برای شەهیدێکی یەکێتی لەبارەی موزایدەکانی یەکێتی بە مووچەی فەرمانبەران و بێدەنگی لەبارەی مووچەی خانەوادەی شەهیدان دێتە دەنگ و داوایەک لە یەکێتی دەکات ، سەربه‌ست نازم محه‌مه‌د، برای شه‌هید (بێستوون نازم) كە شەهیدێكی یه‌كێتییە لە چەمچەماڵ ، رایگەیاند: ”پێویستە یەكێتی دەست لە موزایەدەكردن بە بابەتی مووچە هەڵبگرێت، چونكە ئەوەتا یەكێتی دەڵێ داوا دەكەم مووچەی فەرمانبەران بدرێت، كەچی هیچ لەبارەی مووچه‌ی پێشمه‌رگه و خانه‌واده‌ی شه‌هیدان ناڵێت! ئەمەش مانای وایە كە یەكێتی دەیەوێ مووچەی كەسوكاری شەهیدان و پێشمەرگە نەدرێ و هی ئەوانە بدرێ كە مووچەیان لە بەغداوە هاتووە! بەداخەوە ئه‌م سیاسه‌ته‌ی یه‌كێتی له دژی خانه‌واده‌ی شه‌هیدان و پێشمه‌رگه‌یە و لە كۆتاییشدا باجەكەی دەدەن، ئاخر چۆن ده‌كرێت نیوه‌ی مووچه بدرێت و نیوه‌ی دیكه‌ی مووچه‌خۆران سه‌یری خەڵك بكه‌ن؟“
پرسیاری ئەوەشی كرد كە ئاخۆ بۆچی دەبێت لەم مانگی رەمەزانە، كەسوكاری شەهیدان لە كوردستان بێ پارە بن، ”ئەوەی دەكرێت، جۆرێكە لە فیتنە، چونكە دەیانەوێ بەشێكی خەڵك مووچە وەربگرن و بەشێكیشیان مووچەیان پێ نەدرێت.
لەبارەی ئەو موزایدانەی یەکێتی سەربەست نازم دەشلێت:بەشێك لە هۆكارەكانی ئەو موزایەدەیەی یەكێتی بە مووچەی مووچەخۆرانی كوردستانیەوە دەكات، پەیوەندیی بەوەوە هەیە كە ئەو حزبە لە سنووری سلێمانی تووشی شڵەژان بووە، بەهۆی كێشە ناوخۆییەكانی لە لایەك و دروستبوونی لیستەكەی لاهوور جەنگی لە لایەكی دیكەوە، ”دەیەوێ بەم موزایەدانە، ئەم بابەتانە پەردەپۆش بكات!“
گوتیشی: ”ئێمە وەك بنەماڵەی شەهیدانی یەكێتی هۆشداری بە یەكێتی دەدەن، دۆخی ناوخۆی یەكێتیش لەوە زیاتر بەرگە ناگرێت، بۆچی یەكێتی قسە لەسەر مووچەكانمان ناكات و تەنیا باسی دابەشكردنی مووچەی ئەوانە دەكات كە مووچەكانیان نێردراوە؟“