هاوپۆل: Uncategorized

سەرۆکی حکومەت پەیامێکی پیرۆزبایی لە وەزیری دەرەوەی تورکیا پێگەیشت

دەمەوێت سوپاستان بكەم كە دوابەدوای كارەساتی بوومەلەرزە ئازاربەخشەكەی وڵاتەكەمان، لە نزیكەوە هەموو هێمای ئەو هەستە بەرزانەی نەورۆزتان بۆ ئێمە دەربڕی

ئەمڕۆ دووشەممە ٣/٢٠،  مەولود چاوشئۆغلو وەزیری دەرەوەی توركیا، پەیامێكی پیرۆزبایی بە بۆنەی جەژنی نەورۆزەوە، ئاراستەی مەسرور بارزانی سەرۆكی حكومەتی هەرێمی كوردستان کرد.

لە پەیامەكەی وەزیری دەرەوەی توركیادا هاتووە: “ بەڕێز سەرۆكی ئەنجوومەنی وەزیران، دۆستی قەدرگرانم، لەگەڵ ژیانەوەی سروشت، لە ناخی هەستەكانمەوە،  پیرۆزبایی جەژنی نەورۆزت لێ دەكەم، كە هۆكارێكە بۆ سەوزكردنی هیواكانمان و پتەوكردنی برایەتیی نێوانمان.”

وەزیری دەرەوەی توركیا، هەروەها دەڵێ : “نەورۆز بە درێژایی مێژوو، رەنگدانەوەی مرۆڤەكان بووە بۆ تێگەیشتنیان لە ژیان لەگەڵ سروشتدا، لەگەڵ ئەوەی سیمبۆلی دووبارە نوێبوونەوە و ژیانەوەیە، لە هەمانكاتیشدا سیمبۆلی هاودەنگی و خۆشبەختیە، ئێمە سەرقاڵی سارێژكردنی بریندارەكانی كارەساتی بوومەلەرزەین كە چەقەكەی شاری كەهرەمان مەراش بوو لە شەشی شوباتی ٢٠٢٣، بۆیە لە وڵاتەكەمان بە خەمناكییەوە پێشوازی لە جەژنی نەورۆز دەكەین.”

لە درێژەی پەیامەكەی وەزیری دەرەوەی توركیادا هاتووە: “ئەو رۆژەی وەكو موژدەبەخشی بەهار پیرۆز دەكرێت، لە هەمانكاتیشدا ساتی پتەوكردنی هەستی یەكبوون و پێكەوەیی و هاوسۆزییە، جگە لەوەی دەمەوێت سوپاستان بكەم كە دوابەدوای كارەساتی بوومەلەرزە ئازاربەخشەكەی وڵاتەكەمان، لە نزیكەوە هەموو هێمای ئەو هەستە بەرزانەی نەورۆزتان بۆ ئێمە دەربڕی.”

وەزیری دەرەوەی توركیا لە كۆتاییشدا دەڵێ: “بەم بۆنەیەوە، هیوای ئاشتی و خۆشگوزەرانیی بۆ وڵاتەكەمان و گشت جیهان دەخوازم، هیوای تەندروستیی باش و خۆشبەختی و سەلامەتی بۆ كەسایەتی بەڕێزتان و خەڵكی هەرێمی دۆستمان دەخوازم.”

بەبۆنەی هاتنی جەژنی نەورۆز و سەری ساڵی نوێی کوردی ، گەرمترین پیرۆزبایی ئاراستەی سەرجەم کوردستانييان، بەتایبەتی پێشمەرگە قارەمانەکان و هێزەکانی ئاسایشی ناوخۆ و کەس و کار و بنەماڵەی سەربەرزی شەهیدان و ئەنفالکراوان دەکەم. هیوادارم لە خۆشی و شادی و ئارامیدا، ڕۆژانی جەژن و پشوو بەسەرببەن. لە هەمانکاتدا، داوا لە هاونیشتمانییان دەکەم، لە کاتی گەشت و سەیرانەکانیاندا، پاک و خاوێنی ژینگە و سروشتی جوانی کوردستان بپارێزن. هەروەها پابەندی ڕێنماییەکانی هاتووچۆ بن و دووربن لە تیژڕۆیی.

جەژنی نەورۆز، هێمای یەکگرتن و یەکڕیزی و سەرکەوتن و ئازادی گەلی کوردستانە. لەم بۆنەیەدا، جەخت لە تەبایی و هاوهەڵوێستی خەڵکی کوردستان دەکەینەوە لە پێناو پاراستنی دەسکەوتە نیشتمانییەکان و داکۆکیکردن لە مافە دەستوورییەکانمان . هەر بەم بۆنەیەوە، لە پێناو بەرژەوەندیی گشتیی و ڕەواندنەوەی نیگەرانییەکانی هاووڵاتییانی ئازیزمان و خوڵقاندنی کەشێکی ئەرێنی، داوا لە بەڕێزان جێگری سەرۆک وەزیران و تیمی وەزاری یەکێتیی نیشتمانی کوردستان دەکەمەوە، کە لە دوای کۆتاییهاتنی پشووەکانی نەورۆز ، بگەڕێنەوە بۆ کۆبوونەوەکانی ئەنجومەنی وەزیران، بۆ ئەوەی  گشت کێشەکان لە شوێن و پێگەی فەرمیی خۆی ، گفتوگۆی لەسەر بکرێت و بەیەکەوە ، کاربکەین لە پێناو خزمەتکردنی زیاتری خەڵکی کوردستان و جێبەجێکردنی کارنامەی کابینەی نۆیەمی حکومەتی هەرێمی کوردستان.

جەژنی نەورۆز لە هەمووان پیرۆز بێت و کوردستان هەمیشە لە ئارامی و گەشانەوە و پێشکەوتندا بێت .

مەسرور بارزانی
سەرۆکی حکومەتی هەرێمی کوردستان

وەرگێڕانی: دیار عەزیز

الشرق الاوسط: كەی ئاگادار كرانەوە كە ئەمریكا ئامادەكاری بۆ ڕووخاندنی ڕژێمی سەدام حوسێن دەكات؟
سەرۆك بارزانی: لە نیسانی ٢٠٠٢ شاندێك لە واشنتۆن هات، بانگهێشتێكی فەرمییان بۆ من و كۆچكردوو مام جەلال هێنابوو تاوەكوو سەردانی واشنتۆن بكەین. ئاگاداریان كردینەوە كە پێشكەوتنێكی زۆر گەورە لە سیاسەتی ئەمریكا وەدی هاتووە، لە داهاتوودا شتی زۆر مەترسیدار روودەدەن، بەڵام راستییەكەی وردەكارییان پێ نەگوتین.
سەردانەكەمان كرد، بەڵام سەردانێكی رانەگەیەندراوبوو، ٣ تا ٤ رۆژ ماینەوە، بە فەرمی ئاگاداریان كردینەوە كە بڕیارەكە دراوە و ڕژێم لە ڕێگەی هێزی سەربازییەوە دەگۆڕدرێت.

الشرق الاوسط: كێ لە كۆبوونەوەكە ئامادە بوو؟
سەرۆك بارزانی: نوێنەری وەزارەتی دەرەوەی ئەمریكا، بەرپرسی دۆسیەی ڕۆژهەڵاتی ناوەڕاست بوو، ئەوەی كە پێیان گوتین، جێگری بەڕێوەبەری CIA و پێموایە پێنتاگۆنیش، شاندێكی تێكەڵ بوو، پێیان گوتین كە بڕیارەكە دراوە و دەمانەوێ رای ئێوە وەربگرین. گوتمان ئەگەر ئێوە جددین لە ڕووخاندنی ڕژێم، بەڵام پرسیاری گرنگتر ئەوەیە كە پاش ڕووخاندنی ڕژێم چی؟ گوتیان بۆ ئەم بابەتە ئێمە پێویستیمان بە یارمەتیی ئێوەیە، چ ئامۆژگارییەكمان دەكەن؟ لە راستیدا راوێژمان بە یەكتر كرد، من و كۆچكردوو مام جەلال و ئەو شاندەی لەگەڵماندا بوون، تێبینیی ئەوەمان كرد كە ئەوان ڕژێم دەڕووخێنن جا ئەگەر ئێمە ڕازی بین یان ڕازی نەبین، ئەگەر بەشداریمان بكردایە یان نا.
گوتیان پێمە پێویستیمان بە چەترێكی سیاسی هەیە كە دروست دەبێت لە میانی بەستنی كۆنگرەیەك بۆ ئۆپۆزسیۆنی عێراقی بە هەموو گرووپەكانیەوە و بەبێ ئیستسنا، لەو كۆنگرەیەدا دەبێ بڕیار لەوە بدەین كە چ دەكەین لەپاش ڕووخاندنی ڕژێم؟ گوتیان ئەمە بیرۆكەیەكی باشە و لەگەڵ هێزەكانی دیكەش كارمان كردووە. لە مانگی ١٢ی ساڵی ٢٠٠٢ لەگەڵ گرووپەكانی دیكە راوێژمان بە یەكتر كرد، زۆرینەیان پشتیوان بوون، بەشێكیش ناڕازی بوون.

الشرق الاوسط: پاش ئەوەی لە ئەمریكا گەڕانەوە، لە هێزە هەرێمییەكان كێتان ئاگادار كردەوە لە ناوەڕۆكی ئەو كۆبوونەوەیەتان؟
سەرۆك بارزانی: پێموایە لە ڕێگەی گەڕانەوەم، سەردانی دیمەشقم كرد و چاوم بە سەرۆك بەشار ئەسەد كەوت، پێم گوت كە بڕیارەكە دراوە و رژێم دەڕووخێندرێت، ئەو گومانی هەبوو و باوەڕی نەدەكرد. ئەسەد ناڕازی نەبوو، بەڵام گوتی ئێوە بەرژەوەندیی خۆتان باشتر دەزانن.

الشرق الاوسط: ئایا ئێران رازی بوو بەوەی ئەمریكییەكان ڕژێمی سەددام بڕووخێنن؟
سەرۆك بارزانی: بەڵێ، ئەوان هێز و لایەنەكانی نزیك لە خۆیان هان دا.

الشرق الاوسط: كێت بینی لە تاران؟
سەرۆك بارزانی: چاوم بە شەهید محەمەد باقر ئەلحەكیم كەوت، داوام لێی كرد كە ئامۆژگاریی شاندی ئەنجوومەنی باڵا بكات تاوەكوو زیاتر واقیعی بن. چاوم بە رەفسنجانی كەوت كە ئەوكات سەرك كۆمار بوو. چاوم بە قاسم سولەیمانی كەوت، قسە لەسەر بابەتەكە نەبوو، ئەوكاتە كەسایەتییەكی دیار نەبوو وەك دواتر، دۆسیەی عێراقی بەدەستەوە بوو.

الشرق الاوسط: قاسم سولەیمانی پشتیوانی ئەوەبوو كە ئەمریكا بێتە عێراق؟
سەرۆك بارزانی: بەڵێ، تەنانەت رەفسنجانی گوتی كە ئێمە ناتوانین بە ئاشكرا پشتیوانی ئەمە بكەن، بەڵام ڕووخاندنی سەدام بۆ ئێمە شتێكی گەورە و سەركەوتنێكی گەورەیە.

الشرق الاوسط: ئەی توركیا؟
سەرۆك بارزانی: توركیا پشتیوان بوو بەو مەرجەی رێگەی پێ بدرێت دوو فرقەی سوپای توركیا بێتە ناوەوە، فرقەیەكیان بچێتە مووسڵ و فرقەیەكی دیكەش بچێتە كەركووك.

الشرق الاوسط: لە كۆنگرەی لەندەن ڕێككەوتن لەسەر سیستەمی فیدرالی؟
سەرۆك بارزانی: رێككەوتین لەسەر ناسنامەی عێراق وەك دەوڵەتێكی فیدرالی دیموكراسی فرەیی.

الشرق الاوسط: هەستت بە چی كرد ئەو ڕۆژەی ڕژێمی سەدام حوسێن ڕووخێندرا و سەرۆكەكەی لادرا؟
سەرۆك بارزانی: والله ئایەتێكم بیر كەوتەوە كە دەفەرموێ ( اللَّهُمَّ مَالِكَ الْمُلْكِ تُؤْتِي الْمُلْكَ مَن تَشَاءُ وَتَنزِعُ الْمُلْكَ مِمَّن تَشَاءُ وَتُعِزُّ مَن تَشَاءُ وَتُذِلُّ مَن تَشَاءُ – ال عمران – الایە ٢٦) بەبیرم هاتەوە كە ئەوكاتەی بچووك بووم، كاتێك كە شۆڕشی تەمووز ڕووی دا لە ساڵی ١٩٥٨، چووینە كۆشكی (الرحاب) سەركەوتین بۆ سەربانی كۆشكەكە، دەستەواژەیەكم خوێندەوە كە لەسەر تانكیی ئاو نووسرابوو، كەسێك لەسەری نووسیبوو: كوفر بەردەوام دەبێت، زوڵم بەردەوام نابێت، ئەو دەستەواژەیە تاوەكوو ئێستاش ئەو ڕستەیەم وەبیرم ماوە.

الشرق الاوسط: لە ساڵی ١٩٥٨ چوویتە كۆشكی (الرحاب)؟
سەرۆك بارزانی: بەڵێ پاش شۆڕش،

الشرق الاوسط: پاش ئەو كوشتارگەیەی ڕووی دا؟
سەرۆك بارزانی: بەڵێ پاش كوشتارگەكە.

الشرق الاوسط: لەگەڵ ئەمریكییەكان لەسەر چی ڕێككەوتن لە پێناو ڕۆژی دوای ڕووخانی ڕژێم؟
سەرۆك بارزانی: كۆنگرەی لەندەن بە ڕێككەوتن بوو، هاتنی حاكمی مەدەنی (گارنەر) بۆ یارمەتیدانی ئۆپۆزسیۆن بوو بە مەبەستی پێكهێنانی حكوومەتێكی كاتی، بەڵام پاشان برێمەر بە بڕیارێكی ئەنجوومەنی ئاسایشەوە هات، ژمارەی بڕیارەكەی ئەنجوومەنی ئاسایشم لەبیر نییە، بەڵام لە ئازادكردنەوە گۆڕدرا بۆ داگیركردن، ئەمەش ئەمەش هەموو شتەكانی گۆڕی.

الشرق الاوسط: دیارترین هەڵەی ئەمریكییەكان چی بوو لە بابەتی هاتنیان بۆ عێراق؟
سەرۆك بارزانی: گەورەترین هەڵەیان خۆگۆڕینیان بوو بۆ داگیركەر.

الشرق الاوسط: پاش دوو دەیە، ئایا هیچ تەفسیرێكت بۆ بڕیارەكەی پۆل برێمەر هەیە لەسەر هەڵوەشاندنەوەی سوپای عێراق؟
سەرۆك بارزانی: وەك بڕیاری لەسێدارەدان بوو بۆ كەسێكی مردوو، سوپا بە كردەیی هەڵوەشابووەوە، سوپا نەمابوو، پاش هەڵوەشانەوەی ڕژێم لە ڕۆژی نۆی نیسان، سوپا داڕما، نە سەربازگە و نە سەركردایەتی و نە پلەبەندی نەمان، هەموو پێكهاتەكانی داڕمان، سوپا بە تەواوی لەبەریەك هەڵوەشایەوە، بۆیە بڕیارەكە وەك ئەوە بوو تۆ بڕیاری لەسێدارەدان بۆ كەسێكی مردوو دەربكەیت.

الشرق الاوسط: كێ بوونی سەربازیی ئەمریكی تووشی داهێزران كرد؟ بەرەی مقاوەمە، ئێران یان سووریا؟
سەرۆك بارزانی: هەموویان بەشدارییان كرد لە داهێزرانی سوپای ئەمریكا، ئێران و سووریا و تیرۆر و مقاوەمەش جا هەر شتێكی ناو لێ دەنێیت، هەموویان بەشدار بوون.

الشرق الاوسط: رژێمی سووریا دەترسا لەوەی ئامانجی دواتر بێت؟
سەرۆك بارزانی: راستەوخۆ پاش ڕووخانی ڕژێم، ئێرانییەكان و سوورییەكان تا ئەوپەڕی دەترسان، لەوەیان دەپێچایەوە كە كامیان لە پلەی یەكەمدا ئامانجە پاش ڕژێمی بەعس، ئایا ئێران ژمارە یەكە یان سووریا؟

الشرق الاوسط: كەی دوایین جار بوو چاوت بە سەدام حوسێن كەوت؟
سەرۆك بارزانی: رەنگە لە ١٩٩٦.

الشرق الاوسط: چاوپێكەوتنەكە چۆن بوو؟
سەرۆك بارزانی: چاوپێكەوتنێكی باش بوو.

الشرق الاوسط: ئەوكات عێراق گەمارۆ درابوو؟
سەرۆك بارزانی: بەڵێ.

الشرق الاوسط: ئەو كاتەی هێرشتان كردە سەر هەولێر و داوای یارمەتیتان لە سەدام كرد، چ ساڵێك بوو؟
سەرۆك بارزانی: لە ١٩٩٦ بوو.

الشرق الاوسط: پاش ئەوەی داوای یارمەتیتان لێی كرد، سەردانت كرد؟ یارمەتی پێشكەش كردن؟
سەرۆك بارزانی: بەڵێ. یارمەتیی پێشكەش كردین. هەڵبەت یارمەتییەكانی پاش دەستێوەردانی ئێران هات، سەرەتا ئێرانییەكان هاتنە ناوەوە، ئەوەش وەڵامێك بوو بۆ دەستێوەردانی ئێران.

الشرق الاوسط: ئایا سەدامت لە بەندیخانە نەبینی؟ هەوڵت نەدا چاوت پێی بكەوێت؟
سەرۆك بارزانی: نەمبینی و هەوڵیشم نەدا، نەمویست لە بەندیخانە بیبینم.

الشرق الاوسط: دڵخۆش نەبووی بەو دۆخەی سەدام كە دوژمنێكی كۆن بوو؟
سەرۆك بارزانی: دڵخۆشبوونی بەم جۆرە لە سیفەتی پیاواندا نییە هەرگیز، نە ئێمە دەستگیرمان كرد و نە ئێمەش ڕووخاندمان، ئەمریكییەكان هاتن و رووخاندییان، دڵخۆشبوونی لەم جۆرە سیفەتێكی پاك نییە.

ڕۆژی شەممە ١٨ی ئاداری ٢٠٢٣ لە سەلاحەددین سەرۆك مەسعود بارزانی میوانداریی ژمارەیەكی زۆر لە باڵیۆز و كونسوڵ و نوێنەرایەتیی وڵاتان و ڕێكخراوە نێودەوڵەتییەكان و هێزی هاوپەیمانان لە عێراق و هەرێمی كوردستان كرد و نیوەڕۆخوانێكی بۆ ساز كردن.

لەو میواندارییەدا سەرۆك بارزانی گوتەیەكی پێشكەشی میوانەكان كرد و، لە گوتەكەیدا زۆر بە گەرمی بەخێرهاتنی میوانانی كرد و وێڕای ئاماژەدان بە بایەخی هێما و مانا و بۆنەكانی مانگی ئادار و نەورۆز بۆ گەلی كوردستان هیوای ئەوەی بۆ خواستن كە لە ڕۆژانی جەژن و پشوودا كاتێكی خۆشیان لە كوردستان هەبێت.

لە درێژەی گوتەكەیدا سەرۆك بارزانی ڕۆشنایی خستە سەر بارودۆخی سیاسی و پەیوەندییەكانی نێوان حكوومەتی فیدڕاڵی عێراق و حكوومەتی هەرێمی كوردستان و ئەوەی خستەڕوو كە دەرفەتێكی باش بۆچارەسەركردنی كێشەكان لەئارا دایە و ئیرادە و خواستێكیش دەبیندرێت بۆ ئەوەی كێشەكان بە لێكتێگەییشتن و بە پشتبەستن بە دەستوور و لەسەر بنەمای ئەو ڕێككەوتنانە چارەسەر بكرێن كە لەنێوان لایەنە پێكهێنەرەكانی هاوپەیمانێتیی ئیدارەی دەوڵەت بەستراوە. سەرۆک بارزانی سەردانی چەند ڕۆژی ڕابردووی بەڕێز محەمەد شیاع سودانی بۆ هەرێمی کوردستانی بە دەرفەتێکی باش بۆ لێکتێگەییشتنی زیاتری نێوان هەرێم و حکوومەتی فیدڕاڵ لەمەڕ نەهێشتنی ناکۆکییەکان لەقەڵەم دا.

هەروەها سەرۆك بارزانی هێمای بە پڕۆسەی سیاسیی ناوخۆی هەرێمی كوردستانیش دا و جەختی لەوە كردەوە كە بۆ ئەوەی شەرعیەت لە هەرێمی كوردستان نەخرێتە ژێر پرسیار پێویستە ئەمساڵ هەڵبژاردن بكرێت و ئەوەشی ڕاگەیاند كە هاوكاری و هەماهەنگییەكی باش لەنێوان تیمە نێودەوڵەتییەكان و لایەنە پەیوەندیدارەكانی هەرێم هەیە بۆ ئامادەكارییەكانی هەڵبژاردنەكانی هەرێمی كوردستان. پەیوەست بە مافی پێكهاتەكان لە هەڵبژاردنەكاندا سەرۆك بارزانی ئەوەی دووپات كردەوە كە نابێ هیچ دەستوەردان لە مافی پێكهاتەكاندا بكرێت و، ئیرادە و سیغەیەكی دیاریكراوە بەسەر پێكهاتەكانی هەرێم بسەپێندرێت. دەبێ ڕێز لە ئیرادەی پێكهاتە ئایینی و نەتەوەییەكانی كوردستان بگیرێت و خودی پێكهاتەكان و ڕێكخراوی نەتەوە یەكگرتووەكان هەر سیستەمێك بۆ بەشداریكردنی پێكهاتەكان بە باش بزانن بەلای ئێمەشەوە پەسەند دەبێت.

هەر لەو كۆبوونەوەیەدا دەرگەی گفتوگۆ و ئاڵوگۆڕی بیروڕا بۆ ئامادەبوان كرایەوە و سەرۆك بارزانی وەڵامی تێبینی و پرسیاری دیپلۆماتكار و نوێنەرانی وڵاتانی بیانیی سەبارەت بە بارودۆخی سیاسیی عێراق و هەرێمی كوردستان دایەوە.

سۆران خاکی:

هەڵەبجە بە درێژایی مێژوو بۆتە قوربانی سیاسەتی چەوتی یەکێتی ئەو حزبە هەمیشە ئەو شارەی کردۆتە قوربانی بەرژەوەندییە حزبیەکانی، کارەساتی ١٦ی ئازاری ساڵی ١٩٨٨و کیمیابارانکردنی هەڵەبجە بەرئەنجام شەهیدبوونی ٥هەزار مرۆڤی بێ تاوان لەم شارەدا یەکێتی هۆکاری سەرەکیە، چونکە یەکێتی دەستی پاسدارانی ئێرانی گرت و هێناینە ئەم شارەو بیانووی دایە دەستی ڕێژێمی بەعس بۆ ئەوەی بە چەکی کۆمەڵکوژ بۆردومانی ئەم شارە بکات، هەر ئەوەش نا بەڵکو ڕێگەی نەدا خەڵکەکەش لە شارەکە بڕۆنە دەرەوە و خۆیان ڕزگار بکەن !

دوای لەناوچوونی ڕژێمی بەعس بکەری سەرەکی ئەم کارەساتە کە طارق ڕەمەزانی فڕۆکەوان بوو دەستگیرکرا، کەچی وەفای یەکێتی بۆ هەڵەبجەییەکان ئەوەبوو بە ڕۆژی ڕووناک ئازادی کردوو ڕەوانەی دەرەوەی وڵاتیشی کرد!

ئەمڕۆش دوای دوو ٣٥ ساڵ لەو کارەساتە هەڵەبجە لە ژێر چەتری حوکمڕانی یەکێتی دا لە بچووکترین و سەرەتایی ترین خزمەتگوزاری بێ بەشەو هیچ سیمایەکی شارستانی و ئاوەدانی بەم شارەوە دیار نیە !

تۆ بڵێی ئەم هەموو ڕق و قینەو و دوژمنایەتی کردنەی یەکێتی بۆ ئەم شارەو خەڵکەکەی لە چیەوە سەرچاوەی گرتبێ و دانیشتوانی ئەم شارە چ تاوانێکیان ئەنجام دابێ وایان لێ دەکەن ؟

ڕۆژی دووشەممە ١٣ی ئاداری ٢٠٢٣ لە سەلاحەددین سەرۆک مەسعود بارزانی پێشوازی لە شاندی فیدڕاسیۆنی نیشتیمانیی جەنگاوەرانی دێرینی فەڕەنسا کرد کە پێکهاتبوو لە فیلیپ دولارب سکرتێر و سێناتۆر لوی دوڤێرنوا و جەنەڕاڵ تینۆدۆر ئارفارا ئەندامانی فیدڕاسیۆن.

لە دیدارەکەدا شاندی میوان پێزانینیان بۆ خەبات و ماندووبوون و قوربانیدانی سەرۆک بارزانی و پێشمەرگە و گەلی کوردستان هەبوو و جەختیان لە بەردەوامیی دۆستایەتی و پەیوەندی و برایەتیی نێوان گەلی فەڕەنسا و گەلی کوردستان کردەوە.

هەروەها بە مەبەستی بەرزڕاگرتنی خەباتی پێشمەرگە و فراوانکردنی پەیوەندی نێوان گەلی کوردستان و گەلی فەڕەنسا کۆمەڵێک بیرۆکە و پێشنیاریان خستەڕوو.

هەر لەو کۆبوونەوەیەدا سەرۆک بارزانی دۆستایەتیی نێوان گەلی کوردستان و گەل و حکوومەتەکانی فەڕەنسا بە مێژوویی و دێرین وەسف کرد و وێڕای ئاماژەدان بە چەندین نموونەی مێژوویی و سەردانی سەرۆک هۆڵاند و سەرۆک ماکرۆن، سوپاسی گەل و دەوڵەتی فەڕەنسای کرد کە هەمیشە پاڵپشت و دۆستێکی گەورەی گەلی کوردستان بوونە.

شاندەکە خۆشحاڵی خۆیان بە سەردانکردنی هەرێمی کوردستان نیشاندا، کە ئەمە شەشەمین شاندی قوتابییانی ئەکادیمیاکەیە کە لە ساڵانی ڕابردوودا، سەردانی هەرێمی کوردستانیان کردووە.شاندەکە ستایشی پێشکەوتن و ئاوەدانیی و دۆخی بەیەکەوەژیانی ئاشتییانەی هەرێمی کوردستانیان کرد.
لە وەڵامی پرسیاری ئامادەبوواندا، باس لە دوایین گۆڕانکاری و پەرەسەندنەکانی هەرێمی کوردستان و عێراق و ناوچەکە کرد و تیشکمان خستە سەر چاکسازییەکانی کابینەی نۆیەم لە بوارەکانی هەمەجۆرکردنی سەرچاوەکانی داهات و بەدیجیتەڵکردنی خزمەتگوزارییە گشتییەکان و دەستپێکردنی پرۆسەی پارەدانی دیجیتاڵی .
هەروەها ئاماژەش بە پەیوەندییەکانی هەرێمی کوردستان و حکومەتی فیدراڵ و گرنگیی چارەسەرکردنی کێشەکان لەسەر بنەمای دەستوور کرا.

ڕونکردنەوەیەکی پێویست…زۆر بەکورتی

بەهێز حوسێن:

ماوەی چوار ساڵە وەک بندیوار مەکتەبی ڕاگەیاندنی یەکێتی مووچەی ٤٢٥ دۆلاریان بۆ بڕیومەتەوە ( ئەندامی ئەنجومەنی ڕاوێژکاریی ) و لەماڵی خۆم بێ کار دانیشتووم ، هۆکارەکەش ئەوەیە برادەرێک لە ناو ڕاگەیاندن دەموچاوی منی بەدڵ نییە ، گرەویان لەسەر کردبووم کە سێ مانگ ناخایەنێت و بەهێز حوسێن خۆی دەکات بە کەناڵێکی نەیاردا ، بەڵام ئەوە چوار ساڵ تێپەڕی و سەرتان دای لەبەرد !.

لە دواین هەڵمەتی هەڵبژاردنیشدا بۆ پەرلەمانی کوردستان خۆبەخشانە ماوەی یەک مانگ لە ڕادیۆی دەنگی گەلی کوردستان بەرنامەم پێشکەشکرد و سەربەزانەش دڵسۆزیم بۆ یەکێتی دووپاتکردەوە .

چوارساڵە دانم بەخۆمدا گرتووە و لەبەر ڕێزی مێژووی خۆم و ١٥ ساڵ کار و داهێنان لە ڕاگەیاندنی یەکێتی و ٢٧ ساڵ ئەزموونی کاری میدیایی قسەم نەکردووە ، ئەگەر نا ئەوەندە دەست و پێ سپی نیم لە کاری میدیایی تا کارم دەست نەکەوێت یان لێی نەزانم!.

تەنها مانگانە ٥٥٠ هەزار قیستی شوقە دەدەم و ئەرکی بژێوی خێزانێکیشم لەسەرە ، هەڤاڵێکم نەیپرسی باشە تۆ بەچی دەژیت !؟.
ماوەی چەند مانگێک شاگردیم کرد لە دوکانێکی بچوکدا عەریزە نووسیم دەکرد ڕۆژی بە دەهەزار و ١٥ هەزار دینار ، کامتان ئاگاتان لەم وەزعەی من هەبوو؟

کامتان ئاگادارن لەبەر نەداری هەردوو کوڕەکەم نەتوانی بخەمە باخچەی ساوایان و ساڵێک گەورەکەیانم دواخست لە قوتابخانە و بە ٧ ساڵی داخڵم کرد؟

کامتان هاتن لەوە بکۆڵنەوە کە دیارترین میدیاکارتان بۆ لەسەر شاشە نەماوە!؟.
هەڤاڵانی ل. مەکتەبی ڕاگەیاندن و لێپرسراوی سکرتارییەتی هەڤاڵ مام جەلال و زۆرێک لە م.س و سەرکردایەتییەکانیشم لەم بێ ئەرزشکردنەی من ئاگادار کردۆتەوە ، بەڵام تا ئێستا هیچ وەڵامێکیان نەبووە و لەم چوار ساڵەدا کەسێکیان تەلەفۆنێکیشیان بۆ هەواڵپرسین بۆ نەکردووم .

وەک ئەرکێکی ئەخلاقیانەی خۆم بەرامبەر بە هاوسەر و مناڵەکانم و ئەو پاپەندە داراییانەی لەسەرمن ، لێرەوە ڕادەگەیەنم کە چیتر دەستەوەستان نامێنم و بەدوای کاردا دەگەڕێم ، بەداخەوە دوای ئەم هەموو ساڵە لە خزمەت و دڵسۆزییەم هەڤاڵەکانم ناچارم دەکەن لە دەرگای ئەم و ئەو بدەم بۆ کارکردن و لەو میدیایەی شەونخوونی و دڵسۆزیم تێداکرد و بێ مووچەیم تێدا قەبوڵکرد شوێنم نەبێتەوە ، وەزعەکەتان بۆگەن کردووە و ئەوەی بەرامبەرم دەکرێت بە ئیهانەی دەزانم…

داوای لێبووردن لە کەسە دڵسۆز و خەمخۆرە بێدەسەڵاتەکانی یەکێتی دەکەم و هەموو لایەکتان هەر شاد و سەلامەت بن .