانی جێگری سەرۆکی پارتی دیموکراتی کوردستان، کۆنگرەی یەکگرتنی یەکێتیی قوتابیان و لاوانی دیموکراتی کوردستان ده‌ستی پێكرد.
له كۆنگره‌كه‌دا سه‌رۆك بارزانی وتارێكی پێشكه‌ش كرد و ڕایگه‌یاند، زۆر خۆشحاڵم كە بەشدار دەبم لەگەڵ ئێوەی خۆشەویست لە رۆژێكی وا پیرۆزدا كە هەردوو ڕێكخراوی بەتوانا، هەردوو ڕێكخراوی پڕ ئەزموون یەكتر بگرنەوە. پیرۆزباییتان لێ دەكەم و دەستخۆشیتان لێ دەكەم بۆ ئەم بڕیارە، دڵنیام لەمەودوا دەتوانن زیاتر و باشتر خزمەتی گەل و نیشتمان بكەن.
ئاماژه‌ی به‌وه‌ش دا، قوتابیان و لاوان رۆڵێكی زۆر كاریگەریان هەبووە لە شۆڕشی ئەیلوول، لە شۆڕشی گوڵان هەتا لە شەڕی داعش. من دڵنیام لەمەودواش دەتوانن ئەو رۆڵە باشتر و زیاتر ببینن. لێرەدا من سوپاسی ئەو بەڕێزانە دەكەم كە تا ئێستا بەرپرسیارێتیی ئەم دوو رێكخراوەیان هەڵگرتبوو و تەمەنای سەركەوتن دەكەم بۆ ئەو بەڕێزانەی كە لەمەودوا متمانەی ئێوە وەردەگرن.
هاوكات سه‌رۆك بارزانی، گوتیشی، زۆر خۆشحاڵم، پێش چەند ڕۆژێك كە لەگەڵ سكرتاریەتی هەردوولا دانیشتم، بیستم كە نسبەتی ئافرەت زۆر بووە لە نێو قوتابیان و لاوان، بە مانای ئەوەیە كە لە ناو حزبیش زیاد دەبێت، ئەمە زۆر زۆر جێی خۆشحاڵییە بۆ ئێمە و من تەوسیەتان دەكەم چەندی بتوانن نسبەتی ئافرەت زیاد ببێت.
سەرۆک بارزانی: ئەگەر لایەنێك تەسەوڕ بكات خۆی زۆرینەیە و بە حوكمی زۆرینەی خۆی ئیرادەی خۆی فەڕز دەكات، بەخوا عێراق خێر لە خۆی نابینێت و سەریش ناكەوێت ئەو بۆچوونە، ئەگەر پێكەوە بین، دەتوانین هەموو یارمەتیدەری یەكتر بین و پشتیوانی یەكتر بین. نەشبووە لە دونیا تۆ بەزۆر خەڵكێك بێنی پێكیەوە بنێیت و بڵێی وەڵا ئێمە هەموو یەكین. عێراق لە دەستووریشدا هاتووە كە نەتەوەی جیاوازی تێدایە، ئایینی جیاوازی تێدایە، مەزهەبی جیاوازی تێدایە و دەبێت ئارەزوومەندانە ئەمانە یەك بگرن، بەزۆر ناتوانی فەرز بكەیت ئەمانە یەك بگرن. بە چی دەبێت؟ بە سیاسەتێكی راست و ڕەوان، سیاسەتی راست و رەوانیش دەبێ دەستوورێك ئەم سیاسەتە پیشان بدات و دەبێ بنەمایەك هەبێت تۆ لەسەری رێك بكەویت، بەداخەوە نە ئیلتزام بەو مەبادیئە كرا و نە ئیلتزام بە دەستوور كرا. ئێستاش من دەڵێم ئەگەر هەموو لایەنەكان بیانەوێت عێراق سەقامگیر ببێت و خەڵكەكەی بەختەوەر ببن، دەبێ بگەڕێینەوە بۆ ئەو سێ بنەمایە، ئەگەرنا، با ئیحسایەك بكرێت، بەڵام ئیحسایەكی شەفاف، نەتەوە و ئایین و مەزهەبی تێدا بێت، بۆ ئەوەی مەعلووم بێت. مادام بەرەو ئەوە دەچن، بەرەو مەزهەب و ئەمانە، باشە با ئامارێك بكرێت، ئامارێكی شەفاف، بزانین چەند ئایین لە عێراق هەیە؟ چەند نەتەوە هەیە و چەند مەزهەب هەیە؟ ئەو وەختە كەس گلەیی ناكات، بەڵام ئیحسایەكی شەفاف بێت. یان ئەگەر هەڵبژاردن دەكرێ، با یەك بازنە بین. بەڵام تۆ پێشوەختە تۆ دابنێیت من ئەوەندەم هەیە و تۆ ئەوەندەت هەیە، تۆ كەمینەیت و من زۆرینەم، بەبێ ئەوەی نە ئامارێك كرابێت، بەڕاستی ئەمە تەسەوڕ ناكەم ئەنجامی باش بێت، كاتییە، ئەگەر دەستكەوتێكیش هەبێت كاتییە.
سه‌رۆك بارزانی: ناچارم ئەمڕۆ هەندێك شت زۆر بە سەراحەت باس بكەم چونكە كاتی ئەوە هاتووە. مەسەلەی مووچە، وایان لێكردووە كە ئەننەما خەبات و تێكۆشانی ئەم میللەتە، ئەو هەموو ساڵانە، ئەو هەموو سەركردە قارەمانانە، ئەو هەموو گەورانە، ئەو هەموو شەهیدە، ئەو هەموو ئەنفال و كیمیابارانە، هەمووی لەبەر ئەوە بووە كە داوای مووچەیان كردووە. ئەگەر مەبەست مووچە بوایە ئەو دەوڵەتانەی پێشتر دەستی كوردیان ماچ دەكرد و مەمنوونیش بوون، بەداخەوە ئەمە بە چاوساغی و بە ڕێنمایی هەندێك لایەنی ناوخۆ.
سه‌رۆك بارزانی ئه‌وه‌شی وت، بەغدا دەبێ مامەڵە لەگەڵ شەرعیەتی هەرێم بكات، لە ئۆكتۆبەری رابردوو هەڵبژاردن بووە و هەڵبژاردنیش سەنگی هەموو لایەكی پیشان داوە. ئەگەر چەند كەسێك لەبەر هەر مەبەستێك بێت یان لەبەر هەر هۆیەك بێت كە خۆیان قەناعەتیان پێیە، بچن شكایەت بكەن، یان گلەیی بكەن یان دەعوا بكەن، تەعامول لەگەڵ ئەوانە بكەن، ئەمە خەرقی دەستوورە، خەرقی شەرعیەتە، خەرقی هەموو شتێكە. ئەگەر مەبەست ئەوەیە كە فیدڕاڵیەت نەماوە؟ با بە سەراحەت پێمان بڵێن ئێمە قەناعەتمان بە فیدڕاڵیەت نەماوە و لەبەر ئەوە دەبێ حكوومەتی مەركەزی بێت، ئەو وەختە ئەوەی قەبووڵی دەكات، قەبووڵی دەكات، ئەوەی قەبووڵیشی نەكات، بڕیاری خۆی دەكات. بەڵام ئەو تەعامولەی ئێستا لەگەڵ هەرێم دەكرێت، تەعامولی ئەوە نییە هی فیدڕاڵی بێت.
سه‌رۆك بارزانی؛ ئێمە پێمان خۆشە بگەڕێنەوە بۆ ئەو سێ بنەمایە و بۆ دەستوور. ئەگەر ئەو سێ بنەمایە جێبەجێ بكرێ، ئیتر پێویستی نە بەوە دەبێت كە كێ زۆرینەیە، چونكە ئەوە شەراكەتە، بەڵام ئەگەر ئەوە نەكرێت، خۆم تەسەوڕ ناكەم دۆخی عێراق سەقامگیر ببێت.
سه‌رۆك بارزانی، ئه‌وه‌ی وت، لەم ئیحسایەی ئەخیر كە كرا، هەڵبەت زۆر دژی ئەوە بوون كە نەتەوە و ئایین و مەزهەبی تێدا بێت، بەڵام ئەگەر بڵێین بە نفووس، لە هەرێمی كوردستان، ئەو شوێنانەی كە ئێستا لەژێر دەستی حكوومەتی هەرێمن و لەژێر دەستی پێشمەرگەن، تەقریبەن ١٥٪یە. ناوچەكانی دەرەوەی ئیدارەی هەرێمی تێدا نییە كە ئەگەر ئەوانەشی بێتە سەر، تەقریبەن رەنگە خۆی لە ٢٥٪ بدات ژمارەی كورد، زیاتریش، كەچی ئەوان مامەڵەیەك لەگەڵ هەرێم دەكەن، هەتا ئەو ناوچانەی لەژێر دەسەڵاتی هەرێمیشە، ١٥٪ نییە و ١٤٪ نییە و لە ١٠٪ش كەمترە، لە هەموو شتێك كە دەڵێن پشكی هەرێم ئەوەندەیە، زۆر بە كەمی، بە نیوە و كەمتر لە نیوە، تەنانەت تۆز سێ بەرامبەر و دە بەرامبەر بۆ ئێمە دێت.
