هاوپۆل: Uncategorized

فرسەت سەید شکور:‎
کورد دوژمنی بۆ چیە، پێویست ناکات پەیماننامەی لۆزان نوێ بکرێتەوە، کورد خۆی دانی نا بەچوار پارچە بوونی و خۆی کرد بە چوار پارچە.

تێکدانی یەکڕیزی نیشتمانی، لۆزانێکی دیکەیە

لە کاتێکدا دەبوو، لە دوای تێپەڕبوونی سەد ساڵ بەسەر پەیماننامەی لۆزانی شووم بۆ نەتەوەی کورد، کوردستانیان لەسەرانسەری دونیا یەکدەست و یەکهەڵوێست بوونایە، پێکەوە دژی زوڵم و دابەشکاری نارەوای زلهێزان هەڵوێستیان هەبووبایە، کەچی وەکو پیشەی هەمیشەییان پە٭کە٭کە و کۆمەڵێک لایەنی هەلپەرستی تەسلیم بوو بە ئیرادەی نەیارانی گەلی کورد، بە چوار ئاڵای جیاوازەوە ئەم یادەیان کردەوە، کە ئەمە مایەی شەرمەرزاری و نووشستی عەقڵانییە.

لە ڕاستیدا هەر یادکردنەوەیەکی لەو شێوەیە ڕاستەوخۆ خزمەتکردنە بە داگیرکەرانی گەلی کورد، چونکە ئەمە ویست و خواستی ئەوان دەهێنێتە دی کە دابەشبوون و لێک هەڵوەشانی نەتەوەت کوردە، بەڵام وا دیارە ئەو لایانەی کە بەم کارە هەڵدەستن، ئاراستەکراون و ڕێنمایی دەکرێن، کە یەکگرتوویی کورد لە قاڵب دەبن و لە حەقدی خۆیاندا بیان توێننەوە.

جێگەی خۆیەتی کوردستانیانی رەسەنی نەتەوەی کورد، ئەم جۆرە لە گرووپ و تاقمی هەڵپەرست بناسنەوە و لە هیچ شوێنێکدا ڕێگەیان نەدەن بەناوی گەلی کوردستانەوە قسە بکەن، پێویستە هەر کوردێک لە تەواوی دونیا بگەڕێتەوە بۆ دیدگای ڕەسەنی خەباتکارانەی نەتەوەیی سەرۆک بارزانی کە (یان کوردستان یان نەمان)ـە.

ڕێکەوت شێخانی:‎ گوایە خۆپیشاندانیان کرد دژ بە چوار پارچە کردنی کوردستان، کەچی بە چوار ئاڵای جیاواز بەژداری کۆنفرانسیان کرد و بە دوژمنیان گۆت ئێمە چوار پارچەین

لە چەند ڕۆژی ڕابردووا بەناو کۆنفرانسی سەد ساڵەی لۆزان لەلایەن شوێنکەوتووانی پەکەکە و هەندێک کادیری یەکێتی لە ئەورووپا ڕێکخرا، بەداخەوە ئەو کۆنفرانسە بە هیچ شێوەیەک تەعبیری لە قەزیەی کورد نەکرد، چونکە تەواو بەحیزبی کرا و پەکەکە و یەکێتی و پاشکۆکانی بە ئاشکرا بۆ بەرژەوەندی خۆیان بەکاریان هێنا.

لەوەش ناخۆشتر و کارەساتتر ئەوەبوو کە چوار ئاڵای جۆراوجۆر نمایش کران، ئەوەش سووکایەتیکردن بوو بە ئاڵای کوردستان، چونکە کوردستان یەک ئاڵای هەیە، ئەویش ئەو ئاڵایەی ئێستای هەرێمی کوردستانە کە بە درێژایی مێژوو کورد دانی پێدا ناوە و خوێنی بۆ پاراستن و شەکاوەیی ڕشتووە، بۆیە ئەو فرەئاڵاییەی کۆنفرانسەکەی لۆزان پیادەکردنی ئەجێندای پەکەکە و داگیرکارانی کوردستانە و لێکترازان لەنێو گەلی کوردستاندا قووڵتر و برینەکانیش زیندوو دەکاتەوە، بەداخەوە بۆ ئەو کادیرانەی یەکێتی لەوێبوون، کەچی لە ئاست ئەو سووکایەتییە بێهەڵوێست بوون.

بە درێژایی مێژووی دروستبوونی، پەکەکە بۆ یەکجاریش کوردایەتی نەکردووە، تەنیا ویستوویەتی لە دۆزی ڕەوای کورد بدات، بۆیە ئەمساڵ لەو بەناو کۆنفرانسەی لۆزان یادەکەی بە حیزبی کرد، بۆیه تەنانەت لەناو کوردانی تاراوگەش پێشوازی لێ نەکرا و ژمارەیەکی کەمی خەڵکی کورد بەشدار بوون، تەنانەت دەگوترێت هەندێک لەوانەی بەشداربوون، لە بنەڕەتدا باوەڕیان بە سەربەخۆیی کوردستان نییە، کەچی بۆ موزایەدەکردن و سپیکردنەوەی ڕوویان بەشداریان تێدا کرد. ئاخر حیزبێکی وەک یەکێتی کە کەرکووکی ڕادەستی حەشد و سوپای عێراق کردبێت، چۆن کوردانی ڕەسەن گاڵتەیان بە کادیرەکانیان نایەت کاتێک باسی قەزیەی کوردی بکەن!
پەکەکە و یەکێتی و هەموو حیزبەکانی کوردستان دەبێت بزانن هەر کۆنفرانسێک تایبەت بە کورد ئەگەر پاڵپشتی پارتی و حکوومەتی هەرێمی کوردستانی لەگەڵ نەبێت، سەرکەتوو نابێت و تەنانەت کۆمەڵگەی نێودەوڵەتیش ڕێز لەو جۆرە بەناو کۆنفرانسانە ناگرێت، چونکە ئاشکرایە بەحیزبی کرابوو بۆ بەرژەوەندی گرووپێکی پەکەکە و یەکێتی و پاشکۆکانی.

سەرۆك بارزانی پێشوازی لە سەرۆكی كەنیسەی كلدان لە عێراق و جیهان و شاندێكی یاوەری دەكات

ڕۆژی یەكشەممە ٢٣ی تەمموزی ٢٠٢٣ لە سەلاحەددین سەرۆك مەسعود بارزانی پێشوازی لە پاتریارك كاردینال لویس ساكۆ، پاتریارك و سەرۆكی كەنیسەی كلدان لە عێراق و جیهان و شاندێكی یاوەری كرد كە پێكهاتبوو لە ژمارەیەك لە مەترانەكانی ئایینی كریستیان لە هەرێمی كوردستان و عێراق.

لە دیدارەكەدا كاردینال لویس ساكۆ سوپاسی ئەو ڕێز و پێزانینەی كرد كە لە هەرێمی كوردستان بۆ هێما و كەسایەتییەكانی ئایینە جیاجیاكان هەیە. هەروەها سوپاسی فەرهەنگی پێكەوەژیانی كوردستانی كرد كە بووەتە هۆی پاراستنی پێكهاتەكان و مێژوو و كولتوورەكانیان. دەستخۆشیشی لە سەرۆك بارزانی كرد كە بە حیكمەت و ڕابەرایەتیی خۆی، پێكەوەژیان و ئاشتی و ژیانی هاوبەشی پێكهاتە جۆراوجۆرەكانی لە كوردستان پێشخستووە، ڕاشیگەیاند كە شانازی بەو ژیانە هاوبەش دەكەین كە بۆ هەموو لایەك لە كوردستاندا هەیە. لە بەشێكی تری وتەكانیدا كاردینال لویس ساكۆ ئاماژەی بە بڕیاری ئەمدوایەی سەرۆككۆماری عێراق دا بۆ كشاندنەوەی مەرسوومی سەرۆككۆماریی تایبەت بە كەنیسەی كلدان دا، و بە بڕیارێكی نادروست و مەترسیداری لە قەڵەمدا كە پێكهاتەی كریستیانی بریندار كردووە و دژی بنەماكانی پێكەوەژیان و ئاشتەواییە.

هەر لەو دیدارەدا سەرۆك بارزانی بەخێرهاتنی شاندی میوانی كرد و هێمای بەوەدا كە كوردستان سەرزەمینی پێكەوەژیان و ئاشتەوایی نێوان هەموو پێكهاتە نەتەوەیی و ئایینییەكانە. ئەوەشی خستەڕوو كە لەشەڕی دژی تیرۆریستانی داعشدا بە شاندێكی پیاوانی ئایینی كریستیانم ڕاگەیاند كە كوردستان وڵاتی خۆتانە و نابێ بیر لە جێهێشتنی بكەنەوە، یان پێكەوە بە سەربەرزی لەسەر ئەو خاكە دەژیین یانیش پێكەوە دەمرین. سەرۆك بارزانی نیگەرانیی خۆی لە بڕیارەكەی سەرۆككۆماری عێراق بۆ كشاندنەوەی مەرسوومی سەرۆككۆماریی تایبەت بە كەنیسەی كلدان نیشاندا و هیوای خواست كە پێداچوونەوە بە بڕیارەكە بكرێت و ڕاست بكرێتەوە.

لە بەشێكی تری ئەو دیدارە شاندی میوان كورتەیەكیان لەبارەی بارودۆخی پارێزگای نەینەوا و ژیان و گوزەرانی كریستیانەكان و ئەگەر و مەترسیەكانی داهاتوو بۆ سەرۆك بارزانی باس كرد.

ئەکرەم سالح
بەرپرسی لقی ٢٢ی گەرمیانی پارتی بۆ یەکێتی:

لە شەرمەندەییتان بەرامبەر خەڵکی بەشەرەفی کفری نازانن چیبکەن، بۆیە ناچارن پەنا بۆ کۆمەڵێک ڕستەی حەماسی و دروشمی بریقەداری بێ کردار ببەن.

ئەڵبەتە ئەو بارودۆخەی بەسەر زۆنی سلێمانی و دەڤەری گەرمیان هاتووە لەم ساڵانەی دواییەدا، نمونەی لە هیچ قوژبنێکی ئەم دونیایەدا نیە! بەتایبەتی لەڕووی حکومڕانییەوە دیارە ئەگەر قسە لەسەر حکومڕانی باش بکرێت لەڕووی تیۆریوە ئەوە سەدان پەرتوکی لەسەر نوسراوە، بەڵام ئەوەی گرنگە پراکتیزەکردنی حکومڕانیە بەجۆرێک جێگەی ڕەزامەندی هاوڵاتی بێت.
بەڵام لەم دەڤەرە بڕواناکەم هاوڵاتیەک هەبێت لە دەسەڵاتی سنورەکە ڕازی بێت بەوانەشی، کە ئەندام و لایەنگری لایەنی دەسەڵاتن! چونکە دزی و قاچاخچێتی و گەندەڵی و بەهەردانی سامانی گشتی گەشتووەتە ئاستێک نەک هاوڵاتی، بەڵکو خودی دەسەڵاتدارانی ناوچەکە پێیان شەرمە داکۆکی لێ بکەن، چونکە خۆیان دەزانن چی دەگوزەرێت! مەگەر ئەوانەی بۆ پەردەپۆشکردنی ئەو نەهامەتیەی بەسەر خەڵکی ناوچەکەیان هێناوە، جار جار نوزەیەکیان لێوەبێت، ئەویش ته‌نها پاساو هێنانه‌وه‌یه و بۆ پاراستنی پێگەی خۆیانە.
قەزای کفری یەکێکە لە شارە دێرینەکانی کوردستان، خەمخۆرانی ئەم شارە زیاتر لە چوار ساڵە هاواریانە بەدەست نەبوونی خزمەتگوزاری و ئەو نادادیەی لەلایەن ئیدارەی سنورەکەوە به‌رامبه‌ر به‌ شارەکە دەکرێت، بەڵام کەس ئاوڕیان لێ ناداتەوە، چەند ڕۆژێکە وەک مافێکی سروشتی دەستیان بەخۆپیشاندانێکی مەدەنی کردووە و داوای چارەسەری گرڤتی شارەکەیان دەکەن، لەبری پشتیوانی دەسەڵاتی ناوچەکە هەر لەسەرەتاوە دژی گردبوونەوەکەیان بوون، چونکە باشیان دەزانی ئەوەی هۆکاری نەهامەتی ئەو شارەیە خودی خۆیانن،
بەڵام پاش ئەوەی ڕێزدار مەسرور بارزانی سەرۆکی حکومەتی هەرێمی کوردستان بەدەنگ داواکاری خۆپیشاندەرانەوە هات و بەخێرایی لیژنیەکی ناردە لای خۆپیشاندەران، لەماوەی (٤٨)کاتژمێردا بەشێکی زۆری داخوازیە هەنوکەیەکانی بۆ جێبەجێ کردن و زیاتر لە ملیارێک و دوو سەد ملیۆن دیناری بۆ شاری کفری خەرجکرد و وەزارەتە پەیوەندارەکانیشی ڕاسپارد، کە هەموو ئاسانکرایەک بکەن بۆ بووژاندنەوەی شارەکە و چارەسەرکردنی کێشە و گرڤتەکانیان ,خه‌ڵكی شاره‌كه‌ هیوایه‌كیان بۆ گه‌ڕایه‌وه‌، کەچی لەو ڕۆژەوە لایەنی باڵادەستی سنوره‌كه‌ وەکو كێچ کەوتبێتە کەوڵیان كه‌وتونه‌ته‌ تۆمەت بەخشینەوە و چەواشەکردنی خەڵک بەمەبەستی بێ بایەخکردنی ئەو کارانەی بۆ شاری کفری کراوە.
جا لێرەدا ئەوەی جێگەی سەرسوڕمانە ئەوانەی گەرمیانیان توشی ئەم نەهامەتیە کردووە و لەبەر دزی و گەندەڵی هۆشیان لای خۆیان و خەڵک نەماوە! تازە بەخەبەر دێنەوە و دەمی هەمبانە کۆنەکەیان کردووەتەوە، وەک ئەوەی پێشتر کفری لەسەر نەخشەی ناوچەکە نەبووبێت بۆیە هیچی بۆ نەکراوە!
لەبری ئەوەی خەمێ لەئازارەکانی خەڵکی ناوچەکە بخۆن و سنورێک بۆ ئەو پاشاگەردانیە دابنێن، کەچی باسی پارەی زبڵ و خاشاک و بەشە ناوخۆی دەکەن بێ ئەوەی باسی سەرچاوەی پارەکە بکەن! یان باسی شەڕی داعش و بەرگری لەناوچەکە دەکەن.
هەرچەندە ئەمە ئەرکێکی نیشتمانیە و ناکرێ بکرێتە منەت لەسەر خەڵکی سنورەکە، بەڵام دیارە خۆیان لە گێلی دەدەن و دەیانەوێ وەک کاری هەمیشەییان خەڵک چەواشە بکەن، ئەگینا ئێمە زیاتر لە پەنجا فەرماندە و پێشمەرگەمان لە بەرگری لە گەرمیان لەشەڕی تیرۆرستان لەم میحوەرە شەهید بووە.
ئێمە دەزانین لەشەرمه‌نده‌یان بەرامبەر خەڵکی بەشەرەفی کفری نازانن چی بکەن؟ بۆیە ناچار پەنا بۆ کۆمەڵێ ڕستەی حەماسی و دروشمی بریقەداری (بێ کردار) دەبەن! بەڵام دەبێت ئەو ڕاستیە بزانن سەردەم جیاوازە و خەڵک هۆشیارە و قسەی بێ ناوەڕۆک چیتر جێگە ناگرێت، چونکە خەڵک کار و خزمەتی ئەوێت، بۆیه‌ کەرەم بکەن کێ دەستی گرتوون؟ چی لەهەگبەکەتان دایە پێشکەشی بکەن، کە خزمەتانیش پێ ناکرێت کۆسپ لەبەردەم خزمەتکردن بە هاوڵاتیان دروست مەکەن! چونکە بەری ڕۆژ بە بێژنگ ناگیرێت!

عەلی عەونی: عەلی باپیر دەیەوێ نیزمێکی وەک تاڵیبان لە هەرێمی کوردستان حوکم بکات
‘خەڵک عەلی باپیر و حزبەکەی ناوێت ئێمە چی بکەین؟’

ئێوارەی دوێنێ عەلی باپیر سەرۆکی کۆمەڵی دادگەر هێرشێكی توندی بێ پاساوی كردە سەر حكوومەتی هەرێمی كوردستان، لەبەرامبەردا عەلی عەونی ئەندامی کۆمیتەی ناوەندی پارتی بە (بازمیدیا)ی راگەیاند؛ عەلی باپیر دادپەروەری لەوەدا دەبینێت کە بێتە ئێرە حوکمی دینداری تەتەروف و دوژمنکارانە لەسەر خەڵکەکەی بکات، ئەو پێی خۆشە و دەیەوێ نیزامێکی وەک تاڵیبان لێرە حوکم بکات، ئەگەر بەو جۆرە بێت بۆ ئەو نیزامەکە دادپەروەرییە، ئەگەرنا بێدادییە، جگە لەوەش بێدادی و زوڵم لەوە خراپتر نییە وێنەی کۆمەڵگای خۆت بشێوێنیت، کەسێک نەشارەزابێت وا دەزانێ لەم وڵاتە رۆژانە بە سەدان خەڵک وەک ئێران لەسێدارە دەدرێ، عەلی باپیر بۆ رەوشەکە بەخراپی پیشان دەدات؟، خەڵک ئاگای لەو ئیدعایە و دەردەی هەیە و گاڵتەیان بە قسەکانی دێت.

ئەندامەکەی کۆمیتەی ناوەندی پارتی گوتیشی؛ ‘دەڵێن مێرولەیەک کەوتبووە نێو پەرداخێک ئاو هاواری دەکرد ئاو دونیای برد’، پێیان گوت ئاو تۆی بردووە دونیای نەبردووە، بۆیە عەلی باپیر کە لە دەستەڵات دا نییە پێیوایە نادادپەروەرییە، خۆی بە هەموو جۆرێک تاقیکردەوە خەڵک عەلی باپیری ناوێ ئێمە چی بکەین؟، لایەق نییە سەرکردەی کۆمەڵ هەمیشە خەریکی ناڕاست نیشاندانی رەوشەکە بێت، دەبوو وەک خۆی دەڵێت لە رووی ئیمانیەوە زۆر گەشبینانە وێنەکەی نیشان بدایە، خوا دەفەرموێ(یسر ولا تعسر، بشر ولا تنفر)، ئەم پیاوە نەک یەک فەرموودەی خوا و پێغەمبەری جێبەجێ نەکردووە، بەڵکو هەمیشە نەفرەتی بڵاوکردووەتەوە.

لەبارەی ئەو زوڵمەی عەلی باپیر باسی دەکات، عەلی عەونی گوتیشی؛ هەر ئەوەندەی عەلی باپیر و هاوشێوەکانی دەتوانن قسە بکەن و بڵێن ئازادی نییە، دەربڕینی ئەم رستە خۆی بەدرۆخستنەوەی قسەی خۆیان، ئەوە نیشان دەدات راستگۆ نین، کاتێک دەتوانێ دژی حکومەتی هەرێم قسە بکات، واتا ئازادی و دیموکراسی هەیە و مافی مرۆڤ و ئازادی رادەربڕین هەیە، بەم رفتارانەی نیشانی دەدات لە خوا و پێغەمبەر دوورە.

د.محەمەد خورشید؛ “دەنگەکانی یەکێتی لە شەش کورسییەوە بۆ دوو کورسی دابەزیوە، ئەمەش وای کردووە بەپەرۆشبن بۆ هاوپەیمانێتی”

یەکێتی دەیەوێت سود لە لایەنەکانی دیکە بۆ زیادکردنی کورسییەکانی وەربگرێت

یاریدەدەری بەرپرسی مەکتەبی رێکخستنی کەرکووک گەرمیانی پارتی رای دەگەیەنێت، لەگەڵ لایەنەکانی لە گفتوگۆی بەردەوامدان، کۆتایی ئەم مانگە کۆتا وادەیە بۆ ئەنجامدانی هاوپەیمانێتی، تا بتوانین ئەنجامێکی باش بەدەست بهێنین.

د.محەمەد خورشید، یاریدەدەری بەرپرسی مەکتەبی رێکخستنی کەرکووک گەرمیانی پارتی بە (بازمیدیا)ی راگەیاند؛ لە پێش جەژنی قوربانەوە ئێمە لەگەڵ لایەنە کوردستانییەکان کە زیاد لە ١٢ لایەن بوون کۆبوونەوەمان کرد، هەروەها گفتوگۆی جدی لەسەر هاوپەیمانێتی کراوە، لەوانە کۆمەڵی دادگەری، بزوتنەوەی گۆران، حزبی شیوعی، سۆسیالیست، ئیسلامی عێراقی، هاوپەیمانی نیشتمانی، حزبەکانی دیکە، دانیشتن و کۆبوونەوەکان لەسەر ئەم بابەتە بەردەوام دەبێ، کار لەسەر دروستکردنی یەکڕیزی بۆ هەڵبژاردنی ئایندە لە ئەنجومەنی پارێزگای کەرکووک دەکەین، بۆ ئەوەی نزیکبونەوە لەنێوان لایەنەکان بە پلەی یەک هەبێت، کۆتایی ئەم مانگەش کاتی هاوپەیمانیەکانە، تا بتوانین ئەنجامێکی باش بێتە دەست بە شێوەیەکی باش هاوکاربین.

هاوکات بەرپرسەکەی پارتی باس لەوە دەکات، پێدەچێت دەرئەنجامەکانی هەڵبژاردنی ١٠/١٠/٢٠٢١ ترسی لای یەکێتی دروست کردبێت، هەرچەندە ئەوکاتە یەکێتی و گۆران بەیەکەوە یەک لیست لە کەرکووک دابەزین، بەڵام ژمارەی کورسیەکانی لە شەش کورسی بۆ دوو کورسی دابەزی و دواتر کەسیکی بێ لایەنیان کرد بە هی خۆیان و دەڵێن سێ کورسیمان هەیە، ژمارەی دەنگەکانیان لە ٧٥٪ی کورد بۆ ٤٠٪ی دەنگی کورد دابەزیوە، ئەمە بێگومان حساباتە لەلای ئەوان (یەکێتی) و رەنگە بیانەوێ لەگەڵ چەند لایەنێکی دیکە دابەزن، بۆ ئەوەی سود لە دەنگەکانی ئەوانی دی وەربگرن.

سەبارەت بە هاوپەیمانێتی کۆمەڵ و یەکێتی، د.محەمەد خورشید دەڵی؛ هەر لایەنێکی سیاسی بەشی خۆی دەنگی هەیە، بێگومان برایانمان لە کۆمەڵی دادگەر دەنگی خۆیان هەیە، بەڵام تا ئێسیا دەنگێکی وایان نەهێنانە کە لە ئەنجومەنی پارێزگا نوێنەرێکیان هەبێت، نە لە هەڵبژاردنەکانی ئەنجومەنی نوێنەرانی عێراق نوێنەریان نەبووە، واتا دەنگی کۆمەڵ ئەوەنەنیە لە کەرکووک.

لەبارەی هاوپەیمانی یەکێتی و پارتی بۆ هەڵبژاردنی ئەنجومەنی پارێزگای کەرکووک، پارتی هاوپەیمانی لەگەڵ دەکات؟، بەرپرسەکەی پارتی دەڵێ؛ سەرەڕای هەموو ئەو کێشانەی لەگەڵ ئەو لایەنە هەیە، بەڵام ئێمە بۆ ئایندەی هەڵبژاردنەکان پابەندی بریاری مەرکەزی خۆمانین، جا بڕیارەکە هەرچی بێت.

گووته‌بێژی پارتی دیموكراتی كوردستان ڕاگەیەندراوێکی لەبارەی قسەکانی بافڵ تاڵەبانی بڵاوکردەوە

دەقی ڕاگەیەندراوەکە:

لە کۆڕێکیدا لە دەرەوەی وڵات، دوێنی سه‌رۆكی یه‌كێتی نیشتمانی كوردستان، په‌یوەندییه‌كانی نێوان پارتیمان و حزبه‌كه‌ی به‌ خراپ له‌ قه‌ڵه‌م داوە و، هۆكاری خراپیه‌كه‌یشی خستووەته‌ ئه‌ستۆی پارتیمان وەكو ئه‌وەی ئێمه‌ی پارتی گرفت‌ و جیاوازیه‌كانمان یه‌كلایه‌نه‌ دروستكردبێ!… دیارە له‌ بیریان چۆته‌وە كه‌ له‌ زۆربه‌ی وێستگه‌كاندا سه‌رەڕای هاوبه‌شیان له‌ حوكمرانی كه‌چی له ‌لایه‌نه‌كانی ئۆپۆزسیۆن زیاتر كێشه‌ و گرفتیان دروستدەكرد بۆ كار و چالاكییه‌كانی حكومه‌ت.

لە قسەکانیدا باس له‌ كێشه‌كانی پارێزگای سلێمانی دەكات به‌بێ خستنەڕووی ڕاستیه‌كان و، باس لەوە ناکات کە حزبه‌كه‌ی هۆكاری سه‌رەكییه‌ و ڕێگربووە له‌ ئاوەدانكردنه‌وە و جێبه‌جێكردنی پڕۆژە خزمه‌تگوزارییه‌كان و تا دەگاته‌ بابه‌تی ئه‌منیەت و دەستبه‌سه‌رداگرتنی داهاتی ناوخۆی پارێزگاكه و تەواوی ئەو سنوورە، ئەوەیش ڕوونناکاتەوە کە حزبه‌كه‌ی بووەته‌ به‌دیلی حكومه‌ت و ناهێڵێ دامه‌زراوە شه‌رعییەکان ڕۆڵی خۆیان ببینن و، ناشڵێت ئه‌و هه‌موو ئیمكاناته‌ له‌ كوێ به‌دەستدەهێنن كه‌ له‌ جیاتی دامه‌زراوەكانی حکومەت پاره‌ سه‌رفبكه‌ن.
له‌لایه‌كی دیكه‌وە له‌بیری چۆته‌وە كه‌ چۆن دامه‌زراوەكانی حكومه‌تی فیدڕاڵی و دادگای فیدڕاڵی هێناوەته‌ ناو پرۆسه‌ی حوكمرانی هه‌رێم و چه‌ندە چارەسه‌ری كێشه‌كانی به‌و بابه‌ته‌ ئاڵۆزكردووە.

پارتی یه‌ك مه‌رجه‌عیه‌ت و یه‌ك هه‌ڵوێستی هه‌بووە و ئه‌وەی بڕیاری لێدەدرێت جێبه‌جێدەكرێت، ئه‌وە ئاواتی ئه‌وانه‌ هاوشێوەی خۆیان له‌ كوردستاندا په‌یدابكه‌ن، با دڵنیا بێت مه‌رجه‌عیه‌ت و یه‌ك هه‌ڵوێستی پارتی له‌ هیچ وێستگه‌یه‌ك نه‌گۆڕاوە و له‌مه‌ودواش ناگۆڕدرێت. ئه‌گه‌ر پارتی په‌یوەندی خۆی له‌گه‌ڵ حزبه‌كه‌ی ئه‌و له‌سه‌ر ئه‌ساسی قسه‌كردن و ته‌سریحاتی كادیر و سه‌ركردایه‌تییه‌كانیان ڕێكخستبووایە دەبوو هیچ كۆبوونه‌وەیه‌ك ئه‌نجام نه‌درابا،‌ به‌ڵام ئه‌گه‌ر ئیڕادەی ڕێككه‌وتن له‌ دەست خۆیاندا نه‌بوو بیانوو زۆرن بۆ تێكدانی زەمینه‌ی ته‌فاهوم و لێكنزیكبوونه‌وە.

خه‌ڵكی كوردستان ئاگاداردەكه‌ینه‌وە كه‌ پارتیمان جدیە لە چارەسەرکردنی کێشەکان و فەراهەمکردنی کەشێکی ئارام بۆ هاووڵاتیان و یەکڕیزی و پێشخستنی پرۆسەی سیاسی لە کوردستاندا، هەروەکو ئاشکرایشە باسكردنی كێشه‌ و جیاوازییه‌كان به‌و شێوازە و بردنیان بۆ دەرەوەی هه‌رێم ئاماژەیه‌كی نوێ نییه‌ بۆ به‌خه‌مه‌وەنه‌بوونی یه‌كڕیزی نێوماڵی كوردستانی.

گووته‌بێژی پارتی دیموكراتی كوردستان
١٣ـی ٧ـی٢٠٢٣

ڕۆژی پێنجشەممە ٦/٧ هێزێکی ئەمنی لەشاری سلێمانی لەسەر شەقام هاوڵاتیەکی سڤیل دەستگیر دەکەن بەناوی دکتۆر ئالان فریدون کە پیشەی مامۆستای زانکۆیەو پێشوتر سەرۆکی زانکۆی پۆلیتەکنیکی سلێمانی بوە و دواتر ئازادی دەکەن و بیانوی دەستگیرکردنەکەشی ئەوەبوە گوایە ناوبراو وێنەی کاروانی ئۆتومبیلی هێزێکی ئەمنی گرتووە.

ئێمه لەدەستەی سەربەخۆی مافەکانی مرۆڤ نیگەرانین لە دەستگیر کردنی ئەو ماموستایە. ئیدانەی شێوازی دەستگیرکردنەکەی دەکەین و لامان وایە دەچێتە چوارچێوەی ڕفاندن چونکە بەبێ فەرمانی دادوەر و ڕێکاری یاسایی بووە ، لای خۆمانەوە پشتگیری تەواوی ڕێکاری یاسایی دەکەین بەرامبەر هەر کەسێک کە لەسەر دۆسیەیەک داواکراو بێت، و پێویستە بەگوێرەی فەرمانی بەڕێز دادوەر مامەڵە لەگەڵ داواکراو بکرێت، نەوەک شێوازی هەڕەمەکی دەستگیرکردن و بردنی بۆ شوێن وبارەگای سەربازی ، چونکە ئەو جۆرە دەستگیرکردنە جێگەی پرسیارەو گومان دروست دەکات .

ئەوەش بەگشتی پرسیار دەخاتە سەر سەروەری یاسا و دەبێتە هۆی دروست بونی ترس و دڵە ڕاوکێ لای هاوڵاتیان و پێچەوانەی تەواوی بنەماکانی مافی مرۆڤە ، لە ئاستی نێودەوڵەتیش باش نابێت بۆ هەرێمی کوردستان و ناوبانگی هێزە ئەمنیەکان، بۆیە دووبارە بونەوەی ئەو حاڵەتانەش خزمەت بە پڕۆسەی دیموکراتی و ڕەوشی مافەکانی مرۆڤ لەهەرێم ناکات و نیگەرانی هەموو لایەکی لێکەوتۆتەوە.

ئێمە لە نزیکەوە چاودێری ئەو کەیسەمان کردوەو پێویستە هەرچی زووە ئەو هێزە ئەمنیەی بەو کارە هەڵساوە ڕونکردنەوە بۆ ڕای گشتی بدات و دۆسیەکەش بەپێی ڕێکارە یاساییەکان یەکلا بکرێتەوە.

دەستەی سەربەخۆی مافی مرۆڤ لەهەرێمی کوردستان.

٨/٧/٢٠٢٣

سەید ئەحمەد پێنجوێنی:

مامۆستایەکی ئاینی رای دەگەیەنێت، رەنگە ئێمە لە رووی پیشەسازی و مۆدێرنەوە لە پاشبین، ئەوەش بەهۆی نەبوونی دەوڵەت و چەوساندنەوەمان بووە بەدرێژای مێژوو، بەڵام خاوەنی کۆمەڵێک بەهای جوان و کلتور و خێزانین، ئێستا داگیرکەر دەیەوێ بۆ ئەجێندای بۆگەنی مل کەچ بکەین و بەهاجوانەکانمان لەبن هەڵکەنێت، دەستخۆشی لە سەرۆک وەزیران دەکەم کە رێگیری لەم هەنگاوەی داگیرکەران دەکات.

سەید ئەحمەد پێنجوێنی، وتارخوێن و مامۆستای ئاینی لەبارەی رەخنەکەی رێکخراوی هیومان رایتسۆچ کە باس لە رێگری حکومەتی هەرێمی کوردستان بۆ ئازادی هاوڕەگەزخوازی دەکات، بە (بازمیدیا) رایگەیاند: دەبێت دەستخۆشی لە حکومەتی هەرێمی کوردستان بکرێت، کاتێک دێتە سەنگەری میللەت رێز و قەدری بگرین، ئێمە وەک مامۆستایانی ئاینی و خواناس و دڵسۆزی ئەم میللەت و خاکە پیرۆزە دەبێ هەر کارێک حکومەت کردی و باش بوو پێی بڵێین چاکتکرد، بۆیە پشتیوانی ئەم هەنگاوەی حکومەت دەکەین.

سەید ئەحمەد پێنجوێنی دەڵێ؛ رێکخراوە ناحکومیەکان کە راستەوخۆ بەڕێز سەرۆکی حکومەت سەرپەرەشتی دەکات، لە رێگای دادگاوە هەوڵی باشی دا تا بەشێوەیەکی یاسایی ئەو زێران و شتە خراپانەی دوورن لە بەهای کۆمەڵگاوە دایان بخات، حەقوایە میللەتیش دەستخۆشیان لێ بکات، ئێمە کارێکی باش حکومەت یان حزب بیکات، دەست لەنێو دەستی دەنێین و پشتیوانی و دەستخۆشی لێ دەکەین

سەبارەت بە پەرەسەندنی هاوڕەگەزخوازی لە کوردستاندا، ئەم مامۆستا ئاینییە گوتیشی؛ ئەگەر بمانەوێ خێزان و کۆمەڵگاکەمان وەک میللەتێکی تێکەڵاو و پێکەوە ژیان بمێنێت، وەک چۆن هەزاران ساڵە بەهای باڵا و رەوشتی جوان و رێز لە زانست گیراوە و بووە بە دەستمایە و سەرمایە و ژێرخانی نەتەوە و نیشتمانەکەمان، نابێ مل بۆ ئەجێندای بۆگەنی داگیرکەر دابنەین، کە کۆمەڵگای خۆیان داڕوخاوە و هیچ بەهایەکی جوانی تێدانەماوە، دەبێت دەست بە بەهاکانمانەوە بگرین، حکومەتیش وەک پارێزەری میللەت دەبێت لە سەنگەری بەرگیردابێت و رێگری لە هەر حاڵەتێکی نامۆ بە کۆمەڵگاکەمان بگرێت، بەنموونە هاوڕەگەزخوازی کە داڕوخێنەری کۆمەڵگاکانە، ئێستا دەیانوێ کۆمەڵگای ئێمەش بەم دەردەوە بئاڵێنن.

مەریوان نەقشبەندی:

بەرپرسی کاروباری ئاینییەکان لە وەزارەتی ئەوقاف رای دەگەیەنێت، کە پشتگیری حکومەتی هەرێمی کوردستان دەکەم، کە رێگری لە حاڵەتی نامۆی وەک (هاوڕەگەز خوازی) بکات، چونکە ئەم کارە بۆ پاراستنی خێزانی کوردی و کوردستانیان و کلتوری کۆمەڵگەیە.

دوای ئەوەی رێکخراوی هیومان رایتسۆچ راپۆرتێکی بڵاوکردەوە و تێیدا رەخنەی لە حکومەتی هەرێمی کوردستان گرتووە کە رێگری لە هاوڕەگەزخوازی دەکات، لەمبارەیەوە مەریوان نەقشبەندی، بەرپرسی کاروباری ئاینییەکان لە وەزارەتی ئەوقاف بە (بازمیدیا)ی راگەیاند، هاوڕەگەزخوازی لە هەرێمی کوردستان جێگای نابێتەوە، ئەگەر بەڕاستی حکومەتی هەرێمی کوردستان رێگری لە پەرەسەندنی هاوڕەگەزخوازی کردبێت، ئەوە بەڕاستی شایەنی رێزلێگرتنە و جێگای دەستخۆشییە.

بەرپرسی کاروباری ئاینییەکان دەڵێ”رێگری حکومەت لە تەشەنەسەندنی هاوڕەگەزخوازی لە خەمخۆریەتی بۆ پاراستنی خێزانی کوردی و کوردستانیان، هەروەها ئاشتی کۆمەڵایەتی و پاراستنی کلتوری کۆمەڵگاکەمان، بۆیە بەتەواوەتی لەم رووەوە پشتگیری حکومەتی هەرێمی کوردستان دەکەم، کە رێگری لە هەر حاڵەتێکی نامۆ بە کۆمەڵگاکەمان بکات”.

مەریوان نەقشبەندی رەخنەکەی هیومان رایتسۆچ بە بێبنەما ناودەبات و دەڵێ “ئەو جۆرە رەخنانە ئەگەر لە حکومەتی هەرێم، یان هەندێک ناوەند و حزبی کوردستانی بێت، بەراستی رەخنەیەکی بێ بنەمایە و دەستێوەردانە لە سەروەری هەر کۆمەڵگایەک، کە خۆی شێوازی کاری خۆی هەڵبژێرێت”.